អាដហុក​បំភ្លឺ​ពី​ភាព​ស្អាតស្អំ​របស់​ខ្លួន​ដើម្បី​តប​នឹង​ការ​ចោទ​ប្រកាន់​របស់​ស្រីមុំ

0:00 / 0:00

សមាគម​ការពារ​សិទ្ធិមនុស្ស​អាដហុក (ADHOC) បដិសេធ​ថា មិន​បាន​ណែនាំ​ឲ្យ​អ្នក​នាង ខុម ចាន់តារាទី ហៅ​ស្រីមុំ ផ្ដល់​ចម្លើយ​មិន​ពិត​ដល់​អាជ្ញាធរ​នោះ​ទេ ហើយ​អាដហុក មាន​ភស្តុតាង​គ្រប់គ្រាន់​ដើម្បី​បំភ្លឺ​ពី​ភាព​ស្អាតស្អំ​របស់​ខ្លួន។ ទន្ទឹម​គ្នា​នេះ សមាគម​អាដហុក ក៏​ងឿង​ឆ្ងល់​ចំពោះ​ការ​កោះហៅ​របស់​អង្គភាព​ប្រឆាំង​អំពើ​ពុករលួយ​ដែរ។ បក្ស​ប្រឆាំង និង​អង្គការ​សិទ្ធិ​មនុស្ស​លីកាដូ (LICADHO) សោកស្ដាយ​ចំពោះ​លិខិត​កោះហៅ​របស់​អង្គភាព​ប្រឆាំង​អំពើ​ពុករលួយ។ ពួកគេ​ថា ចំណាត់​ការ​នេះ អាច​ជា​ការ​គំរាមកំហែង​ដល់​ភារកិច្ច​មន្ត្រី​សិទ្ធិមនុស្ស។

ប្រធាន​សមាគម​ការពារ​សិទ្ធិមនុស្ស​អាដហុក លោក ធន សារាយ បញ្ជាក់​ក្នុង​សន្និសីទ​សារព័ត៌មាន នា​ការិយាល័យ​អង្គការ​សម្ពន្ធភាព​ការពារ​សិទ្ធិមនុស្ស​កម្ពុជា (CHRAC) នៅ​ព្រឹក​ថ្ងៃ​ទី​២៦ ខែ​មេសា ថា អ្វី​ដែល​សមាគម​អាដហុក ធ្វើ​កន្លង​មក​ពាក់ព័ន្ធ​នឹង​សំណុំរឿង​អ្នកនាង ខុម ចាន់តារាទី ហៅ​ស្រីមុំ នោះ គឺ​ស្របតាម​គោលការណ៍​ស្ថាប័ន និង​ច្បាប់​កម្ពុជា។

លោក​អះអាង​ថា សមាគម​អាដហុក មិន​បាន​លួងលោម​ឲ្យ​អ្នកនាង ស្រីមុំ ឲ្យ​និយាយ​កុហក​នោះ​ទេ។ផ្ទុយ​ទៅ​វិញ ស្រីមុំ ខ្លួន​ឯង​ទេ ដែល​បាន​រៀបរាប់​ពី​ភាព​លំបាក និង​ការ​បារម្ភ​នានា​របស់​នាង ព្រមទាំង​បដិសេធ​ថា មិន​មាន​ទំនាក់ទំនង​ស្នេហា​ជាមួយ​លោក កឹម សុខា ​នោះ​ទេ នៅ​ពេល​នាង​បាន​មក​ពឹង​ពាក់​សមាគម ដើម្បី​ការពារ​ និង​ប្រឹក្សា​ផ្លូវច្បាប់​ជូន​នាង​នោះ៖ «យើង​មាន​ភស្តុតាង​ទាំង​អស់ តាំង​ពី​វីដេអូ និង​ការ​ចំណាយ គឺ​មិន​បាន​លួងលោម​ឲ្យ​នាង​មុំ និយាយ​មិន​ការ​ពិត​ណា​មួយ​ទេ ពីព្រោះ​ការ​ពិត​របស់​នាង​ដំបូង​គឺ​មាន​មួយ ហើយ​យើង​ខំ​ការពារ​នាង​តាំង​ពី​ដំបូង​ទី ដូច្នេះ​ការ​អោយ​មតិ​យោបល់​របស់​យើង​គឺ​ផ្អែក​លើ​ការ​ពិត​ដែល​នាង​ឲ្យ​យើង។ យើង​មិន​អាច​ប្រឌិត​ការ​ពិត​ណា​មួយ​ទៀត កើត​ទេ ព្រោះ​យើង​ជា​អង្គការ​សិទ្ធិមនុស្ស​ត្រូវ​តែ​ឈរ​លើ​គោលការណ៍​គុណធម៌​របស់​យើង»

