ប្រជាពលរដ្ឋនិងក្រុមអង្គការសិទ្ធិមនុស្ស ព្រមទាំងសភារបស់សហភាពអឺរ៉ុប បានជំរុញឲ្យស្នងការពាណិជ្ជកម្មរបស់សហភាពអឺរ៉ុប ស៊ើបអង្កេតលើករណីក្រុមហ៊ុនស្ករសកម្ពុជា ដែលរងការចោទប្រកាន់ថា បានរំលោភសិទ្ធិមនុស្ស និងទន្ទ្រានយកដីប្រជាពលរដ្ឋរាប់ពាន់គ្រួសារ។ ប៉ុន្តែស្នងការពាណិជ្ជកម្មសហភាពអឺរ៉ុប ដែលបានមកបំពេញទស្សនកិច្ចនៅប្រទេសកម្ពុជា បានអះអាងថា ស្ករសកម្ពុជា នៅតែអាចនាំចូលទៅសហភាពអឺរ៉ុបដោយរួចពន្ធជាដដែល។
ស្នងការពាណិជ្ជកម្មរបស់សហភាពអឺរ៉ុប លោក ការ៉ែល ឌឺ ហ្គីត (Karel De Gucht) បានអះអាងថា នៅអំឡុងពេលទស្សនកិច្ចនៅប្រទេសកម្ពុជា សហភាពអឺរ៉ុបមិនមានគម្រោងស៊ើបអង្កេតលើរោងចក្រស្ករអំពៅដែលមជ្ឈដ្ឋាននានា កំពុងរិះគន់ថា មានការរំលោភសិទ្ធិមនុស្សនោះទេ។
ទោះជាស្នងការពាណិជ្ជកម្មរបស់សហភាពអឺរ៉ុបមិនចុះស៊ើបអង្កេតក៏ដោយ ប៉ុន្តែលោក ការ៉ែល នឹងជួបជាមួយរដ្ឋាភិបាលដើម្បីស្វែងដំណោះស្រាយដល់អ្នករងគ្រោះ ជាពិសេសប្រជាពលរដ្ឋរាប់ពាន់គ្រួសារដែលបានបង់ដីធ្លីពីគម្រោងអភិវឌ្ឍដីសម្បទានសេដ្ឋកិច្ចស្ករអំពៅ។
បញ្ហានេះ ប្រធានអង្គការសមធម៌កម្ពុជា លោក អៀង វុទ្ធី បានសោកស្ដាយចំពោះការអះអាងរបស់ស្នងការពាណិជ្ជកម្មរបស់សហភាពអឺរ៉ុប។ ការមិនអើពើនេះ ហាក់ជួយគាំទ្រដល់ក្រុមហ៊ុន ហើយអ្នករងគ្រោះនៅតែគ្មានដំណោះស្រាយដដែល ដែលប្រជាពលរដ្ឋរាប់ពាន់គ្រួសារ បានរស់នៅរងទុក្ខវេទនាជាច្រើនឆ្នាំមកហើយនោះ។
លោក អៀង វុទ្ធី បញ្ជាក់ទៀតថា អ្វីដែលសោកស្ដាយបំផុតនោះ ស្នងការពាណិជ្ជកម្មរបស់សហភាពអឺរ៉ុប មិនបានចុះជួបអ្នករងគ្រោះដោយសារតែគោលនយោបាយរបស់សហភាពអឺរ៉ុប។
លោក ការ៉ែល ឌឺ ហ្គីត មានគម្រោងធ្វើទស្សនកិច្ចរយៈពេល ៤ថ្ងៃ ចាប់ពីថ្ងៃទី១៨ ដល់ ២១ នៅក្នុងខែមីនា នៅប្រទេសមីយ៉ាន់ម៉ា វៀតណាម និងប្រទេសកម្ពុជា ដើម្បីលើកកម្ពស់ទំនាក់ទំនងពាណិជ្ជកម្មជាមួយសហគមន៍អឺរ៉ុប។
