មន្ត្រីជំនាញផ្នែកពេទ្យការងារនៃក្រសួងការងារ និងបណ្ដុះបណ្ដាលវិជ្ជាជីវៈ តម្រូវអោយអ្នកគ្រប់គ្រងរោងចក្រកាត់ដេរ ជុន ចៅ [CHUN CHAO (Cambodia) Garment Co., Ltd.] ឋិតក្នុងភូមិស្រែជម្រៅ សង្កាត់ចោមចៅ ខណ្ឌពោធិ៍សែនជ័យ កែសម្រួលបរិស្ថានក្នុងរោងចក្រ បន្ទាប់ពីកម្មករប្រមាណ ៤០នាក់ ដួលសន្លប់បន្តបន្ទាប់គ្នានៅព្រឹកថ្ងៃ ទី៤ ខែមីនា។ មន្ត្រីជំនាញពេទ្យការងារបានចុះពិនិត្យស្ថានភាពរោងចក្រនៅថ្ងៃដដែលនេះបានរកឃើញថា បញ្ហាដួលសន្លប់របស់កម្មករនេះ បណ្ដាលមកពីបរិយាកាសក្នុងរោងចក្រមិនល្អ ភាយជាតិគីមី និងការភ័យស្លុតតៗគ្នា។
មន្ត្រីរដ្ឋបាលរោងចក្រ ជុន ចៅ លោក លឹម ហាងគង់ បញ្ជាក់ថា មន្ត្រីជំនាញពេទ្យការងារបានចុះពិនិត្យស្ថានភាពរោងចក្រ បង្គាប់អោយរោងចក្រផ្អាកការងារបណ្ដោះអាសន្ន ហើយអាចដំណើរការឡើងវិញនៅថ្ងៃច័ន្ទ សប្ដាហ៍ក្រោយ។
លោក លឹម ហាងគង់ បន្តថា មន្រ្តីជំនាញក៏បានតម្រូវអោយរោងចក្រកែសម្រួលបរិស្ថានក្នុងរោងចក្រធ្វើយ៉ាងណាអោយមានខ្យល់ចេញចូលគ្រប់គ្រាន់ និងត្រូវផ្លាស់ប្ដូរទីតាំងកង្ហារទឹកមួយចំនួន ដែលមន្រ្តីជំនាញអះអាងថា ដាក់ខុសទីតាំង៖ «អោយអនុវត្តតែម៉ាស៊ីនចម្រោះទម្លាក់ទឹកអោយកម្មករត្រជាក់ហ្នឹងអោយកែមកខាងនេះវិញ កុំអោយដាក់នៅជិតបន្ទប់ទឹក»។
ក្រុមកម្មករនៅរោងចក្រ ជុន ចៅ ប្រមាណ ៤០នាក់ បានដួលសន្លប់នៅពេលចូលធ្វើការបានប្រហែល ២ម៉ោង និងបន្ទាប់ពីមានកម្មការិនីម្នាក់ដួលសន្លប់ដោយជំងឺបេះដូង។ ពួកគេបានរៀបរាប់ថា នៅមុនពេលដួលសន្លប់ ពួកគេមានអាការៈណែនទ្រូង ថប់ដង្ហើម ក្អួតចង្អោរ និងទន់ដៃជើង៖ «រាល់ថ្ងៃអត់អីដល់ថ្ងៃនេះមុនដំបូងសន្លប់តែមួយទេ ដល់ពេលយូរៗទៅសន្លប់ច្រើនទៅៗ។ ខ្ញុំណែនទ្រូងចង់ក្អួតមិនដឹងគេយកខ្ញុំដាក់ឡានថ្មើរម៉ាន មិនដឹងដល់ពេទ្យថ្មើរម៉ានផង។ ពេលហ្នុងខ្ញុំដេរសុខៗ មានបងម្នាក់នៅក្រុមមួយគាត់គាំងបេះដូងគាត់ដួលសន្លប់ ពេលហ្នុងខ្ញុំរាងសើៗដែរ ខ្ញុំទៅបន្ទប់ទឹក ក៏ញ័រដៃញ័រជើងសន្លប់នៅបន្ទប់ទឹកតែម្ដង។ គេហេតុផលរឿងអីគេអត់ទាន់រកឃើញ សន្លប់គ្នាច្រើន អ្នកខ្លះរត់ចេញមកអត់អីទេ អ្នកខ្លះរត់មកក្អួត ដូចខ្ញុំអីរត់មកក្អួតអត់មានរឿងអីសោះ»។