ក្នុង​សន្និសីទ​សារព័ត៌មាន​សមាគម​អាដហុក បាន​បញ្ចាំង​វីដេអូ​កិច្ច​សម្ភាសន៍​ដែល​ស្រីមុំ ស្នើ​សុំ​ជួយ​អន្តរាគមន៍​ពី​ដំបូង កាល​ពី​ថ្ងៃ​ទី​៩ ខែ​មីនា ឆ្នាំ​២០១៦។ ក្នុង​កិច្ច​សម្ភាសន៍​នោះ នាង​ស្រីមុំ អះអាង​ថា ហ្វេសប៊ុក របស់​នាង ត្រូវ​បាន​គេ​ហេគ (Hack) និង​បាន​បដិសេធ​ទាំង​ស្រុង​នូវ​អ្វី​ដែល​បណ្ដាញ​សារព័ត៌មាន​ក្នុង​ស្រុក​ផ្សាយ​ថា នាង​មាន​ទំនាក់ទំនង​ស្នេហា​ជាមួយ​លោក កឹម សុខា។

អ្វីៗ​ប្រែ​ផ្ទុយ​ស្រឡះ គឺ​នៅ​ថ្ងៃ​ទី​១៩ ខែ​មេសា ស្រីមុំ បាន​ប្រាប់​តុលាការ​ពី​ការ​ពិត​ផ្សេង​មួយ​ទៀត​ឲ្យ​តុលាការ​ជួយ​រក​យុត្តិធម៌​ជូន​នាង ហើយ​នៅ​ថ្ងៃ​ទី​២៣ ខែ​មេសា ស្រីមុំ ដែល​អះអាង​ថា មិន​សូវ​ចេះ​អក្សរ​នោះ បែរ​ជា​បាន​សរសេរ​លិខិត​ចំហ​ផ្ទាល់​ដៃ​បួន​ទំព័រ​ទៅ​វិញ​ថា នាង​ពិត​ជា​មាន​ស្នេហា​ជាមួយ​លោក កឹម សុខា ព្រោះ​លង់​ជឿ​តាម​ការ​សន្យា​ផ្ដល់​លុយ ផ្ដល់​ផ្ទះ។ ក្នុង​លិខិត​នោះ នាង​បាន​បង្ហាញ​ឈ្មោះ​មន្ត្រី​សិទ្ធិ​មនុស្ស​មួយ​ចំនួន ហើយ​ចោទ​ថា បាន​លួងលោម​ឲ្យ​នាង​និយាយ​កុហក​អាជ្ញាធរ។

ភ្លាមៗ​នោះ ក្រសួង​យុត្តិធម៌ ចេញ​លិខិត​ថ្កោលទោស​អង្គការ​សង្គម​ស៊ីវិល​ដែល​ពាក់ព័ន្ធ និង​ស្នើ​ឲ្យ​អាជ្ញាធរ​ចាត់​ការ​អ្នក​ទាំង​នោះ។ បន្ទាប់​មក​នៅ​ថ្ងៃ​ទី​២៤ ខែ​មេសា អង្គភាព​ប្រឆាំង​អំពើ​ពុករលួយ​បាន​នាំ​ខ្លួន​មេ​ឃុំ​ ឈ្មោះ ស៊ាង ចែត មក​ពី​គណបក្ស សម រង្ស៊ី។ នៅ​ថ្ងៃ​ទី​២៥ មេសា អង្គភាព​ប្រឆាំង​អំពើ​ពុករលួយ បាន​ធ្វើ​សន្និសីទ​កាសែត​បង្ហាញ​ពី​ការ​នាំ​ខ្លួន​មេ​ឃុំ​រូប​នេះ និង​បាន​ចេញ​លិខិត​កោះហៅ​មនុស្ស ៨​នាក់ ទៅ​សាកសួរ​ពាក់ព័ន្ធ​នឹង​ការ​ចោទ​ប្រកាន់​របស់​អ្នកនាង ខុម ចាន់តារាទី ហៅ ស្រីមុំ។ ក្នុង​នោះ​មាន​មន្ត្រី​សមាគម​អាដហុក ចំនួន ៥​រូប និង​អគ្គលេខាធិការ​រង​នៃ​គណៈកម្មាធិការ​ជាតិ​រៀបចំ​ការ​បោះឆ្នោត លោក នី ចរិយា ប្រធាន​អង្គការ​សីលការ អ្នកស្រី ធីតា ឃឹះ និង​មន្ត្រី​នៃ​ការិយាល័យ​ឧត្ដមស្នងការ​ទទួល​បន្ទុក​សិទ្ធិមនុស្ស​ប្រចាំ​កម្ពុជា គឺ​លោក សឺន សាលី ដែល​នឹង​ត្រូវ​ឆ្លើយ​បំភ្លឺ​នៅ​ថ្ងៃ​ទី​២៧ និង​ថ្ងៃ​ទី​២៨ ខែ​មេសា។

