អង្គការស្ថាប័នផ្សេងៗ ឯកជន និងស្ថាប័នរដ្ឋជាច្រើន នាំគ្នាប្រារព្ធទិវាសិទ្ធិនារីអន្តរជាតិខួបលើកទី១០៦ ជាបន្តបន្ទាប់ក្នុងរយៈពេលប៉ុន្មានថ្ងៃមកនេះ។ ដោយឡែកកម្មករកម្មការិនី និងសហជីព នៅថ្ងៃទី៨ មីនា ក៏ប្រារព្ធទិវានេះតាមប្រធានបទរបស់ខ្លួនថា "បញ្ឈប់អំពើហិង្សាលើស្ត្រីនៅក្នុងវិស័យការងារ" ដែលនៅតែប្រឈម។
ប្រធានគណៈកម្មាធិការយេនឌ័រ នៃសហភាពការងារកម្ពុជា អ្នកស្រី ហេង ចិន្ដា មានប្រសាសន៍នៅថ្ងៃទី៨ មីនា ថា ការរំលោភបំពានខាងផ្លូវភេទ និងការប្រើហិង្សាលើស្ត្រី នៅតែមានច្រើនករណីចំពោះកម្មការិនីបម្រើការងារនៅតាមរោងចក្រកាត់ដេរសម្លៀកបំពាក់ និងស្បែកជើង។
អ្នកស្រីថ្លែងទៀតថា ស្ត្រីខ្លះក៏រងការរើសអើងក្នុងតួនាទីសហជីពការពារប្រយោជន៍ឲ្យកម្មករ៖ «នៅពេល ដែលក្លាយជាថ្នាក់ដឹកនាំ ខាងនិយោជកគាត់តែងតែលួងលោមទិញទឹកចិត្ត គា ត់ថា ឲ្យឈប់ ធ្វើប្រធាន សហជីពទៅ គាត់នឹងដំឡើងលុយ គាត់នឹងឲ្យតួនាទី ហើយបើសិនជាពួកគាត់អត់ព្រម គំរាមកំហែងដូចជាការរកវាយដំ ។ ជួនកាលអ្នកខ្លះប្រើពាក្យដូចជាថា ប្រយ័ត្នគាត់ជួលគេឲ្យរំលោភអី ជាដើម ។ អាហ្នឹងយើងតែងតែជួបប្រទះកន្លងមក។ អ៊ីចឹងនៅពេលដែលពួកគាត់ក្លាយជាថ្នាក់ ដឹកនាំសហជីព អ្នកខ្លះគាត់ភ័យប្រឈមនឹងបញ្ហាទាំងអស់ហ្នឹង » ។
ទន្ទឹមគ្នានេះ ប្រធានសហភាពការងារកម្ពុជា លោក អាត់ ធន់ ថ្លែងថា ស្ត្រីជាកម្មការិនីនៅតាមរោងចក្រ នៅតែរងការរំលោភបំពាន និងបិទសិទ្ធិសេរីភាពក្នុងវិស័យការងារពីខាងថៅកែ ដូចជាការគំរាមកំហែងបញ្ចប់កិច្ចសន្យា ការប្រើហិង្សាពេលពួកគាត់ទាមទារលក្ខខណ្ឌការងារឲ្យប្រសើរ។ ក្រៅពីនេះ ក៏មានការបៀតបៀនខាងផ្លូវភេទដែរ។
លោក អាត់ ធន់ ថ្លែងថា៖ «ដូចជានិយោជក អ្នកគ្រប់គ្រង ប្រធានក្រុម ប្រធានផ្នែកដែល មានអំណាច ហ្នឹង ជួនកាលគាត់ចង់បានស្ត្រីធ្វើជាដៃគូ គាត់ច្រើនតែប្រើវិធីឲ្យមុខតំណែង ហើយបើ អ្នកឯង មិនយកអាហ្នឹង គឺគាត់នឹងមិនផ្ដល់ឱកាសហ្នឹងដាក់គំនាបនៅក្នុងទណ្ឌកម្ម ។ ពេលខ្លះ អញ្ជើញគាត់ មក ធ្វើការ ថែមម៉ោង ឬថ្ងៃផ្សេងអត់ ធ្វើការ ដើម្បី ធ្វើបាប អីអ៊ីចឹង គឺមាននៅក្នុងរបាយការណ៍។ អ៊ីចឹងអានេះវាជារឿងមួយ ដែលគួរឲ្យខ្មាសអៀនណាស់ ដែលកើតមាន ហើយមួយទៀត ផ្នែកអារម្មណ៍ ខ្ញុំគិត ថាការ គំរាមកំហែង អំពីសេរីភាព ដូចជា ថាមិន ឲ្យគាត់ធ្វើអី ឬក៏មិនឲ្យគាត់ចូលរួម ឬបំភិតបំភ័យ គាត់ថា នឹងបាត់បង់សិទ្ធិការងារអីហ្នឹង គឺជាការ គំរាមកំហែង ក្នុងវិស័យការងារ » ។
ទាក់ទងបញ្ហាគំរាមកំហែងនេះ កម្មការិនីរោងចក្រ អឹមវ៉េ៣ កញ្ញា សឿន ចំរើន បន្ទរថា ស្ត្រីកម្មការិនីប្រឈមនឹងការរើសអើងច្រើន ហើយស្ត្រីទាំងនេះមិនសូវហ៊ានតវ៉ាខ្លាំងទេ ព្រោះខ្លាចបាត់បង់ការងារ។ ប៉ុន្តែកញ្ញាថ្លែងថា ការរំឭកទិវាសិទ្ធិនារី ៨ មីនា ជាការផ្ដល់កិត្តិយសដល់ស្ត្រី និងជំរុញទឹកចិត្តស្ត្រីឲ្យហ៊ានងើបតវ៉ា៖ «ប្រារព្ធទិវាស្ត្រី ៨ មីនា នេះ ធ្វើឲ្យស្ត្រីខ្លួនខ្ញុំផ្ទាល់មានអារម្មណ៍រំភើប ហើយមានអារម្មណ៍ថា ខ្ញុំក្លាហានជាងមុន ហើយស្ត្រីខ្លួនឯងត្រូវតែពង្រឹងសមត្ថភាពខ្លួនឯង ហើយស្ត្រី ជុំវិញគ្នាយើង ត្រូវតែឲ្យតម្លៃ និងគាំទ្រស្ត្រីគ្នាឯង ដើម្បីឲ្យស្ត្រីហ្នឹងឈានដល់ថ្នាក់ដឹកនាំស្ត្រីនៅកន្លែងការងារតាមមូលដ្ឋាន » ។
ប្រធានសហភាពការងារកម្ពុជា លោក អាត់ ធន់ ដែលរៀបចំការប្រារព្ធទិវាសិទ្ធិនារីអន្តរជាតិ ៨ មីនា ថ្លែងថា ពិធីនេះជាការបញ្ជូនសារដល់រដ្ឋាភិបាលអំពីបញ្ហារំលោភសិទ្ធិការងារ ការប្រើហិង្សាលើស្ត្រីពេលពួកគាត់តវ៉ាទាមទារប្រាក់ឈ្នួលសមរម្យ និងលក្ខខណ្ឌការងារផ្សេងៗ។ លោកបញ្ជាក់ថា កម្មករកំពុងប្រឈមបញ្ហាបាត់សិទ្ធិ និងអត្ថប្រយោជន៍ ព្រោះតែថៅកែរោងចក្រម៉ៅការបន្ត មិនគោរពសិទ្ធិការងារ ដោយប្រើកិច្ចសន្យាខ្លី បញ្ឈប់ស្ត្រីឆ្លងទន្លេពីការងារ មិនឲ្យមានសហជីព និងមិនបង់របបសន្តិសុខសង្គម ជាដើម។ ថៅកែខ្លះដូររោងចក្រ ឬរត់ចោលរោងចក្រដោយមិនបើកប្រាក់ឈ្នួលឲ្យកម្មកររាប់ពាន់នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។