សាធារណជនរិះគន់រដ្ឋបាលខេត្តព្រះសីហនុ ថាមិនមានលទ្ធភាពទប់ស្កាត់ភាពអនាធិបតេយ្យនៃសកម្មភាពកាប់រំលំដើមឈើធំៗដោយឈ្មួញមានទ្រព្យ និងមន្ត្រីមានអំណាចមួយចំនួន ដែលបានជួលកម្មករឲ្យចូលកាប់ព្រៃឈើ ដើម្បីរានយកដីធ្វើកម្មសិទ្ធិនៅលើតំបន់កោះរ៉ុង នៅមុនពេលតំបន់នេះត្រូវរាជរដ្ឋាភិបាលត្រៀមដាក់បញ្ចូលជាឧទ្យានជាតិ។
បញ្ហានេះ អ្នកឃ្លាំមើលសង្គមបង្ហាញការព្រួយបារម្ភ ខ្លាចព្រៃឈើដែលដុះនៅលើកោះរ៉ុង អាចនឹងត្រូវរលាយហិនហោចដោយសារការកាប់ទន្ទ្រាន និងគ្មានអាជ្ញាធរចុះហាមឃាត់។
សាធារណជន និងភ្ញៀវទេសចរដែលបានចូលទៅកម្សាន្តនៅលើកោះរ៉ុង នាឱកាសពិធីបុណ្យចូលឆ្នាំចិន ដែលទើបបញ្ចប់កាលពីសប្ដាហ៍មុន បង្ហាញការព្រួយបារម្ភខ្លាចព្រៃឈើដែលដុះនៅលើកោះរ៉ុង ត្រូវគេបំផ្លាញហិនហោចក្នុងពេលដ៏ខ្លីខាងមុខ។ ភ្ញៀវទេសចរមួយចំនួនបានអះអាងថា ឃើញមានសកម្មភាពប្រើរណារយន្ត ឬម៉ាស៊ីនត្រង់សឺន័រ ដើម្បីកាត់រំលំដើមឈើធំៗនៅតាមតំបន់មួយចំនួននៃសង្កាត់កោះរ៉ុង ប៉ុន្តែមិនឃើញមានអាជ្ញាធរចុះហាមឃាត់ទេ។
ភ្ញៀវទេសចរមួយចំនួន បានសំណូមពរដល់អភិបាលខេត្តព្រះសីហនុ លោក យន្ត មីន ពិសេសរដ្ឋមន្ត្រីក្រសួងបរិស្ថាន លោក សាយ សំអាល់ និងរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា ជួយបញ្ជូនមន្ត្រីស្អាតស្អំ ឲ្យចុះពិនិត្យជាក់ស្តែងដល់ទីតាំងសង្កាត់កោះរ៉ុង ដើម្បីឲ្យដឹងការពិត និងឈានដល់មានវិធានការទប់ស្កាត់សកម្មភាពកាប់រានដីព្រៃ និងដុតរានដើមឈើធំៗនៅលើកោះរ៉ុងឲ្យបានទាន់ពេល។
ចៅសង្កាត់កោះរ៉ុង លោក អ៊ួង និត មិនលើកទូរស័ព្ទដើម្បីបំភ្លឺជុំវិញសកម្មភាពកាប់រានព្រៃឈើធម្មជាតិ និងដុតដើម្បីហ៊ុមព័ទ្ធរបងធ្វើកម្មសិទ្ធិ ដែលកើតមានអនាធិបតេយ្យនៅមូលដ្ឋានសង្កាត់កោះរ៉ុង នេះទេកាលពីថ្ងៃពុធ ទី១ ខែកុម្ភៈ។
