ការសម្រេចនេះ ធ្វើឡើងនៅព្រឹកថ្ងៃសុក្រ ទី២ ខែសីហា ឆ្នាំ២០១៣ ក្នុងសវនាការលើកទីបី ដែលប្រព្រឹត្តទៅនៅបន្ទប់សវនាការនៃតុលាការខេត្តរតនគិរី បន្ទាប់ពីបានសាកសួរដេញដោលសាក្សីបន្ថែមចំនួន ៣នាក់ និងអានកំណត់ហេតុបំភ្លឺរបស់សាក្សីអវត្តមានចំនួន ៧នាក់។ ក្នុងនោះដែរ តំណាងក្រុមហ៊ុនទូរស័ព្ទ ម៉ូប៊ីតែល (Mobitel) និងក្រុមហ៊ុន មេហ្វហ្វូន (Metfone) បានឆ្លើយបំភ្លឺតាមទូរស័ព្ទមកចៅក្រមស៊ើបសួរថា ឯកសារថតទុកការសន្ទនាតាមរយៈទូរស័ព្ទនៃភាគីពាក់ព័ន្ធរឿងក្តីនេះ ត្រូវលុបចោលអស់ហើយ ក្រោយរយៈពេលមួយខែ។
កាលពីដើមខែកក្កដា ប្រធានក្រុមប្រឹក្សាជំនុំជម្រះ បានបើកសវនាការលើកទី២ ជម្រះរឿងក្តីសម្លាប់អ្នកកាសែតនេះ ប៉ុន្តែដោយសារតែក្រុមប្រឹក្សាជំនុំជម្រះរកឃើញថា ចៅក្រមស៊ើបសួរ លោក ឡុច ឡៅ មិនទាន់បានស៊ើបសួរសាក្សីមួយចំនួនទៀតពាក់ព័ន្ធរឿងក្តីនេះ ទើបក្រុមប្រឹក្សាជំនុំជម្រះចាត់តាំងឲ្យចៅក្រមស៊ើបសួរថ្មី គឺលោក សួស ឡា ស៊ើបសួរសាក្សីពាក់ព័ន្ធបន្ថែម ដែលក្នុងនីតិវិធីតុលាការហៅថាចាត់របៀប។
ទាក់ទិនរឿងក្តីនេះដែរ តំណាងស្ថាប័នអយ្យការ ព្រះរាជអាជ្ញារង លោក ជា សុភ័ក្រ បានធ្វើសេចក្តីសន្និដ្ឋានចុងក្រោយ និងរក្សាទុកការចោទប្រកាន់ជនជាប់ចោទទាំងពីរ ពីបទមនុស្សឃាតគ្រោងទុកជាមុនដដែល។ ចំណែកភាគីដើមចោទ គឺអ្នកស្រី អឹម ចន្ធីរ ទាមទារឲ្យផ្ដន្ទាទោសជនជាប់ចោទ និងទាមទារសំណងជំងឺចិត្តជាប្រាក់ ១០ម៉ឺនដុល្លារ។ រីឯភាគីជនជាប់ចោទទាំងពីរនាក់ប្ដីប្រពន្ធ អះអាងថា មិនបានប្រព្រឹត្តដូចការចោទប្រកាន់ទេ ហើយស្នើសុំឲ្យតុលាការដោះលែងពួកគេឲ្យមានសេរីភាពឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។