ពលរដ្ឋរស់នៅភូមិកែងសាន់ ឃុំសេដា ស្រុកលំផាត់ ខែត្ររតនគិរី ចោទមេភូមិ មេឃុំ ប្រធានសហគមន៍ និងមន្ត្រីរដ្ឋបាលព្រៃឈើថា បានឃុបឃិតជាមួយឈ្មួញឈូសឆាយដីព្រៃសហគមន៍ជាង ៥០០ហិកតារ។ អ្នកភូមិកែងសាន់ មួយចំនួន បានផ្ដិតមេដៃប្ដឹងអាជ្ញាធរភូមិ-ឃុំ មន្ត្រីរដ្ឋបាលព្រៃឈើ និងប្រធានសហគមន៍ទៅស្ថាប័នអយ្យការខែត្ររតនគិរី ពីបទអនុគ្រោះឲ្យកើតមានបទល្មើសព្រៃឈើនៅតំបន់អភិរក្ស។
អ្នកភូមិកែងសាន់ មួយចំនួនដែលបានផ្ដិតមេដៃប្ដឹងអាជ្ញាធរមូលដ្ឋាន ប្រធានសហគមន៍ និងមន្ត្រីរដ្ឋបាលព្រៃឈើ រំពឹងថា តុលាការនឹងផ្ដល់យុត្តិធម៌ដល់សហគមន៍ដែលរងគ្រោះដោយសារការបាត់បង់ធនធានធម្មជាតិ ដែលអាជ្ញាធរមូលដ្ឋានធ្វើមិនដឹងមិនឮ និងឃុបឃិតគ្នាជាមួយឈ្មួញឈូសឆាយដីព្រៃសហគមន៍ ដើម្បីបម្លែងជាសម្បត្តិបុគ្គល។
ពលរដ្ឋរស់នៅភូមិកែងសាន់ ឃុំសេដា ស្រុកលំផាត់ លោក ស្រូត មុត ឲ្យដឹងនៅថ្ងៃទី២ ខែមករា ថា អ្នកភូមិមានភស្តុតាងជាក់លាក់ដែលបញ្ជាក់ថា ដីព្រៃសហគមន៍នៅចំណុចអូរបោក និង បឹងរំចក ឋិតក្នុងឃុំសេដា ស្រុកលំផាត់ ជាង ៥០០ហិកតារ ត្រូវឈ្មួញឃុបឃិតគ្នាជាមួយអាជ្ញាធរពាក់ព័ន្ធ និងមន្ត្រីជំនាញយកគ្រឿងចក្រឈូសឆាយឲ្យក្លាយជាវាល។ លោកថា ទីតាំងឈូសឆាយដែលអ្នកភូមិប្រទះឃើញ គឺមានគំនរឈើជាច្រើនម៉ែត្រគូបនៅមិនទាន់ដុតកម្ទេចចោល នៅគ្រាដែលគំនរឈើមួយចំនួនធំត្រូវគេដុតកម្ទេចចោលដើម្បីបំបាត់ភស្តុតាង។
លោកបញ្ជាក់ថា អ្នកភូមិប្រទះឃើញគ្រឿងចក្រច្រើនគ្រឿងឈូសឆាយដីព្រៃសហគមន៍នោះ ហើយបានរាយការណ៍ទៅមេភូមិ និងមេឃុំ ក៏ប៉ុន្តែអាជ្ញាធរមូលដ្ឋាន មិនចាត់វិធាននោះទេ៖ «សួរមេភូមិ អាជ្ញាធរ ថានរណាឈូសឆាយដីព្រៃហ្នឹង? គាត់ថា មិនដឹងទេ។ ពួកខ្ញុំទៅទប់ស្កាត់បទល្មើសព្រៃឈើ ពេលដែលឈប់ស្កាត់ហើយ អ្នកប្រព្រឹត្ត និងពួកឈូសឆាយហ្នឹងគាត់ថា មេភូមិ និងមេឃុំឲ្យខ្ញុំហើយដីហ្នឹងមានប្លង់ ដល់ខ្ញុំសុំមើលទៅមានប្លង់មែន»។
ព្រៃសហគមន៍ភូមិកែងសាន់ គឺជាផ្នែកមួយនៃដែនជម្រកសត្វព្រៃលំផាត់ មានផ្ទៃដីជាង ៤ពាន់ហិកតារ ដែលពលរដ្ឋនៅតំបន់នោះ ដាក់ពាក្យស្នើសុំអាជ្ញាធរខែត្រ និងក្រសួងសាមី ដើម្បីចុះបញ្ជីជាព្រៃអភិរក្សរបស់សហគមន៍តែពុំទាន់ឆ្លើយតប។
