តំណាងអង្គការសង្គមស៊ីវិលជាស្ត្រីដែលធ្វើការងារទាក់ទងផ្នែកសិទ្ធិមនុស្ស ស្ទើរតែមិនជឿថា លោកនាយករដ្ឋមន្ត្រី ហ៊ុន សែន ប្រើពាក្យមិនសមរម្យលើស្ត្រី ដែលជាមាតាពិភពលោកនៅទីសាធារណៈ ខណៈដែលលោកកំពុងកាន់តួនាទីកំពូលរបស់ជាតិ។
ក្រុមស្ត្រីទាំងនោះ សំដែងការមិនពេញចិត្ត និងកាយវិការរបស់មេដឹកនាំបែបនេះ ហើយថា ពួកគេនឹងប្រជុំជជែកលើការលើកឡើងរបស់លោក ហ៊ុន សែន ព្រោះថា ពាក្យនេះ ប៉ះពាល់ធ្ងន់ធ្ងរណាស់ដល់ស្ត្រីទូទៅ។
ក្រុមស្ត្រីបំរើការនៅអង្គការមិនមែនរដ្ឋាភិបាល ធ្វើការលើកស្ទួយផ្នែកសិទ្ធិមនុស្ស សំដែងការភ្ញាក់ផ្អើលដោយនឹកស្មានមិនដល់ថា នាយករដ្ឋមន្ត្រីរបស់ខ្លួនប្រមាថស្ត្រីដូចនេះឡើយ។
ការលើកឡើងបែបនេះ ធ្វើឡើងភ្លាមៗ បន្ទាប់ពីលោកនាយករដ្ឋមន្ត្រី ហ៊ុន សែន ដៀមដាមនៅថ្ងៃទី៣ ខែសីហា ដែលប្រើពាក្យសំដីមិនសមរម្យលើស្ត្រី និងបញ្ជាឲ្យប៉ូលិសស្វែងរកអ្នកពាក់ព័ន្ធនឹងអំពើហិង្សា កាលពីថ្ងៃទី១៥ ខែកក្កដា ឆ្នាំ២០១៤ នៅស្ពាននាគក្បែទីលានប្រជាធិបតេយ្យនៅខណៈដែលស្ថានភាពនយោបាយជាប់គាំង។
ប្រធានគណៈគ្រប់គ្រងនៃគណៈកម្មាធិការដើម្បីលើកស្ទួយស្ត្រីនៅក្នុងវិស័យនយោបាយ និងជានាយិកាអង្គការសីលកា អ្នកស្រី ធីតា ឃិះ សម្តែងការភ្ញាក់ផ្អើលនៅពេលលឺពាក្យសំដីរបស់លោក ហ៊ុន សែន ដូចនេះ និងថា ផ្នត់គំនិតនៃការរើសអើងស្ត្រីនៅតែមានដដែល។
អ្នកស្រីទាមទារឲ្យលោកនាយករដ្ឋមន្ត្រីគោរពសិទ្ធិស្ត្រីព្រោះសម្ដីនេះប៉ះពាល់ដល់ស្ត្រីផ្សេងទៀតទូទាំងប្រទេស៖ «ពាក្យពេចន៍នេះ ប៉ះពាល់ដល់ស្ត្រីទាំងអស់ និងប្រជាពលរដ្ឋទាំងអស់ ព្រោះក្នុងនាមលោកជានាយករដ្ឋមន្ត្រី ការដែលចាប់អ្នកទទួលទោសជាកាតព្វកិច្ច ហើយរដ្ឋធ្វើដោយមិនមានការរើសអើង»។
ទោះថ្លែងមិនចំឈ្មោះ ប៉ុន្តែប្រមុខរដ្ឋាភិបាលកម្ពុជា លោក ហ៊ុន សែន និយាយពេញៗមាត់នៅទីសាធារណៈដែលសំដៅទៅលើនារីម្នាក់ថា នារីម្នាក់នោះអាក្រក់ហួសហេតុ។ លោកលើកឡើងថា ក្នុងចំណោមអ្នកប្រើហិង្សាលើកងសន្តិសុខរបស់សាលាខណ្ឌ នារីម្នាក់នោះ ធាត់ ធាក់លើសន្តិសុខដែលកំពុងដេកដួលរងរបួសធ្ងន់៖ «នៅក្នុងចំណោមអ្នកដែលវ៉ៃដ៏សាហាវហ្នឹង មានស្រីម្នាក់ទាត់ឈូសដូចគេហៅថា កីឡាកាសអ៊ីចឹង។ តាមចាប់មីស្រីមួយហ្នឹងឲ្យបានមើល៍! អាហ្នឹងគេមិនមែនហៅនារីទេ គេហៅ មីស្រី ឬគេហៅមី។ វ៉ៃសុទ្ធតែធាក់ វាហួសហេតុពេក! មិនមែនជាការរំលោភសិទ្ធិស្ត្រីទេ ក៏ប៉ុន្តែវាអាក្រក់ហួស អ៊ីចឹងលោកប៉ូលិសនៅបន្តការងារ»។
