កម្លាំងជំនាញស្នងការដ្ឋាននគរបាលខេត្តព្រះសីហនុ បើកយុទ្ធនាការបង្ក្រាបកន្លែងផលិតគ្រឿងញៀន និងឃាត់ខ្លួនជនបរទេស ៥នាក់ ដែលសង្ស័យក្នុងករណីផលិត និងកែច្នៃដោយខុសច្បាប់នូវសារធាតុញៀននាមូលដ្ឋានក្រុងព្រះសីហនុ។
មន្ត្រីសង្គមស៊ីវិល និងពលរដ្ឋ គាំទ្រសកម្មភាពចុះបង្ក្រាបគ្រឿងញៀនរបស់កម្លាំងសមត្ថកិច្ចជំនាញខេត្តព្រះសីហនុ នៅពេលនេះ។
ស្នងការរងនគរបាលខេត្តព្រះសីហនុ លោក ស៊ុន សុផាត បានបង្ហាញមុខជនសង្ស័យជាជនបរទេសចំនួន ៥នាក់ ដែលសមត្ថកិច្ចឃាត់ខ្លួនក្នុងយុទ្ធនាការចុះបង្ក្រាបបទល្មើសផលិតកែច្នៃដោយខុសច្បាប់នូវសារធាតុញៀន ដែលកម្លាំងនគរបាលប្រឆាំងបទល្មើសគ្រឿងញៀនចុះបង្ក្រាប កាលពីថ្ងៃទី២៤-២៥ ខែធ្នូ។
លោកបញ្ជាក់ថា ជនសង្ស័យទាំង ៥នាក់នោះមានស្ត្រីចំនួន ៣នាក់ និងមានសញ្ជាតិផ្សេងៗគ្នារួមមាន ជនជាតិអ៊ុយក្រែន (Ukraine) ជនជាតិឆេកូ (Czech Republic) ជនជាតិហ្វាំងឡង់ដ៍ (Finland) ជនជាតិរុស្ស៊ី និងជនជាតិអាមេរិក ជាមេខ្លោងផលិតគ្រឿងញៀន។
លោក ស៊ុន សុផាត ដែលជាប្រធានការិយាល័យកណ្ដាលប្រឆាំងបទល្មើសផងនោះ ឲ្យដឹងថា ការឈានដល់ចាប់ឃាត់ខ្លួនជនបរទេសជាប់សង្ស័យផលិត កែច្នៃ និងចែកចាយគ្រឿងញៀនទាំង ៥នាក់ ដោយសារមានកិច្ចសហការផ្តល់ព័ត៌មានពីប្រជាពលរដ្ឋនាមូលដ្ឋានក្រុងព្រះសីហនុ។
លោកបន្តថា យុទ្ធនាការចុះស្រាវជ្រាវបង្ក្រាបកន្លែងផលិតគ្រឿងញៀននេះ សមត្ថកិច្ចបានរកឃើញម៉ាស៊ីនសម្រាប់ផលិតគ្រឿងញៀនចំនួន ១គ្រឿង ម្សៅមានពណ៌ផ្សេងៗគ្នាជាច្រើនពណ៌ ដែលសង្ស័យថាជាសារធាតុផ្សំថ្នាំញៀនជាច្រើនកញ្ចប់ និងកំប៉ុង ជញ្ជីងសម្រាប់ថ្លឹងគ្រឿងញៀន និងសារធាតុផ្សំថ្នាំញៀន ព្រមទាំងសម្ភារផ្សេងៗមួយចំនួនទៀត។
លោក ស៊ុន សុផាត ឲ្យដឹងថា បច្ចុប្បន្ន ជនសង្ស័យក្នុងសំណុំរឿងផលិត កែច្នៃ និងចែកចាយគ្រឿងញៀនទាំង ៥នាក់ ត្រូវកម្លាំងជំនាញការិយាល័យកណ្ដាលប្រឆាំងបទល្មើស នៃស្នងការដ្ឋាននគរបាលខេត្តព្រះសីហនុ បញ្ជូនទៅកាន់តុលាការ ចាត់ការតាមនីតិវិធីកាលពីព្រឹកថ្ងៃទី២៧ ខែធ្នូ។ លោកសង្កត់ធ្ងន់ថា យុទ្ធនាការចុះស្រាវជ្រាវឈានដល់បង្ក្រាបកន្លែងគ្រឿងញៀន និងបទល្មើសផ្សេងៗនាមូលដ្ឋានខេត្តព្រះសីហនុ របស់កម្លាំងនគរបាលជំនាញ នឹងបន្តជាបន្តបន្ទាប់នាថ្ងៃអនាគត៖ « ឲ្យតែមានវត្តមានលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ នៅទីនេះ គឺមិនលើកលែងជាដាច់ខាតនូវបទល្មើសគ្រឿងញៀននាមូលដ្ឋានខេត្តនេះ។ ករណីនេះ ឯកឧត្តមឧត្តមសេនីយ៍ទោ ជួន ណារិន្ទ ក៏ដូចជាកម្លាំងជំនាញរបស់យើងដែរ គឺបានប្ដេជ្ញាចិត្តប្រឆាំងដាច់ខាតនូវករណីជួញដូរ ឬរក្សាទុកនូវសារធាតុគ្រឿងញៀនគ្រប់ប្រភេទ ដែលមាននៅក្នុងខេត្តព្រះសីហនុ ទាំងមូល »។
