ព្រៃចំនួន ៥តំបន់ ដែលមានទំហំជាង ១លានហិកតារ ត្រូវបានរាជរដ្ឋាភិបាលលោក ហ៊ុន សែន ត្រៀមដាក់ជាព្រៃការពារនោះ រួមមានព្រៃឡង់ ព្រៃក្រវាញខាងត្បូង ព្រៃព្រះរកា ព្រៃសៀមប៉ាងខាងលិច និងព្រៃវ៉ឺនសៃ។ ក្រៅពីសាទរនឹងចំណាត់ការរបស់រាជរដ្ឋាភិបាលដែលគ្រោងដាក់ព្រៃសេសសល់ចុងក្រោយចំនួន ៥កន្លែងនេះជាព្រៃការពារ សមាជិកសហគមន៍ព្រៃឡង់ អះអាងថា ខ្លួនបានត្រៀមរួចជាស្រេចក្នុងការផ្លាស់ប្ដូរ ឬបង្កើនមុខរបរថ្មីសម្រាប់ជីវភាពខ្លួន និងគ្រួសារ។
ទន្ទឹមនឹងការដាក់ព្រៃទាំង ៥នេះ ជាតំបន់ព្រៃការពារធម្មជាតិ រដ្ឋាភិបាលក៏នឹងដាក់លក្ខខណ្ឌមួយចំនួនដល់សហគមន៍ក្នុងការអាស្រ័យផលពីព្រៃនោះ ដូចជាការមិនអនុញ្ញាតអោយមានការបរបាញ់សត្វព្រៃ ឬកាប់ព្រៃក្នុងតំបន់ព្រៃស្នូក ជាដើម។
លោក សាយ សំអាល់ រដ្ឋមន្ត្រីក្រសួងបរិស្ថានបានថ្លែងក្នុងសិក្ខាសាលាពិគ្រោះយោបល់ថ្នាក់ជាតិស្ដីពី "ការរៀបចំដាក់ព្រៃឡង់ ព្រៃក្រវាញខាងត្បូង ព្រៃព្រះរកា ព្រៃសៀមប៉ាង ខាងលិច និងព្រៃវ៉ឺនសៃ ជាតំបន់ការពារធម្មជាតិ" នៅសណ្ឋាគារ សូហ្វីថេល ភូកេតត្រា កាលពីព្រឹកថ្ងៃច័ន្ទ ទី២៥ ខែមេសា ថា កត្តាទាំងនេះអាចនឹងជាបញ្ហាប្រឈមដល់ប្រជាជននៅទីនោះ ព្រោះពួកគាត់នៅអាស្រ័យផលពីធម្មជាតិនៅឡើយ។
លោក សាយ សំអាល់៖ «ដរាបណាបើយើងនៅពឹងផ្អែកការធ្វើអាជីវកម្មលើធនធានធម្មជាតិ បញ្ហាហ្នឹងនៅតែចម្រូងចម្រាសអ៊ីចឹងហើយ។ ក៏ប៉ុន្តែនៅពេលដែលយើងផ្លាស់ប្ដូរការគិតគូររបស់យើងមកធ្វើអាជីវកម្មលើខួរក្បាលខ្លួនឯង អាជីវកម្មលើគំនិតច្នៃប្រឌិត ច្នៃបង្កើតរបស់យើង។ ខ្ញុំថា នោះយើងប្រហែលមានឱកាសច្រើនក្នុងការរក្សានូវធនធានធម្មជាតិរបស់យើង»។
លោក ហឿន សុភាព តំណាងម្នាក់នៃសហគមន៍ព្រៃឡង់ បានឆ្លើយតបថា សហគមន៍សាទរនឹងការដាក់បញ្ចូលព្រៃជាតំបន់ការពារធម្មជាតិពីសំណាក់រាជរដ្ឋាភិបាលជាខ្លាំង។ លោកបញ្ជាក់ថា ខាងលោកបានត្រៀមខ្លួនរួចជាស្រេចក្នុងការស្វែងរកមុខរបរផ្សេង ដើម្បីទ្រទ្រង់ជីវភាពទៅថ្ងៃអនាគត ព្រោះទាំងធនធានធម្មជាតិ និងជីវចម្រុះនៅក្នុងព្រៃបច្ចុប្បន្ន មានការថយចុះជាលំដាប់ ដោយសារការកាប់បំផ្លាញខុសច្បាស់មួយចំនួន។
