អង្គការខាណា (Khana) បានចេញផ្សាយរបាយការណ៍ប៉ាន់ស្មានថា កម្ពុជាមានអ្នកប្រើប្រាស់គ្រឿងញៀន ១៣.០០០នាក់ ក្នុងនោះអ្នកប្រើប្រាស់ ១.០៨៦នាក់ នៅរាជធានីភ្នំពេញ។ មន្ត្រីក្រសួងមហាផ្ទៃ ទទួលបន្ទុកគ្រឿងញៀនបញ្ជាក់ថា បញ្ហាគ្រឿងញៀនមិនត្រឹមតែវាយលុកនៅតាមទីប្រជុំជន និងទីក្រុងទេ ទន្ទឹមនឹងនេះ ថ្នាំញៀនបានបន្តរីករាយដាល់បន្ថែមទៀតទៅដល់ជនបទដែរ។
សំឡេងអ្នកធ្លាប់ប្រើប្រាស់ថ្នាំញៀន៖ «យើងបាត់បង់អារម្មណ៍ខ្លួនឯងទីមួយយើងលេងគ្រាន់តែយើងដាក់ចូលក្នុងខ្លួនហើយ យើងបែក។ លេងយូរៗទៅយើងបែក គេហៅថាបែក ទី១ យើងចេះតែស្ដាប់ភាសាពីខាងក្រៅៗ គេចង់មកចាប់យើង ប៉ូលិសមកចាប់យើង តាមពិតឥតមានទេ»។
ក្រុមអង្គការមិនមែនរដ្ឋាភិបាលដែលជាដៃគូអភិវឌ្ឍន៍ប្រយុទ្ធប្រឆាំងសារធាតុថ្នាំញៀនបានចាត់ទុកអ្នកប្រើប្រាស់គ្រឿងញៀនថា គឺជាក្រុមគោលដៅដែលរងគ្រោះ ហើយចាំបាច់ណាស់ត្រូវការការពារ និងព្យាបាលដោយយកចិត្តទុកដាក់ពីសង្គម និងក្រុមគ្រួសារ។
ការថ្លែងដូចនេះរបស់មន្ត្រីជាន់ខ្ពស់អង្គការខាណា ធ្វើឡើងនៅក្នុងវេទិកាពិគ្រោះយោបល់ស្ដីពីយុទ្ធនាការគាំទ្រ និងបញ្ឈប់ទណ្ឌកម្មលើអ្នកប្រើប្រាស់ថ្នាំញៀន កាលពីព្រឹកថ្ងៃទី២៧ ខែមិថុនា ក្នុងរាជធានីភ្នំពេញ។
នាយកប្រតិបត្តិនៃអង្គការខាណា លោក ជួប សុខចំរើន ឲ្យដឹងថា មានអ្នកដែលធ្លាប់ប្រើប្រាស់សារធាតុញៀនជាច្រើនមកហើយ ក្រោមការគាំពារកម្មវិធីដោយអង្គការខាណា ចាប់តាំងពីឆ្នាំ២០០៤ មកដែលពួកគេបានវិលត្រឡប់ទៅរកសភាពដើមវិញ។
ថ្វីបើពុំមានតួលេខពិតប្រាកដ លោក ជួប សុខចំរើន យល់ឃើញថា ការធ្វើសមាហរណកម្មរបស់ពួកគេវិញនេះ បញ្ជាក់ថា ប្រសិនបើពុំមានការគាំពារ និងមើលថែពីសង្គមទេ នោះពួកគេនឹងមិនមានឱកាសទៀតឡើយ៖ «មានបងប្អូនដែលគាត់ទទួលបានចំណេះដឹង និងជំនាញតាមរយៈការផ្ដល់ប្រឹក្សារបស់យើង ហើយយើងជំរុញគាត់ និងបញ្ជូនគាត់ទៅរកវិជ្ជាជីវៈហ្នឹង គឺគាត់បានផ្ដាច់ការប្រើប្រាស់គ្រឿងញៀនមែន»។
ប្រធានអាជ្ញាធរជាតិប្រយុទ្ធប្រឆាំងគ្រឿងញៀន លោក កែ គឹមយ៉ាន ថ្លែងកាលពីថ្ងៃទី២៦ ខែមិថុនា ថា អ្នកប្រើប្រាស់ និងជួញដូរគ្រឿងញៀនក្នុងរយៈពេល ៦ខែនៅដើមឆ្នាំ២០១៦ នេះ មានចំនួនកើនឡើង ៨.៤០០នាក់ ធៀបនឹងឆ្នាំ២០១៥។
អតីតអ្នកធ្លាប់ប្រើប្រាស់គ្រឿងញៀន និងផ្ដាច់សារធាតុថ្នាំញៀននេះ គឺលោក អ៊ុក ថា រស់នៅសង្កាត់ស្ទឹងមានជ័យ រាជធានីភ្នំពេញ ពន្យល់ថា ថ្នាំញៀននេះកាលបើចូលក្នុងខ្លួនហើយគឺធ្វើឲ្យបាត់បង់ស្មារតី មានអារម្មណ៍រវើរវាយ សប្បាយ និងភ្លេចអស់ទុក្ខកង្វល់៖ «ទីមួយប្រើប្រាស់គ្រឿងញៀនលើកដំបូងគឺប្រើប្រាស់គ្រាប់។ ប្រើ១គ្រាប់ចែកចេញគ្នាដល់ទៅ ៨នាក់។ វាមានក្លិនឈ្ងុយដល់ក្លិនឈ្ងុយទៅ ជក់ទៅគឺសប្បាយណាស់។ ជក់ទៅសប្បាយមែន ឆ្ងាញ់ជាងមុន។ វាសប្បាយ ធ្វើឲ្យបំបាត់អស់ទុក្ខទាំងប៉ុន្មានដែលយើងមាន»។
មន្ត្រីទទួលបន្ទុកគ្រឿងញៀននៃក្រសួងមហាផ្ទៃ បញ្ជាក់ថា សព្វថ្ងៃកម្ពុជា មានអ្នកប្រើប្រាស់គ្រឿងញៀនជាង ១ម៉ឺននាក់ ក្នុងនោះមានជាង ៧ពាន់នាក់កំពុងទទួលព្យាបាលនៅមណ្ឌលបណ្ដោះអាសន្នទាំងរដ្ឋ និងឯកជនចំនួន ១០។ ការចរាចរគ្រឿងញៀនដែលធំបំផុត ត្រូវគេកំណត់មុខសញ្ញាថា គឺចេញមកពីតំបន់ត្រីកោណមាស។
ដោយឡែក របាយការណ៍របស់អង្គការខាណា វិញរកឃើញថា មានប្រជាពលរដ្ឋជាង ១២លាននាក់ ក្នុងចំណោមបណ្ដាប្រទេសជាង ៩៣ប្រទេស កំពុងប្រើប្រាស់គ្រឿងញៀនតាមរយៈការចាក់សឺរ៉ាំង។ របាយការណ៍នេះក៏បង្ហាញពីតួលេខប៉ាន់ប្រមាណដែរថា ប្រជាជនកម្ពុជា ចំនួន ១៣ម៉ឺននាក់ ប្រើប្រាស់គ្រឿងញៀន តាមរយៈការចាក់សឺរ៉ាំង និងផ្ទាល់។ ក្រៅពីនេះវិញ អ្នករស់នៅក្នុងរាជធានីភ្នំពេញ ប្រមាណ ១.៣០០នាក់។ ទន្ទឹមនឹងអ្នករស់នៅជាមួយជំងឺអេដស៍ ហើយប្រើប្រាស់គ្រឿងញៀនតាមរយៈការចាក់សឺរ៉ាំង ប្រមាណជិត ២៥ភាគរយ (២៤.៨) គឺជាអត្រាមួយដ៏ខ្ពស់បំផុត។
ម្យ៉ាងវិញទៀត នៅមានអត្រាអ្នកប្រើប្រាស់ម្ជុល និងសឺរ៉ាំងឡើងវិញ ដែលមានសារធាតុគ្រឿងញៀនជិត ៣១ភាគរយ (៣១.៩)។
មន្ត្រីក្រសួងមហាផ្ទៃ ទទួលស្គាល់ថា ការទប់ស្កាត់ការរត់ពន្ធគ្រឿងញៀននេះ គឺពុំមែនជារឿងងាយស្រួលឡើយ។ លើសពីនេះ អ្នករកស៊ីគ្រឿងញៀន គឺប៉ិនប្រសប់ជាងសមត្ថកិច្ចទៅទៀត។ បើទោះជាបែបណា ការបង្ក្រាបកន្លងទៅ គេសង្កេតឃើញថា ភាគច្រើនគឺជាមនុស្សដែលមានឥទ្ធិពលនៅក្នុងសង្គម មានបុណ្យស័ក្ដិ និងខ្នងបង្អែក អាចជាមន្ត្រីក្នុងជួររដ្ឋាភិបាល ឬថាអាចជាសមត្ថកិច្ចជាដើម។
