ជនជាតិដើមភាគតិចរស់នៅឃុំសំអាង ស្រុកថាឡាបរិវ៉ាត់ ខែត្រស្ទឹងត្រែង អះអាងថា ព្រៃសហគមន៍ភ្នំជម្រកសត្វ ត្រូវឈ្មួញសម្រុកកាប់ទន្ទ្រានយកដីធ្វើអាជីវកម្មអស់ជាង ១០០ហិកតារថ្មីទៀតនៅប៉ុន្មានខែចុងក្រោយនេះ។ អ្នកភូមិចោទប្រកាន់ថា អាជ្ញាធរមូលដ្ឋាន មន្ត្រីរដ្ឋបាលព្រៃឈើ និងប្រធានសហគមន៍ គ្មានឆន្ទៈទប់ស្កាត់បទល្មើសព្រៃឈើនោះទេ បើទោះបីជាអ្នកភូមិបានរាយការណ៍ករណីនេះជាច្រើនសាក្តី។
ជនជាតិដើមភាគតិចកួយ សម្ដែងការខកចិត្តចំពោះភាពព្រងើយកន្តើយរបស់អាជ្ញាធរឃុំ និងមន្ត្រីរដ្ឋបាលព្រៃឈើ ថាមិនបានយកចិត្តទុកដាក់ទប់ស្កាត់បទល្មើសព្រៃឈើ។ ពួកគេថា មន្ត្រីរដ្ឋបាលព្រៃឈើ និងសមត្ថកិច្ច មិនបានបំពេញតួនាទីការពារសម្បត្តិធម្មជាតិ និងអនុវត្តគោលការណ៍ណែនាំរបស់ប្រមុខរដ្ឋាភិបាលនោះទេ ឃើញតែដាក់កុងត្រូលចាំស្ទាក់ទារប្រាក់ពីអ្នកដឹកឈើតាមផ្លូវ។
ជនជាតិដើមភាគតិចរស់នៅភូមិឆ្វាំង ឃុំសំអាង ស្រុកថាឡាបរិវ៉ាត់ ខែត្រស្ទឹងត្រែង លោក អ៊ុក ម៉ៅ អះអាងថា ឈ្មួញបានបន្តកាប់ឈើមានតម្លៃពីព្រៃសហគមន៍ និងកាប់ព្រៃរានយកដីអស់ជាង ១០០ហិកតារថ្មីទៀត ឋិតនៅចំណុចភ្នំធំ អូរឆ្កូត ត្រពាំងព្រៃ និងអូរកោងកាង។ សកម្មភាពកាប់ទន្ទ្រាននោះ ភាគច្រើនជាពលរដ្ឋចំណាកស្រុក បានជួលកម្មករសម្រុកកាប់ទន្ទ្រានដី និងឈើមានតម្លៃ និងបានបោះតង់ស្នាក់នៅក្នុងព្រៃជាង ១០តង់ក្នុងព្រៃសហគមន៍។
លោកថា ពលរដ្ឋចំណាកស្រុកបានទិញដីពីឈ្មួញនៅមូលដ្ឋាន ឈ្មោះ ភឿក ស៊ី ឈ្មោះ វណ្ណា និងឈ្មោះ ភាព និងបានបាញ់ថ្នាំសម្គាល់កំណត់ព្រំដី ដើម្បីគ្រប់គ្រងច្រើនខែមកហើយ នៅតែពុំឃើញមន្ត្រីរដ្ឋាភិបាលចេញមុខទប់ស្កាត់៖ « អ្នកកាប់នោះភាគច្រើនមកពីខែត្រកំពង់ចាម ខែត្រត្បូងឃ្មុំ ចំណាកស្រុក ។ អ្នកខ្លះ គ្រាន់តែ ដើរបាញ់ថ្នាំ ចឹងទៅ ដើរចង្អុលដីខ្ញុំត្រឹមនេះ ត្រឹមនោះ វាស់លក់ឲ្យគេម៉ង »។
