Opens in new windowមន្ត្រីតំណាងការិយាល័យឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួន យូ.អិន.អេច្ឆ.ស៊ី.អ (UNHCR) បានសម្របសម្រួលឲ្យជនភៀសខ្លួនម៉ុងតាញ៉ា-វៀតណាម មានគ្នា ២៤នាក់ បានវិលទៅកាន់ប្រទេសកំណើតវិញ បន្ទាប់ពីម៉ុងតាញ៉ា ទាំងនោះ រង់ចាំការចុះបញ្ជីកំណត់អត្តសញ្ញាណជនភៀសខ្លួនអស់រយៈពេលជិតមួយឆ្នាំមិនបានសម្រេច។ ដោយឡែកនៅសល់ម៉ុងតាញ៉ា ២០០នាក់ទៀត ក៏ត្រូវបានសមត្ថកិច្ចកម្ពុជា បដិសេធមិនចុះបញ្ជីឈ្មោះនេះដូចគ្នា។
ក្រុមជនជាតិម៉ុងតាញ៉ា ទាំង ២៤នាក់ មានស្រី ៥នាក់ និងបុរស ១៩នាក់ ក្នុងនោះមានកុមារីចំនួន ៤នាក់ ជិះក្នុងរថយន្តទេសចរណ៍ពីរគ្រឿង ចាកចេញពីក្រុងបានលុង ទៅកាន់ច្រកទ្វារព្រំដែនអន្តរជាតិអូរយ៉ាដាវ ក្រោមការឃ្លាំមើលរបស់សមត្ថកិច្ចពាក់ព័ន្ធនៃការវិលត្រឡប់ដោយស្ម័គ្រចិត្តរបស់ក្រុមម៉ុងតាញ៉ា ទាំងនោះ ទៅប្រទេសវៀតណាម វិញ។
មន្ត្រីប៉ូលិសអន្តោប្រវេសន៍ច្រកទ្វារអន្តរជាតិស្រុកអូរយ៉ាដាវ មិនអធិប្បាយទាក់ទិនការបញ្ជូនជនជាតិម៉ុងតាញ៉ា ឆ្លងកាត់ច្រកទ្វារព្រំដែននេះទេ ក៏ប៉ុន្តែតំណាងការិយាល័យឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួន កញ្ញា វីវៀន តាន់ (Vivian Tan) បញ្ជាក់តាមសារអេឡិចត្រូនិកនៅថ្ងៃទី៨ ខែតុលា ថា យូ.អិន.អេច្ឆ.ស៊ី.អ គឺជាអ្នកសម្រួលការវិលត្រឡប់ដោយស្ម័គ្រចិត្តតាមការស្នើសុំពីក្រុមម៉ុងតាញ៉ា ទាំងនោះ។
វិទ្យុអាស៊ីសេរី មិនមានលទ្ធភាពជួបសម្ភាសជាមួយម៉ុងតាញ៉ា ទាំង ២៤នាក់នោះបានទេ ដោយសារក្បួនរថយន្តដឹកជញ្ជូនជនភៀសខ្លួនបានចេញពីខេត្តរតនគិរី ដោយត្រង់ឆ្ពោះទៅច្រកទ្វារព្រំដែន មិនអាចឲ្យអ្នកយកព័ត៌មានជួបសម្ភាសបាន។
ទាក់ទិនករណីនេះដែរ នាយការិយាល័យជនអន្តោប្រវេសន៍នៃស្នងការដ្ឋានប៉ូលិសខេត្តរតនគិរី លោក មឿង ខេម មានប្រសាសន៍បញ្ជាក់ថា ការដឹកជញ្ជូនក្រុមម៉ុងតាញ៉ា ទាំង ២៤នាក់ ឋិតក្រោមការទទួលខុសត្រូវរបស់មន្ត្រី យូ.អិន.អេច្ឆ.ស៊ី.អ និងមន្ត្រីនាយកដ្ឋានជនភៀសខ្លួន មិនទាក់ទងនឹងសមត្ថកិច្ចប៉ូលិសខេត្តឡើយ៖ «អត់ចូលមកស្នងការផង ព័ត៌មានថាខាងអង្គការ យូ.អិន គេជូនដំណើរ ខ្ញុំអត់ដឹងផង»។
