សហគមន៍​នេសាទ​ខេត្ត​បាត់ដំបង​រិះគន់​អាជ្ញាធរ​ថា​មិន​ទប់ស្កាត់​បទល្មើស​នេសាទ

0:00 / 0:00

សហគមន៍​នេសាទ​នៅ​ស្រុក​ឯកភ្នំ ខេត្ត​បាត់ដំបង កំពុង​ព្រួយ​បារម្ភ​ជា​ខ្លាំង​ខ្លាច​ក្រែង​ហិនហោច​អស់​ត្រី​ពី​តំបន់​ព្រៃ​លិច​ទឹក ដែល​ជាប់​បឹង​ទន្លេសាប​នៅ​ក្នុង​ខេត្ត​នេះ។ ពលរដ្ឋ​ប្រទះ​ឃើញ​មាន​បទល្មើស​នេសាទ​ទ្រង់ទ្រាយ​ធំ​ជាច្រើន​កន្លែង​នៅ​តំបន់​ព្រៃ​លិច​ទឹក​នោះ ដោយ​ពុំ​មាន​សមត្ថកិច្ច​ណា​ទប់ស្កាត់​ឲ្យ​មាន​ប្រសិទ្ធភាព​នៅ​ឡើយ​ទេ។

អនុប្រធាន​សហគមន៍​នេសាទ​ស្ដី​ក្រោម​រហាល​សួង ឃុំ​ព្រែកហ្លួង ស្រុក​ឯកភ្នំ លោក ហោ សំអាត មាន​ប្រសាសន៍​នៅ​ថ្ងៃ​ទី​២៣ វិច្ឆិកា ថា អ្នក​មាន​ទ្រព្យ​ធន​យក​ប្រជាពលរដ្ឋ​ធ្វើ​ជា​របាំង​ការពារ នាំ​គ្នា​ប្រព្រឹត្ត​បទល្មើស​នេសាទ ដោយ​ប្រើ​ឧបករណ៍​បរ​ណរ៉ាវ​រាប់​ពាន់​ម៉ែត្រ ដាក់​ចាប់​ត្រី​នៅ​តំបន់​ព្រៃ​លិច​ទឹក​នៃ​ស្ទឹង​នន់ ក្នុង​ឃុំ​ព្រៃចាស់ ស្រុក​ឯកភ្នំ យ៉ាង​គគ្រឹកគគ្រេង។

លោក​អះអាង​ថា បទល្មើស​នេសាទ​ទាំងអស់​នេះ​បាន​រាំង​ខ្ទប់​ត្រី​ទាំង​តូច​ទាំង​ធំ មិន​អាច​ចូល​មក​ដល់​ស្ទឹង​សង្កែ ដើម្បី​ឲ្យ​ប្រជាពលរដ្ឋ​ធ្វើ​នេសាទ​ជា​លក្ខណៈ​គ្រួសារ​បាន​ឡើយ។ លោក​បន្ថែម​ថា សមត្ថកិច្ច​ពាក់ព័ន្ធ ជាពិសេស​មន្ត្រី​ខណ្ឌ​រដ្ឋបាល​ជលផល​ខេត្ត​បាត់ដំបង បាន​ចុះ​ទៅ​ដល់​ទីកន្លែង​ធ្វើ​នេសាទ​នោះ​ខ្លះ​ដែរ ក៏ប៉ុន្តែ​ពុំ​បាន​បង្ក្រាប​ឲ្យ​មាន​ប្រសិទ្ធភាព​នោះ​ឡើយ៖ « ខ្ញុំ​និយាយ​ជាក់ស្ដែង ខ្ញុំ​អត់​ចង់​ទៅ​ប្រជុំ​ជាមួយ​មន្ត្រី​ផ្សេងៗ​ទៀត​ទេ ព្រោះ​ទៅ​ប្រជុំ​យើង​លើក​បញ្ហា​ទៅ​អត់​មាន​ដំណោះស្រាយ ឲ្យ​អត់​មាន​ការ​ឆ្លើយតប​អី​ជាក់លាក់​ទេ។ បញ្ហា​នេះ​ធ្វើ​ឲ្យ​បទល្មើស​ចេះ​តែ​កើត​ឡើង ដោយសារ​អ្នក​ប្រព្រឹត្តិ​អត់​មាន​ការ​ផ្ដន្ទាទោស​អនុវត្ត​ច្បាប់ »