កាលពីពេលថ្មីៗនេះ លោ ហ៊ុន សែន បានសម្តែងក្តីអាណិតអាសូរ និងផ្ដល់យុត្តិធម៌ដល់នារីម្នាក់ជាអតីតពិធីការិនីទូរទស្សន៍ គឺកញ្ញា សាសា ក្រោយពេលកញ្ញាស្រស់សោភារូបនោះ ត្រូវឧកញ៉ាម្នាក់ប្រើអំពើហិង្សាលើរូបនាងយ៉ាងខ្លាំង។
នាយិការនៃមជ្ឈមណ្ឌលសិទ្ធិមនុស្ស អ្នកស្រី ចក់ សុភាព ហាក់មិនភ្ញាក់ផ្អើលនឹងការថ្លែងរបស់លោកនាយករដ្ឋមន្ត្រីនៅពេលនេះ ព្រោះអ្នកស្រីថា នៅពេលកន្លងមក លោក ហ៊ុន សែន ធ្លាប់និយាយពីពាក្យមិនសមរម្យមកលើស្ត្រី។ អ្នកស្រីថា សម្ដីនេះមិនសមជាសម្ដីថ្នាក់ដឹកនាំប្រទេសទេ។
អ្នកស្រី ចក់ សុភាព បន្ថែមថា ការថ្លែងបែបនេះ គឺបំពានទៅប្រព័ន្ធតុលាការ ខណៈដែលតុលាការមិនទាន់ចោទប្រកាន់ផង ដែលជាស្ត្រីម្នាក់នោះ រងការប្រមាថបែបនេះទៅហើយ៖ «ខ្ញុំមានការសោកស្តាយមែនទែន ចំពោះការដែលបន្តនូវទង្វើ ជាពិសេសប្រើពាក្យមីស្រី របស់ថ្នាក់ដឹកនាំដូចនេះ ដែលធ្វើឲ្យមន្ត្រីថ្នាក់ក្រោមគាត់នឹងធ្វើតម្រាប់តាម»។
រដ្ឋធម្មនុញ្ញនៃព្រះរាជាណាចក្រកម្ពុជា មាត្រា៣១ ចែងថា ព្រះរាជាណាចក្រកម្ពុជា ទទួលស្គាល់ និងគោរពសិទ្ធិមនុស្ស សិទ្ធិនារី និងសិទ្ធិកុមារ។ ការប្រើប្រាស់សិទ្ធិសេរីភាពផ្ទាល់ខ្លួនរបស់បុគ្គលម្នាក់ៗ មិនត្រូវឲ្យប៉ះពាល់សិទ្ធិសេរីភាពអ្នកដទៃឡើយ។
ដោយឡែកនាយកប្រតិបត្តិអង្គការយេនឌ័រ និងអភិវឌ្ឍន៍ដើម្បីកម្ពុជា និងជាអគ្គលេខធិការដ្ឋាននៃបណ្ដាញយេនឌ័រ និងអភិវឌ្ឍន៍ហៅកាត់ GAD/ C អ្នកស្រី រស់ សុភាព មានប្រសាសន៍ថា ទោះស្ត្រីម្នាក់នោះ មានទោស ឬប្រព្រឹត្តបទល្មើសធ្ងន់ធ្ងរយ៉ាងណាក៏ដោយ ក៏មិនសមរងការប្រមាថដូចនេះឡើយ។
អ្នកស្រីស្នើឲ្យលោក ហ៊ុន សែន មុននឹងថ្លែងអ្វីមួយត្រូវគិតពីតម្លៃរបស់ស្ត្រីផង៖ «សម្រាប់ខ្ញុំផ្ទាល់អត់នឹកស្មានថា សម្ដេចនាយករដ្ឋមន្ត្រីគាត់មានប្រសាសន៍អ៊ីចឹងទេ។ យើងដឹងហើយថា ទោះអ្នកទោសក៏ដោយ ក៏មិនត្រូវជេប្រមាថដែរ»។
ក្រុមស្ត្រីសង្គមស៊ីវិលអះអាងថា ពួកគេនឹងជួបប្រជុំគ្នាទាក់ទងប្រសាសន៍របស់លោកនាយករដ្ឋមន្ត្រី ហ៊ុន សែន ដែលអាចនឹងចេញសេចក្ដីថ្លែងការណ៍ស្នើប្រមុខរដ្ឋាភិបាល ផ្តល់តម្លៃដល់ស្ត្រីទូទៅជៀសវាង ការថ្លែងដែលប្រមាថដល់ស្ត្រីដូចនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។