លោក អ៊ុក ម៉ៅ សង្កេតឃើញថា ព្រៃសហគមន៍ និងដីត្រៀមបម្រុងសង្គមកិច្ចរបស់រដ្ឋបាលឃុំសំអាង ត្រូវបានគេកាប់អស់ជិត ៣ពាន់ហិកតារនៅចំណុចអូរកោងកាង រហូតដល់ភ្នំធំ។ លោកថា នៅថ្ងៃទី៣ មករា គោយន្តពីរគ្រឿងបានដឹកប្រេងផ្គត់ផ្គង់ម៉ាស៊ីនអារឈើស្វ័យប្រវត្តិ ឬត្រង់ស៊ឺន័រ ដែលកំពុងប្រតិបត្តិការកាប់ទន្ទ្រានដីព្រៃសហគមន៍។ លោកស្ដីបន្ទោសគណៈកម្មការសហគមន៍ និងអាជ្ញាធររដ្ឋាភិបាល មិនយកចិត្តទុកដាក់ការពារព្រៃឈើទេ ថែមទាំងបណ្តោយឲ្យសកម្មភាពទន្ទ្រានដីព្រៃសហគមន៍កាន់តែរីកធំឡើង៖ « មួយជួរអូរតាលាស់ ដីសហគមន៍គេកាប់ជិតអស់ហើយ ប្រហែលជាអស់ខែប្រាំងនេះហើយ »។
ឆ្លើយតបការចោទប្រកាន់នេះ ប្រធានសហគមន៍ភ្នំជម្រកសត្វ លោក ញៀន ផុន ទទួលស្គាល់ថា ពិតជាមានការកាប់ទន្ទ្រានដីព្រៃសហគមន៍ តែលោកពុំប្រាកដថា មានទំហំប៉ុនណានោះទេ។ លោកបញ្ជាក់ថា គណៈកម្មការសហគមន៍ពុំមានសិទ្ធិអំណាចចាប់ម៉ាស៊ីនអារឈើអនុវត្តច្បាប់ទេ បានត្រឹមរាយការណ៍ទៅមន្ត្រីរដ្ឋបាលព្រៃ ក៏ប៉ុន្តែនៅគ្រាដែលសហគមន៍ប្រទះឃើញបទល្មើសព្រៃឈើ ហើយរាយការណ៍ករណីនេះទៅមន្ត្រីរដ្ឋបាលព្រៃឈើ ពុំមានលទ្ធផល។ លោកថា នៅពេលដែលក្រុមល្បាតរបស់សហគមន៍ចុះអន្តរាគមន៍ទប់ស្កាត់ ក្រុមជនល្មើសបានរត់គេចខ្លួន៖ « ខ្ញុំ ទទួលស្គាល់ ហើយ តែខ្ញុំរាយការណ៍ទៅ គេមិន ចុះមក ធ្វើម៉េច ? ខ្ញុំអត់ចេះធ្វើ សំណុំរឿង បែបបទជូនតុលាការទេ »។
អាស៊ីសេរី មិនអាចទាក់ទងនាយផ្នែករដ្ឋបាលព្រៃឈើស្រុកថាឡាបរិវ៉ាត់ លោក វ៉ា សុខា និងមេឃុំសំអាង លោក ញៀន ផន ដើម្បីសុំការបំភ្លឺបញ្ហានេះបានទេនៅថ្ងៃទី៤ មករា ព្រោះទូរស័ព្ទមិនអាចទាក់ទងបាន។
ប្រធានរដ្ឋបាលសាលាស្រុកថាឡាបរិវ៉ាត់ លោក ថៃ អ៊ី មានប្រសាសន៍ថា អាជ្ញាធរស្រុកពុំទាន់ទទួលព័ត៌មានករណីនេះនៅឡើយទេ ក៏ប៉ុន្តែអាជ្ញាធរស្រុកនឹងស្រាវជ្រាវបញ្ហានេះ។ លោកបញ្ជាក់ថា អាជ្ញាធរស្រុកនឹងចាត់ឲ្យអភិបាលរងស្រុកម្នាក់ ចុះទៅពិនិត្យជាក់ស្តែងបញ្ហានេះ និងប្រមូលព័ត៌មានករណីនេះនៅគ្រាទទួលដំណឹងនេះ៖ « យើងនឹងរាយការណ៍ ជូនទៅ លោកអភិបាលសួរ ទៅឃុំ ឡើងវិញ ថាតើមានករណីហ្នឹងអត់ »។
