តំណាងសហគមន៍ការពារព្រៃឈើឃុំឃ្សឹម ស្រុកស្នួល លោកស្រី មុំ សុគីម និងលោក សន ស៊ីយាន កំពុងភ័យខ្លាច និងមកលាក់ខ្លួននៅទីក្រុងភ្នំពេញ គេចពីការគំរាមសម្លាប់ដោយឈ្មួញព្រៃឈើខេត្តក្រចេះ តាមរយៈការបោះពាក្យសម្ដី និងគំរាមតាមទូរស័ព្ទ។
លោកស្រី មុំ សុគីម បានឲ្យដឹងនៅថ្ងៃច័ន្ទ ទី៨ ខែមេសា ថា សហគមន៍ឃុំឃ្សឹម មានគ្នាជិត ១០០នាក់ មកពីឃុំចំនួន ៥ នៅស្រុកស្នួល បានប្រមូលផ្តុំគ្នាចូលព្រៃនៅថ្ងៃទី១៥ ខែមីនា និងបញ្ចប់នៅថ្ងៃទី៥ ខែមេសា ដោយចាប់បានម៉ាស៊ីនអារឈើជាង ២០គ្រឿង ត្រាក់ទ័រ ១គ្រឿង និងដុតបំផ្លាញឈើប្រណិតប្រភេទធ្នង់ជិត ១០ម៉ែត្រគូប។
លោកស្រីឲ្យដឹងថា ព្រៃឈើដែលមានសេសសល់តិចតួចនៅខេត្តក្រចេះ នឹងត្រូវវិនាសហិនហោចក្នុងរយៈពេលខ្លីខាងមុខ ព្រោះអាជ្ញាធរមូលដ្ឋានគ្មានវិធានការទប់ស្កាត់ទេ៖ «វិនាសកម្មព្រៃឈើនៅចំណុចឃុំឃ្សឹម ទាំងព្រៃសហគមន៍អភិរក្សការពារធនធានធម្មជាតិនៅដែនជម្រកសត្វព្រៃស្នួលហ្នឹងក៏អស់រលីង ដែលលោកឯកឧត្ដម ម៉ុក ម៉ារ៉េត ប្រគល់ឲ្យចំនួន ២.៤៥៩ហិកតារហ្នឹង គឺអត់មានសល់ ១ដើមទេ ត្រូវបានបំផ្លាញដោយអ្នកមានអំណាច និងអ្នកចំណូលថ្មី ហើយម៉ាស៊ីនអារឈើធ្វើសកម្មភាពទាំងយប់ទាំងថ្ងៃ ពិសេសអារនៅពេលយប់»។
លោកស្រីឲ្យដឹងថា សម្ភារៈព្រៃឈើដែលរឹបអូសបានពីជនល្មើស សហគមន៍បានប្រគល់ជូនរដ្ឋបាលព្រៃឈើឃុំឃ្សឹម ទុកជាវត្ថុតាង និងមានវិធានការបន្ត។
ចំណែកលោក សន ស៊ីយាន តំណាងសហគមន៍ព្រៃឈើឃុំឃ្សឹម ម្នាក់ទៀត បានស្នើឲ្យរដ្ឋាភិបាល ឬលោកនាយករដ្ឋមន្ត្រី ហ៊ុន សែន ជួយទប់ស្កាត់វិនាសកម្មព្រៃឈើកំពុងធ្វើសកម្មភាពនៅដែនជម្រកអភិរក្សសត្វស្រុកស្នួល ជាបន្ទាន់។
តំណាងសហគមន៍ព្រៃឈើឃុំឃ្សឹម បានចោទខេត្តក្រចេះ ថា ទំនងជាអាចជាប់ពាក់ព័ន្ធ ឬនៅពីក្រោយបទល្មើសព្រៃឈើ ទើបគ្មានវិធានការទប់ស្កាត់ឲ្យមានប្រសិទ្ធភាព៖ «មានគេគំរាម គេទូរស័ព្ទមកខ្ញុំថា មូលហេតុអីបានដុតឈើគេ? ខ្ញុំឆ្លើយថា កម្លាំងសមូហភាពគេសម្រេចថាដុតចោល បើមិនដុតទេបទល្មើសនៅតែមាន។ បួនដប់ម្ភៃឆ្នាំហើយរកស៊ីតែបទល្មើសព្រៃឈើប្រណិតៗហ្នឹង។ នរណាគេទូរស័ព្ទគំរាមហ្នឹង? គឺឈ្មោះ យ៉ាន់ ហៀង អធិការប៉ូលិសស្រុកចិត្តបុរី»។