អគ្គលេខាធិការនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន នាយឧត្ដមសេនីយ៍ មាស វីរិទ្ធ ថ្លែងថា បញ្ហាគ្រឿងញៀនគឺជាបន្ទុកមិនមែនតែកម្ពុជាទេ ប៉ុន្តែកង្វល់នេះគឺនៅជុំវិញពិភពលោក។ លោកបន្តថា កម្ពុជាគឺប្រទេសដែលឆ្លងកាត់ និងការរត់ពន្ធគ្រឿងញៀន។ ការចរាចរគ្រឿងញៀននេះ បានទាញឲ្យកម្ពុជា ត្រូវជួបនូវវិបត្តិដ៏ធ្ងន់ធ្ងរនេះដែរ៖ «ការផលិត ការចរាចរ ការដាំដុះ និងការជួញដូរគ្រឿងញៀនទាំងធម្មជាតិ និងសំយោគ គឺមានការកើនឡើង ហើយក្នុងនោះចំនួនអ្នកប្រើប្រាស់គ្រឿងញៀននៅលើពិភពលោកក៏មានការកើនឡើងដែរ»។
កាលពីថ្ងៃទី២៦ ខែមិថុនា នាយកដ្ឋានប្រយុទ្ធប្រឆាំងគ្រឿងញៀន បានដុតបំផ្លាញគ្រឿងញៀនជិត ១.៦០០គីឡូក្រាម (១.៥៦៦) ដែលគិតជាទឹកលុយមានទំហំប្រមាណជិត ១០ម៉ឺនដុល្លារសហរដ្ឋអាមេរិក។ តួលេខដែលបានបំផ្លាញនេះ គឺពាក់ព័ន្ធនឹងសំណុំរឿង៣ករណី ដែលសមត្ថកិច្ចបង្ក្រាបក្នុងដំណាក់កាលចុងក្រោយនេះ។
មន្ត្រីជំនាញក្រសួងមហាផ្ទៃបញ្ជាក់ថា ចំនួនគ្រឿងញៀនគឺនៅមានច្រើនជាងនេះទៀត ដែលសមត្ថកិច្ចចាប់បាន ហើយនិងត្រូវដុតបំផ្លាញចោលក្នុងពេលខាងមុខ។
ស្ថិតក្នុងវ័យប្រមាណ ៣៦ឆ្នាំ លោក អ៊ុក ថា ឲ្យដឹងថា លោកធ្លាប់រស់នៅជាមួយគ្រឿងញៀនជាង ១០ឆ្នាំ ទម្រាំនឹងផ្ដាច់បាននេះ គឺលោកបានបំផ្លាញទ្រព្យសម្បត្តិដែលមាននៅក្នុងគ្រួសារ និងខាតពេលវេលាអស់ជាច្រើនឆ្នាំណាស់មកហើយ។
លោកបន្តថា ទម្រាំភ្ញាក់រលឹកវិញ ស្ទើរហួសពេលទៅហើយ។ ជាងនេះទៀត លោក អ៊ុក ថា ចង់ឃើញយុវជន និងពលរដ្ឋទាំងអស់ត្រូវចៀសឲ្យឆ្ងាយពីគ្រឿងញៀន៖ «ស្ដាយក្រោយជាខ្លាំង! ខ្ញុំផ្ដាំផ្ញើដល់យុវជនជំនាន់ក្រោយកុំឲ្យសាកល្បងគ្រឿងញៀនដូចជាខ្ញុំជាគំរូស្រាប់។ គេថាលេងគ្រឿងញៀនទៅសាច់ស្អាត កុំជឿគេឲ្យសោះ។ លេងគ្រឿងញៀនទៅធ្វើឲ្យយើងខូចសុខភាព ឆាប់ចាស់ជាងមុន និងធ្វើឲ្យសង្គមរឹតតែស្អប់ខ្ពើមយើងកាន់តែខ្លាំងឡើង»៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
2016-06-28
រថយន្តដែលសមត្ថកិច្ចខេត្តស្ទឹងត្រែង បាញ់ដោយសង្ស័យថាដឹកឈើខុសច្បាប់ កាលពីថ្ងៃទី២៦ ខែមិថុនា ឆ្នាំ២០១៦។