ព្រៃសហគមន៍ភ្នំជម្រកសត្វ ឋិតនៅភូមិឆ្វាំង ឃុំសំអាង ស្រុកថាឡាបរិវ៉ាត់ មានផ្ទៃដីចំនួនជាង ៤ពាន់ហិកតារ (៤.៤៤៦,១៦ហិកតារ) ត្រូវបានអាជ្ញាធរខែត្រស្ទឹងត្រែង ទទួលស្គាល់ជាផ្លូវការនៅដើមឆ្នាំ២០១៥។ សហគមន៍បានស្នើសុំបន្តទៀតទៅក្រសួងបរិស្ថាន ដើម្បីចុះបញ្ជីព្រៃសហគមន៍ភ្នំជម្រកសត្វ ជាដីព្រៃសមូហភាព តែមិនទាន់មានការឆ្លើយតប។
ជនជាតិដើមភាគតិចកួយ រស់នៅឃុំស្រែឫស្សី ស្រុកថាឡាបរិវ៉ាត់ លោក ថាន់ វ៉ន អះអាងដែរថា ព្រៃសហគមន៍ឃុំស្រែឫស្សី ក៏រងការកាប់រានយកដីធ្វើអាជីវកម្មអស់ជាងពាក់កណ្ដាលដែរ ជាពិសេសគឺឈ្មួញសម្រុកកាប់ឈើមានតម្លៃនៅរយៈពេល ៦ខែកន្លងមកនេះ។ លោកអះអាងថា មេភូមិ និងមេឃុំ មិនត្រឹមតែមិនអើពើគាំពារធនធានធម្មជាតិនោះទេ ប៉ុន្តែថែមទាំងជួយអន្តរាគមន៍ឲ្យជនល្មើសរត់គេចខ្លួន និងប្រគល់វត្ថុតាងឲ្យជនល្មើសវិញ នៅគ្រាដែលសហគមន៍រឹបអូសបាន។ លោកថា បទបញ្ជាប្រមុខរដ្ឋាភិបាលមិនត្រូវបានអាជ្ញាធរថ្នាក់ក្រោមជាតិអនុវត្តឲ្យមានប្រសិទ្ធភាព ដើម្បីឲ្យពលរដ្ឋមានទំនុកចិត្តនោះទេ៖ « បើខ្ញុំគិតៗទៅ ច្បាប់ជាតិ រាល់ថ្ងៃ គឺមានតែក្នុងក្រដាស។ មន្ត្រីរាជការគ្រប់ជាន់ថ្នាក់អត់គោរពច្បាប់ផង »។
មន្ត្រីសម្របសម្រួលសមាគមអាដហុក (ADHOC) ខែត្រស្ទឹងត្រែង លោក ហូ សំអុល ឲ្យដឹងថា សមាគមអាដហុក បានទទួលព័ត៌មានករណីនេះដែរ។ លោកថា បើទោះបីជាសកម្មភាពកាប់ទន្ទ្រានដីព្រៃសហគមន៍រានយកដីបែបអនាធិបតេយ្យអស់រាប់ពាន់ហិកតារក្តី ក៏ពុំឃើញមន្ត្រីរដ្ឋាភិបាលចេញមុខចាប់ខ្លួនជនល្មើស និងអ្នកពាក់ព័ន្ធអនុវត្តច្បាប់។ បញ្ហានេះ ពលរដ្ឋកាន់តែអស់ជំនឿលើការអនុវត្តច្បាប់របស់អាជ្ញាធរពាក់ព័ន្ធ៖ « ករណីដីព្រៃមុននឹងស៊ើបទៅ បើប៉ះខ្សែបក្ស ( គណបក្សប្រជាជន ) មិនសូវមាន បញ្ហាទេ ហើយជាពិសេស គឺមាន ខ្នងក្នុង ថ្នាក់ដឹកនាំ ស្រុកទៀត »។
