ប្រជាពលរដ្ឋ និងមន្ត្រីសមាគមអាដហុក (Adhoc) ប្រចាំខេត្តពោធិ៍សាត់ ចុះស៊ើបអង្កេតករណីកាប់ឈើខុសច្បាប់នៅឃុំរកាត និងឃុំសំរោង នៃស្រុកភ្នំក្រវាញ នៅថ្ងៃទី៨ ខែឧសភា។ ការស៊ើបអង្កេតនេះរកឃើញថា មានប្រជាពលរដ្ឋជាច្រើនគ្រួសារមកពីខេត្តកំពត កំពង់ស្ពឺ និងពោធិ៍សាត់ កំពុងតែបោះតង់ស្នាក់នៅ និងធ្វើសកម្មភាពកាប់ឈើយ៉ាងគគ្រឹកគគ្រេងនៅក្នុងទឹកដីឃុំទាំងពីរ។
ប្រភេទឈើធ្នង់ នាងនួន និងឈើប្រណីតមួយចំនួនទៀត ត្រូវបានគេកាប់ និងដឹកចេញក្នុងមួយថ្ងៃៗរាប់សិបម៉ែត្រគូប ពីលើជួរភ្នំក្រវាញ និងចំណុចអូរដា នៃឃុំរកាត ដែលជាតំបន់អភិរក្សដឹកតាមត្រាក់ទ័រ និងរទេះគោជាច្រើនគ្រឿង យកទៅស្ដុកទុកក្នុងឃ្លាំងឈើចំនួន ៣ទីតាំង ក្នុងឃុំសំរោង ហើយប្រជាពលរដ្ឋអះអាងថា ឃ្លាំងទាំងនោះ គឺជាកម្មសិទ្ធិក្រុមហ៊ុន អិម.ឌី.អែស (MDS) របស់លោកឧកញ៉ា ទ្រី ភាព។
ប្រជាពលរដ្ឋម្នាក់ដែលថ្លែងក្នុងលក្ខខណ្ឌសុំមិនបញ្ចេញឈ្មោះ ឲ្យដឹងថា តៃកុងឡាន និងអ្នកដើរជួលប្រជាពលរដ្ឋកាប់ឈើឲ្យខ្លួននោះ គឺជាកម្មករធ្វើការនៅក្នុងក្រុមហ៊ុន អិម.ឌី.អែស ដែលគាត់ឃើញមុខស្ទើររៀងរាល់ថ្ងៃ ហើយសកម្មភាពកាប់ឈើនេះកើតមានរយៈពេលជិត ៤ខែមកហើយ ប៉ុន្តែមិនឃើញមានអាជ្ញាធរ ឬមន្ត្រីជំនាញខាងណាចុះទប់ស្កាត់នោះទេ។ លោកបន្តថា សព្វថ្ងៃមានឡានប្រភេទយីឌុបចំនួន ២គ្រឿង ដឹកឈើចន្លោះពី ៤០ ទៅ ៨០ម៉ែត្រគូបក្នុង១ថ្ងៃ៖ «អ្នកទិញឃើញតែនៅកន្លែងក្រុមហ៊ុន ទ្រី ភាព ទាំងអស់ហ្នឹង! កាប់ចេញមកហ្នឹង គឺចំណុចព្រៃអភិរក្ស មិនមែនព្រៃសម្បទានទេ ព្រៃហ្នឹងខ្ញុំដឹងខាង ស៊ី.អាយ គ្រប់គ្រង ហើយអង្គការក្រៅរដ្ឋាភិបាលហ្នឹង។ ខ្ញុំជាប្រជាពលរដ្ឋម្នាក់ដែលនៅត្រង់ហ្នឹងយូរហើយ ខ្ញុំដឹងព្រៃណាព្រៃសហគមន៍ ព្រៃណាអភិរក្ស ព្រៃណាដែលសម្បទាន ខ្ញុំបាទដឹងទាំងអស់»។