![កម្មកររោងចក្រកាត់ដេរ ជុន ចៅ [CHUN CHAO (Cambodia) Garment Co., Ltd.] នៅសង្កាត់ចោមចៅ ខណ្ឌពោធិ៍សែនជ័យ សម្រាកព្យាបាលនៅគ្លីនិកឯកជនមួយក្រោយពីដួលសន្លប់កាលពីព្រឹកថ្ងៃទី៤ មីនា ឆ្នាំ២០១៦។](https://www.rfa.org/resizer/v2/7CJSAGEIWDJCKYZHUAJB2BVABY.jpg?auth=06ddc850cb41fa05adc7e0eb220ffb87a0fbabac0dded287e3428cee118c42b6&width=800&height=489)
ក្រុមកម្មករត្រូវបានបញ្ជូនទៅសង្គ្រោះនៅបីទីតាំងផ្សេងគ្នា រួមមានមន្ទីរពេទ្យបង្អែកពោធិចិនតុង គ្លីនិកទួលកី និងគ្លីនិក ហ៊ាង មុន្នីវុធ។
វេជ្ជបណ្ឌិត ហ៊ាង មុន្នីវុធ មានប្រសាសន៍ថា កម្មករដែលបានសម្រាកព្យាបាលក្នុងគ្លីនិករបស់លោក បានធូរស្បើយវិញ បន្ទាប់ពីបានដាក់សេរ៉ូមជំនួយកម្លាំង។ លោកថា ពួកគេពុំមានសញ្ញានៃការពុលណាមួយទេ ពោលគឺពួកគេទន់ខ្សោយ និងភិតភ័យតៗគ្នា។ លោកស្នើអោយពួកគេសម្រាក និងទទួលទានអាហារអោយបានគ្រប់គ្រាន់៖ «ខ្ញុំគិតថា ដូចជាគ្មានជំងឺអីទេ ដោយសារយកមកយើងបានឆែកមើលគ្រប់តាំងពីសញ្ញាជីវិតរបស់គាត់តាំងពី អ្វីផ្សេងៗ ដែលយើងបានពិនិត្យមើលគឺអត់មានអីប្រែប្រួលទេ។ គាត់ធូរស្បើយវិញបន្ទាប់ពីដាក់សេរ៉ូម និងចាក់ថ្នាំបំប៉នកម្លាំង និងលើកទឹកចិត្តគាត់ធ្វើអោយស្មារតីគាត់មានសភាពនឹងន គាត់មិនមានបញ្ហាអីទៀតទេ»។
លោកវេជ្ជបណ្ឌិតបញ្ជាក់ដែរថា អ្នកដែលបានដួលសន្លប់មិនគួរចូលធ្វើការវិញភ្លាមៗទេ គឺត្រូវសម្រាកពីការងារយ៉ាងហោចមួយថ្ងៃទៀត។
របាយការណ៍របស់អង្គការអន្តរជាតិផ្នែកការងារ ហៅកាត់ថា អាយឡូ (ILO) រកឃើញថា ការដួលសន្លប់របស់កម្មករក្នុងរោងចក្រនៅពេលកំពុងបំពេញការងារបណ្ដាលមកពីបញ្ហាមួយចំនួនរួមមានបរិយាកាសក្នុងរោងចក្រដែលក្ដៅខ្លាំង និងហប់ សារធាតុគីមី ការថែមម៉ោងច្រើន អាហារខ្វះជីវជាតិ និងបញ្ហាផ្លូវចិត្តជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។