ព្រៃឈើនៅតំបន់ជម្រកសត្វព្រៃភ្នំណាំលា ក្នុងខេត្តមណ្ឌលគិរី នៅតែរងការកាប់រានខុសច្បាប់ដើម្បីយកដី បើទោះបីក្រុមមន្ត្រីជំនាញបរិស្ថានត្រូវបានដាក់ឲ្យការពារ និងអភិរក្សតំបន់នោះយ៉ាងណាក្តី។ ក្រុមសហគមន៍ជនជាតិដើមព្នង អ្នកអភិរក្សព្រៃឈើនៅតំបន់នោះ បានចុះល្បាតព្រៃជាញឹកញយ និងបានអះអាងថា ព្រៃឈើជិត ១០០ហិកតារហើយត្រូវគេកាប់រាន ប៉ុន្តែមន្ត្រីជំនាញមិនអាចបង្ក្រាប ឬស្រាវជ្រាវរកជនពាក់ព័ន្ធករណីនេះឃើញនៅឡើយ។
កម្មករស៊ីឈ្នួលកាប់រានព្រៃឈើម្នាក់ និងរណារយន្តកាត់ឈើពីរគ្រឿង ត្រូវបានសហគមន៍ការពារព្រៃឈើឃុំប៊ូស្រា ស្រុកពេជ្រាដា ឃាត់ខ្លួនបញ្ជូនទាំងវត្ថុតាងមកសមត្ថកិច្ចប៉ូលិស។
ការឃាត់ខ្លួននេះធ្វើឡើងកាលពីរសៀសថ្ងៃទី២៦ ខែមេសា បន្ទាប់ពីសហគមន៍ភូមិពូលុ មួយក្រុមបានល្បាតព្រៃហើយប្រទះឃើញកម្មករស៊ីឈ្នួលប្រមាណ ៥ ទៅ ៦នាក់ កំពុងអាររំលំឈើដោយម៉ាស៊ីនកាត់ឈើនៅចំណុចព្រៃកប់សពភូមិពូលុ ក្នុងព្រៃអភិរក្សភ្នំណាំលា។
តំណាងសហគមន៍លោក ឃុត ចាន់រ៉ា រៀបរាប់ថា នេះគឺជាជាសកម្មភាពលួចអាររំលំឈើក្នុងព្រៃអភិរក្សបន្ថែមទៀតដែលកម្មករស៊ីឈ្នួលអះអាងថា ពួកគេត្រូវគេជួយពីខេត្តកំពង់ចាម ដើម្បីមកកាប់រានព្រៃឈើយកដី។ លោកបន្តថា ចាប់ពីឆ្នាំ២០១២ រហូតបច្ចុប្បន្ន ព្រៃឈើនៅតំបន់នោះរងការកាប់រាន ប៉ុន្តែសហគមន៍មិនអាចដឹងពីអត្តសញ្ញាណជនពាក់ព័ន្ធ និងឃាត់ខ្លួនពួកគេបានទាន់ពេលវេលានោះទេ។
តំណាងសហគមន៍លោក ឃុត ចាន់រ៉ា៖ «មិនដឹងកាប់ជាលក្ខណៈក្រុមហ៊ុន ឬអ្នកមានអំណាចណាឃុបឃិតកាប់ទន្ទ្រានហ្នឹង។ ចាប់បានម្នាក់ប៉ុន្មាននាក់ទៀតរត់រួច។ សួរទៅថាស៊ីឈ្នួលគេ សុភ័ក្រ បរិស្ថានរួចនៅកន្លែងហ្នឹងអត់មានឈ្មោះ សុភ័ក្រ បរិស្ថានទេ»។
កម្មករស៊ីឈ្នួលដែលសហគមន៍ឃាត់ខ្លួនមានឈ្មោះ ទី ហេង រស់នៅភូមិទួលកណ្តាល ឃុំពពេល ស្រុកពញាក្រែក ខែត្រកំពង់ចាម បញ្ជាក់ថា ពួកគេមានគ្នា ៩នាក់ ត្រូវបានមេការឈ្មោះ ភ័ក្រ រស់នៅភូមិជាមួយជួលមកធ្វើការនៅតំបន់នោះ ហើយក៏ប្រើឲ្យអាររំលំឈើនោះ ក៏ប៉ុន្តែពួកគេមិនដឹងថានរណាជាអ្នកនៅពីក្រោយមេការនោះពិតប្រាកដឡើយ។