អ្នកសម្របសម្រួលសមាគមអាដហុក (ADHOC) ប្រចាំខេត្តព្រះសីហនុ អ្នកស្រី ជៀប សុធារី ដែលធ្លាប់ចុះទៅដល់សង្កាត់កោះរ៉ុង ទទួលស្គាល់ថា ពិតជាមានសកម្មភាពកាប់រានដីព្រៃឈើមួយចំនួនពិតមែន ប៉ុន្តែទីតាំងដីដែលអ្នកស្រីឃើញកាប់រាន មិនមែនជាប្រភេទដើមឈើធំៗនោះទេ។ អ្នកស្រីបន្តថា ការកាប់រានដីព្រៃរបស់ប្រជាពលរដ្ឋមួយចំនួនរស់នៅលើកោះរ៉ុង គឺកាប់រានតែនៅលើចំណែកក្បាលដី ដែលត្រូវមន្ត្រីជំនាញមកពីក្រសួងពាក់ព័ន្ធរដ្ឋាភិបាលថ្នាក់ជាតិ និងរដ្ឋបាលខេត្តព្រះសីហនុ បានចុះវាស់ជូនជាក់ស្តែង៖ « ទន្ទឹមគ្នាហ្នឹង យើងក៏ឃើញអ្នកមានលុយមានអំណាចមួយចំនួន បានល្មោភវាតទីយកដីនៅលើកោះរ៉ុងជាលក្ខណៈទ្រង់ទ្រាយធំ បានបន្តកើតមានដោយបានជួលកម្មករចូលទៅកាប់ព្រៃឈើ ដុតរានដីធ្វើកម្មសិទ្ធិយ៉ាងអនាធិបតេយ្យ។ ចំណែកប្រជាពលរដ្ឋសាមញ្ញវិញ គឺមានចំណែកដីតិចតួចបំផុត។ ដីនៅតំបន់កោះរ៉ុងហ្នឹង ដីជាក់ស្តែងរបស់ពួកគាត់កាប់ឆ្ការរួចហើយ ពួកគាត់បានដាំដំណាំជាក់ស្តែងនៅលើដីនោះសម្រាប់បម្រើសេចក្តីត្រូវការ ឬសម្រាប់ប្រើប្រាស់នៅតាមគ្រួសារនីមួយៗ »។
យ៉ាងនេះក្តី អ្នកស្រី សុធារី អះអាងថា អ្នកស្រីក៏ធ្លាប់ទទួលបានពាក្យបណ្ដឹង និងព័ត៌មានជុំវិញសកម្មភាពកាប់រានដីព្រៃធម្មជាតិនៅលើសង្កាត់កោះរ៉ុង ផ្ដើមដោយបុគ្គលមានទ្រព្យ និងមន្ត្រីមានអំណាចមួយចំនួន បានជួលកម្មករឲ្យចូលទៅកាប់រានដីព្រៃធម្មជាតិនៅតាមតំបន់ខ្លះនៃសង្កាត់កោះរ៉ុង ធ្វើកម្មសិទ្ធិមួយចំនួនដែរ។
អ្នកឃ្លាំមើលសង្គមរូបនេះ ទទូចដល់រដ្ឋបាលខេត្តព្រះសីហនុ ពិសេសរដ្ឋមន្ត្រីក្រសួងបរិស្ថាន លោក សាយ សំអាល់ និងរដ្ឋមន្ត្រីក្រសួងរៀបចំដែនដី លោក ជា សុផារ៉ា ជួយបញ្ជូនមន្ត្រីចុះពិនិត្យ និងទប់ស្កាត់សកម្មភាពកាប់រានដីព្រៃមានដើមឈើធំៗនៅលើកោះរ៉ុង ឲ្យបានឆាប់។ ជាងនេះទៀត ក៏ត្រូវវែករកមុខអ្នកជាប់ពាក់ព័ន្ធ ឬអ្នកនៅពីក្រោយបទល្មើសកាប់រានដីព្រៃមានដុះដើមឈើធំៗ ដើម្បីវាតយកដីធ្វើកម្មសិទ្ធិខុសច្បាប់ យកទៅផ្ដន្ទាទោសឲ្យបានធ្ងន់ធ្ងរ ប្រយោជន៍ថែរក្សាដីព្រៃធម្មជាតិនៅលើកោះរ៉ុង ឲ្យបានគង់វង្សនាថ្ងៃអនាគត៖ « បើសិនចាប់បានជនល្មើសហើយ គួរតែធ្វើការ ហើយដាក់ទោសទៅតាមផ្លូវច្បាប់ និងស្រាវជ្រាវរកម្ចាស់ពិតប្រាកដ ព្រោះអីអ្នកចូលទៅកាប់រានដីព្រៃឈើនៅលើកោះរ៉ុងទាំងនោះ ភាគច្រើន គឺចូលទៅស៊ីឈ្នួលគេទេ។ ចំណែកឯម្ចាស់ដីពិតប្រាកដ គាត់មិនដែលមកធ្វើការកាប់រានដីដោយខ្លួនឯងទេ។ ហើយភាគច្រើនប្រជាពលរដ្ឋក្រីក្របានទៅស៊ីឈ្នួលកាប់រានដីឲ្យគេ ដើម្បីរកកម្រៃប្រចាំថ្ងៃចិញ្ចឹមជីវិតហ្នឹងឯង។ ចំណែកឯអ្នកដែលជួលឲ្យកម្មករចូលទៅកាប់ព្រៃនៅលើកោះរ៉ុងហ្នឹង អាជ្ញាធររកមិនដែលឃើញទេ »។
កាលពីថ្ងៃទី៣១ ខែមករា ឆ្នាំ២០១៧ កម្លាំងសមត្ថកិច្ចនគរបាល និងមន្ត្រីមន្ទីរបរិស្ថាន ចាប់បានម៉ាស៊ីនត្រង់សឺន័រ ឬរណារយន្តចំនួន ១១គ្រឿង ដែលត្រូវបុគ្គលមានអំណាច និងឈ្មួញមានទ្រព្យមួយចំនួន បានជួលកម្មករឲ្យចូលទៅកាប់រំលំដើមឈើនៅលើសង្កាត់កោះរ៉ុង។
កាលពីថ្ងៃទី៣១ ខែមករា នៅលើបណ្ដាញសង្គមហ្វេសប៊ុក (Facebook ) របស់ម្ចាស់គណនីឈ្មោះ ឈុន ប៊ុនថា បានបង្ហាញរូបភាពកាត់ផ្ដួលរំលំដើមឈើធំៗ និងសកម្មភាពដុតរានដីព្រៃធ្វើកម្មសិទ្ធិនៅលើសង្កាត់កោះរ៉ុង ដោយបង្ហាញពីកង្វល់នៃការបាត់បង់ព្រៃឈើធម្មជាតិ ដែលដុះនៅតំបន់នេះ។
លោក ឈុន ប៊ុនថា ដែលគេស្គាល់ថាជាអ្នកតំណាងឲ្យក្រុមហ៊ុន រ៉ូយ៉ាល់ គ្រុប (Royal Group) របស់អ្នកឧកញ៉ា គិត ម៉េង ដែលទទួលបានដីសម្បទានសេដ្ឋកិច្ចពីរដ្ឋាភិបាលសម្រាប់បម្រើដល់វិស័យទេសចរណ៍ មានគម្រោងសង់សណ្ឋាគារប្រណិតលំដាប់ផ្កាយ៥ នៅលើកោះរ៉ុងជាដើម បានផ្ញើសារជាអក្សរនៅលើបណ្ដាញសង្គមរបស់ខ្លួនថា « សកម្មភាពកាប់ដុតព្រៃទន្ទ្រានយកដីនៅលើកោះរ៉ុង ប្រសិនបើតំបន់នេះអស់ព្រៃឈើធម្មជាតិ ភ្ញៀវទេសចរនឹងមិនមកលេងទៀតទេ »។
