ប្រទេសជាច្រើននៅជុំវិញពិភពលោក កំពុងភ័យព្រួយដោយសារតែជំងឺឆ្លងដ៏ឆាប់រហ័សបានកើតមានជាបន្តបន្ទាប់។ ក្រុមវេជ្ជបណ្ឌិតផ្នែកវេជ្ជសាស្ត្រមើលឃើញថា បញ្ហាជំងឺឆ្លងវាពុំត្រឹមតែជាកង្វល់របស់ប្រទេសដែលបានផ្ទុះចេញជាសញ្ញាប៉ុណ្ណោះទេ គឺវាជាក្តីបារម្ភរបស់ពិភពលោកទាំងមូលដែលត្រូវតែរួមគ្នាប្រយុទ្ធប្រឆាំង។
ប្រតិភូវេជ្ជបណ្ឌិតប្រមាណ ៣០០នាក់មកពីប្រទេសជុំវិញពិភពលោក បានជួបពិភាក្សាក្នុងសន្និសីទវិទ្យាសាស្ត្រមួយ នៅខេត្តសៀមរាប កាលពីព្រឹកថ្ងៃអង្គារ ទី២៩ ខែវិច្ឆិកា។
ក្រុមប្រតិភូវេជ្ជបណ្ឌិតទាំងនោះមកពីប្រទេសតំបន់ប៉ាស៊ីហ្វិកខាងលិច តំបន់អាស៊ីខាងត្បូង តំបន់អាស៊ីអាគ្នេយ៍ អាស៊ីបូព៌ា អឺរ៉ុប អាមេរិក ទ្វីបអាហ្វ្រិក និងអូសេអានី (Oceany) ជាដើម។ ក្រុមប្រតិភូវេជ្ជបណ្ឌិតទាំងនោះបានជួបពិភាក្សាគ្នាដើម្បីចែករំលែកចំណេះដឹង និងធ្វើកិច្ចសហប្រតិបត្តិការរួមគ្នាប្រយុទ្ធប្រឆាំងនឹងជំងឺឆ្លងដែលកំពុងតែគំរាមកំហែងនៅតាមតំបន់ជាច្រើននៃពិភពលោក។
រដ្ឋមន្ត្រីក្រសួងសុខាភិបាលនៃប្រទេសកម្ពុជា ដែលអញ្ជើញចូលរួមជាអធិបតីនៅក្នុងសន្និសីទវិទ្យាសាស្ត្រ លើកទី៨ ប្រចាំតំបន់ប៉ាស៊ីហ្វិកខាងលិច និងតំបន់អាស៊ីអាគ្នេយ៍ គឺលោក ម៉ម ប៊ុនហេង។ លោកថ្លែងនៅលើវេទិកានៅព្រឹកថ្ងៃអង្គារ ទី២៩ ខែវិច្ឆិកា ថា បច្ចុប្បន្នពុំមានប្រទេសណាមួយអាចដោះស្រាយជាបន្ទាន់នូវបញ្ហាសុខភាពសាធារណៈ ដែលប្រកាសអាសន្នតែម្នាក់ឯងបានឡើយ។ ពិភពលោកទាំងមូលត្រូវតែរួមគ្នាដើម្បីប្រយុទ្ធប្រឆាំងនឹងជំងឺឆ្លងដែលគំរាមកំហែងដល់សុខភាពសាធារណៈទាំងអស់គ្នា៖ «ពិភពលោកកាន់តែខិតជិតគ្នាតាមរយៈការកើនឡើងនៃជើងហោះហើរ និងភាពរីកចម្រើនផ្នែកសេដ្ឋកិច្ច។ ការកើនឡើងនៃចំនួនប្រជាពលរដ្ឋ និងការប្រឈមមុខយ៉ាងជិតស្និទ្ធរវាងមនុស្សនិងសត្វ ព្រមទាំងការផ្លាស់ប្ដូរនៃអាកាសធាតុ បានជះឥទ្ធិពលដល់បរិស្ថាន ដែលនឹងធ្វើឱ្យហានិភ័យក៏កើនឡើងដែរ»។
មជ្ឈមណ្ឌលប្រយុទ្ធនឹងជំងឺរបស់សហរដ្ឋអាមេរិក (US-CDC) ព្រមទាំងអង្គការសុខភាពពិភពលោក (WHO) ដែលជាអ្នកឧបត្ថម្ភឱ្យរៀបចំសន្និសីទវិទ្យាសាស្ត្រនេះឡើង ក៏កំពុងមានក្តីកង្វល់ចំពោះជំងឺឆ្លងជាច្រើនប្រភេទ ដែលកំពុងតែគំរាមកំហែងសុខភាពសាធារណៈនៅក្នុងពិភពលោកដែរ។
អ្នកនាំពាក្យក្រសួងសុខាភិបាលកម្ពុជា និងជាប្រធាននាយកដ្ឋានប្រយុទ្ធប្រឆាំងជំងឺឆ្លង លោក លី សូវ៉ាន់ មានប្រសាសន៍ថា បច្ចុប្បន្ននៅពេលដែលពិភពលោក និងប្រទេសជាច្រើនកំពុងប្រឈមមុខនឹងជំងឺឆ្លងនៅក្នុងប្រទេសកម្ពុជា ក៏កំពុងព្រួយបារម្ភចំពោះបញ្ហាជំងឺឆ្លងជាច្រើនប្រភេទដែរ៖ «បច្ចុប្បន្ននេះយើងព្រួយបារម្ភ គឺជំងឺផ្ដាសាយថ្មីដែលយើងធ្លាប់ផ្ទុះកាលពីឆ្នាំ២០០៩ និងកាលពីឆ្នាំ១៩១៨-១៩១៩។ ទី២ គឺជំងឺដែលកំពុងកើតមានដូចជាអេបូឡា (Ebola) និងជំងឺផ្លូវដង្ហើមមជ្ឈិមបូព៌ាជាដើម»។
លោក លី សូវ៉ាន់ បញ្ជាក់ថា ការជួបប្រជុំគ្នារបស់ប្រតិភូវេជ្ជបណ្ឌិតនៅឯខេត្តសៀមរាប ពេលនេះ គឺជាឱកាសដ៏ល្អក្នុងការពិភាក្សាអំពីការរកឃើញផ្នែកវិទ្យាសាស្ត្រថ្មីៗ ដើម្បីចែករំលែកជំនាញ និងរួមគ្នា ហើយត្រៀមលក្ខខណ្ឌឆ្លើយតបចំពោះជំងឺឆ្លងដ៏សាហាវទាំងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។