អ្នក​ភូមិ​ត្អូញត្អែរ​ពី​បញ្ហា​សុខភាព​ដោយសារ​អាជីវកម្ម​ថ្ម​ភ្នំ​បី​កន្លែង​នៅ​ខេត្ត​កំពង់ឆ្នាំង

0:00 / 0:00

អ្នក​ភូមិ​នៃ​ឃុំ​ពង្រ ស្រុក​រលាប្អៀរ ខេត្ត​កំពង់ឆ្នាំង ប្រឈម​នឹង​បញ្ហា​សុខភាព និង​គ្រោះថ្នាក់​ចរាចរណ៍ ដោយសារ​ឡាន​បែន​ដឹក​ថ្ម​បើក​លឿនៗ និង​ហុយ​ដី​ទ្រលោម​រាល់​ថ្ងៃ​កាត់​តាម​ភូមិ​របស់​ពួក​គាត់។ អាជ្ញាធរ​អះអាង​ថា ម្ចាស់​ការដ្ឋាន​កិន​ថ្ម​ដែល​កំពុង​ធ្វើ​អាជីវកម្ម ហើយ​អនុញ្ញាត​ឲ្យ​ឡាន​បែន​បើក​ដឹក​ថ្ម​កាត់​តាម​មុខ​ផ្ទះ​អ្នក​ភូមិ​នោះ គ្រោង​ចាក់​ផ្លូវ​បេតុង​ក្នុង​ពេល​ឆាប់ៗ។

អ្នក​ភូមិ​ភ្នំតូច នៃ​ឃុំ​ពង្រ ប្រមាណ ៥០​គ្រួសារ ដែល​ប៉ះពាល់​ផ្ទាល់​ពី​ធូលី​ដី​ហុយ​ចូល​ច្រមុះ និង​អាហារ​ហូប​ចុក​រាល់​ថ្ងៃ ស្នើ​ឲ្យ​អាជ្ញាធរ ឬ​ក្រុមហ៊ុន ពន្លឿន​ការ​ស្ថាបនា​ផ្លូវ​ក្រាល​កៅស៊ូ ឬ​ផ្លូវ​បេតុង ដើម្បី​កុំ​ឲ្យ​ពលរដ្ឋ​ប៉ះពាល់​ធ្ងន់ធ្ងរ​ជាង​នេះ។ ប្រហែល​បី​ឆ្នាំ​ហើយ​ដែល​អ្នក​ភូមិ​ទ្រាំ​រស់នៅ​ជាមួយ​ធូលី​ដី ឬ​កម្ទេច​ថ្ម ទើប​ពេល​នេះ​ពួក​គេ​យក​ដើម​ឈើ ឬ​ឫស្សី​ដាក់​ស្កាត់​ផ្លូវ​មុខ​ផ្ទះ កុំ​ឲ្យ​ឡាន​បើក​លឿន​នាំ​ឲ្យ​ដី​ហុយ​ខ្លាំង​ពេក។

ពលរដ្ឋ​ម្នាក់​ក្នុង​ចំណោម​អ្នក​ភូមិ​ជាច្រើន​ទៀត ដែល​ត្អូញត្អែរ​ពី​បញ្ហា​ដី​ហុយ លោកស្រី កែ សូល មាន​ប្រសាសន៍​ថា អាជ្ញាធរ ឬ​ក្រុមហ៊ុន​មិន​សូវ​គិតគូរ​ពី​សុខភាព​ពលរដ្ឋ​ទេ ដោយ​គ្រាន់​តែ​សន្យា​ថា នឹង​ធ្វើ​ផ្លូវ​កុំ​ឲ្យ​ហុយ ប៉ុន្តែ​អស់​រយៈពេល​ជាច្រើន​ឆ្នាំ​មក​នេះ ផ្លូវ​នៅ​តែ​ហុយ ហើយ​មនុស្ស​ទាំង​ចាស់​ទាំង​ក្មេង​មាន​ជំងឺ​រលាក​ផ្លូវ​ដង្ហើម និង​លំបាក​រស់នៅ​ប្រចាំ​ថ្ងៃ ដោយសារ​កម្ទេច​ថ្ម​ភ្នំ និង​ធូលី​ដី​ហុយ៖ « ចង់​សំណូមពរ​ឲ្យ​រាជ​រដ្ឋាភិបាល ចាក់​កៅស៊ូ​តែ​ម្ដង​ទៅ​ឲ្យ​ជាប់ ដើម្បី​ឲ្យ​ប្រជាជន​បាន​ស្រួល ហើយ​សិស្ស​សាលា​ធ្វើ​ដំណើរ​ទៅ​សាលា​ឲ្យ​បាន​ស្រួលបួល។ ជួនកាល​ឡាន​បើក​វ៉ូ​មក គ្នា​ធ្មេច​ភ្នែក កាលណា​ធ្មេច​ភ្នែក​ទៅ លោ​ដួល​កង់​ទៅ ឡាន​កិន​ទៅ មាន​គ្រោះថ្នាក់​ដល់​កូន​ចៅ​ក្នុង​ភូមិ​ទៀត »

