អាជ្ញាធរខេត្តឧត្តរមានជ័យ បានជូនដំណឹងទៅអន្តរក្រសួងដែលទទួលបន្ទុកវាស់វែង និងដោះស្រាយសំណងជូនប្រជាពលរដ្ឋ ដែលប៉ះពាល់ដោយសារក្រុមហ៊ុនចិន សាងសង់ទំនប់ទឹកស្ទឹងស្រែងទី២ ឲ្យមកជួបប្រជុំជាមួយប្រជាពលរដ្ឋនៅថ្ងៃច័ន្ទ ទី៣០ ខែឧសភា។
ការជូនដំណឹងដ៏ប្រញាប់ប្រញាល់នេះ ធ្វើឡើងបន្ទាប់ពីប្រជាពលរដ្ឋចំនួន ៥ភូមិមកពី ៣ស្រុក បានលើកគ្នាទៅតវ៉ាដល់ការដ្ឋានក្រុមហ៊ុនចិន ស៊ីណូ ហាយដ្រូ (Sino Hydro) ព្រមទាំងផ្អាកមិនឲ្យបន្តការងារសាងសង់ទំនប់ទឹកទៅមុខទៀតបានផង។
ប្រជាពលរដ្ឋប្រមាណ ២០០នាក់មកពីភូមិចំនួន៥ នៃស្រុកចំនួនបីផ្សេងៗគ្នា នៅតែតវ៉ាប្រឆាំងនឹងក្រុមហ៊ុនចិន ស៊ីណូ ហាយដ្រូ ដែលកំពុងតែអនុវត្តគម្រោងសាងសង់ទំនប់ទឹកស្ទឹងស្រែងទី២ នៅតំបន់ភ្នំអាតោ នៃខេត្តឧត្តរមានជ័យ នៅព្រឹកថ្ងៃអាទិត្យ ទី២៩ ខែឧសភា។
កាលពីថ្ងៃទី២៨ ខែឧសភា កន្លងទៅ ក្រុមអ្នកភូមិប្រមាណជាង ១០០នាក់ បានលើកគ្នាទៅតវ៉ា ព្រមទាំងរារាំងក្រុមហ៊ុនចិន មិនឲ្យដំណើរការសាងសង់ទំនប់ទឹកតទៅទៀតម្ដងរួចមកហើយ។ ក្រុមប្រជាពលរដ្ឋដែលលើកគ្នាទៅតវ៉ាប្រឆាំងនឹងក្រុមហ៊ុនចិន មានមកពីឃុំលំទង ស្រុកអន្លង់វែង មកពីសង្កាត់កូនក្រៀល ក្រុងសំរោង និងភូមិស្រះកែវ ឃុំពង្រ ស្រុកចុងកាល់ ច្រើនជាងគេ។
តំណាងប្រជាពលរដ្ឋដែលដឹកនាំការតវ៉ាដោយសុំមិនបញ្ចេញឈ្មោះ មានប្រសាសន៍កាលពីរសៀលថ្ងៃអាទិត្យ ទី២៩ ខែឧសភា ថា ប្រជាពលរដ្ឋមកពី ៥ភូមិ កំពុងព្រួយបារម្ភខ្លាចក្រែងក្រុមហ៊ុនចិន ដែលសាងសង់ទំនប់ទឹកស្ទឹងស្រែងទី២ មិនទូទាត់សំណងដែលប៉ះពាល់នានាជូនពួកគេ។ បុរសដដែលបញ្ជាក់ថា តាមកិច្ចសន្យា ក្រុមហ៊ុនចិន ស៊ីណូ ហាយដ្រូ នឹងប្រើពេល ៤ឆ្នាំដើម្បីសាងសង់ទំនប់ទឹកស្ទឹងស្រែងទី២ នៅតំបន់ភ្នំអាតោ ឲ្យចប់រួចរាល់ ហើយរហូតមកដល់ពេលនេះ ក្រុមហ៊ុនចិន បានសាងសង់ទំនប់ទឹករយៈពេលជិត ៣ឆ្នាំហើយ ដោយបង្កឲ្យមានការប៉ះពាល់លើដីស្រែចម្ការ និងផលដំណាំអ្នកភូមិជាច្រើន ប៉ុន្តែគេមិនទាន់បានទទួលសំណងអ្វីនៅឡើយ៖ « គោលការណ៍របស់ប្រជាពលរដ្ឋ ទី១ គាត់ចង់បានសំណងជាលុយកាក់។ ទី២ ដីស្រែចម្ការមិនដឹងជាដោះដូរថ្មីនៅកន្លែងណា ?»។
