សមាជិកបណ្ដាញកម្មករធ្វើការងារតាមផ្ទះ បានផ្ញើលិខិត ១ច្បាប់ជូន លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងថា កម្មករបម្រើការងារតាមផ្ទះ រដ្ឋាភិបាលមិនទាន់បានដាក់បញ្ចូលឲ្យស្ថិតក្រោមកិច្ចការពារដោយច្បាប់ ដូចគ្នាកម្មករបម្រើការងារក្នុងវិស័យផ្សេងទេ។
លិខិតចុះថ្ងៃទី៩ ខែធ្នូ ផ្ញើជូន លោក អ៊ិត សំហេង មានចុះហត្ថលេខា អ្នកស្រី វុន សម្ផស្ស ប្រធានបណ្ដាញកម្មករធ្វើការងារតាមផ្ទះកម្ពុជា បានបង្ហាញថា សព្វថ្ងៃនេះដោយសារកំណើននៃតម្រូវការកម្មករធ្វើការងារតាមផ្ទះទាំងក្នុង និងក្រៅប្រទេស បានទាក់ទាញស្ត្រីវ័យក្មេងៗចូលបម្រើការងារក្នុងវិស័យនេះមានចំនួនច្រើន។
ផ្ដើមពីបញ្ហានេះ អ្នកស្រី វុន សម្ផស្ស បានស្នើដល់ក្រសួងការងារ ជួយដាក់បញ្ចូលការងារកម្មករធ្វើការងារតាមផ្ទះ មានសិទ្ធិទទួលបានប្រាក់ឈ្នួលសមរម្យ សិទ្ធិធ្វើការងារ ៨ម៉ោងក្នុងមួយថ្ងៃ ឬសិទ្ធិឈប់សម្រាកលំហែមាតុភាពជាដើម។
កម្មករធ្វើការងារតាមផ្ទះ បានទទូចដល់ លោក អ៊ិត សំហេង ដាក់ចេញនូវវិធានការច្បាប់ និងរដ្ឋបាលមួយចំនួន ដើម្បីលើកកម្ពស់ និងការពារសិទ្ធិសំខាន់ៗចំនួន ៩ចំណុច ដល់ពួកគេមានដូចជា ស្នើផ្តល់សច្ចាប័ន និងដាក់ឲ្យអនុវត្តអនុសញ្ញាលេខ១៨៩ របស់អង្គការពលកម្មអន្តរជាតិ ស្ដីពីការងារសមរម្យសម្រាប់កម្មករធ្វើការងារតាមផ្ទះ ឬស្នើឲ្យទទួលស្គាល់ការចូលរួមរបស់កម្មករធ្វើការងារតាមផ្ទះក្នុងការអភិវឌ្ឍសេដ្ឋកិច្ចជាតិ និងស្នើបញ្ចុះតម្លៃលិខិតឆ្លងដែនសម្រាប់កម្មករចំណាកស្រុក មិនឲ្យលើសពី ២៥ដុល្លារជាដើម។
វិទ្យុអាស៊ីសេរី មិនទាន់អាចទាក់ទងមន្ត្រីក្រសួងការងារ ដើម្បីបំភ្លឺជុំវិញសំណើរបស់សមាជិកកម្មករបម្រើការងារតាមផ្ទះបានទេ នៅថ្ងៃព្រហស្បតិ៍ ទី១២ ខែធ្នូ។
បញ្ហានេះដែរ លោក យ៉ា ណាវុធ ប្រធានអង្គការខារ៉ាមកម្ពុជា បានឲ្យដឹងដែរថា កម្មករ ឬពលករធ្វើការងារតាមផ្ទះទាំងក្នុង និងក្រៅស្រុក មិនទាន់មានច្បាប់ការពារត្រឹមត្រូវដូចកម្មករ ឬពលករធ្វើការងារដូចវិស័យផ្សេងៗនោះទេ។ លោកបន្តថា រដ្ឋាភិបាល ឬក្រសួងពាក់ព័ន្ធគួរពិនិត្យចំពោះកង្វល់របស់កម្មករបម្រើការងារតាមផ្ទះ ឲ្យទទួលបានសិទ្ធិដូចអ្នកបម្រើការងារក្នុងស្ថាប័នដទៃទៀតដែរ៖ «អ្នកជំនួយការមេផ្ទះ បើយើងពិនិត្យមើលនៅក្នុងក្របខ័ណ្ឌច្បាប់ការងារ គឺអត់ទាន់បានគ្របដណ្ដប់នៅក្នុងច្បាប់ការងារទេ គឺមិនថាប្រទេសទទួល ឬប្រទេសបញ្ជូនទេ។ អ៊ីចឹង ការដែលសង្គមស៊ីវិលស្នើឲ្យមានការការពារបន្ថែមទៅលើអ្នកជំនួយការមេផ្ទះហ្នឹង វាជារឿងមួយល្អសម្រាប់ប្រទេសកម្ពុជា ផង។ ហើយបើសិនជាយើងចង់ទិតៀន ឬប្រាប់ទៅប្រទេសទទួលហ្នឹងផ្តល់សច្ចាប័នទៅលើអនុសញ្ញាលេខ១៨៩ ស្ដីពីការការពារអ្នកជំនួយការមេផ្ទះហ្នឹង ទាល់តែយើងហ្នឹងផ្តល់សច្ចាប័នខ្លួនឯងសិន បានជាការមួយល្អ ហើយយើងអាចទៅនិយាយជាមួយគេបាន»។
លោក មឿន តុលា ប្រធានកម្មវិធីសិទ្ធិការងាររបស់មជ្ឈមណ្ឌលអប់រំច្បាប់សម្រាប់សហគមន៍ បានឲ្យដឹងថា ពលករកម្ពុជា ដែលបានចុះបញ្ជីជាផ្លូវការចេញទៅធ្វើការនៅប្រទេសថៃ មានប្រមាណ ២០ម៉ឺននាក់។ ប៉ុន្តែ តាមការសិក្សាថ្មីៗនេះ រកឃើញថា មានពលករកម្ពុជា ទាំងស្របច្បាប់ និងខុសច្បាប់ ចន្លោះពី ៦០ម៉ឺន ទៅ ១លាននាក់ បានចេញទៅធ្វើការនៅប្រទេសថៃ។
ចំណែក លោក យ៉ា ណាវុធ ប្រធានអង្គការខារ៉ាមកម្ពុជា បានបញ្ជាក់ថា ពលករកម្ពុជា ទាំងស្រប និងអត់ច្បាប់ មានពលករខ្មែរប្រមាណ ១៥% ក្នុងចំណោមពលករជាង ៣លាននាក់ កំពុងធ្វើការនៅប្រទេសថៃ មកពីប្រទេសកម្ពុជា មីយ៉ាន់ម៉ា និងឡាវ។ ចំណែកពលករកម្ពុជា ទាំងស្រប និងអត់ច្បាប់ ចេញទៅធ្វើការងារនៅប្រទេសម៉ាឡេស៊ី មានជាង ៥ម៉ឺននាក់ និងចេញទៅធ្វើការស្របច្បាប់នៅប្រទេសកូរ៉េខាងត្បូង មានជាង ២ម៉ឺននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។