សហគមន៍ដីធ្លីតំបន់បឹងកក់ អំពាវនាវឲ្យតុលាការកំពូល ផ្តល់យុត្តិធម៌ដល់តំណាងរបស់ពួកគេ គឺអ្នកស្រី ទេព វន្នី ដែលកំពុងជាប់ឃុំក្នុងពន្ធនាគារ។ ការអំពាវនាវនេះ ធ្វើឡើងបន្ទាប់ពីតុលាការកំពូល គ្រោងបើកសវនាការបណ្ដឹងសុំនៅក្រៅឃុំរបស់អ្នកស្រី ទេព វន្នី នៅថ្ងៃទី១៨ ខែមករា ខាងមុខ។
តំណាងសហគមន៍ដីធ្លីតំបន់បឹងកក់ លោកស្រី បូវ សោភា បញ្ជាក់ថា អ្នកស្រី ទេព វន្នី មិនបានប្រព្រឹត្តកំហុសដូចការចោទប្រកាន់របស់អាជ្ញាធរ និងតុលាការនោះទេ ដូច្នេះតុលាការកំពូល ត្រូវផ្តល់យុត្តិធម៌ដោយដោះលែងអ្នកស្រី ទេព វន្នី ឲ្យមានសេរីភាពបាននៅក្រៅឃុំឃាំងវិញ៖ « សុំ មេត្តាផ្តល់ យុត្តិធម៌ដល់អ្នកស្រី ទេព វន្នី ព្រោះគាត់មិនបានប្រព្រឹត្តខុសទៅ តាមការ ចោទប្រកាន់ របស់តុលាការ ដំបូង ឬមួយ តុលាការឧទ្ធរណ៍ទេ។ អ៊ីចឹងពួកយើងសង្ឃឹមយ៉ាងមុតមាំថា តុលាការកំពូល នឹងរកយុត្តិធម៌ និងផ្តល់សេរីភាពសម្រាប់អ្នកស្រី ទេព វន្នី នៅ ថ្ងៃទី ១៨ ដើម្បីឲ្យគាត់ជួបជុំក្រុមគ្រួសារគាត់ឡើងវិញ ។ នេះជាការសំណូមពររបស់នាងខ្ញុំ និងប្រជាពលរដ្ឋនៅ តំបន់បឹងកក់ »។
គិតត្រឹមថ្ងៃទី១៦ ខែមករា ឆ្នាំ២០១៧ តំណាងសហគមន៍ដីធ្លីតំបន់បឹងកក់ អ្នកស្រី ទេព វន្នី បានជាប់ពន្ធនាគារអស់រយៈពេល ១៥៣ថ្ងៃមកហើយ ពាក់ព័ន្ធនឹងសំណុំរឿងហិង្សាក្បែរផ្ទះនាយករដ្ឋមន្ត្រី កាលពីឆ្នាំ២០១៣ កន្លងទៅ។ ក្រៅពីនេះ សកម្មជនដីធ្លីរូបនេះ និងអ្នកបឹងកក់ ៣រូបទៀត ក៏ត្រូវបានតុលាការក្រុងភ្នំពេញ កាត់ទោសឲ្យជាប់ពន្ធនាគារក្នុងម្នាក់ៗចំនួន ៦ខែពីបទប្រមាថ និងប្រឆាំងអ្នករាជការសាធារណៈ ប្រព្រឹត្តទៅនៅមុខសាលារាជធានីភ្នំពេញកាលពីខែឆ្នាំ២០១១ កន្លងទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។