ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី១៣ ខែមីនា បញ្ចេញប្រតិកម្មច្រានចោលរបាយការណ៍របស់អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ដែលរកឃើញថា មានការរំលោភសិទ្ធិការងារកម្មករធ្ងន់ធ្ងរនៅក្នុងវិស័យឧស្សាហកម្មកាត់ដេរនៅកម្ពុជា។ ក្រសួងការងារ ចាត់ទុករបាយការណ៍របស់ យូមែន រ៉ៃត៍ វ៉ច្ឆ ថាគ្មានមូលដ្ឋានវិជ្ជាជីវៈច្បាស់លាស់។
ក្រសួងការងារ និងបណ្តុះបណ្តាលវិជ្ជាជីវៈ បង្ហាញការសោកស្ដាយ និងបដិសេធចំពោះរបាយការណ៍របស់ យូមែន រ៉ៃត៍ វ៉ច្ឆ។ ក្រសួងការងារ អះអាងថា អ្វីដែលបានលើកឡើងក្នុងរបាយការណ៍របស់ យូមែន រ៉ៃត៍ វ៉ច្ឆ គឺមិនអាចទទួលយកបានឡើយ។
ប្រតិកម្មរបស់ក្រសួងការងារ បែបនេះ ធ្វើឡើងមួយថ្ងៃប៉ុណ្ណោះបន្ទាប់ពីអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ បានបញ្ចេញរបាយការណ៍របស់ខ្លួនជាផ្លូវការ កាលពីថ្ងៃទី១២ ខែមីនា។ របាយការណ៍រកឃើញថា ការរំលោភសិទ្ធិការងារនៅក្នុងវិស័យឧស្សាហកម្មកាត់ដេរនៅកម្ពុជា បានកើតឡើងទាំងក្នុងរោងចក្រមានទិសដៅនាំចេញ និងក្នុងរោងចក្រម៉ៅការ។ យូមែន រ៉ៃត៍ វ៉ច្ឆ ក៏បានចោទប្រកាន់ក្រសួងការងារ ថាមិនបានបំពេញការងាររបស់ខ្លួនពេញលេញ ដើម្បីជំរុញការអនុវត្តច្បាប់ការងារ និងចាត់វិធានការចំពោះរោងចក្រកាត់ដេរ ដែលបានរំលោភសិទ្ធិកម្មករឡើយ។
យ៉ាងណាក៏ដោយ នៅក្នុងសេចក្តីប្រកាសព័ត៌មានរបស់ខ្លួន ក្រសួងការងារ លើកឡើងថា បច្ចុប្បន្ន កម្ពុជា កំពុងសហការយ៉ាងជិតស្និទ្ធ និងប្រកបដោយតម្លាភាពនូវកម្មវិធីគម្រោងរោងចក្រកាន់តែប្រសើរនៅកម្ពុជា ដើម្បីធ្វើអធិការកិច្ចការងារ និងវាយតម្លៃលក្ខខណ្ឌការងារនៅកម្ពុជា ប្រកបដោយវិជ្ជាជីវៈ បន្ថែមទៅលើយន្តការអធិការកិច្ចលក្ខខណ្ឌការងារ សុវត្ថិភាព និងអនាម័យការងារដែលមានស្រាប់។
ក្រសួងការងារ អះអាងបន្តថា ពួកគេបានយកចិត្តទុកដាក់ពង្រឹងយន្តការ និងប្រសិទ្ធភាពនៃអធិការកិច្ចការងារ និងដាក់ពិន័យដល់សហគ្រាស គ្រឹះស្ថានទាំងឡាយណាដែលបានល្មើសនឹងបទប្បញ្ញត្តិនៃច្បាប់ស្ដីពីការងារ។ ក្រសួងការងារ បញ្ជាក់ថា ជាក់ស្តែងក្នុងឆ្នាំ២០១៤ ក្រុមអធិការកិច្ចការងារតែមួយចំនួន ៤៩ក្រុម បានធ្វើអធិការកិច្ចការងារចំនួន ៧.១៩១លើក បានដាក់កំហិតលើសហគ្រាស គ្រឹះស្ថានចំនួន ៨០៤ និងបានផាកពិន័យសហគ្រាសគ្រឹះស្ថានប្រមាណ ១៣០។
ក្រសួងការងារ អះអាងថា របាយការណ៍របស់ យូមែន រ៉ៃត៍ វ៉ច្ឆ បានរំលោភលើវិជ្ជាជីវៈរបស់ក្រសួង និងកម្មវិធីគម្រោងរោងចក្រកាន់តែប្រសើរនៅកម្ពុជា របស់អង្គការអន្តរជាតិខាងការងារ (ILO) ដែលកំពុងបំពេញការងារប្រកបដោយវិជ្ជាជីវៈ និងប្រសិទ្ធភាព។