បើទោះជាសហភាពអឺរ៉ុបមិនចុះស៊ើបអង្កេតក៏ដោយ ប៉ុន្តែក្រុមហ៊ុនដែលបញ្ជាទិញស្ករសធំនៅលើពិភពលោក ដូចជា ក្រុមហ៊ុនកូកាកូឡា បានប្រកាសថា នឹងចុះស៊ើបអង្កេតលើអ្នកផលិតស្ករសរបស់ខ្លួន។ ការស៊ើបអង្កេតនោះ គឺត្រូវបង្ហាញថា សង្វាក់ផលិតកម្មផលិតស្ករសនោះ មិនមានពាក់ព័ន្ធនឹងការរំលោភសិទ្ធិមនុស្ស និងការកេងប្រវ័ញ្ចកម្លាំងពលកម្មកុមារជាដើម។
សេចក្ដីប្រកាសព័ត៌មានរបស់ក្រុមហ៊ុនកូកាកូឡា ដែលបានប្រកាសកាលពីខែវិច្ឆិកា ឆ្នាំ២០១៣ ថា ក្រុមហ៊ុនបានទាក់ទងក្រុមហ៊ុនដែលជាអ្នកផ្គត់ផ្គង់ស្ករសរបស់ខ្លួន ឲ្យមកបកស្រាយអំពីការរំលោភសិទ្ធិមនុស្ស និងសិទ្ធិដីធ្លី រួមទាំងការកេងប្រវ័ញ្ចកម្លាំងពលកម្មជាដើម។
បន្ថែមលើនេះ ក្រុមហ៊ុនធំមួយទៀតដែលជាអ្នកទិញស្ករ ឈ្មោះ ប៉ិបស៊ី (Pepsi) ក៏បានសហការជាមួយក្រុមហ៊ុនកូកាកូឡា ដើម្បីស៊ើបអង្កេតការរំលោភបំពាននានា លើសង្វាក់ផលិតកម្មស្ករសនៅលើពិភពលោក។ សេចក្ដីប្រកាសព័ត៌មានរបស់ក្រុមហ៊ុនប៉ិបស៊ី នៅថ្ងៃទី១៨ មីនា ឆ្នាំ២០១៤ បានបង្ហាញថា ក្រុមហ៊ុននឹងស៊ើបអង្កេតអំពីការទន្ទ្រានដីធ្លីរវាងអ្នកផ្គត់ផ្គង់ស្ករស។ បច្ចុប្បន្នក្រុមហ៊ុនកូកាកូឡា និងក្រុមហ៊ុនប៉ិបស៊ី បានចាប់ផ្ដើមត្រួតពិនិត្យអំពីសង្វាក់ផលិតកម្ម អ្នកផ្គត់ផ្គង់ស្ករសរបស់ខ្លួននៅលើពិភពលោក ក្នុងនោះមានអ្នកផ្គត់ផ្គង់ស្ករសរបស់ប្រទេសកម្ពុជាដែរ។
សេចក្ដីប្រកាសព័ត៌មានដដែលក៏បានបញ្ជាក់ថា ការទទួលខុសត្រូវរបស់ក្រុមហ៊ុននេះ មិនមែនត្រឹមជារឿងដែលត្រូវធ្វើនោះទេ តែជារឿងត្រឹមត្រូវសម្រាប់អាជីវកម្មរបស់ក្រុមហ៊ុន។ ក្រុមហ៊ុនបានបង្កើតគោលនយោបាយដើម្បីធានាអំពីនិរន្តរភាពវិស័យកសិកម្ម ការការពារបរិស្ថាន និងពិនិត្យសកម្មភាពមិនស្របច្បាប់នានា ដែលទាក់ទងនឹងការផ្លាស់ប្ដូរទីកន្លែងរស់នៅ របស់ម្ចាស់ដីជាដើម។
អនុប្រធានគោលនយោបាយសាធារណៈរបស់ក្រុមហ៊ុនប៉ិបស៊ី លោក ប៉ូល ប៊ូយកាស (Paul Boykas) មានប្រសាសន៍នៅក្នុងសេចក្ដីថ្លែងការណ៍នោះថា ក្រុមហ៊ុនប្ដេជ្ញាចិត្តនឹងសហប្រតិបត្តិការរវាងរដ្ឋាភិបាលសហគមន៍មូលដ្ឋានអង្គការក្រៅរដ្ឋាភិបាល និងដៃគូអភិវឌ្ឍនានា ចំពោះការអនុវត្តសិទ្ធិដីធ្លី និងគោរពសិទ្ធិមនុស្ស។