លោក ហឿន សុភាព៖ «ខាងយើងគឺបានត្រៀមខ្លួនជាស្រេចផងដែរ គឺបានន័យថា យើងត្រៀមខ្លួនទៅនឹងបរិស្ថាន ហើយយើងនឹងច្នៃប្រឌិតលើការដកហូតអនុផល គឺយើងមិនពឹងផ្អែកតែលើធនធានតែមួយគត់ទេ គឺយើងបែរមករកមុខរបរផ្សេងៗ ដូចជាចិញ្ចឹមជ្រូក ចិញ្ចឹមមាន់ និងរកមុខរបរផ្សេងៗទៀត ផ្អែកទៅលើស្ថានភាពជាក់ស្ដែង គឺយើងនៅតែដូរ ទោះបីឯកឧត្ដមមិនផ្សាយក៏ខាងយើងនៅតែដូរ»។
នាយកអង្គការវេទិកានៃអង្គការមិនមែនរដ្ឋាភិបាលស្ដីពីកម្ពុជា (NGO Forum) លោក តឹក វណ្ណរ៉ា បានថ្លែងប្រាប់អាស៊ីសេរី ថា ព្រៃឈើ និងធនធានធម្មជាតិ គឺជាឆ្អឹងខ្នង និងជាជីវិតរបស់ប្រជាកសិករនៅតំបន់ទាំងនោះ ដែលកំពុងពឹងអាស្រ័យពីផល និងអនុផលនៃព្រៃឈើទាំងនោះ។ ជាងនេះទៅទៀត លោកពិតជាចង់ឃើញការគាំទ្រទាំងពីរដ្ឋាភិបាល និងដៃគូពាក់ព័ន្ធ ជួយផ្ដល់មុខរបរ និងជម្រើសថ្មីៗដល់ពួកគាត់៖ «រាជរដ្ឋាភិបាល ក៏ដូចជាដៃគូអភិវឌ្ឍន៍ក្នុងការធ្វើពាណិជ្ជកម្មក្នុងលក្ខណៈសិប្បកម្មទៅដល់ប្រជាជនដើម្បីអោយពួកគាត់មានជំនាញក្នុងការផលិត ទាក់ទងរបស់ចេញពីធម្មជាតិអោយស្របទៅតាមលក្ខន្តិក បទបញ្ជានៃច្បាប់»។
ការដាក់ព្រៃឡង់ និងព្រៃចំនួន ៤ទៀត ជាតំបន់ព្រៃការពារនេះ ត្រូវបានប្រកាសដោយលោក ហ៊ុន សែន កាលពីថ្ងៃទី៣១ ខែមីនា ឆ្នាំ២០១៦។ ព្រៃឡង់ លាតសន្ធឹកលើខេត្តចំនួន ៤ គឺខេត្តព្រះវិហារ ក្រចេះ ស្ទឹងត្រែង និងកំពង់ធំ ប៉ុន្តែសម្រាប់ការគ្រោងដាក់ព្រៃឡង់ ជាតំបន់ព្រៃការពារ គឺរាប់បញ្ចូលខេត្តចំនួន៣ ប៉ុណ្ណោះ គឺមិនមែនរាប់បញ្ចូលខេត្តព្រះវិហារ នោះទេ។ កត្តានេះត្រូវបានតំណាងសហគមន៍ព្រៃឡង់ មិនពេញចិត្ត និងទទូចអោយរាប់បញ្ចូលទាំង ៤ខេត្ត។
បើទោះជារដ្ឋមន្ត្រីក្រសួងបរិស្ថាន លោក សាយ សំអាល់ បានបញ្ជាក់ថា សិក្ខាសាលានេះជាការពិភាក្សាចុងក្រោយជាមួយនឹងដៃគូពាក់ព័ន្ធ មុននឹងដាក់ស្នើរាជរដ្ឋាភិបាលសុំសេចក្ដីសម្រេច តែលោក ចាយ សាមិត្ត ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានរដ្ឋបាលការពារ និងអភិរក្សធម្មជាតិ នៃក្រសួងបរិស្ថាន បានអោយដឹងថា នេះជាការសិក្សាជំហានបឋម ដូច្នេះទើបមានតែខេត្ត៣ ដែលបានរាប់បញ្ចូល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។