ទោះបីជាយ៉ាងណា វិទ្យុអាស៊ីសេរី មិនអាចស្វែងរកការទាក់ទងតំណាងក្រុមហ៊ុនចិន ស៊ីណូ ហាយដ្រូ នោះ ដើម្បីសុំការអធិប្បាយជុំវិញការតវ៉ារបស់ប្រជាពលរដ្ឋបានថាយ៉ាងណានៅឡើយ នៅថ្ងៃអាទិត្យ ទី២៩ ខែឧសភា។
ចំណែកអភិបាលខេត្តឧត្តរមានជ័យ លោក ស ថាវី មានប្រសាសន៍ថា ជាច្រើនខែមកហើយ ក្រុមការងារអន្តរក្រសួងមានដូចជា ក្រសួងសេដ្ឋកិច្ច និងហិរញ្ញវត្ថុ និងក្រសួងធនធានទឹក ដែលសហការជាមួយរដ្ឋបាលសាលាខេត្តឧត្តរមានជ័យ បានចុះវាស់វែងដីធ្លីជំរឿនការប៉ះពាល់របស់ប្រជាពលរដ្ឋ ដោយសារការសាងសង់ទំនប់ទឹកស្ទឹងស្រែងទី២ នេះជាបន្តបន្ទាប់ មិនព្រងើយកន្តើយមិនដោះស្រាយដូចអ្នកភូមិយល់ឃើញនោះឡើយ។ អាជ្ញាធរខេត្តឧត្តរមានជ័យ ពន្យល់ថា ទំនប់ទឹកស្ទឹងស្រែងទី២ នេះ គឺជាគម្រោងរបស់រដ្ឋាភិបាល ដែលបានកម្ចីពីប្រទេសចិន។ វាមិនមែនជាគម្រោងវិនិយោគឯកជនទេ គឺវាជាទំនប់ទឹកសម្រាប់ផ្គត់ផ្គង់ការស្រោចស្រពវិស័យកសិកម្ម ដែលប្រជាពលរដ្ឋនឹងបានទទួលផលប្រយោជន៍សម្រាប់អនាគត។
លោក ស ថាវី បញ្ជាក់ថា ដោយសារតែប្រជាពលរដ្ឋជាច្រើនលើកគ្នាទៅតវ៉ាទាមទារសំណងដែលប៉ះពាល់ដោយសារការជីកទំនប់ទឹកនេះ គឺលោកបានជូនដំណឹងទៅមន្ត្រីអន្តរក្រសួង ឲ្យមកជួបជាមួយប្រជាពលរដ្ឋជាបន្ទាន់នៅថ្ងៃច័ន្ទ ទី៣០ ខែឧសភា៖ « យើងបានរាយការណ៍ទៅប្រធានអន្តរក្រសួងហើយ គាត់ថាថ្ងៃច័ន្ទ គាត់នឹងចុះទៅជួបជាមួយប្រជាពលរដ្ឋដែលមានផលប៉ះពាល់ »។
លោក ស ថាវី មានប្រសាសន៍ថា ចាប់តាំងតែពីក្រុមហ៊ុនចិន ទៅអនុវត្តគម្រោងសាងសង់ទំនប់ទឹកស្ទឹងស្រែងទី២ នៅជិតភ្នំអាតោ តាំងពីអំឡុងឆ្នាំ២០១៤ មកនោះ គឺលោកមិនដឹងទេ ថាតើវាធ្វើឲ្យប៉ះពាល់ដល់ដីស្រែចម្ការ ដីលំនៅឋាន ដីព្រៃសហគមន៍ និងផលដំណាំរបស់ប្រជាពលរដ្ឋអស់ប៉ុន្មានហិកតារច្បាស់លាស់នៅឡើយ ប៉ុន្តែលោកដឹងថា ដីភូមិស្រះកែវ ឃុំពង្រ នៃស្រុកចុងកាល់ ដែលមានប្រជាពលរដ្ឋកំពុងរស់នៅជាង ១៥០គ្រួសារ គឺប៉ះពាល់ទាំងស្រុង ហើយនឹងត្រូវរុះរើទៅនៅកន្លែងថ្មី។