ស្ថាបនិកបណ្ដាញព្រះសង្ឃឯករាជ្យដើម្បីយុត្តិធម៌សង្គម ព្រះតេជព្រះគុណ ប៊ុត ប៊ុនតិញ សម្ដែងក្តីអស់សង្ឃឹមចំពោះការប្ដេជ្ញាចិត្តរបស់គណៈកម្មការទប់ស្កាត់ និងបង្ក្រាបបទល្មើសព្រៃឈើ ជាពិសេសគឺសារាចរស្ដីពីវិធានការគ្រប់គ្រងធនធានធម្មជាតិរបស់រាជរដ្ឋាភិបាល គឺពុំមានប្រសិទ្ធភាពទេ ខណៈជនល្មើសនៅតែបន្តសម្រុកកាប់ព្រៃឈើដដែល។ ព្រះតេជព្រះគុណមើលឃើញថា រដ្ឋាភិបាល និងមន្ត្រីរដ្ឋាភិបាលហាក់ដូចជាអសមត្ថភាពក្នុងការការពារព្រៃអភិរក្ស និងព្រៃសហគមន៍ដែលត្រូវការពារដោយច្បាប់។ ព្រះតេជព្រះគុណសម្ដែងការសោកស្ដាយចំពោះប្រមុខរដ្ឋាភិបាល ដែលបានចំណាយធនធានរបស់រដ្ឋទៅបំពាក់គ្រឿងឥស្សរិយយសដល់មនុស្សយ៉ាងច្រើនស្ដីពីការពារព្រៃកាលពីខែធ្នូ ឆ្នាំ២០១៦ ក៏ប៉ុន្តែព្រៃឈើនៅតែរងការកាប់ដដែល មានន័យថា ព្រៃឈើបាត់បង់ ធនធានរបស់រដ្ឋក៏ខាតបង់៖ « ព្រះសង្ឃការពារព្រៃក៏ទទួលបានគ្រឿងឥស្សរិយយស ក៏ប៉ុន្តែយើងបានចំណាយធនធានចំណាយទ្រព្យសម្បត្តិរបស់រដ្ឋបំពាក់គ្រឿង ឥស្សរិយយសដល់មនុស្សដ៏ច្រើនស្ដីពីការពារព្រៃ ហេតុអីបានបំពាក់គ្រឿងឥស្សរិយយស ព្រៃក៏ អស់ លុយ ក៏អស់ អាត្មា មានការ សោកស្ដាយណាស់ »។
កាលពីថ្ងៃទី២២ ខែកញ្ញា រាជរដ្ឋាភិបាលបានចេញសារាចរស្ដីពីវិធានការគ្រប់គ្រងធនធានធម្មជាតិ ក្នុងនោះរាជរដ្ឋាភិបាលបានដាក់ចេញនូវវិធានការមួយចំនួនទៅឲ្យស្ថាប័នពាក់ព័ន្ធ ត្រូវចាត់វិធានការឲ្យបានហ្មត់ចត់ ដើម្បីទប់ស្កាត់ និងបង្ក្រាប ព្រមទាំងលុបបំបាត់បទល្មើសធនធានធម្មជាតិគ្រប់ប្រភេទ រួមទាំងការរុករានដីក្នុងតំបន់ព្រៃការពារ និងអភិរក្សធម្មជាតិដែលស្ថិតនៅក្នុងដែនសមត្ថកិច្ចរបស់ខ្លួន។ ប៉ុន្តែរហូតមកដល់ពេលនេះ ការអនុវត្តជាក់ស្តែង គេសង្កេតឃើញរដ្ឋាភិបាលបរាជ័យក្នុងការទប់ស្កាត់ការកាប់បំផ្លាញព្រៃសហគមន៍ និងព្រៃអភិរក្ស ដែលការពារដោយច្បាប់ស្ទើរនៅគ្រប់ទីកន្លែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។