សកម្មភាពចុះបង្ក្រាបទីតាំងផលិត និងចែកចាយគ្រឿងញៀនមានលទ្ធផលវិជ្ជមានជាបន្តបន្ទាប់របស់កម្លាំងសមត្ថកិច្ចនគរបាល និងកងរាជអាវុធហត្ថនាខេត្តទេសចរណ៍មួយនេះ ទទួលបានការគាំទ្រច្រើនពីមន្ត្រីសង្គមស៊ីវិល និងប្រជាពលរដ្ឋរស់នៅខេត្តព្រះសីហនុ។
អ្នកសម្របសម្រួលអង្គការលីកាដូ (LICADHO) ប្រចាំខេត្តព្រះសីហនុ លោក ប៊ួន ណារិទ្ធិ គាំទ្រសកម្មភាពចុះបង្ក្រាប និងចាប់ជនល្មើសគ្រឿងញៀន បញ្ជូនទៅកាន់តុលាការ ដើម្បីផ្ដន្ទាទោសជាបន្តបន្ទាប់ ពិសេសនៅឆ្នាំ២០១៦ មានលទ្ធផលវិជ្ជមានគួរឲ្យកត់សម្គាល់។ ទន្ទឹមគ្នានេះ លោកកត់សម្គាល់ថា មេឈ្មួញគ្រឿងញៀនធំៗ សមត្ថកិច្ចមិនទាន់បង្ក្រាបបានច្រើនទេ គឺបង្ក្រាបបានតែអ្នកចែកចាយតូចតាចប៉ុណ្ណោះ។
ក្នុងនាមអ្នកឃ្លាំមើលសង្គម លោក ប៊ួន ណារិទ្ធិ សំណូមពរដល់ស្ថាប័នតុលាការ ធ្វើយ៉ាងណាត្រូវផ្ដន្ទាទោសជនល្មើសលើសំណុំរឿងគ្រឿងញៀនឲ្យបានធ្ងន់ធ្ងរ ព្រោះពួកនេះនៅពេលរួចផុតពីការជាប់ក្នុងពន្ធនាគារ ជនធ្លាប់ប្រព្រឹត្តល្មើសគ្រឿងញៀនភាគច្រើន បានបន្តសកម្មភាពចែកចាយគ្រឿងញៀននេះជាបន្តទៀត៖ « ស្ថាប័នតុលាការខេត្តព្រះសីហនុ ក៏ដូចជាអយ្យការអមសាលាដំបូងខេត្តនេះ មេត្តាចាត់វិធានការផ្ដន្ទាទោសដល់មុខសញ្ញាជួញដូរគ្រឿងញៀនទាំងអស់ឲ្យបានធ្ងន់ធ្ងរបំផុត ពីព្រោះកន្លងមក ពួកគេតែងតែរត់ការបាននៅក្រៅឃុំ ហើយបានមកលក់គ្រឿងញៀនបន្តទៀត មានន័យថា ចេញពីពន្ធនាគារមក ជនគ្រឿងញៀនទាំងនេះមិនរាងចាលទេ ហើយបានមកលក់ដូរគ្រឿងញៀនដដែល គឺលក់ស្ដារដើម។ អ៊ីចឹងហើយបានជាឈ្មួញគ្រឿងញៀនទាំងហ្នឹង វាមិនខ្លាចរអាច្បាប់នោះទេ »។
របាយការណ៍ការិយាល័យបង្ក្រាបបទល្មើសគ្រឿងញៀន នៃស្នងការដ្ឋាននគរបាលខេត្តព្រះសីហនុ សម្រាប់ឆ្នាំ២០១៦ បង្ហាញថា ចាប់ពីខែមករា ដល់ថ្ងៃទី២៧ ខែធ្នូ សមត្ថកិច្ចបង្ក្រាបបទល្មើសបានចំនួន ៨៥ករណី ក្នុង ១៥២មុខសញ្ញា និងមានស្ត្រីចំនួន ២៣នាក់។
ករណីជួញដូរ និងចែកចាយគ្រឿងញៀនមានចំនួន ៦៣ករណី ឃាត់ខ្លួនជនសង្ស័យ ១៥២នាក់ មានស្ត្រី ២១នាក់។ ករណីរក្សាទុកសារធាតុញៀន និងការដឹកជញ្ជូនមាន ១៥ករណី ឃាត់ខ្លួនជនសង្ស័យ ២៣នាក់ មានស្ត្រី ១នាក់។ ករណីប្រើប្រាស់គ្រឿងញៀនមានចំនួន ១៧ករណី មានស្ត្រី ១នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។