ទោះជាបែបនេះក្តី នៅក្នុងរបាយការណ៍របស់ខ្លួន យូមែន រ៉ៃត៍ វ៉ច្ឆ ទទួលស្គាល់ថា ក្នុងឆ្នាំ២០១៤ ក្រសួងការងារ ពិតជាបានបង្កើតក្រុមអធិការកិច្ចការងារចម្រុះ ដើម្បីធ្វើអធិការកិច្ច ឬត្រួតពិនិត្យទៅលើដំណើរការនៅតាមបណ្ដារោងចក្រនានាមែន។ ប៉ុន្តែ អង្គការមួយនេះកត់សម្គាល់ថា អធិការដ្ឋានការងារកម្ពុជា នៅតែគ្មានប្រសិទ្ធភាព និងត្រូវបានចោទប្រកាន់ថា បានប្រព្រឹត្តអំពើពុករលួយជាច្រើន។ យូមែន រ៉ៃត៍ វ៉ច្ឆ ឲ្យដឹងដែរថា ចន្លោះពីឆ្នាំ២០០៩ ដល់ឆ្នាំ២០១៣ មានរោងចក្រតែ ១០ ប៉ុណ្ណោះ ត្រូវបានក្រសួងការងារ រកឃើញថា មានកំហុស និងផាកពិន័យ ហើយនៅ ១១ខែដំបូងនៃឆ្នាំ២០១៤ វិញ ចំនួនផាកពិន័យបានកើនឡើងដល់ ២៥។ យូមែន រ៉ៃត៍ វ៉ច្ឆ អះអាងថា ចំនួនផាកពិន័យនេះនៅតែទាប បើប្រៀបទៅនឹងចំនួនរោងចក្រទាំងអស់នៅកម្ពុជា និងករណីរំលោភសិទ្ធិការងារនៅតាមបណ្ដារោងចក្រទាំងនោះ។
ចំពោះប្រតិកម្មរបស់ក្រសួងការងារ នៅពេលនេះ ត្រូវបាននាយករងប្រចាំតំបន់អាស៊ីនៃអង្គការ យូមែន រ៉ៃត៍ វ៉ច្ឆ លោក ហ្វីល រ៉ូបឺតសុន (Phil Robertson) ចាត់ទុកថា ជារឿងធម្មតាទៅហើយរបស់រដ្ឋាភិបាលកម្ពុជា នៅពេលដែលពួកគេមិនសប្បាយចិត្តទៅនឹងលទ្ធផលរកឃើញរបស់អង្គការណាមួយនោះ។ លោក ហ្វីល រ៉ូបឺតសុន មានប្រសាសន៍នៅថ្ងៃទី១៣ មីនា ថា ជាជាងចាំតែវាយប្រហារទៅលើរបាយការណ៍របស់អង្គការអន្តរជាតិ រដ្ឋាភិបាលគួរតែសួរខ្លួនឯងថា តើត្រូវធ្វើអ្វីទៀតដើម្បីធ្វើឲ្យស្ថានភាពកាន់តែប្រសើរ? លោកបន្តថា អ្វីដែល យូមែន រ៉ៃត៍ វ៉ច្ឆ រកឃើញ គឺជាការខកខានដែលមានលក្ខណៈជាប្រព័ន្ធក្នុងការការពារសិទ្ធិរបស់កម្មករនៅកម្ពុជា។
លោកបញ្ជាក់ថា «គ្រប់ពេលដែលអ្នករិះគន់ពួកគេ ពួកគេនឹងវាយប្រហារអ្នកភ្លាមៗជាជាងព្យាយាមវិភាគ បញ្ហាធ្ងន់ធ្ងរដែលកំពុងកើតមាន និងរកមធ្យោបាយដើម្បីដោះស្រាយ។ ពួកគេអាចវាយប្រហារពួកយើងគ្រប់ពេលតាមដែលគេចូលចិត្ត ប៉ុន្តែអ្វីដែលពួកគេត្រូវធ្វើនោះ គឺត្រូវដោះស្រាយបញ្ហារបស់ពលរដ្ឋ និងកម្មករកម្ពុជា។ ពួកគេបានខកខានក្នុងការបំពេញកាតព្វកិច្ចរបស់ខ្លួន ដើម្បីការពារសិទ្ធិរបស់កម្មកររោងចក្រនៅកម្ពុជា»។
របាយការណ៍សិក្សារបស់ យូមែន រ៉ៃត៍ វ៉ច្ឆ ធ្វើឡើងចន្លោះពីខែតុលា ឆ្នាំ២០១៣ ដល់ខែកុម្ភៈ ឆ្នាំ២០១៥ និងបានធ្វើការសម្ភាសទៅលើមនុស្សប្រមាណ ៣៤០នាក់ ភាគច្រើនជាកម្មកររោងចក្រកាត់ដេរមកពីរោងចក្រជាង ៧០ នៅក្នុងទីក្រុងភ្នំពេញ ខេត្តកណ្តាល កំពង់ស្ពឺ កំពង់ចាម និងព្រៃវែង រកឃើញថា ការរំលោភសិទ្ធិការងារកម្មករមានច្រើនរូបភាព ក្នុងនោះរួមមាន ការធ្វើការបន្ថែមម៉ោងដោយបង្ខំ ការសងសឹកប្រឆាំងអ្នកមិនព្រមធ្វើការបន្ថែមម៉ោង កង្វះពេលវេលាសម្រាកចន្លោះម៉ោងធ្វើការ ការបដិសេធមិនឲ្យឈប់សម្រាកពេលឈឺ ការប្រើប្រាស់មនុស្សមិនគ្រប់អាយុឲ្យធ្វើការ ការប្រើប្រាស់យុទ្ធសាស្ត្របំបែកសហជីព ដើម្បីទប់ទល់ជាមួយសហជីពឯករាជ្យ ការរើសអើងចំពោះកម្មការិនីមានផ្ទៃពោះ ការធ្វើទុក្ខបុកម្នេញផ្លូវភេទ និងការបដិសេធអត្ថប្រយោជន៍ក្នុងពេលមាតុភាព ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។