ចំណែក​ពលរដ្ឋ​ម្នាក់​ទៀត លោក សៀង ម៉ៃ ថា​លោក និង​ពលរដ្ឋ​រស់នៅ​ក្បែរ​ខាង​គ្នា បាន​ខឹងសម្បា​ចំពោះ​ឡាន​ដឹក​ថ្ម​បើក​លឿនៗ មិន​គិត​ពី​បញ្ហា​គ្រោះថ្នាក់​ចរាចរណ៍ ឬ​ដី​ហុយ។ លោក​ថា កាល​ពី​ឆ្នាំ​ទៅ ពលរដ្ឋ​រង​ផល​ប៉ះពាល់​ធ្លាប់​បបួល​គ្នា​ផ្ដិត​មេដៃ​សុំ​អន្តរាគមន៍​ទៅ​ថ្នាក់​លើ​ម្ដង​ហើយ ប៉ុន្តែ​ក្រោយ​មក មេ​ភូមិ​ស្ងាត់​ទៅ​វិញ ដោយ​ពលរដ្ឋ​ខ្លះ​មិន​ស្ងប់​ចិត្ត ទន្ទឹង​រង់ចាំ​មើល​ដំណោះស្រាយ​នេះ៖ « ឡាន​នៅ​នេះ​រត់​ចង់​ប្រហែល​នៅ​ផ្លូវ​ជាតិ​ដែរ យប់​ដល់​ម៉ោង ១២ ឬ​ម៉ោង ១ និយាយ​ឲ្យ​ចំ​ថ្ងៃ​ណា​ត្រូវ​ចេញ ចេញ​ទាល់​តែ​ភ្លឺ ឡាន​ចេញ​ចូលៗ​ហ្នឹង​តែ​ម្ដង។ ការដ្ឋាន​ខាង​កើត វា​ខ្លាំង​ជាង​ពីរ​ការដ្ឋាន​ខាង​លិច។ ពីរ​ការដ្ឋាន​ខាង​លិច​ល្មម​ទេ »

ឆ្លើយតប​ចំពោះ​បញ្ហា​នេះ ប្រធាន​មន្ទីរ​រ៉ែ និង​ថាមពល​ខេត្ត​កំពង់ឆ្នាំង លោក អ៊ុក រស់ បញ្ជាក់​ថា បច្ចុប្បន្ន ក្រុមហ៊ុន​វាយ​ថ្ម​ដែល​កំពុង​ដំណើរ​ការ​មាន​ពីរ និង​បញ្ឈប់​ធ្វើ​អាជីវកម្ម​មួយ ប៉ុន្តែ​ក្រុមហ៊ុន​ដែល​នៅ​បន្ត​ធ្វើ​អាជីវកម្ម គ្រោង​បញ្ចេញ​ថវិកា​ស្ថាបនា​ផ្លូវ​ចាក់​បេតុង​ក្នុង​ពេល​ឆាប់ៗ។ លោក​ថា ដំណាក់​កាល​ទី​១ ក្រុមហ៊ុន និង​អាជ្ញាធរ បាន​កែ​សម្រួល​ផ្លូវ​ពី​ផ្លូវ​តូច​មាន​ភក់​ជ្រាំ ទៅ​ជា​ផ្លូវ​ធំ​ទូលាយ​ក្រាល​ក្រួស​ក្រហម ហើយ​ដំណាក់​កាល​ទី​២ នឹង​ក្រាល​បេតុង​តែ​ម្ដង៖ « ចុង​ឆ្នាំ​នេះ​ទើប​តែ​មាន​គម្រោង​ទេ​បង ! អត់​ទាន់​បាន​ទៅ​វាស់វែង​គិតគូរ​វាយ​តម្លៃ​ទេ ប៉ុន្តែ​ដល់​ថ្ងៃ​អនាគត​ទៅ វា​អាច​ត្រូវ​តែ​អ៊ីចឹង​ហើយ។ ការដ្ឋាន​នីមួយៗ​លែង​ឲ្យ​ស្រោច​ទឹក​ហុយ​អ៊ីចឹង​ហើយ ឲ្យ​ចាក់​បេតុង​ម៉ង។ អត់​អី​ទេ​បង មន្ទីរ​នឹង​ចាត់​វិធានការ​តាម​ហ្នឹង​ទៀត​បង ព្រោះ​មាន​ការ​ណែនាំ​ពី​ខាង​លើ​តឹងរ៉ឹង​ឥឡូវ »

ការដ្ឋាន​កិន​ថ្ម​ភ្នំ​ដំរី​រមៀល​របស់​នាយកដ្ឋាន​អភិវឌ្ឍន៍ នៃ​ក្រសួង​ការពារ​ជាតិ និង​ការដ្ឋាន​កិន​ថ្ម​លើ​ភ្នំ​អន្សោម​ត្មាត​របស់​ក្រុមហ៊ុន ភី.អេស.ហ្វាយ (PS5) របស់​ចិន ឋិត​នៅ​ឃុំ​ពង្រ ស្រុក​រលាប្អៀរ កំពុង​ធ្វើ​អាជីវកម្ម។ សព្វថ្ងៃ​មាន​ឡាន​បែន​ចេញ​ចូល​ទិញ​ថ្ម​ចន្លោះ​ពី ៦០ ទៅ ១០០​ឡាន​ក្នុង ១​ថ្ងៃ​កាត់​ផ្លូវ​ក្រាល​ក្រួស​ក្រហម​មុខ​ផ្ទះ​អ្នក​ភូមិ​ភ្នំតូច ឆ្ពោះ​ទៅ​ការដ្ឋាន​ទាំង​ពីរ​មាន​ប្រវែង​ប្រមាណ​ពីរ​គីឡូម៉ែត្រ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។