សារនៅលើទំព័រហ្វេសប៊ុកផ្ទាល់ខ្លួនរបស់លោក ឈុន ប៊ុនថា ក៏មានភ្ជាប់ជាមួយនូវរូបថត និងវីដេអូឃ្លីបនៃសកម្មភាពកាប់ និងដុតរានព្រៃឈើនៅតាមតំបន់ខ្លះនៃសង្កាត់កោះរ៉ុង ព្រមទាំងរូបថតរបស់កម្លាំងនគរបាល និងមន្ត្រីមន្ទីរបរិស្ថានខេត្តព្រះសីហនុ ដែលបានចុះឃាត់ខ្លួនកម្មករ និងចាប់បានរណារយន្តចំនួន ១១គ្រឿង ដែលកម្មករស៊ីឈ្នួលកាប់រំលំដើមឈើឲ្យឈ្មួញ និងមន្ត្រីមានអំណាចរានយកដីធ្វើកម្មសិទ្ធិនៅលើតំបន់កោះរ៉ុង។ បន្ថែមលើនេះ លោក ឈុន ប៊ុនថា បានផ្តល់សម្ភាសជាមួយអាស៊ីសេរី តាមទូរស័ព្ទនៅរសៀលថ្ងៃពុធ ទី១ ខែកុម្ភៈ ថា កន្លងទៅ សកម្មភាពកាប់រានដីព្រៃធម្មជាតិនៅលើសង្កាត់កោះរ៉ុង មិនមានសមត្ថកិច្ចពីស្ថាប័នពាក់ព័ន្ធណាមួយចេញមុខទប់ស្កាត់ទេ ប៉ុន្តែទើបកាលពីថ្ងៃទី៣១ ខែមករា ឆ្នាំ២០១៧ ឃើញមានកម្លាំងនគរបាល និងមន្ត្រីបរិស្ថាន បានចុះទៅតាមតំបន់មានសកម្មភាពកាប់ព្រៃឈើមួយចំនួន និងបានចាប់រណារយន្តចំនួន ១១គ្រឿង និងកម្មករចំនួន ១០នាក់ នាំយកមកធ្វើកិច្ចសន្យាឲ្យបញ្ឈប់សកម្មភាពកាប់រានដីព្រៃឈើនៅលើកោះរ៉ុងតទៅទៀត៖ « យើងបានសំណូមពរដល់អាជ្ញាធរពាក់ព័ន្ធខេត្តព្រះសីហនុ ជួយបញ្ចេញកម្លាំងដើម្បីទប់ស្កាត់បទល្មើសកាប់រានដីព្រៃធម្មជាតិនៅលើកោះរ៉ុងនេះជាបន្តបន្ទាប់ ហើយចាប់បានរណារយន្ត ឬរណារត្រង់សឺន័រ និងសម្ភារមួយចំនួន ព្រមទាំងឃាត់ខ្លួនកម្មករកាប់ព្រៃបានចំនួន ១០នាក់ ហើយបានឲ្យកម្មករដែលចូលទៅកាប់ព្រៃឈើទាំងអស់ហ្នឹងផ្ដិតមេដៃធ្វើកិច្ចសន្យាបញ្ឈប់កាប់ព្រៃ ហើយត្រូវកំណត់ឲ្យឡើងមកលើដីគោកវិញ ប៉ុន្តែនៅថ្ងៃទី១ ខែមករា នេះ ដែលកម្លាំងសមត្ថកិច្ច និងកម្លាំងក្រុមហ៊ុនយើងបានចុះល្បាត ឬពិនិត្យជាក់ស្តែងនៅតាមតំបន់មួយចំនួននៅលើកោះរ៉ុង ក៏បានឃើញកម្មករទាំងនោះនៅបន្តកាប់ព្រៃឈើនៅលើកោះរ៉ុងដដែល ហើយខាងភាគីម្ចាស់ដីខ្លះថែមទាំងបាននាំយកកម្លាំងទាហាន ឬកងទ័ពមកដាក់ពង្រាយចាំកាងការពារសកម្មភាពកាប់ព្រៃឈើនៅលើកោះរ៉ុងនេះថែមទៀត »។
