អង្គការធ្វើការតាមដានលើការវិវត្តន៍របស់សង្គម ថ្នាក់ជាតិនិងអន្តរជាតិ បានចាត់ទុកថា ស្ថានភាពនៃការគោរពសិទ្ធិមនុស្សនៅប្រទេសកម្ពុជា បានធ្លាក់ចុះ និងជាក្ដីកង្វល់ ជាពិសេស ក្នុងរយៈពេលប៉ុន្មានឆ្នាំមកនេះ បញ្ហាការបំពារបំពាន ផ្នែកសិទ្ធិមនុស្ស ត្រូវបានក្រុមអ្នកឃ្លាំមើលរបស់អង្គការសង្គមស៊ីវិលមើលឃើញថា បានកើតឡើងញឹកញាប់ទៅលើកម្មករនៅតាមរោងចក្រសហគ្រាស។
មជ្ឈមណ្ឌលសិទ្ធិមនុស្សកម្ពុជា (CCHR) ឲ្យដឹងថា កម្ពុជានៅតែខកខានការសន្យារបស់ខ្លួនចំពោះការផ្ដល់តម្លៃលើផ្នែកសិទ្ធិមនុស្ស។ ជាពិសេសការគាបសង្កត់សិទ្ធិសេរីភាពនេះ ត្រូវមើលឃើញកាន់តែច្បាស់ក្នុងដំណាក់កាលចុងក្រោយនេះ គឺនៅពេលដែលអាជ្ញាធរប្រើកម្លាំងប្រឆាំងក្រុមបាតុករផ្នែកវាយនភណ្ឌកាត់ដេរ ដែលតវ៉ាទាមទារប្រាក់ខែសមរម្យ។
នៅក្នុងសេចក្ដីថ្លែងការណ៍របស់មជ្ឈមណ្ឌលសិទ្ធិមនុស្សកម្ពុជា ចុះថ្ងៃទី១៩ មករា ចេញផ្សាយអំពីគោលនយោបាយសង្ខេបវិស័យឧស្សាហកម្មកាត់ដេរកម្ពុជា របស់ខ្លួន បានបរិយាយថា ថ្វីបើមានកិច្ចការពារផ្នែកច្បាប់ និងក្របខ័ណ្ឌគោលនយោបាយ ព្រមទាំងគោលនយោបាយថ្នាក់ជាតិមួយចំនួន ក្នុងកម្រិតមួយយ៉ាងក្ដី ក៏សិទ្ធិការងារនៅតែត្រូវបានរំលោភបំពានក្នុងអត្រាមួយគួរឲ្យព្រួយបារម្ភ នៅក្នុងវិស័យកាត់ដេរកម្ពុជាដែរ។
របាយការណ៍កម្រាស់ ៤៣ទំព័រ ដែលមជ្ឈមណ្ឌលសិទ្ធិមនុស្សកម្ពុជា ចេញផ្សាយបន្តថា បច្ចុប្បន្ននេះ វិស័យកាត់ដេរកម្ពុជា ត្រូវញាំញីដោយបញ្ហាសិទ្ធិមនុស្ស ជាពិសេស ដើមឆ្នាំ២០១៤ នេះ ការតវ៉ាជាច្រើនរបស់កម្មកររោងចក្រ ដើម្បីទាមទារប្រាក់ឈ្នួលសមរម្យ ត្រូវបានជំនួសមកវិញដោយការប្រើហិង្សាហួសហេតុពីសំណាក់មន្ត្រីនគរបាល ដែលបណ្ដាលឲ្យមានអ្នកស្លាប់ និងរបួសជាច្រើននាក់ផ្សេងទៀត។
បន្ថែមលើសេចក្ដីថ្លែងការណ៍នេះ អ្នកសម្របសម្រួលគម្រោងធុរកិច្ច និងសិទ្ធិមនុស្សរបស់មជ្ឈមណ្ឌលសិទ្ធិមនុស្សកម្ពុជា លោក ឌុច ពិសិដ្ឋ ឲ្យដឹងថា ហិង្សាទំនងអាចនឹងមិនថមថយឡើយ បើការដោះស្រាយប្រាក់ឈ្នួលសម្រាប់កម្មករទ្រទ្រង់ជីវភាពរស់នៅ នៅតែយឺតយ៉ាវ ហើយពុំមានភាពស៊ីគ្នាទៅនឹងការឡើងថ្លៃទំនិញនៅលើទីផ្សារនោះ។