របាយការណ៍របស់ យូ.អិន.អេច្ឆ.ស៊ី.អ បច្ចុប្បន្ននេះនៅទីក្រុងភ្នំពេញ មានក្រុមម៉ុងតាញ៉ា ប្រមាណ ២០០នាក់ទៀត មិនបានទទួលឲ្យចុះឈ្មោះកំណត់អត្តសញ្ញាណជនភៀសខ្លួនដោយអាជ្ញាធរនៅទីក្រុងភ្នំពេញឡើយ។ ដោយឡែកមានតែម៉ុងតាញ៉ា ១៣នាក់ប៉ុណ្ណោះ ដែលនាយកដ្ឋានជនភៀសខ្លួន ទទួលចុះឈ្មោះជាជនភៀសខ្លួនក្នុងឆ្នាំ២០១៥ នេះ។
ប្រធាននាយកដ្ឋានជនភៀសខ្លួននៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ លោក តាន់ សុវិជ្ជា បដិសេធមិនអធិប្បាយជុំវិញបញ្ហាជនភៀសខ្លួនម៉ុងតាញ៉ា ដែលមិនទទួលចុះឈ្មោះនោះទេ។ លោកជំរុញឲ្យសួររឿងនេះទៅក្រសួងមហាផ្ទៃ៖ «សួរទៅខាងក្រសួងមហាផ្ទៃ អ្នកនាំពាក្យក្រសួងមហាផ្ទៃ ពីព្រោះការងាររបស់ក្រសួង ខ្ញុំអត់អាចឆ្លើយបានទេ។ ក្រសួងមហាផ្ទៃ លោកមានអ្នកនាំពាក្យ»។
ទោះជាយ៉ាងនេះក៏ដោយ អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ប្រាប់អ្នកយកព័ត៌មាននៅថ្ងៃទី២៥ កញ្ញា ថា ជនជាតិភាគតិចម៉ុងតាញ៉ា-វៀតណាម ទាំងអស់នោះ បានឆ្លងចូលមកប្រទេសកម្ពុជា ដោយខុសច្បាប់។ ដូច្នេះ កម្ពុជា ត្រូវអនុវត្តទៅតាមច្បាប់អន្តោប្រវេសន៍របស់ខ្លួន។ លោក ខៀវ សុភ័គ បញ្ជាក់ថា រដ្ឋាភិបាលបានទុកពេលឲ្យ យូ.អិន.អេច្ឆ.ស៊ី.អ ចំនួន ៣ខែ ដើម្បីចាត់ចែងបញ្ជូនខ្លួនពួកគេត្រឡប់ទៅប្រទេសវៀតណាម វិញ។ បើមិនដូច្នោះទេ រដ្ឋាភិបាលនឹងចាត់ចែងទៅតាមច្បាប់របស់កម្ពុជា។
ចាប់ពីខែកក្កដា រហូតបច្ចុប្បន្ន មានក្រុមម៉ុងតាញ៉ា ៥ក្រុមមានគ្នាសរុប ៧៧នាក់ បានស្ម័គ្រចិត្តវិលត្រឡប់ទៅប្រទេសវៀតណាម វិញ ក្នុងនោះបីក្រុមមានគ្នា ៤២នាក់ ចាកចេញពីប្រទេសថៃ និងពីរក្រុមទៀត មានគ្នា ៣៥នាក់ចាកចេញពីក្រុងភ្នំពេញ។ ម៉ុងតាញ៉ា ទាំង ៥ក្រុមនេះ ត្រូវបានសមត្ថកិច្ចច្រកទ្វារព្រំដែនស្រុកអូរយ៉ាដាវ ខេត្តរតនគិរី សម្របសម្រួលឲ្យឆ្លងដែនទៅប្រទេសវៀតណាម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។