គណៈកម្មការគ្រប់គ្រងគ្រោះមហន្តរាយខេត្តកំពត អំពាវនាវឲ្យប្រជាពលរដ្ឋបង្កើនការយកចិត្តទុកដាក់ និងប្រុងប្រយ័ត្នខ្ពស់ ខណៈដែលប្រព័ន្ធវាស់ស្ទង់កម្ពស់ទឹកជំនន់បានឲ្យដឹងថា ស្ថានភាពទឹកបានឡើងដល់កម្រិតប្រកាសអាសន្ន។
បើទោះជាស្ថានភាពទឹកបានឡើងដល់កម្រិតប្រកាសអាសន្ននៅតាមក្រុង និងស្រុកមួយចំនួននៃខេត្តកំពត ប៉ុន្តែស្ថានភាពទឹកផ្នែកខាងលើទំនប់វារីអគ្គិសនីកំចាយ នៅមិនទាន់ដល់កម្រិតប្រកាសអាសន្ននៅឡើយទេគិតត្រឹមល្ងាចថ្ងៃទី២៦ កក្កដា។ តាមរយៈហ្វេសប៊ុក (facebook) របស់រដ្ឋបាលសាលាខេត្តកំពត បញ្ជាក់ថា កម្ពស់ទឹកនៅលើទំនប់វារីអគ្គិសនីកំចាយ មានកម្ពស់ ១៤៩ម៉ែត្រ ខណៈដែលភូមិឃុំមួយចំនួននៅក្នុងស្រុកទឹកឈូ បានរងការលិចជាបណ្ដើរៗហើយ។
អាជ្ញាធរខេត្តបានជូនដំណឹងឲ្យប្រជាពលរដ្ឋមានការយកចិត្តទុកដាក់ និងប្រុងប្រយ័ត្នខ្ពស់ចំពោះគ្រោះថ្នាក់ផ្សេងៗដែលអាចកើតឡើងជាយថាហេតុ ពិសេសប្រុងប្រយ័ត្នចំពោះក្មេងតូចៗកុំឲ្យលេងទឹក និងត្រូវត្រៀមរៀបចំសម្ភារៈមធ្យោបាយធ្វើដំណើរ ស្បៀងអាហារ និងសត្វពាហនៈ។
តាមសេចក្តីជូនដំណឹងរបស់រដ្ឋបាលខេត្តកំពត មិនបានបញ្ជាក់ថា ជំនន់ទឹកភ្លៀងដែលបណ្ដាលឲ្យលិចភូមិឃុំមួយចំនួនក្នុងស្រុកទឹកឈូ តាមដងមាត់ព្រែកកំពត ដោយសារការបើកទ្វារទឹកបង្ហូរពីវារីអគ្គិសនីនៅលើភ្នំកំចាយ ឬយ៉ាងណានោះទេ ហើយអាស៊ីសេរី ក៏មិនអាចសុំការបំភ្លឺបន្ថែមពីអភិបាលខេត្តកំពត លោក ចាន់ ចេស្ដា បានដែរនៅថ្ងៃទី២៦ កក្កដា ដោយលោកប្រាប់ថាឲ្យចាំមើលតាមហ្វេសប៊ុក។
អ្នកភូមិនៅឃុំកំពង់ក្រែង ស្រុកទឹកឈូ ប្រាប់ថា ទំនប់វារីអគ្គិសនីកំចាយ បានបើកទ្វារបង្ហូរទឹកពីភ្នំកំចាយ តាំងពីយប់ថ្ងៃទី២៥ កក្កដា មក ជាហេតុធ្វើឲ្យមានទឹកឡើងលិចភូមិ។ អ្នកភូមិប្រាប់ថា ពួកគាត់បានឮសំឡេងស៊ីរ៉ែនប្រកាសអាសន្នយ៉ាងតិចណាស់ ៣ដងកាលពីយប់ថ្ងៃទី២៥ កក្កដា ដោយម្ដងនៅម៉ោង ១០យប់ ម្ដងទៀតម៉ោង ១១យប់ និងម៉ោង ២រំលងអធ្រាត្រម្ដងទៀត។
ស្នងការនគរបាលខេត្តកំពត លោក ម៉ៅ ច័ន្ទមធុរិទ្ធិ ឲ្យដឹងនៅល្ងាចថ្ងៃទី២៦ កក្កដា ថា មានពលរដ្ឋជាង ២០០គ្រួសារក្នុងស្រុកទឹកឈូ បានរងការប៉ះពាល់តិចតួចនៅឡើយពីជំនន់ទឹកភ្លៀងនៅខេត្តកំពត។ លោកស្នងការបន្តថា បើសិនភ្លៀងនៅតែបន្តទៀត ក្រុងកំពត ប្រឈមនឹងការលិច ប៉ុន្តែទោះជាយ៉ាងណា លោកបានណែនាំដល់ប៉ុស្តិ៍ប៉ូលិសឲ្យត្រៀមជួយពលរដ្ឋរងគ្រោះ និងណែនាំដល់ពលរដ្ឋកុំឲ្យក្មេងតូចៗលេងទឹក៖ « បើសិនណាមេឃនៅតែភ្លៀង អាហ្នឹងពិបាកដែរ តែបើសិនមេឃរាំងលែងភ្លៀង មិនអីទេ។ បានត្រៀមទូក ត្រៀមអីសម្រាប់ដឹកជញ្ជូនពួកគាត់ ស្បៀង ប្រសិនណាបើវាលិចដូចពីរឆ្នាំមុន អាហ្នឹងយើងដើម្បីជួយពួកគាត់។ ណែនាំទៅដល់ប៉ុស្តិ៍រដ្ឋបាលពួកយើងហើយ ឲ្យប្រាប់ពួកគាត់ សំខាន់បំផុតគឺក្មេងតូចៗ ហើយទី២ គឺសត្វពាហនៈ។ ពួកគាត់ឲ្យយកមកទីទួលសុវត្ថិភាព ពីព្រោះភ្លៀងបីបួនប្រាំថ្ងៃហ្នឹងអត់ឈប់សោះ ភ្លៀងរហូត។ ចឹងប្រសិនណាភ្លៀងនៅធ្លាក់ចឹង វាបញ្ហាប្រឈមសម្រាប់ខេត្តកំពត យើងដែរ »។
ភ្លៀង និងខ្យល់កន្ទ្រាក់បានធ្លាក់ជាប់នៅខេត្តកំពត ក្នុងរយៈពេលជិតមួយសប្ដាហ៍មកនេះ។ ទឹកសមុទ្រនៅព្រែកកំពតម្ដុំមុខសាលាខេត្ត បានហក់ឡើងខ្លាំងនៅថ្ងៃទី២៦ កក្កដា គឺសល់តែកន្លះម៉ែត្រទៀត នឹងលិចចូលក្នុងក្រុងកំពត ខណៈដែលត្រើយម្ខាងទៀតនៃក្រុងកំពត ទឹកបានជន់លិចជាបណ្ដើរៗហើយ។ ចំណែកអ្នកនេសាទតាមសមុទ្រ បានផ្អាកសកម្មភាពនេសាទនៅសមុទ្រជាច្រើនថ្ងៃមកហើយ។
សាលាខេត្តកំពត ក៏បានអំពាវនាវឲ្យពលរដ្ឋប្រុងប្រយ័ត្នបង្ការក្នុងពេលមានការហូរគំហុកទឹកភ្លៀងនៅព្រែកកំពត និងទឹកឈូ ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។