កម្មករ ទី ហេង៖ «មុនដំបូងថា មកត្រាយព្រៃតិចៗព្រៃស្រឡះដាំដំឡូងដល់នេះរំលំព្រៃមួយហិកតារ គាត់ចុះចាប់។ បាទ! ព្រៃធំដែរ ព្រៃគេត្រួសជើងក្រោមរួច បើជួលមកហើយ ខ្ញុំចេះតែកាប់ស្មានតែដីគេទិញអស់ហើយ»។
នាយប៉ូលិសប៉ុស្តិ៍ឃុំប៊ូស្រា សួន សុភ័ក្រ បដិសេធមិនធ្វើអត្ថាធិប្បាយពិស្ដារជុំវិញការឃាត់ខ្លួនកម្មករនេះទេ ក៏ប៉ុន្តែលោកបញ្ជាក់ខ្លីថា បានប្រគល់កម្មករស៊ីឈ្នួលនោះទៅឲ្យមន្ត្រីមន្ទីរបរិស្ថានរួចហើយ នៅថ្ងៃទី២៧ ខែមេសា។
ចំណែកប្រធានមន្ទីរបរិស្ថានខេត្តមណ្ឌលគិរី លោក ឈិត សុផល ទទួលស្គាល់ថា មន្ត្រីលោកបានទៅទទួលយកកម្មករស៊ីឈ្នួលនៅពីប៉ូលិសប៉ុស្តិ៍ហើយ ប៉ុន្តែលោកមិនបានសាកសួរព័ត៌មានជាក់លាក់ជុំវិញរឿងនេះនៅឡើយ។ លោកទទួលស្គាល់ថា ព្រៃអភិរក្សពិតជាត្រូវបានគេលួចកាប់រាន ហើយករណីនេះអ្នកភូមិនៅតំបន់នោះមួយចំនួនក៏មានពាក់ព័ន្ធកាប់រានព្រៃនោះដូចគ្នា។
លោក ឈិត សុផល៖ «យើងពិនិត្យមើលតើករណីហ្នឹង វាប្រព្រឹត្តឡើងវាសមទៅនឹងលក្ខខណ្ឌនៃច្បាប់គឺយើងធ្វើទៅតាមហ្នឹងទៅ»។
ទោះជាយ៉ាងនេះក្តី មន្ត្រីឃ្លាំមើលបញ្ហាព្រៃឈើសមាគមអាដហុក ខេត្តមណ្ឌលគិរី លោក សុក រដ្ឋា អះអាងថា សហគមន៍បានប្រឹងប្រែងរួមចំណែកទប់ស្កាត់បទល្មើសព្រៃឈើ និងចាប់បានជនពាក់ព័ន្ធបញ្ជូនមកសមត្ថកិច្ចដើម្បីស្រាវជ្រាវរកអ្នកនៅពីក្រោយសកម្មភាពល្មើសច្បាប់នេះ៖ «យើងនឹងធ្វើការឃ្លាំមើល សង្ឃឹមថាខាងមន្ត្រីមន្ទីរបរិស្ថាននឹងធ្វើការរឿងហ្នឹងទៅតាមនីតិវិធីច្បាប់ដោយគ្មានការយោគយល់ ឬអត់ឱនអ្វីមួយទេ។ សម្រាប់ជាគំរូមួយសម្រាប់ជនល្មើសផ្សេងទៀតចូលទៅធ្វើបទល្មើស»។
ព្រៃឈើនៅតំបន់ភ្នំណាំលា មិនមែនមានតែសកម្មភាពកាប់រានព្រៃយកដីនោះទេ កាលពីខែមីនា កន្លងទៅសហគមន៍ធ្លាប់ចាប់បានក្រុមជនជាតិវៀតណាម ១៥នាក់ រួមជាមួយនឹងវត្ថុតាងរួមមាន គោយន្តច្នៃចំនួន ៤គ្រឿង រណាយន្ត ៧គ្រឿង កាំភ្លើងធុន អ៊ឹមសី (M16) ១ដើម ម៉ូតូ ៩គ្រឿង និងឈើគគីរកាត់រួចប្រមាណ ៤ម៉ែត្រគូប។ ករណីនេះតុលាការបានសម្រេចឃុំខ្លួនជនជាប់ចោទនៅពន្ធនាគារខេត្តរួចហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។