ស្ដាប់ ឬ ទាញយកសំឡេង
00:00/00:00
មន្ត្រីឃ្លាំមើលសិទ្ធិមនុស្សនៃសមាគមអាដហុក (ADHOC) អំពាវនាវឲ្យអាជ្ញាធរខែត្រ និងតំណាងអយ្យការខែត្រស្ទឹងត្រែង ស៊ើបអង្កេតបន្ទាន់ចំពោះករណីសមត្ថកិច្ចខែត្រស្ទឹងត្រែង ប្រើប្រាស់អាវុធបាញ់រះលើរថយន្តជាច្រើនគ្រាប់ដែលសង្ស័យថា ដឹកឈើប្រណិត។ សមាគមអាដហុក សម្ដែងក្ដីបារម្ភពីការប្រើប្រាស់អាវុធរបស់សមត្ថកិច្ចថា ជាទម្រង់អាចប៉ះពាល់ដល់ភូមិឃុំមានសុវត្ថិភាព និងអសន្តិសុខសង្គម។
មន្ត្រីឃ្លាំមើលសិទ្ធិមនុស្សឲ្យដឹងនៅថ្ងៃទី២៧ ខែមិថុនា ថា អនុប្រធានមន្ទីរទំនាក់ទំនងរដ្ឋសភា និងនគរបាលប្រឆាំងបទល្មើសសេដ្ឋកិច្ចនៃស្នងការនគរបាលខែត្រស្ទឹងត្រែង លោក ប៉ូ លី យកកាំភ្លើងបាញ់រះលើរថយន្តសាំយ៉ុង (Samyung) និងរថយន្តកាមេរី បាលែន (Camry) ដែលសង្ស័យថា ដឹកឈើប្រណិតពីស្រុកសៀមប៉ាង កាលពីថ្ងៃទី១៦ ខែមិថុនា ឋិតនៅចំណុចព្រៃចាស់លើផ្លូវជាតិលេខ៧អា (7A) ក្នុងភូមិគីឡូលេខ៨ សង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង។
សមាគមអាដហុក ចង់ឃើញអាជ្ញាធរពាក់ព័ន្ធស្រាវជ្រាវរកមូលហេតុនាំឲ្យកើតមានករណី នេះ និងស្រាវជ្រាវរកលិខិតបេសកកម្មនានាទាក់ទិនការប្រើប្រាស់អាវុធរបស់ នគរបាលដើម្បីបញ្ជាក់ពីភាពស្របច្បាប់។
មន្ត្រីសម្របសម្រួលនៃសមាគមអាដហុក ខែត្រស្ទឹងត្រែង លោក ហូ សំអុល សង្ស័យថា ការបាញ់រះលើរថយន្តដឹកឈើប្រណិត គឺជាហេតុផលទារប្រាក់ដើម្បីជាថ្នូរដោះលែង ឬក៏បាញ់ដើម្បីឲ្យរថយន្តឈប់ដើម្បីជំរិតទារប្រាក់។ លោកថា ប្រសិនបើសមត្ថកិច្ចទាំងនោះពុំមានបេសកកម្មប្រើប្រាស់អាវុធ ហើយបានបាញ់ដោយសេរី គឺជាទង្វើខុសច្បាប់។ លោកថា ប្រសិនសមត្ថកិច្ចទាំងនោះមានលិខិតបញ្ជាបេសកកម្មប្រើប្រាស់អាវុធ ក៏ពុំមានសិទ្ធិយកកាំភ្លើងបាញ់បង្ក្រាបអ្នករកស៊ីឈើដែរ ដរាបណាជនល្មើសមិនមានអាវុធតដៃ។
លោក ហូ សំអុល បារម្ភថា ការប្រើប្រាស់កាំភ្លើងបាញ់បោះដោយសេរីពុំមានច្បាប់ទម្លាប់គឺជា ទម្រង់អសន្តិសុខសង្គមធ្ងន់ធ្ងរដែលជាដើមចមបង្កភាពភ័យខ្លាចដល់ ពលរដ្ឋ៖ «បង្ក្រាបក្នុងឆន្ទៈបទល្មើសពិតប្រាកដ កុំថាថ្ងៃណាឈ្មួញឲ្យលុយ ឬក៏ឧក្រិដ្ឋជនឲ្យលុយទៅមិនបង្ក្រាប បើកដៃឲ្យ ថ្ងៃណាមិនបានឲ្យបែរជាបង្ក្រាប»។
វិទ្យុអាស៊ីសេរី មិនអាចទាក់ទងស្នងការនគរបាលខែត្រស្ទឹងត្រែង លោក ម៉ៅ តារា និងអ្នកនាំពាក្យអគ្គស្នងការដ្ឋាននគរបាលជាតិ លោក គៀត ចន្ថារិទ្ធ ដើម្បីសុំការអធិប្បាយបន្ថែមចំពោះករណីនេះបានទេ នៅថ្ងៃទី២៧ ខែមិថុនា។
ចំណែកអ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា ការផ្ទុះអាវុធត្រូវមានច្បាប់ទម្លាប់ត្រឹមត្រូវ មិនអាចអាងអំណាចបាញ់បោះដោយសេរីនោះទេ។ លោកស្នើឲ្យអភិបាលខែត្រស្ទឹងត្រែង លោក ម៉ុម សារឿន ស៊ើបអង្កេតរកឫសគល់ករណីនេះ ហើយចាត់វិធានការផ្អែកតាមច្បាប់ស្ដីពីការគ្រប់គ្រងអាវុធ៖ «ព្រោះអាវុធមិនបានចែងបាញ់បោះសេរីដើម្បីអាងខ្លួនជាស្អីទេ មុនផ្ទុះអាវុធត្រូវមានច្បាប់ទម្លាប់ត្រឹមត្រូវ។ ដូច្នេះស្នើឲ្យគណៈបញ្ជាការឯកភាពខែត្រ (អភិបាលខែត្រ) មានវិធានការយ៉ាងម៉េច? ស៊ើបអង្កេតស្រាវជ្រាវតាមច្បាប់»។
អ្នកនាំពាក្យអគ្គស្នងការនគរបាលជាតិ លោក គៀត ចន្ថារិទ្ធ ធ្លាប់មានប្រសាសន៍ថា មានបទល្មើសខ្លះ នគរបាលបានយកកាំភ្លើងបាញ់ហើយសរសេរក្នុងរបាយការណ៍ថា ផ្ទុះអាវុធដោយអចេតនា។ លោកណែនាំឲ្យនគរបាលទាំងអស់អនុវត្តច្បាប់ឲ្យបានត្រឹមត្រូវ ជាពិសេសការប្រើប្រាស់អាវុធជាដើម ហើយលោកក៏ជំរុញឲ្យនរបាលអនុវត្តច្បាប់ដោយយុត្តិធម៌ ស្មោះត្រង់ និងមានវិជ្ជាជីវៈ៖ «ដេញគេពីក្រោយ បាញ់គេ ដល់ដាក់របាយការណ៍មកថា ផ្ទុះអាវុធដោយអចេតនា។ លេងរបៀបហ្នឹងអត់បានទេ! នគរបាលត្រូវយុត្តិធម៌ ស្មោះត្រង់ និងវិជ្ជាជីវៈ សុខទុក្ខពលរដ្ឋនៅលើដៃរបស់នគរបាល នៅលើប៊ិចរបស់នគរបាល»។
លោក ហូ សំអុល កត់សម្គាល់ថា កាលពីចុងខែឧសភា ឆ្នាំ២០១៦ មានករណីបាញ់បោះបណ្ដាលឲ្យពលរដ្ឋភ្ញាក់ផ្អើលនៅពេលឮសំឡេងកាំភ្លើង បាញ់រះច្រើនគ្រាប់ចេញពីបរិវេណផ្ទះអតីតអភិបាលខែត្រស្ទឹងត្រែង លោក ឡូយ សូផាត បច្ចុប្បន្នជាតំណាងរាស្ត្រមណ្ឌលខែត្រស្ទឹងត្រែង តែមកទល់ពេលនេះ សមត្ថកិច្ចមិនទាន់បង្ហាញមូលហេតុនៃការបាញ់បោះនោះនៅឡើយដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។