ទាក់ទិនបញ្ហានេះ លោក ឈឹម សាវុធ មន្ត្រីស៊ើបអង្កេតជាន់ខ្ពស់មជ្ឈមណ្ឌលសិទ្ធិមនុស្សកម្ពុជា ដែលបានចូលព្រៃពិនិត្យបទល្មើសព្រៃឈើជាមួយសហគមន៍ការពារព្រៃឈើ នៅស្រុកស្នួល ខេត្តក្រចេះ មានប្រសាសន៍ថា ព្រៃឈើមានសេសសល់តិចតួចនាខេត្តក្រចេះ ជិតវិនាសអស់ហើយ ព្រោះអាជ្ញាធរមិនបានទប់ស្កាត់ទេ៖ «ព្រៃឈើនៅដែនជម្រកសត្វស្នួលបច្ចុប្បន្នស្ទើរតែអស់ទៅហើយ នៅសល់ប្រមាណពី ២០ ទៅ ៣០ភាគរយទេ។ អ្នកប្រព្រឹត្តសុទ្ធសឹងតែជាមន្ត្រី ជាកម្លាំងប្រដាប់អាវុធ ជាឈ្មួញធំៗ និងពលរដ្ឋចំណាកស្រុកមួយចំនួន គឺកំពុងកាប់បំផ្លាញយ៉ាងអនាធិបតេយ្យ។ និយាយទៅគឺកាប់បំផ្លាញយ៉ាងរង្គាល និងគ្មានកម្លាំងសមត្ថកិច្ចណាទៅបង្ក្រាបទេ មានតែកម្លាំងសមត្ថកិច្ចដាក់ប៉ុស្តិ៍យកលុយពីឈ្មួញល្មើស»។
លោក ឈឹម សាវុធ បន្តថា បច្ចុប្បន្នមជ្ឈមណ្ឌលសិទ្ធិមនុស្សកំពុងត្រៀមឯកសារ ឬវត្ថុតាងនៃបទល្មើសព្រៃឈើនៅស្រុកស្នួល ដាក់ជូនក្រសួងស្ថាប័នពាក់ព័ន្ធ ពិសេសខុទ្ទកាល័យលោកនាយករដ្ឋមន្ត្រី ហ៊ុន សែន ជួយមានវិធានការ និងចុះស៊ើបអង្កេតអ្នកនៅពីក្រោយបទល្មើស។
មន្ត្រីសង្កាត់រដ្ឋបាលព្រៃឈើឃ្សឹម លោក មុនី បានបដិសេធមិនផ្តល់អត្ថាធិប្បាយទេជុំវិញបទល្មើសព្រៃឈើនៅឃុំឃ្សឹម ស្រុកស្នួល ខេត្តក្រចេះ នៅគ្រាលោក ជួង ស៊ាងហាក់ ស្នងការនគរបាលខេត្តក្រចេះ មិនលើកទូរស័ព្ទ។
លោកនាយករដ្ឋមន្ត្រី ហ៊ុន សែន នៅក្នុងអាណត្តិទី៤ នៃរដ្ឋសភា បានប្រកាសដាក់ចេញនូវបទបញ្ជាលុបបំបាត់បទល្មើសព្រៃឈើឲ្យមន្ត្រីពាក់ព័ន្ធតាមខេត្ត ក្រុង នីមួយៗ អនុវត្តឲ្យបានជាស្ថាពរ ប៉ុន្តែគេសង្កេតឃើញថា បទបញ្ជានេះ មន្ត្រីក្រោមឱវាទអនុវត្តមិនទាន់មានប្រសិទ្ធភាពទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។