តំណាងសហគមន៍ជនជាតិដើមភាគតិចព្នង ឃុំប៊ូស្រា ស្រុកពេជ្រាដា និងឃុំដាក់ដាំ ស្រុកអូររាំង ខេត្តមណ្ឌលគិរី នាំគ្នាយកពាក្យបណ្ដឹងមកជូនក្រសួងបរិស្ថាន ក្រសួងរៀបចំដែនដី នគរូបនីយកម្ម និងសំណង់ និងរដ្ឋសភា ឲ្យជួយដោះស្រាយករណីកាប់រានព្រៃយកដីនៅដែនជម្រកសត្វព្រៃភ្នំណាំលៀ ក្រោយពេលសហគមន៍ដាក់ពាក្យបណ្ដឹងដូចគ្នានេះទៅស្ថាប័នអយ្យការសាលាដំបូងខេត្តមណ្ឌលគិរី។
ពាក្យបណ្ដឹងចំនួនបីផ្សេងគ្នាផ្ដិតមេដៃដោយតំណាងសហគមន៍ប៊ូស្រា និងសហគមន៍ដាក់ដាំ ចំនួន ៩នាក់ បានដាក់ជូនស្ថាប័នថ្នាក់ជាតិចំនួនបី នៅថ្ងៃទី១ ខែកុម្ភៈ ដើម្បីជួយទប់ស្កាត់ និងចាត់វិធានការទៅលើជនពាក់ព័ន្ធកាប់រានព្រៃឈើយកដី។
តំណាងសហគមន៍ លោក ក្រើង តុលា បញ្ជាក់ថា មន្ត្រីរដ្ឋបាលក្រសួងបរិស្ថាន ក្រសួងរៀបចំដែនដី នគរូបនីយកម្ម និងសំណង់ រួមទាំងមន្ត្រីស្ថាប័នរដ្ឋសភា បានទទួលយកពាក្យបណ្ដឹងរបស់សហគមន៍រួចហើយ ក៏ប៉ុន្តែមិនទាន់មានការឆ្លើយតបបែបណានៅឡើយ។ លោកបន្តថា គោលបំណងរបស់សហគមន៍ដែលដាក់ពាក្យបណ្ដឹងមកស្ថាប័នជំនាញ និងស្ថាប័នរដ្ឋសភានេះ គឺសហគមន៍ទាមទារឲ្យស្ថាប័នទាំងបីនេះ ជួយរកយុត្តិធម៌ និងចាត់វិធានការបន្ថែមទប់ស្កាត់កុំឲ្យបទល្មើសព្រៃឈើនេះកើតមានតទៅទៀត៖ « សហគមន៍ទាំងអស់សង្ឃឹមថា តុលាការ និងក្រសួងទាំងអស់ នឹងចាត់វិធានការឲ្យពួកគាត់។ សុំចុះអន្តរាគមន៍ជាបន្ទាន់ ហើយបញ្ឈប់ការកាប់ទន្ទ្រានហ្នឹង ហើយមិនឲ្យប្រើប្រាស់តែម្តង »។
កាលពីថ្ងៃទី២៥ ខែមករា តំណាងសហគមន៍ឃុំប៊ូស្រា និងឃុំដាក់ដាំ បានដាក់ពាក្យបណ្ដឹងបរិហារមន្ត្រីជំនាញបរិស្ថានខេត្តពីរនាក់ និងមន្ត្រីមូលដ្ឋានស្រុកអូររាំង និងស្រុកពេជ្រាដា ចំនួន ៥នាក់ទៅស្ថាប័នអយ្យការសាលាដំបូងខេត្តមណ្ឌលគិរី ពីបទបណ្តែតបណ្តោយឲ្យមានការកាប់រានព្រៃក្នុងដែនសមត្ថកិច្ចរបស់ខ្លួន។