ចំណែកមន្ត្រីសម្របសម្រួលសមាគមអាដហុក ប្រចាំខេត្តពោធិ៍សាត់ លោក ភួង សុធា ដែលបានចុះអង្កេតករណីនេះផ្ទាល់ដែរនោះ បញ្ជាក់ថា ប្រជាពលរដ្ឋក្មេងចាស់ជាច្រើនគ្រួសារ នាំគ្នាមកសង់រោងប្រក់ស័ង្កសី និងកៅស៊ូតង់នៅភូមិវាល នៃឃុំរកាត ប្រមាណជា ២០០រោង ក្នុងគោលបំណងស្នាក់នៅ និងឡើងកាប់ឈើស៊ីឈ្នួលឲ្យក្រុមហ៊ុន អិម.ឌី.អែស។ លោកបន្តថា សកម្មភាពកាប់បំផ្លាញព្រៃឈើនៅក្នុងដែនអភិរក្សព្រៃឈើនេះ គឺមានទ្រង់ទ្រាយធំគួរឲ្យព្រួយបារម្ភ។
វិទ្យុអាស៊ីសេរី មិនអាចស្វែងរកប្រភពទាក់ទងតំណាងក្រុមហ៊ុន អិម.ឌី.អែស និងនាយខណ្ឌរដ្ឋបាលព្រៃឈើខេត្តពោធិ៍សាត់ ដើម្បីសុំការបកស្រាយជុំវិញបញ្ហានេះបានទេ នៅថ្ងៃទី៨ ខែឧសភា។
យ៉ាងណា អភិបាលនៃគណៈអភិបាលស្រុកភ្នំក្រវាញ លោក សូរ សាហុង មានប្រសាសន៍ទទួលស្គាល់ថា បទល្មើសព្រៃឈើពិតជាកើតមានខ្លះមែន ប៉ុន្តែមិនអាចកើតមាននៅក្នុងដែនអភិរក្សព្រៃឈើនោះទេ ដោយសារតែមានកម្លាំងសមត្ថកិច្ច និងមន្ត្រីជំនាញយាមកាមជាប្រចាំ៖ «ការងារបង្ក្រាបនេះ គឺយើងមានយន្តការច្បាស់លាស់បង្កើតកម្លាំងចម្រុះ បង្កើតក្រុមពិសេស ដើម្បីទប់ស្កាត់បទល្មើសអស់ហ្នឹង ប៉ុន្តែគ្រាន់តែទំហំប្រជាពលរដ្ឋយើងសព្វថ្ងៃនេះវាមានច្រើន ហើយការទប់ស្កាត់វាបង្ក្រាបបានខ្លះអត់ខ្លះ វាមិនអាចទប់ស្កាត់ទាំងស្រុងទេ។ និយាយឲ្យចំពាក់ព័ន្ធបទល្មើសទាំងហ្នឹង វាគ្មានឈ្មួញណាម្នាក់ចេញមុខច្បាស់លាស់ទេ សុទ្ធតែលាក់មុខទេ ប៉ុន្តែអ្វីដែលគេនាំគ្នានិយាយនេះ គឺគ្រាន់តែជាការសន្និដ្ឋាន»។
លោកបញ្ជាក់ថា បទល្មើសភាគច្រើន គឺកើតចេញពីប្រជាពលរដ្ឋនៅក្នុងស្រុកផ្ទាល់ នាំគ្នាសម្រុកទៅកាប់ឈើក្រៅពីមុខរបរធ្វើស្រែចម្ការនៅក្នុងរដូវវស្សា។ ចំពោះពលរដ្ឋដែលទៅបោះតង់ស្នាក់នៅភូមិវាល នៃឃុំរកាត នោះ ខាងលោកមិនទាន់ទទួលបានព័ត៌មាននៅឡើយ ប៉ុន្តែលោកនឹងចាត់ឲ្យមន្ត្រីទៅពិនិត្យស្ថានភាពនេះក្នុងពេលឆាប់ៗ។
មន្ត្រីអង្គការក្រៅរដ្ឋាភិបាល និងប្រជាពលរដ្ឋរស់នៅខេត្តពោធិ៍សាត់ ចាត់ទុកសកម្មភាពកាប់បំផ្លាញព្រៃឈើ គឺជាបញ្ហាធ្ងន់ធ្ងរ បន្ទាប់ពីបញ្ហាដីធ្លីដែលកំពុងញាំញីប្រជាពលរដ្ឋក្រីក្រនៅក្នុងខេត្តនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។