អាជ្ញាធរមូលដ្ឋាន និងប្រជាពលរដ្ឋខ្លះនៅស្រុកស្រីស្នំ ចម្ងាយប្រមាណជាង ១០០គីឡូម៉ែត្រភាគខាងត្បូងឆៀងខាងលិចពីទីរួមខេត្តសៀមរាប បាននាំគ្នាឡើងភ្នំស្រីស្នំ ដែលស្ថិតនៅភូមិដំណាក់ដំរី ឃុំស្លែងស្ពាន ដើម្បីពិនិត្យមើលរណ្ដៅធំៗ និងជ្រៅ ដែលក្រុមហ៊ុនចិន បានជីក និងបន្សល់ទុកស្លាកស្នាមនៅឡើយ។
ការនាំគ្នាឡើងភ្នំទៅពិនិត្យមើលរណ្ដៅទាំងនោះ គឺក្រោយពេលដែលក្រុមហ៊ុនចិន បានបញ្ចប់ការងាររបស់គេ និងចាកចេញពីកន្លែងការដ្ឋានអស់ទៅហើយ។
តើរណ្ដៅដែលក្រុមហ៊ុនចិន បានប្រើម៉ាស៊ីនជីកដែលមានទំហំធំ និងជ្រៅនោះ ដើម្បីអ្វី?
សមាជិកក្រុមប្រឹក្សាស្រុក និងប្រជាពលរដ្ឋខ្លះនៅស្រុកស្រីស្នំ ខេត្តសៀមរាប សង្ស័យថា ក្រុមហ៊ុនចិន ដែលឡើងទៅជីកដីនៅលើកំពូលភ្នំរយៈពេលជិត ៣ឆ្នាំមកហើយ អាចជាសកម្មភាពនៃការប្រមូលយករ៉ែមាស ដោយលាក់កំបាំងពីភ្នែកសមត្ថកិច្ចនៃរដ្ឋាភិបាលខ្មែរ។
ការសង្ស័យនេះ កើតមានឡើងនៅពេលដែលក្រុមហ៊ុនចិន បានដកចេញពីការដ្ឋាន ហើយអ្នកភូមិខ្មែរខ្លះបានឡើងទៅពិនិត្យឃើញមានរណ្ដៅធំៗ និងជ្រៅ ដោយសារតែក្រុមហ៊ុនចិន ប្រើម៉ាស៊ីនជីកនៅលើកំពូលភ្នំមិនដឹងជាធ្វើអ្វីច្បាស់លាស់។
សមាជិកម្នាក់នៃក្រុមប្រឹក្សាស្រុកក្រឡាញ់ គឺលោក ស៊ឹម សោភ័ណ។ លោកអះអាងកាលពីរសៀលថ្ងៃពុធ ទី៨ ខែកក្កដា ថា កាលពីថ្ងៃទី៧ ខែកក្កដា កន្លងទៅ លោកបានចំណាយពេលពេញ ១ថ្ងៃ ដើម្បីឡើងភ្នំស្រីស្នំ ដែលស្ថិតក្នុងភូមិដំណាក់ដំរី ឃុំស្លែងស្ពាន។ លោក ស៊ឹម សោភ័ណ មានប្រសាសន៍ទៀតថា មូលហេតុដែលលោកឡើងភ្នំស្រីស្នំ នោះ ដោយសារតែលោកឮព័ត៌មានជាយូរមកហើយថា ក្រុមហ៊ុនចិន ដែលទៅអនុវត្តគម្រោងធ្វើប្រឡាយទឹកនៅស្រុកស្រីស្នំ បានឡើងភ្នំជីកខួងដី ទំនងជាពាក់ព័ន្ធនឹងការរុករករ៉ែមាសខុសច្បាប់។ លោក ស៊ឹម សោភ័ណ បញ្ជាក់ថា នៅពេលដែលលោកឡើងទៅលើភ្នំ គឺលោកបានឃើញរណ្ដៅធំៗ និងជ្រៅ ដែលក្រុមហ៊ុនចិន ជីក គួរឲ្យសង្ស័យដូចព័ត៌មានដែលប្រជាពលរដ្ឋនិយាយនោះមែន៖ «អូ! រណ្ដៅជ្រៅណាស់ អាចម៍ដីច្រើនមែនទែន គេកាយ។ ខ្ញុំបានទៅថតកន្លែងគេកាយហ្នឹងជាកន្លែងដាក់ម៉ាស៊ីនខួង»។
ទោះយ៉ាងណា វិទ្យុអាស៊ីសេរី មិនអាចទាក់ទងអភិបាលស្រុកស្រីស្នំ និងមេឃុំស្លែងស្ពាន ដើម្បីសាកសួរព័ត៌មានជុំវិញរឿងនេះបានថាយ៉ាងណានៅឡើយ នៅថ្ងៃពុធ ទី៨ ខែកក្កដា។
សមាជិកក្រុមប្រឹក្សាស្រុកស្រីស្នំ លោក ហូរ ឈិន មានប្រសាសន៍ថា នៅលើកំពូលភ្នំស្រីស្នំ នោះ កាលពីក្រុមហ៊ុនចិន នៅធ្វើការដ្ឋាន គឺគេហាមឃាត់មិនឲ្យប្រជាពលរដ្ឋខ្មែរចូលទៅជិតទេ សូម្បីតែអាជ្ញាធរស្រុក និងឃុំ ក៏មិនដែលបានចូលទៅដែរ។ សមាជិកក្រុមប្រឹក្សាស្រុកដដែលបញ្ជាក់ថា ក្រុមហ៊ុនចិន ដែលទទួលគម្រោងធ្វើប្រឡាយទឹកស្ទឹងស្រែង បានទៅធ្វើការដ្ឋាននៅលើភ្នំស្រីស្នំ នោះរយៈពេលជិត ៣ឆ្នាំហើយ ទើបតែដកចេញកាលពីខែមិថុនា។
លោក ហូរ ឈិន បញ្ជាក់ទៀតថា តាំងតែពីក្រុមហ៊ុនចិន ឡើងទៅជីកលើភ្នំ គឺលោកឮប្រជាពលរដ្ឋខ្លះនិយាយពីរឿងចិន ជីកយករ៉ែមាសទីនោះ ក៏ប៉ុន្តែលោកមិនដែលឃើញផ្ទាល់ភ្នែកទេ ពីព្រោះតែគេមិនឲ្យចូលទៅទីនោះ៖ «ថារ៉ែមាសនោះឮតៗគ្នាទេ ប៉ុន្តែយើងមិនបានដឹងពិតប្រាកដ ព្រោះលើនោះអត់ឲ្យអ្នកណាឡើងទៅទេ។ ខ្ញុំឆ្ងល់ដែរ ហេតុអ្វីធ្វើប្រឡាយចាំបាច់អីទៅកាយកំពូលភ្នំ ហើយបើកាយភ្នំ ហេតុអ្វីមិនកាយពីជើងភ្នំ?»។
ប្រជាពលរដ្ឋមួយចំនួនទៀតដែលរស់នៅតាមភូមិជាច្រើននៃស្រុកស្រីស្នំ សុទ្ធតែនិយាយថា គេក៏បានឮរឿងក្រុមហ៊ុនចិន ដែលប្រើម៉ាស៊ីនជីករណ្ដៅនៅលើកំពូលភ្នំស្រីស្នំ ដើម្បីយករ៉ែមាសនៅទីនោះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។