កាលពីខែតុលា ឆ្នាំ២០១៧ តំណាងពលរដ្ឋភូមិកែងសាន់ មួយចំនួន និងមន្ត្រីជាន់ខ្ពស់នៃសមាគមអាដហុក បានដាក់ពាក្យប្ដឹងករណីនេះទៅស្ថាប័នអយ្យការសាលាដំបូងខែត្ររតនគិរី ដោយចោទមេឃុំ អភិបាលស្រុកលំផាត់ និងមន្ត្រីជំនាញ ១០នាក់ ពីបទអនុគ្រោះឲ្យកើតមានបទល្មើសព្រៃឈើនៅព្រៃសហគមន៍ភូមិកែងសាន់។ មកទល់ពេលនេះ សំណុំរឿងនេះឋិតក្នុងការស៊ើបអង្កេតរបស់តំណាងអយ្យការនៅឡើយ។
អាស៊ីសេរី មិនអាចទាក់ទងមេឃុំសេដា លោក អង់ ប៊ុនធៀង ដើម្បីសុំការបញ្ជាក់រឿងនេះបានទេ នៅថ្ងៃទី២ ខែមករា ព្រោះទូរស័ព្ទហៅចូលច្រើនដងពុំមានអ្នកទទួល។ តែលោក អង់ ប៊ុនធៀង ធ្លាប់បញ្ជាក់ថា អាជ្ញាធរមិនជាប់ពាក់ព័ន្ធកាប់រានព្រៃនោះទេ។ លោកថា ពលរដ្ឋនៅមូលដ្ឋានបានស៊ីឈ្នួលកាប់រានឲ្យឈ្មួញ ឋិតក្នុងតំបន់ព្រៃអភិរក្ស តែបច្ចុប្បន្នបានដោះស្រាយរួចអស់ហើយ។ ចំណែកឯឈ្មួញក៏បញ្ឈប់ទិញដីនៅតំបន់នោះដែរ ដោយសារដីនោះឋិតក្នុងតំបន់ព្រៃការពារ និងព្រៃសហគមន៍៖ «អត់មានអីទេ រឿងព្រៃតាំងពីមុន ឥឡូវនេះព្រៃហ្នឹងគ្មានពីណាកាប់ទេ»។
មន្ត្រីឃ្លាំមើលបញ្ហាព្រៃឈើ នៃសមាគមអាដហុក ខែត្ររតនគិរី លោក ឌិន ខន្នី ដែលចុះអង្កេតរឿងនេះសង្ឃឹមថា តុលាការរតនគិរី នឹងផ្ដល់យុត្តិធម៌ជូនពលរដ្ឋ និងស៊ើបអង្កេតរឿងនេះឲ្យគ្រប់ជ្រុងជ្រោយ ដ្បិតសំណុំរឿងនេះមិនពិបាករកភស្តុតាងនោះទេ ព្រោះសហគមន៍បានកំណត់អត្តសញ្ញាណអ្នកភូមិដែលជាអ្នកស៊ីឈ្នួលកាប់រានព្រៃនេះ និងអ្នកប្រព្រឹត្ត។
លោកបញ្ជាក់ថា ដីព្រៃជាង ៥០០ហិកតារ ឋិតក្នុងតំបន់ព្រៃសហគមន៍ ដែលឈ្មួញកាប់រានយកធ្វើជាកម្មសិទ្ធិ គឺជាភស្តុតាងសំខាន់មួយដែលអាចបញ្ជាក់បានថា ឈ្មួញ និងអាជ្ញាធរបានប្រព្រឹត្តបទល្មើសឧក្រិដ្ឋ៖ «ខ្ញុំនៅតែសង្ឃឹមដដែល សំណូមពរឲ្យតុលាការពន្លឿននីតិវិធីដែលពលរដ្ឋបានប្តឹងបរិហារផ្លូវការទៅកាន់តុលាការខែត្ររតនគិរី ហើយសង្ឃឹមថា ពលរដ្ឋដដែលទៀតគាត់នឹងចូលរួមយ៉ាងសកម្មក្នុងការទប់ស្កាត់បទល្មើសព្រៃឈើ និងចូលរួមដាក់បណ្ដឹងបរិហារការដែលមិនចូលរួមទប់ស្កាត់បទល្មើសព្រៃឈើ»។
សហគមន៍ឲ្យដឹងទៀតថា សកម្មភាពកាប់រានដីព្រៃ ពុំមែនតែកើតមានឡើងតែភូមិកែងសាន់ នោះទេ ព្រៃនៅដែនជម្រកសត្វព្រៃលំផាត់ ក៏មានសេចក្ដីរាយការណ៍មកថា ចលនាកាប់រានដីព្រៃធ្វើជាសម្បត្តិឯកជន ក៏កំពុងរាលដាលខ្លាំងឡើង បណ្ដាលឲ្យព្រៃឈើដែលធ្លាប់ជាម្លប់បៃតង ឬព្រៃស្រោង ក្លាយជាវាលក្ដៅហួតហែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។