រដ្ឋាភិបាលចេញផ្សាយវីដេអូខ្លីមួយនៅតាមបណ្ដាញសង្គម ព្រមានពលរដ្ឋពីផលវិបាកនៃ «ការប្រើប្រាស់សិទ្ធិតាមបែបអនាធិបតេយ្យ» ស្របពេលមានការងើបតវ៉ាជាបន្តបន្ទាប់ទាមទារឲ្យរដ្ឋាភិបាលកម្ពុជា បញ្ឈប់ការរំលោភសិទ្ធិមនុស្ស។
អង្គការសង្គមស៊ីវិលផ្នែកសិទ្ធិមនុស្ស និងអ្នកប្រើប្រាស់បណ្ដាញសង្គម ចាត់ទុកការដែលរដ្ឋាភិបាលផ្សាយវីដេអូបែបនេះ ថាមានចេតនាបំភ័យពលរដ្ឋមិនឲ្យប្រើប្រាស់សិទ្ធិស្របច្បាប់របស់ខ្លួន ក្នុងការតវ៉ាប្រឆាំងនឹងការរំលោភបំពានសិទ្ធិមនុស្សពីសំណាក់រដ្ឋាភិបាល។
ក្នុងវីដេអូរយៈពេល ៣នាទី ចេញផ្សាយនៅយប់ថ្ងៃទី២៩ ឧសភា គណៈកម្មាធិការសិទ្ធិមនុស្សកម្ពុជា របស់រដ្ឋាភិបាល លើកយកទិដ្ឋភាពមួយចំនួននៅតំបន់មជ្ឈិមបូព៌ា ក្នុងនោះមានប្រទេសស៊ីរី និងលីប៊ី (Libya) ដោយបង្ហាញពីភាពខុសគ្នារវាងស្ថានភាពមុន និងក្រោយពេលមានសង្គ្រាមស៊ីវិលក្នុងប្រទេសទាំងនោះ។ គឺទិដ្ឋភាពទីក្រុងមុនពេលសង្គ្រាម មានសភាពល្អប្រណិត ប៉ុន្តែក្រោយពេលសង្គ្រាម ឃើញទីក្រុងប្រែក្លាយជាខ្ទេចខ្ទាំ ហិង្សា និងសោកនាដកម្ម។
ប៉ុន្តែនៅត្រង់វិនាទីទី ៣០ គណៈកម្មាធិការសិទ្ធិមនុស្សបានយករូបភាពមួយសន្លឹកដែលតាមការពិតជាទិដ្ឋភាពអគារខ្ពស់ៗនៅប្រទេសសិង្ហបុរី មកតំណាងឲ្យទិដ្ឋភាពនៃការអភិវឌ្ឍក្នុងប្រទេសលីប៊ី កាលនៅមុនពេលមានសង្គ្រាមស៊ីវិលទៅវិញ ហើយកំហុសនេះត្រូវបានសារព័ត៌មាន Channel News Asia របស់ប្រទេសសិង្ហបុរី យកមកចុះផ្សាយនៅថ្ងៃទី៣០ ឧសភា។
វីដេអូដែលអមដោយភ្លេង ថែមទាំងបានបញ្ចូលនូវសម្ដីរបស់លោក ទៀ បាញ់ រដ្ឋមន្ត្រីក្រសួងការពារជាតិ កាលពីពេលថ្មីៗនេះ ថ្លែងជំរុញឲ្យកងកម្លាំងប្រដាប់អាវុធ ឲ្យចាត់វិធានការបង្ក្រាបសកម្មភាពណាដែលរដ្ឋាភិបាលយល់ថាគំរាមកំហែងដល់សន្តិភាព និងស្ថិរភាពនយោបាយក្នុងប្រទេស៖ « ទម្រាំមានថ្ងៃនេះ គឺវាសម្បើមដៃណាស់។ ចាត់ការជាមួយនឹងអ្នកដែលបំពាន បើមិនចាត់ការទេ គឺថាវាអស់។ វាទៅជាអនាធិបតេយ្យគ្រប់គ្រងគ្នាអត់បានទេ។ យើងត្រូវការពារ។ យើងត្រូវតែថែរក្សា ហើយត្រូវតែរក្សាឲ្យបានគង់វង្សស្ថិតស្ថេរតទៅមុខទៀត ដើម្បីឲ្យបងប្អូនយើងកូនចៅយើងនៅពេលខាងក្រោយទៀត កុំឲ្យរងនូវការលំបាក។ ទាំងនោះវាធ្ងន់ធ្ងរថែមទៀត » ។
នាយិកានៃមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព ចាត់ទុកការចេញផ្សាយវីដេអូនេះ ថាជាចេតនារបស់រដ្ឋាភិបាលក្នុងការបំភ័យពលរដ្ឋមិនឲ្យងើបទាមទារសិទ្ធិសេរីភាពរបស់ខ្លួន ដែលធានាការពារដោយរដ្ឋធម្មនុញ្ញ និងច្បាប់អន្តរជាតិ។ អ្នកស្រី ចក់ សុភាព ថ្លែងរិះគន់គណៈកម្មាធិការសិទ្ធិមនុស្សកម្ពុជា របស់រដ្ឋាភិបាលថា ស្ថាប័នមួយនេះកំពុងធ្វើខុសតួនាទីរបស់ខ្លួនក្នុងនាមជាស្ថាប័នថ្នាក់ជាតិ មានមុខងារលើកកម្ពស់សិទ្ធិមនុស្សក្នុងប្រទេស៖ « អាណត្តិគាត់គួរតែធ្វើការលើកកម្ពស់ និងផ្សព្វផ្សាយអំពីសិទ្ធិដែលពលរដ្ឋគាត់មាន ហើយដែលត្រូវបានធានាដោយច្បាប់ជាតិ និងអន្តរជាតិ។ ហើយជាពិសេសសម្រាប់ស្ថាប័នដូចជាគណៈកម្មាធិការសិទ្ធិមនុស្សជាដើម ខ្ញុំគិតថា បើសិនជាឆ្លើយតបស្ថានភាពបច្ចុប្បន្ន ហើយបើសិនជារដ្ឋាភិបាលបារម្ភពីព្រឹត្តិការណ៍ណាមួយដែលអាចជាន់ដាននឹងបទពិសោធន៍ប្រទេសផ្សេងៗ ឬក៏ជាពិសេសសម្រាប់បរិបទប្រទេសកម្ពុជា យើងតែម្ដង ដែលធ្លាប់ឆ្លងកាត់នូវរបបប្រល័យពូជសាសន៍អីហ្នឹង។ ខ្ញុំគិតថា គួរតែព្យាយាមបង្ហាញអំពីសិទ្ធិដែលពលរដ្ឋគាត់មាន ដូចជាសិទ្ធិក្នុងការបញ្ចេញមតិ សិទ្ធិក្នុងការធ្វើបាតុកម្មដោយសន្តិវិធី ដោយយោងទៅតាមរដ្ឋធម្មនុញ្ញយើង ហើយនិងយោងតាមច្បាប់ដែលមានជាធរមាន » ។
អ្នកស្រីបន្ថែមថា ការធានាបានសន្តិភាព គឺជាក្ដីប្រាថ្នារបស់ពលរដ្ឋគ្រប់រូប ប៉ុន្តែសន្តិភាពនោះមិនមែនមានន័យត្រឹមតែជាភាពគ្មានសង្គ្រាមនោះទេ៖ « ខ្ញុំជឿថា អ្នកណាក៏ស្រឡាញ់សន្តិភាពដែរ។ អត់មានអ្នកណាចង់ឲ្យមានសង្គ្រាមកើតឡើងទេ ប៉ុន្តែថាតើយើងនឹងរក្សាសន្តិភាពហ្នឹងបែបណា ហើយសន្តិភាពដែលយើងកំពុងនិយាយនេះ មិនមែនគ្រាន់តែសន្តិភាពអវត្តមាននៃសង្គ្រាមទេ ប៉ុន្តែជាសន្តិភាពអវត្តមាននៃការរំលោភបំពាន អវត្តមាននៃអំពើហិង្សានានាដែលកើតឡើងនៅក្នុងសង្គមដែរ » ។
វិទ្យុអាស៊ីសេរី មិនអាចទាក់ទងប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី ដើម្បីសុំការអត្ថាធិប្បាយបានទេត្រឹមរសៀលថ្ងៃទី៣០ ឧសភា។
បន្ទាប់ពីរដ្ឋាភិបាលផ្សាយវីដេអូនោះ អ្នកប្រើប្រាស់បណ្ដាញសង្គមយូធូប (YouTube) ម្នាក់បានបញ្ចេញមតិរបស់ខ្លួនលើវីដេអូនោះថា រដ្ឋាភិបាលមិនបានលើកឡើងទាល់តែសោះអំពីប្រទេសជាច្រើនទៀត ដែលពលរដ្ឋក្នុងប្រទេសទាំងនោះមានសិទ្ធិសេរីភាពច្រើន តែពួកគេនៅតែមានសុខសន្តិភាព។
ទាក់ទងនឹងខ្លឹមសារនៃវីដេអូនេះ យុវជនមួយរូប និងជាអ្នកប្រើប្រាស់បណ្ដាញសង្គម លោក នាន់ សិរីបុត្រ យល់ថា ដរាបណារដ្ឋាភិបាលនៅតែបន្តរឹតត្បិតសិទ្ធិសេរីភាពរបស់ពលរដ្ឋ នោះពលរដ្ឋគួរតែបន្តភាពសកម្មរបស់ខ្លួនក្នុងការទាមទារសិទ្ធិសេរីភាព៖ « ប្រជាជនត្រូវតែប្រើសិទ្ធិរបស់គេ បើសិទ្ធរបស់គេត្រូវរឹតត្បិត។ ខណៈដែលប្រទេសជាតិជួបបញ្ហា គេត្រូវតែបញ្ចេញសិទ្ធិរបស់គេ ដើម្បីទាមទារនូវអ្វីដែលគេគិតថាត្រូវ » ។
ការដែលរដ្ឋាភិបាលចេញផ្សាយវីដេអូនេះ ស្របពេលគណបក្សប្រឆាំងព្រមានធ្វើមហាបាតុកម្ម ប្រសិនបើមានការចាប់ខ្លួនលោក កឹម សុខា អនុប្រធានគណបក្សសង្គ្រោះជាតិ និងបន្ទាប់ពីសកម្មជនដីធ្លី និងសង្គមស៊ីវិលមួយចំនួន ធ្វើយុទ្ធនាការថ្ងៃច័ន្ទពណ៌ខ្មៅ ដើម្បីទាមទារឲ្យមានការដោះលែងសកម្មជនសិទ្ធិមនុស្សដែលកំពុងជាប់ឃុំ តាមរយៈការតវ៉ាដោយសន្តិវិធី ប៉ុន្តែត្រូវបានរដ្ឋាភិបាលចាត់ទុកថា ជាសញ្ញានៃការធ្វើបដិវត្តន៍ពណ៌ និងបានចាត់វិធានការបង្ក្រាបជាបន្តបន្ទាប់ ទោះបីមានការថ្កោលទោសពីសហគមន៍ជាតិ និងអន្តរជាតិក៏ដោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។