អ្នកនាំពាក្យក្រសួងបរិស្ថាន លោក សៅ សុភាព បញ្ជាក់ថា លោកមិនទាន់បានឃើញពាក្យបណ្ដឹងនោះនៅឡើយ ក៏ប៉ុន្តែប្រសិនបើមន្ត្រីរដ្ឋបាលបានទទួលពាក្យបណ្ដឹងពីពលរដ្ឋហើយ នោះថ្នាក់ដឹកនាំក្រសួង នឹងពិនិត្យ រួចចាត់វិធានការជាក់ស្តែងតាមការវាយតម្លៃរបស់មន្ត្រីពាក់ព័ន្ធ។ លោកបន្តថា ក្រសួងមានតួនាទីដោះស្រាយបណ្ដឹងបរិហាររបស់ពលរដ្ឋ ទាក់ទិនការបំពេញតួនាទីរបស់មន្ត្រីក្រោមឱវាទ ដើម្បីស្វែងរកការពិត និងដោះស្រាយការប្ដឹងនោះ៖ « ក្នុងករណីមានពាក្យប្ដឹង និងមានព័ត៌មានជាក់លាក់ យើងត្រូវដោះស្រាយតាមបែបបទក៏ដូចរចនាសម្ព័ន្ធរបស់យើង។ ជំនាញគាត់ត្រូវចុះពិនិត្យ និងសិក្សាស្រាវជ្រាវថា បញ្ហាហ្នឹងវាកើតមានយ៉ាងម៉េច ហើយអ្នកណាទទួលខុសត្រូវ »។
មន្ត្រីបរិស្ថានចំនួនពីរនាក់រួមមាន អនុប្រធានដែនជម្រកសត្វព្រៃភ្នំណាំលៀ លោក ហាន ខន និងប្រធានមន្ទីរបរិស្ថានខេត្តមណ្ឌលគិរី លោក កែវ សុភ័ក្រ រួមទាំងមេភូមិពូឡេះ លោក ព្យឺយ គីម មេឃុំដាក់ដាំ លោក សម វណ្ណី មេឃុំប៊ូស្រា លោក យើត សារីន អភិបាលស្រុកពេជ្រាដា លោក នួន សារ៉ន អភិបាលស្រុកអូររាំង លោក ណង ទុនណ្ណារី ត្រូវបានសហគមន៍ប្ដឹងបរិហារពីបទបណ្តែតបណ្តោយឲ្យព្រៃឈើក្នុងតំបន់ដែនជម្រកសត្វព្រៃភ្នំណាំលៀ រងការកាប់រានយកដី។
មន្ត្រីសម្របសម្រួលសមាគមអាដហុក (ADHOC) ខេត្តមណ្ឌលគិរី លោក សុក រដ្ឋា កត់សម្គាល់ថា ការសម្រេចចិត្តដាក់ពាក្យប្ដឹងរបស់សហគមន៍ទៅស្ថាប័ននីតិប្រតិបត្តិ និងស្ថាប័ននីតិប្បញ្ញត្តិបន្ថែមទៀត គឺជាសិទ្ធិរបស់ប្រជាពលរដ្ឋ។ លោកថា ស្ថាប័នកំពូលទាំងបីថ្នាក់ មានភារៈផ្តល់យុត្តិធម៌ជូនពលរដ្ឋ គ្រាដែលប្រជាពលរដ្ឋសុំកិច្ចអន្តរាគមន៍ពីស្ថាប័នទាំងនោះ៖ « តុលាការក្តី សមត្ថកិច្ចក្តី ក្រសួងក្តី គឺមានសិទ្ធិបន្ត និងដំណើរការពាក្យប្ដឹងដែលគាត់បានប្ដឹង »។
តំណាងសហគមន៍ឃុំប៊ូស្រា និងឃុំដាក់ដាំ បញ្ជាក់ថា ព្រៃឈើក្នុងដែនជម្រកសត្វព្រៃឋិតក្រោមការគ្រប់គ្រងរបស់ក្រសួងបរិស្ថាន ក៏ប៉ុន្តែព្រៃឈើនោះ សហគមន៍ធ្លាប់អាស្រ័យផល និងអភិរក្សជាព្រៃជំនឿសក្ការៈរបស់ជនជាតិដើមភាគតិច។ សហគមន៍ទាមទារឲ្យស្ថាប័នពាក់ព័ន្ធ ស្វែងរកជនប្រព្រឹត្តិល្មើស និងមន្ត្រីពាក់ព័ន្ធកាប់រានព្រៃ មកទទួលខុសត្រូវចំពោះមុខច្បាប់ និងផ្តល់សំណងសែនព្រេនព្រៃសក្ការៈដែលរងការកាប់បំផ្លាញជាប្រាក់ចំនួន ២០លានរៀល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។