ក្រុមអង្គការមិនមែនរដ្ឋាភិបាល និងគណបក្សសង្គ្រោះជាតិ ថ្កោលទោសការបង្ក្រាបរបស់អាជ្ញាធរសាលារាជធានីភ្នំពេញ ទៅលើការតវ៉ារបស់ពលរដ្ឋមកពីសហគមន៍បឹងកក់ ថ្មគោល និងសហគមន៍បុរីកីឡា កាលពីថ្ងៃទី២៩ ខែឧសភា ថាពុំបានដើរតាមលំអានប្រជាធិបតេយ្យ ដែលយកសិទ្ធិពលរដ្ឋជាធំ ដោយរួមទាំងធ្វើការទាមទារសិទ្ធិដោយអហិង្សាផង។
បណ្ដាញអង្គការធ្វើការងារលើកស្ទួយសិទ្ធិស្ត្រី ដែលរួមមានអង្គការជាង២០ គណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិមនុស្សនៅកម្ពុជា និងក្រុមប្រឹក្សាឃ្លាំមើលកម្ពុជា បានប្រកាសថា អាជ្ញាធរក្រុងភ្នំពេញមិនគួរបន្តគេចវេះមិនផ្ដល់ដំណោះស្រាយដល់អ្នកតវ៉ា ហើយបែរជាចាត់វិធានការបំបែកពួកគាត់ រហូតធ្វើអោយអ្នកតវ៉ា ៣នាក់បានសន្លប់ និងមួយចំនួនទៀតរងរបួសឡើយ។
ថ្លែងនៅក្នុងសន្និសីទសារព័ត៌មាននៅរសៀលថ្ងៃព្រហស្បតិ៍ ទី៣០ ខែឧសភា អ្នកស្រី ធីតា ឃិះ មានប្រសាសន៍ដោយទទូចអោយរដ្ឋាភិបាលងាកមកផ្ដល់ដំណោះស្រាយដល់អ្នកតវ៉ារឿងដីធ្លី និងបញ្ឈប់រាល់អំពើហិង្សាទៅលើពួកគាត់ ដើម្បីស្ដារមុខមាត់រដ្ឋាភិបាល ទាំងក្នុងស្រុក និងនៅលើឆាកអន្តរជាតិ។ ដ្បិតរដ្ឋាភិបាលតែងអះអាងថា ប្រកាន់លទ្ធិប្រជាធិបតេយ្យ។
ចំណែកនៅក្នុងសេចក្ដីថ្លែងការរបស់ខ្លួន គណបក្សសង្គ្រោះជាតិ បានអំពាវនាវអោយរដ្ឋាភិបាលត្រូវទទួលខុសត្រូវរាល់អំពើហិង្សាដែលបានធ្វើឡើងដោយអាជ្ញាធរ ចំពោះអ្នកតវ៉ារឿងដីធ្លី នៅពេលមានការបណ្ដេញចេញដោយបង្ខំ។ ជាមួយគ្នានេះ ក៏បានជំរុញអោយរដ្ឋាភិបាលបញ្ឈប់រាល់អំពើហិង្សាគ្រប់ទម្រង់ទៅលើក្រុមអ្នកតវ៉ា រួមទាំងក្រុមកម្មករដែលកំពុងទាមទារសិទ្ធិរបស់ពួកគេ ស្ទើរជារៀងរាល់ថ្ងៃនោះផង។
សេចក្តីថ្លែងការណ៍ប្រឆាំងអំពើហិង្សាទាំងនេះ បានកើតឡើងបន្ទាប់ពីក្រុមអ្នកតវ៉ាប្រមាណ ២០០នាក់ កាលពីថ្ងៃទី២៩ ឧសភា បាននាំគ្នាធ្វើបាតុកម្មបិទមហាវិថីព្រះមុនីវង្ស នៅចំណុចខាងមុខសាលារាជធានីភ្នំពេញ ដើម្បីសុំឲ្យអភិបាលរាជធានីភ្នំពេញ ថ្មី លោក ប៉ា សុជាតិវង្ស ដោះស្រាយជម្លោះដីធ្លីរបស់ពួកគាត់ ជាមួយក្រុមហ៊ុនដែលបានអូសបន្លាយប្រមាណ ៥ឆ្នាំទៅហើយ។ អាជ្ញាធររាជធានីភ្នំពេញ បានបំបែកក្រុមអ្នកតវ៉ាដោយប្រើរថយន្តបាញ់ទឹកពន្លត់អគ្គិភ័យចំនួន ៣គ្រឿង បាញ់សន្ធាប់ទៅលើពួកគាត់ បណ្ដាលឲ្យស្ត្រី ៣នាក់សន្លប់នៅនឹងកន្លែង និងមានស្ត្រីជាច្រើននាក់ទៀតបានរបូតសម្លៀកបំពាក់។
យ៉ាងណា ស្នងការនគរបាលរាជធានីភ្នំពេញ លោក ជួន សុវណ្ណ បានអះអាងថា ការបង្ក្រាបនៅពេលនោះ គឺដើម្បីរក្សាការពារសិទ្ធិពលរដ្ឋដទៃទៀត។ លោក ជួន សុវណ្ណ ពុំអធិប្បាយឡើយចំពោះការបង្ក្រាបដែលធ្វើអោយមានស្ត្រីអ្នកតវ៉ាបានរបូតសម្លៀកបំពាក់។
មន្ត្រីខុទ្ទកាល័យសាលារាជធានីភ្នំពេញ លោក ឡុង ឌីម៉ង់ បានលើកហេតុផលប្រហាក់ប្រហែលនឹងលោក ជួន សុវណ្ណ ដែរ និងបញ្ជាក់ថា អ្នកតវ៉ាត្រូវគិតគូរអោយបានច្បាស់ពីផលប៉ះពាល់នានា ដែលកើតចេញពីការតវ៉ា រួមទាំងការប៉ះពាល់ដល់កិត្តិយសសេចក្តីថ្លៃថ្នូររបស់ខ្លួនផង។
ស្ត្រីចំណាស់ ង៉ែត ឃុន ដែលជាអ្នកភូមិបឹងកក់ មានប្រសាសន៍នៅរសៀលថ្ងៃទី៣០ ឧសភា ថា ពួកគាត់ពុំចង់បានអ្វីក្រៅពីដំណោះស្រាយបញ្ចប់ជម្លោះដីធ្លីនៅក្នុងរាជធានីភ្នំពេញ ជាពិសេសតំបន់បឹងកក់ បុរីកីឡា និងថ្មគោល ឡើយ។ លោកស្រីបន្តថា ការបង្ក្រាបនៅពេលនេះ កំពុងបញ្ឆេះកំហឹងពួកគាត់អោយស៊ូស្លាប់ដើម្បីទាមទារសិទ្ធិដីធ្លីផ្ទះសម្បែង។
កន្លងទៅ អ្នកបឹងកក់ បានទាមទារអោយបោះព្រំដីបញ្ចូលអ្នកភូមិ ៤៨គ្រួសារទៀត ចូលក្នុងគម្រោងអភិវឌ្ឍន៍នៅនឹងកន្លែង ផ្ដល់ប្លង់កម្មសិទ្ធិអោយពលរដ្ឋនៅសេសសល់អោយគ្រប់ចំនួន កសាងប្រព័ន្ធលូបណ្ដោះទឹកចេញពីភូមិ និងពិសេសផ្ដល់យុត្តិធម៌ដោះលែងអ្នកស្រី យ៉ោម បុប្ផា។ ចំណែកអ្នកបុរីកីឡា និងសហគមន៍ថ្មគោល បានទាមទារដំណោះស្រាយសមរម្យដល់ពួកគាត់ ក្នុងពេលបណ្ដេញចេញ។ ក្នុងគ្រាពលរដ្ឋជាង ១០០គ្រួសារ កំពុងរស់នៅលើគំនរសំរាមក្រោយពេលក្រុមហ៊ុនផានអ៊ីម៉ិច ឈូសបំផ្លាញផ្ទះសម្បែង និង ១៨២គ្រួសារក្នុងសហគមន៍ថ្មគោល ក្បែរព្រលានយន្តហោះអន្តរជាតិភ្នំពេញ កំពុងប្រឈមនឹងការបណ្ដេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។