ឆ្លើយតប​នឹង​បញ្ហា​នេះ នាយ​ខណ្ឌ​រដ្ឋបាល​ជលផល​ខេត្ត​បាត់ដំបង លោក ជួង សុភាព អះអាង​ថា កន្លង​ទៅ លោក​បាន​នាំ​កម្លាំង​សមត្ថកិច្ច​ទៅ​បង្ក្រាប​បទល្មើស​នេសាទ​នៅ​តំបន់​ព្រៃ​លិច​ទឹក ស្រុក​ឯកភ្នំ ជា​ប្រចាំ ដោយ​ពុំ​បាន​បន្ធូរ​ដៃ ឬ​អនុគ្រោះ​ឲ្យ​ជន​ណា​ម្នាក់​ធ្វើ​នេសាទ​ដោយ​សេរី​ឡើយ។ លោក​បន្ថែម​ថា នៅ​ថ្ងៃ​ទី​២៥ វិច្ឆិកា ខាង​មុខ​នេះ លោក​នឹង​ចុះ​ទៅ​បង្ក្រាប​ម្ដង​ទៀត៖ « បាទ ! អ្នក​ថា​ចេះ​តែ​ថា​ទេ នេះ​ខ្ញុំ​ជូន​គាត់​ចុះ​បង្ក្រាប​រហូត​ដល់​ទៅ ៤​ថ្ងៃ​ឯណោះ ប៉ុន្តែ​យើង​ចុះ​តាម​ចំណុច​ដែល​សហគមន៍​សំណូមពរ ដូចជា​នៅ​ឡូ​លេខ​៦ គឺ​អត់​មាន​តែ​ម្ដង ហើយ​នៅ​ខាង​ឡូ​លេខ​៨ យើង​ទើប​តែ​ជួប​មួយ ឬ ២​ករណី​ទេ ហើយ​គាត់​ក៏​សំណូមពរ​ពន្យារ​ពេល​មួយ​រយៈ ហើយ​ក៏​បាន​ឯកភាព​គ្នា​រុះរើ​អស់​ជាច្រើន​ករណី​មក​ហើយ​ដែរ »

ទោះ​ជា​យ៉ាង​នេះ​ក្ដី ប្រជា​សហគមន៍​នេសាទ​ហាក់​គ្មាន​ជំនឿ​នឹង​វិធានការ​បង្ក្រាប​របស់​សមត្ថកិច្ច​នោះ​ទេ។ លោក​អះអាង​ថា ជាទូទៅ​នៅ​ពេល​ដែល​សមត្ថកិច្ច​ទៅ​ដល់​ទីតាំង​បង្ក្រាប គឺ​ក្រុម​អ្នក​ធ្វើ​នេសាទ​បាន​ដឹង​ជា​មុន ហើយ​បាន​យក​ឧបករណ៍​ធ្វើ​នេសាទ​របស់​ខ្លួន​ពន្លិច​ក្នុង​ទឹក គឺ​ហាក់​ត្រូវរ៉ូវ​គ្នា​ជាមួយ​សមត្ថកិច្ច។

ចំណែក​មន្ត្រី​សម្របសម្រួល​សមាគម​ការពារ​សិទ្ធិ​មនុស្ស​អាដហុក (ADHOC) ខេត្ត​បាត់ដំបង លោក យិន ម៉េងលី កត់​សម្គាល់​ថា បទល្មើស​នេសាទ​នៅ​តំបន់​ព្រៃ​លិច​ទឹក​ស្រុក​ឯកភ្នំ កើន​ឡើង​កាន់​តែ​ខ្លាំង​ជា​រៀង​រាល់​ឆ្នាំ។ លោក​សង្កត់​ធ្ងន់​ទៀត​ថា បទល្មើស​នេសាទ​កើត​ឡើង​ច្រើន គឺ​បណ្ដាល​មក​ពី​ខ្វះ​ការ​យក​ចិត្ត​ទុក​ដាក់​ពី​សំណាក់​សមត្ថកិច្ច​ពាក់ព័ន្ធ​នៅ​ក្នុង​ខេត្ត​នេះ៖ « អ៊ីចឹង​កុំ​ឲ្យ​ទម្លាក់​បញ្ហា​ទៅ​លើ​សហគមន៍។ បញ្ហា​គឺ​លើ​មន្ត្រី រួម​ទាំង​អាជ្ញាធរ​នៅ​ទីនោះ​ឯង។ បើ​សិន​ជា​ខ្លួន​មិន​អាច​បង្ក្រាប​បាន ហើយ​វា​កើត​នៅ​ក្នុង​ទឹកដី​របស់​ខ្លួន ប្រសិន​បើ​ជា​បទល្មើស​ផ្សេង​ទៅ​វិញ តើ​ខ្លួន​ថា​យ៉ាង​ម៉េច​ទៅ ? អ៊ីចឹង​ខ្លួន​មិន​ត្រូវ​ឆ្លើយ​ដោះសា​បាន​ទេ ការ​ទទួល​ខុស​ត្រូវ អ្នក​នោះ​ត្រូវ​ទទួល​ខុស​ត្រូវ​ចំពោះ​ច្បាប់ »

សហគមន៍​នេសាទ​លើក​ឡើង​ថា ប្រសិន​បើ​សមត្ថកិច្ច​ពាក់ព័ន្ធ​មិន​ទប់ស្កាត់​ការ​ធ្វើ​នេសាទ​ខុស​ច្បាប់​ឲ្យ​មាន​ប្រសិទ្ធភាព​ទេ គឺ​មិន​យូរ​ឡើយ ត្រី​ទាំង​តូច​ធំ​នៅ​តំបន់​បឹង​ទន្លេសាប នឹង​ហិនហោច​អស់​ជា​ពុំ​ខាន៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។