វិវាទមួយនេះ កើតឡើងបន្ទាប់ប្រជាពលរដ្ឋម្នាក់បានទៅប្ដឹងឲ្យលោកអនុប្រធានភូមិព្រៃព្រហ្ម ឃុំពោទី ស្រុកស៊ីធរកណ្ដាល ខេត្តព្រៃវែង ដើម្បីឲ្យលោកជួយរកខុសត្រូវដោះស្រាយទំនាស់របស់ខ្លួន កាលពីរសៀលថ្ងៃទី៣ កញ្ញា។
ប្រជាពលរដ្ឋឈ្មោះ លោក អឿន ស្រឿ រស់នៅភូមិព្រៃព្រហ្ម ឃុំពោទី ថ្លែងនៅថ្ងៃទី៤ កញ្ញា ថា នៅពេលដែលលោកធ្វើដំណើរដល់ផ្ទះអនុប្រធានភូមិ លោកថា ពេលនោះស្រាប់តែគូទំនាស់របស់លោកក៏បានទៅដល់ផ្ទះរបស់អនុប្រធានភូមិដែរ។ លោកថា មួយរំពេចនោះ ស្រាប់តែបានផ្ទុះវិវាទពាក្យសម្ដីឌឺដងគ្នាកើតឡើង។ លោកថា ពេលនោះអាជ្ញាធរភូមិខឹងសម្បារ ហើយបានវាយចំមុខរបស់ខ្លួនចំនួន ២ដៃ៖ «វាយហ្នឹងវានេះដែរ ហ្នឹងមាវិលហ្នឹង វាយដៃទេបង ដាល់ហ្មង។ បានឈ្លោះប្រកែកតិចតួចជាមួយប្អូនគេ ផុន រុំ ហ្នឹង នៅកន្លែងផ្ទះហ្នឹង។ ដល់អ៊ីចឹង រួចនេះទៅហ្នឹង ក៏ទៅប្ដឹង ហុង ម៉ាប់ ហ្នