មន្ត្រីជំនាញស្ថាប័នពាក់ព័ន្ធក្រោមឱវាទរដ្ឋបាលខេត្តព្រះសីហនុ ចុះសួរសុខទុក្ខស្ត្រីមានផ្ទៃពោះដែលកំពុងសម្រាក ឬរកសេវាសម្រាលកូននៅមន្ទីរពេទ្យបង្អែកខេត្តព្រះសីហនុ ដើម្បីអបអរសាទរទិវាជាតិមាតា ទារក និងកុមារ ឆ្នាំ២០១៧។
ថ្នាក់ដឹកនាំស្ថាប័នពាក់ព័ន្ធនៃរដ្ឋបាលខេត្តព្រះសីហនុ សហការជាមួយវិស័យឯកជន ឬសភាពាណិជ្ជកម្មខេត្តនេះ ចុះសួរសុខទុក្ខស្ត្រីកំពុងសម្រាកសម្រាលកូនខ្ចីនៅមន្ទីរពេទ្យបង្អែកខេត្តព្រះសីហនុ នាឱកាសទិវាជាតិសុខភាពមាតា ទារក និងកុមារ ឆ្នាំ២០១៧ ដោយនាំយកសម្ភារហូបចុកមួយចំនួនទៅចែកជូន។
ប្រធានកាកបាទក្រហម និងជាអគ្គនាយកកំពង់ផែស្វយ័តខេត្តព្រះសីហនុ លោក លូ គឹមឈុន បានដឹកនាំក្រុមការងារចុះជួបសួរសុខទុក្ខស្ត្រីសម្រាលកូនខ្ចីនៅមន្ទីរពេទ្យបង្អែកខេត្តព្រះសីហនុ កាលពីព្រឹកថ្ងៃអង្គារ ទី២១ ខែកុម្ភៈ។ លោកផ្តល់សម្ភាសថា ទិវាជាតិសុខភាពមាតា ទារក និងកុមារឆ្នាំនេះ មន្ត្រីរាជការ និងសភាពាណិជ្ជកម្មខេត្តនេះបានរួមគ្នានាំយកអាហារទទួលទាន ឬសម្ភារប្រើប្រាស់ និងថវិកាមួយចំនួន ផ្តល់ជូនស្ត្រីកំពុងសម្រាលកូនខ្ចី ប្រយោជន៍ដើម្បីជួយសម្រាលទុក្ខលំបាករបស់ប្រជាពលរដ្ឋឲ្យស្របតាមគោលនយោបាយរបស់ប្រមុខដឹកនាំរដ្ឋាភិបាល និងថ្នាក់ដឹកនាំកាកបាទក្រហមកម្ពុជា បានដាក់ចេញ៖ « សម្ដេចប្រធានកាកបាទក្រហមហ្នឹងឲ្យយើងទាំងអស់គ្នានៅខេត្តព្រះសីហនុ នេះ យកចិត្តទុកដាក់អំពីបញ្ហាសុខភាពមាតា ទារក និងកុមារនេះឲ្យបានច្រើនជាបន្តទៀត ព្រោះជាទំពាំងស្នងឫស្សី សម្រាប់ទ្រទ្រង់ប្រទេសជាតិនាថ្ងៃអនាគត »។
ស្ត្រីសម្រាលកូនខ្ចីម្នាក់ក្នុងចំណោមស្ត្រីច្រើននាក់ទៀត ឈ្មោះ អាង រដ្ឋា ដែលធ្វើដំណើរមកពីខេត្តកោះកុង មកសម្រាលកូនខ្ចីនៅមន្ទីរពេទ្យបង្អែកខេត្តព្រះសីហនុ អរគុណដល់ថ្នាក់ដឹកនាំកាកបាទក្រហមខេត្តព្រះសីហនុ និងសភាពាណិជ្ជកម្មខេត្តនេះ ដែលបានចុះជួបសួរសុខទុក្ខ និងចែកជូនគ្រឿងឧបភោគបរិភោគដល់ពួកគាត់នៅពេលនេះ។
ស្ត្រីទើបឆ្លងទន្លេថ្មីៗរូបនេះ ក៏ឆ្លៀតថ្លែងការដឹងគុណទៅដល់ប្រធានមន្ទីរពេទ្យបង្អែកខេត្តព្រះសីហនុ គឺលោកវេជ្ជបណ្ឌិត សេង ណុង និងក្រុមគ្រូពេទ្យគ្រប់ជំនាញទាំងអស់ កំពុងបម្រើការងារនៅមន្ទីរពេទ្យនេះ ដែលបានយកចិត្តទុកដាក់ពិនិត្យព្យាបាលអ្នកជំងឺផ្សេងៗ ពិសេសស្ត្រីសម្រាលកូនខ្ចីដោយយកចិត្តទុកដាក់៖ « ខ្ញុំអរគុណដល់កាកបាទក្រហមកម្ពុជា ដែលបានជួយឧបត្ថម្ភដល់រូបនាងខ្ញុំ និងកូនកំពុងសម្រាក និងសម្រាលនៅមន្ទីរពេទ្យបង្អែកខេត្តព្រះសីហនុ ពេលនេះ »។
ប្រធានមន្ទីរពេទ្យបង្អែកខេត្តព្រះសីហនុ លោកវេជ្ជបណ្ឌិត សេង ណុង មានប្រសាសន៍ថា មន្ទីរពេទ្យនេះមានស្ត្រីមកសម្រាលកូនខ្ចីមានការកើនឡើងជាបន្តបន្ទាប់ ចាប់ពីឆ្នាំ២០១៤ ដល់ដើមឆ្នាំ២០១៧។ លោកឲ្យដឹងថា ចាប់ពីឆ្នាំ២០១៤ មកដល់ពេលនេះ មានស្ត្រីមានផ្ទៃពោះមកសម្រាកសម្រាលកូនខ្ចី ឬឆ្លងទន្លេក្នុងមន្ទីរពេទ្យបង្អែកខេត្តនេះ គឺកើនពីប្រមាណ ១០០នាក់ក្នុង ១ខែ ដល់ប្រមាណ ២០០នាក់ក្នុង ១ខែ ក្នុងរយៈពេល ៣ឆ្នាំចុងក្រោយនេះ។
លោកបានអះអាងថា ចាប់ពីឆ្នាំ២០១៤ ដល់ឆ្នាំ២០១៧ នេះ មិនមានមាតា និងទារកដែលមករកសេវាសម្រាលកូនខ្ចីនៅមន្ទីរពេទ្យនេះណាម្នាក់មានគ្រោះថ្នាក់ដល់អាយុជីវិតទេ។ ជាងនេះ មន្ទីរពេទ្យបង្អែកខេត្តនេះតែងសង្កេតឃើញមានមន្ត្រីរាជការជាថ្នាក់ដឹកនាំនៅតាមមន្ទីរស្ថាប័នរដ្ឋនានាទាំងស្ថាប័នស៊ីវិល និងស្ថាប័នកងកម្លាំងប្រដាប់អាវុធចម្រុះ ព្រមទាំងសប្បុរសជននានា តែងបាននាំយកសម្ភារប្រើប្រាស់ និងថវិកាដោយផ្ទាល់មកផ្តល់ជូនអ្នកជំងឺខ្វះខាត ឬជួបការលំបាក ដែលសម្រាកព្យាបាលនៅមន្ទីរពេទ្យបង្អែកខេត្តព្រះសីហនុ ជាបន្តបន្ទាប់៖ « រហូតមកដល់ពេលបច្ចុប្បន្ននេះ យើងឃើញថាការសម្រាលកូនខ្ចី ឬស្ត្រីមានផ្ទៃពោះមកឆ្លងទន្លេនៅមន្ទីរពេទ្យបង្អែកយើងនេះ គឺមានការកើនឡើងខ្លាំង។ ពីមុនគឺក្រោម ១០០នាក់ទេក្នុង ១ខែ ប៉ុន្តែបច្ចុប្បន្នឈានដល់ជាង ២០០នាក់ក្នុងមួយខែ ដែលបានមកសម្រាលកូននៅមន្ទីរពេទ្យនេះ។ ចំពោះអត្រាស្លាប់របស់មាតា គឺបានថយចុះមែនទែនរហូតដល់ ២ ឬ ៣ឆ្នាំចុងក្រោយនេះ មិនមានមាតាស្លាប់ដោយសារការសម្រាលកូននៅក្នុងមន្ទីរពេទ្យបង្អែកខេត្តព្រះសីហនុ យើងនេះទេ »។
ទាក់ទិនទិវាមាតា ទារក និងកុមារនេះដែរ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល កាលពីថ្ងៃច័ន្ទ ទី២០ ខែកុម្ភៈ បានរំឭកដល់មន្ត្រីសុខាភិបាលក្រោមឱវាទទាំងអស់ ឲ្យបន្តពង្រឹងសកម្មភាពការងាររបស់ខ្លួនឲ្យបានខ្លាំងក្លាបន្ថែមទៀត ពិសេសទាក់ទងបញ្ហាសុខភាពមាតា និងទារក ធ្វើយ៉ាងណាឲ្យសាធារណជនមានទំនុកចិត្ត។ ជាងនេះ លោក ម៉ម ប៊ុនហេង ក៏បានណែនាំដល់មន្ត្រីសុខាភិបាល ត្រូវរួមសហការគ្នាដើម្បីឈានដល់កាត់បន្ថយអត្រាមរណៈមាតា និងទារក ជាពិសេសត្រូវជួយផ្សព្វផ្សាយឲ្យប្រជាពលរដ្ឋយល់ដឹងអំពីការថែរក្សាសុខភាពឲ្យបានជាប្រចាំ។ ពោលគឺមាតាគ្រប់រូប ត្រូវមានភារកិច្ច ឬតួនាទីមើលថែទាំកូនៗដោយត្រូវទៅពិនិត្យផ្ទៃពោះឲ្យបានទៀងទាត់មុនការសម្រាល ហើយការសម្រាលកូនត្រូវទៅសម្រាលនៅមណ្ឌលសុខភាព ឬមន្ទីរពេទ្យដែលមានឆ្មបជំនាញ និងត្រូវចាក់ថ្នាំបង្ការទាំងមាតា និងទារក ក្រោយពេលសម្រាលកូនខ្ចី និងត្រូវបំបៅទឹកដោះកូនឲ្យបាន ៦ខែ។ លោក ម៉ម ប៊ុនហេង សង្កត់ធ្ងន់ថា វិធីថែរក្សាសុខភាពមាតានេះ គឺទាមទារឲ្យប្រជាពលរដ្ឋ ពិសេសស្ត្រីជាមាតាគ្រប់រូប ត្រូវអនុវត្តតាមការណែនាំរបស់មន្ត្រីសុខាភិបាលឲ្យមានប្រសិទ្ធភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។