បញ្ហារំលោភសិទ្ធិមនុស្សទាក់ទងនឹងផលិតកម្មស្ករអំពៅ ក្រសួងពាណិជ្ជកម្មបានបង្កើតគណៈកម្មការមួយដែលមានការពិភាក្សាពីគ្រប់ភាគីទាំងអស់។ អ្នកនាំពាក្យក្រសួងពាណិជ្ជកម្ម លោក កែន រដ្ឋា បានអះអាងថា គណៈកម្មការនេះ មានការចូលរួមពីក្រសួងកសិកម្ម ក្រសួងបរិស្ថាន ក្រសួងពាណិជ្ជកម្ម តំណាងក្រុមហ៊ុនស្ករអំពៅនៅតាមបណ្ដាខេត្តដែលរងផលប៉ះពាល់ និងសហភាពអឺរ៉ុប។
បន្ថែមលើនេះ អ្នកគ្រប់គ្រងក្រុមហ៊ុន ភ្នំពេញ ស៊ូហ្គើរ៍ (Phnom Penh Sugar) លោក សេង ណាក់ ធ្លាប់បានអះអាងកាលពីដើមខែមីនា ឆ្នាំ២០១៤ ថា ការអភិវឌ្ឍរបស់ខ្លួនបានជួយបង្កើតការងារប្រមាណ ៣ពាន់កន្លែង នៅពេលដល់រដូវប្រមូលផលអំពៅ។ ម៉្យាងវិញទៀត គម្រោងនេះបានផលិតស្ករសដើម្បីជំនួសការនាំចូលស្ករពីបរទេស។ លោក សេង ណាក់ បានបញ្ជាក់ថា ក្រុមហ៊ុនស្ករសភ្នំពេញ បានផលិតស្ករសប្រមាណ ៨០% សម្រាប់ការផ្គត់ផ្គង់ក្នុងស្រុក និង ២០% សម្រាប់ការនាំចេញ។
របាយការណ៍របស់សហភាពអឺរ៉ុបប្រចាំកម្ពុជា បានបង្ហាញថា នៅកំឡុងឆ្នាំ២០១០ ដល់២០១២ មានតែប្រទេសពីរប៉ុណ្ណោះនៅក្នុងសហភាពអឺរ៉ុបដែលទិញស្ករសពីកម្ពុជា គឺប្រទេសអង់គ្លេស និងប្រទេសបារាំង ក្នុងនោះប្រទេសអង់គ្លេស បានទិញស្ករសពីកម្ពុជា ស្ទើរតែទាំងស្រុង។ បរិមាណស្ករសកម្ពុជា នាំចេញទៅសហភាពអឺរ៉ុប គឺមានប្រមាណ ៥០លានតោន បើគិតជាប្រាក់មានតម្លៃជាង ៣៤លានដុល្លារអាមេរិកក្នុងឆ្នាំ២០១២។ ហើយក្នុងឆ្នាំ២០១៣ នេះ ការនាំចេញស្ករសពីកម្ពុជា ទៅសហភាពអឺរ៉ុបមានតម្លៃ ៥៣លានដុល្លារអាមេរិក។ ក្រៅពីនេះ ទំហំពាណិជ្ជកម្មនាំចេញរបស់កម្ពុជា ទៅសហភាពអឺរ៉ុបមានចំនួនជាង ៣ពាន់លានដុល្លារអាមេរិក ភាគច្រើនជាផលិតផលកាត់ដេរសំលៀកបំពាក់ ស្បែកជើង អង្ករ និងកង់ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។