ឆ្លើយបំភ្លឺបញ្ហានេះ អភិបាលខេត្តព្រះសីហនុ លោក យន្ត មីន បានបកស្រាយតាមទូរស័ព្ទឲ្យអាស៊ីសេរីដឹងថា សកម្មភាពកាប់រានដីព្រៃនៅតាមតំបន់មួយចំនួននៅលើកោះរ៉ុង គឺកើតឡើងក្រោយពេលមន្ត្រីជំនាញក្រសួងបរិស្ថាន និងក្រសួងដែនដី បានចុះវាស់ និងកាត់ឆ្វៀលដីកាន់កាប់របស់ប្រជាពលរដ្ឋរស់នៅតំបន់នោះ ដើម្បីឈានដល់ផ្តល់សិទ្ធិកាន់កាប់ដីស្របច្បាប់ជូនពួកគាត់។ លោកបន្តថា ការកាប់ព្រៃឈើ និងដុតរានដីព្រៃដែលមានការចោទប្រកាន់នេះ ទំនងជាពលរដ្ឋរស់នៅលើកោះរ៉ុង បានកាប់ឆ្ការព្រៃនៅលើដីចម្ការរបស់ពួកគាត់ ដែលមានដុះព្រៃនៅលើដីជាក់ស្តែង ដើម្បីប្រកបរបរដាំដុះ និងសង់សំណង់ផ្សេងៗ ជាដើម។
ទោះបីជាយ៉ាងណា លោក យន្ត មីន ព្រមានថា បើមានសកម្មភាពកាប់រានដើមឈើធំៗដូចការចោទមែននោះ វាជាទង្វើខុសច្បាប់ ហើយទាមទារឲ្យអ្នកជាប់ពាក់ព័ន្ធ ឬអ្នកនៅពីក្រោយការជួលកម្មករឲ្យចូលទៅកាប់រានដីព្រៃធម្មជាតិ មានដើមឈើធំៗនៅលើកោះរ៉ុង ត្រូវបញ្ឈប់សកម្មភាពជាបន្ទាន់។ អភិបាលខេត្តព្រះសីហនុ បានអះអាងថា នឹងពិនិត្យតាមដានបទល្មើសកាប់រានដីព្រៃឈើនៅលើកោះរ៉ុង ដើម្បីរកឲ្យឃើញការពិត និងឈានដល់មានវិធានការផ្លូវច្បាប់។
កាលពីថ្ងៃទី១៥ ខែកញ្ញា ឆ្នាំ២០១៦ រាជរដ្ឋាភិបាលកម្ពុជា តាមរយៈក្រសួងបរិស្ថាន បានសម្រេចបង្កើតតំបន់ការពារធម្មជាតិចំនួន ៣បន្ថែមទៀតរួមមាន ឧទ្យានជាតិកោះរ៉ុង តំបន់អភិរក្សទឹកសាបបឹងព្រែកទប់ ខេត្តព្រះសីហនុ និងតំបន់បេតិកភណ្ឌភ្នំត្បែង ខេត្តព្រះវិហារ។
ប៉ុន្តែទន្ទឹមគ្នានេះ នៅក្នុងបរិវេណដីព្រៃឈើមានដុះដើមឈើធំៗនៅលើកោះរ៉ុង ត្រូវសាធារណជនរិះគន់ថា ត្រូវបានមន្ត្រីមានអំណាច ឈ្មួញមានទ្រព្យ និងពលរដ្ឋខ្លះ បានឃុបឃិតជាមួយមន្ត្រីជំនាញស្ថាប័នពាក់ព័ន្ធមួយចំនួននាខេត្តព្រះសីហនុ បានជួលកម្មករឲ្យចូលកាប់ព្រៃឈើនៅតាមតំបន់ខ្លះនៃសង្កាត់កោះរ៉ុង ដើម្បីរានយកដីធ្វើកម្មសិទ្ធិ ហើយសកម្មភាពនេះបានកើតមានអនាធិបតេយ្យរហូតមកដល់ពេលនេះ ប៉ុន្តែអាជ្ញាធរមានសមត្ថកិច្ចក្រោមឱវាទរដ្ឋបាលខេត្តព្រះសីហនុ គ្មានវិធានការទប់ស្កាត់ឲ្យមានប្រសិទ្ធភាពទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។