លោក ឌុច ពិសិដ្ឋ៖ «បើសិនយើងពិនិត្យមើលទៅស្ថានភាពបច្ចុប្បន្ននេះ យើងគិតថា ដោយថាកាលពីដើមឆ្នាំ២០១៤ នេះ យើងឃើញថា មានការបង្ក្រាបយ៉ាងហិង្សា រហូតមានអ្នកស្លាប់ ទៅលើការតវ៉ារបស់កម្មកររោងចក្រកាត់ដេរ។ អ៊ីចឹងយើងគិតថា យើងមានការព្រួយបារម្ភនៅពេលខាងមុខទៀត អាចនឹងមានហិង្សាកើតឡើង បើសិនខាងក្រុមកម្មកររាប់រយរាប់ពាន់ហ្នឹងគាត់ចេញមិនតវ៉ាម្ដងទៀត ពាក់ព័ន្ធនឹងការដំឡើងប្រាក់ឈ្នួលអប្បបរមារបស់គាត់»។
ទោះយ៉ាងណា លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ និងអ្នកពាក់ព័ន្ធលើវិស័យកាត់ដេរ ក្រោយពីកើតហិង្សាកាលពីដើមឆ្នាំ២០១៤ បានអះអាងថា ការដំឡើងប្រាក់ខែគោលសម្រាប់កម្មករ នឹងមិនអាចដំឡើងឲ្យលើសពី ១០០ដុល្លារបានឡើយ បើផ្អែកតាមស្ថានភាពបច្ចុប្បន្ន។
ក៏ប៉ុន្តែសហភាពការងារកម្ពុជា កាលពីថ្ងៃទី១២ មករា បានចេញផ្សាយនូវរបាយការណ៍តាមរយៈក្រសួងផែនការក្នុងឆ្នាំ២០១៤ ដែលរកឃើញថា កម្មករម្នាក់គួរទទួលបានចំណូលយ៉ាងហោចណាស់ ១៦៤ដុល្លារក្នុងមួយខែ។
កាលពីថ្ងៃទី១៨ មករា នៅក្នុងពិធីបើកសម្ពោធអាគារភូមិកុមារ អេស.អូ.អេស (SOS) ក្នុងខេត្តក្រចេះ សម្រាប់លោកនាយករដ្ឋមន្ត្រី ហ៊ុន សែន វិញ បានហៅការប្រមូលផ្ដុំរបស់កម្មករដើម្បីទាមទារប្រាក់ខែគោលកន្លងមកនេះថា គឺជាក្រុមអនាធិបតេយ្យ និងមិនអាចលើកលែងឲ្យបាន។
លោក ហ៊ុន សែន៖ «អាហ្នឹងដែលរដ្ឋាភិបាល រាជរដ្ឋាភិបាលយកចិត្តទុកដាក់នេះ គឺនៅកន្លែងហ្នឹង។ មិនដឹងមនុស្សពីកន្លែងណាកន្លែងណី។ ឆក់ប្លន់ ហើយកន្លែងខ្លះទៅរូចូលក្នុងរោងចក្រគេ។ រូបភាពបញ្ចាំងបានមកតើ! ឥឡូវដំណើរធម្មតាអ៊ីចឹងទៅ គ្រូបង្រៀនបង្រៀនសិស្ស សិស្សចូលរៀន អ្នកលក់ដូរ លក់ដូរទៅ។ ហើយអ្នកណាដែលគេមានពេលវេលាធ្វើបាតុកម្ម អាហ្នឹងឲ្យគេទៅធ្វើបាតុកម្មធ្វើទៅ។ តែធ្វើឲ្យត្រូវតាមច្បាប់ ធ្វើខុសច្បាប់មានបញ្ហា»។
កាលពីថ្ងៃទី២ និងថ្ងៃទី៣ មករា កន្លងទៅ អាជ្ញាធរបានបង្ក្រាបទៅលើកម្មករ បានកើតឡើងយ៉ាងខ្លាំង ធ្វើឲ្យមនុស្សចំនួន ៤នាក់ត្រូវបានបាញ់សម្លាប់ ៣នាក់ បាត់ខ្លួន និងជិត ៤០នាក់ផ្សេងទៀតរបួសធ្ងន់និងស្រាល ព្រមទាំង ២៣នាក់ ត្រូវបានចាប់ឃុំខ្លួន ដោយចោទប្រកាន់តាមផ្លូវតុលាការ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។