ឆ្លើយ​តប​នឹង​ការ​កោះ​ហៅ​នេះ ប្រធាន​សមាគម​ការពារ​សិទ្ធិមនុស្ស​អាដហុក លោក ធន សារាយ បញ្ជាក់​ថា ក្រុម​ការងារ​របស់​លោក​ដែល​ត្រូវ​កោះ​ហៅ​នោះ នឹង​ទៅ​ឆ្លើយ​បំភ្លឺ​តាម​ពេល​វេលា​កំណត់។ ទោះ​យ៉ាង​ណា លោក​ងឿង​ឆ្ងល់​ជុំវិញ​ចំណាត់​ការ​របស់​អង្គភាព​ប្រឆាំង​អំពើ​ពុករលួយ​បែប​នេះ៖ «តាម​ខ្ញុំ​ដឹង គឺ​អង្គភាព​ប្រឆាំង​អំពើ​ពុករលួយ គួរ​តែ​អង្កេត​ទៅ​លើ​អំពើ​ពុករលួយ​លួច​ប្រាក់​ជាតិ ហើយ​ចំណែក​រឿង​នេះ​គឺ​យើង​អត់​ពុករលួយ​អី​សោះ ចុះ​ហេតុ​អី​បាន​ជា​រឿង​នេះ​វា​ទៅ​ជា​អ៊ីចឹង​ទៅ​វិញ»

លោក ធន សារាយ ក៏​បញ្ជាក់​ថា សមាគម​អាដហុក បាន​ចំណាយ​លុយ ២០៤​ដុល្លារ ឲ្យ​ទៅ ស្រីមុំ តាម​ការ​ស្នើ​សុំ​ជា​លាយលក្ខណ៍អក្សរ​ដើម្បី​ចំណាយ​លើ​ការ​ធ្វើ​ដំណើរ និង​ស្នាក់​នៅ ពេល​ចូល​បំភ្លឺ​តុលាការ និង​មក​កាន់​ស្នាក់ការ​អាដហុក នៅ​ភ្នំពេញ។ ការ​ចំណាយ​នេះ គឺ​ធ្វើ​ឡើង​ដូច​អ្វី​ដែល​អាដហុក ធ្លាប់​ធ្វើ​កន្លង​មក​លើ​ជនរងគ្រោះ​ទៅ​តាម​គោលការណ៍​របស់​សមាគម​អាដហុក។

អ្នក​គ្រប់គ្រង​បច្ចេកទេស​ការិយាល័យ​ស៊ើបអង្កេត​នៃ​អង្គការ​សិទ្ធិមនុស្ស​លីកាដូ លោក អំ សំអាត មាន​ប្រសាសន៍​ថា ការ​កោះ​ហៅ​មន្ត្រី​សិទ្ធិមនុស្ស​នេះ គឺ​ជា​ការ​ដាក់​សម្ពាធ និង​ជា​ការ​គំរាមកំហែង​ការ​បំពេញ​ភារកិច្ច​ក្នុង​នាម​អ្នក​ការពារ​សិទ្ធិមនុស្ស ដែល​ត្រូវ​បាន​រដ្ឋធម្មនុញ្ញ​ទទួល​ស្គាល់ ផ្ដល់​សិទ្ធិ និង​កិច្ច​ការពារ​ដល់​បុគ្គល​ដែល​ធ្វើការ​លើក​ស្ទួយ​វិស័យ​សិទ្ធិមនុស្ស៖ «ទាំង​អស់​ គ្នា ត្រូវ​តែ​ពិនិត្យ​ឲ្យ​បាន​ដិត​ដល់​ជា​មុន​សិន​ថា អ្វី​ជា​ការតព្វកិច្ច និង​ភារកិច្ច​របស់​អង្គការ​សង្គម​ស៊ីវិល​ដែល​ត្រូវ​បំពេញ ហើយ​អ្វី​ជា​បទល្មើស​មុន​នឹង​ធ្វើ​ការ​កោះ​អញ្ជើញ ឬ​ការ​ចោទ​ប្រកាន់​ណា​មួយ​លើ​មន្ត្រី​នៃ​អង្គការ​ការពារ​សិទ្ធិមនុស្ស ដើម្បី​ជៀសវាង​ការ​ចោទ​ប្រកាន់​ថា ប្រទេស​កម្ពុជា បំបិទ​សិទ្ធិ​សេរីភាព ឬ​ក៏​មាន​ការ​គំរាមកំហែង​ដល់​អ្នក​ការពារ​សិទ្ធិមនុស្ស»

​ជុំវិញ​ស្ថានភាព​ក្ដៅ​គគុក​នេះ​ដែល​កំពុង​កើត​ឡើង​លើ​អ្នក​នយោបាយ អង្គការ​សង្គម​ស៊ីវិល​នៅ​ពេល​នេះ ត្រូវ​បាន​អ្នក​តំណាងរាស្ត្រ​គណបក្ស​សង្គ្រោះ​ជាតិ លោក អ៊ូ ច័ន្ទឫទ្ធិ បាន​សម្ដែង​នូវ​ការ​សោកស្ដាយ និង​ព្រួយ​បារម្ភ​អំពី​មូលដ្ឋាន​គ្រឹះ​នៃ​លទ្ធិប្រជាធិបតេយ្យ​នៅ​កម្ពុជា កំពុង​ត្រូវ​បាន​បំផ្លិចបំផ្លាញ និង​ស្ថិត​ក្នុង​ភាព​អាសន្ន៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។