តំណាងអ្នកភូមិស្រះកែវ អ្នកស្រី ប៉ាង លួង មានប្រសាសន៍ថា ប្រជាពលរដ្ឋនៅក្នុងភូមិរបស់គាត់ និងប្រជាពលរដ្ឋមកពីស្រុកដទៃទៀត បានរួមគ្នាតវ៉ាប្រឆាំងនឹងក្រុមហ៊ុនចិន ២ថ្ងៃជាប់ៗគ្នាមកហើយ ដើម្បីឲ្យក្រុមហ៊ុនចិន និងអាជ្ញាធរ ទទួលខុសត្រូវលើការប៉ះពាល់នានាដែលបណ្ដាលមកពីការសាងសង់ទំនប់ទឹកស្ទឹងស្រែងទី២។
ស្ត្រីដដែលបញ្ជាក់ថា សំណងទាំងនោះ គឺគិតតាំងពីការរកដីថ្មីមកឲ្យប្រជាពលរដ្ឋ និងការទូទាត់ទៅលើដំឡូងមីជាច្រើនហិកតារ ដែលប្រជាពលរដ្ឋខ្ចីលុយធនាគារយកទៅដាំដុះ ហើយត្រូវក្រុមហ៊ុនចិន ឈូសបំផ្លាញអស់កាលពីឆ្នាំ២០១៥៖ « ខ្ញុំចង់ឲ្យដោះស្រាយសំណងឲ្យបានលឿនបំផុត ពីព្រោះរហូតដល់ពេលនេះទៅហើយ សំណងក៏មិនដឹងនៅឯណា ?»។
អ្នកភូមិស្រះកែវ ឲ្យដឹងថា ចាប់តាំងតែពីក្រុមហ៊ុនចិន មកធ្វើការដ្ឋានសាងសង់ទំនប់ទឹកស្ទឹងស្រែងទី២ កាលពីអំឡុងឆ្នាំ២០១៤ រហូតមកដល់ពេលនេះ រយៈពេលជិត ៣ឆ្នាំហើយ។ ពួកគេធ្លាប់ធ្វើការតវ៉ាទាមទារសំណងដែលប៉ះពាល់ដោយសារទំនប់ទឹកនេះចំនួន ៣លើកមកហើយ នៅតែមិនទាន់ដឹងយ៉ាងណានៅឡើយ។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តឧត្តរមានជ័យ លោក ស្រី ណារ៉េន ជំរុញឲ្យរដ្ឋាភិបាល គួរតែប្រញាប់ប្រញាល់ដោះស្រាយការប៉ះពាល់នានាទៅឲ្យប្រជាពលរដ្ឋឲ្យបានឆាប់រហ័ស។ មន្ត្រីសមាគមការពារសិទ្ធិមនុស្សដដែលយល់ថា ការយឺតយ៉ាវនៃការដោះស្រាយសំណងនានាទៅឲ្យប្រជាពលរដ្ឋ ដែលប៉ះពាល់ដោយការសាងសង់ទំនប់ទឹកស្ទឹងស្រែងទី២ នោះ វាអាចនឹងធ្វើឲ្យជីវភាពប្រជាពលរដ្ឋជាច្រើនរយគ្រួសារ ធ្លាក់ចុះដោយសារតែការជំពាក់បំណុលមីក្រូហិរញ្ញវត្ថុ និងគ្មានដីធ្លីធ្វើកសិកម្ម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។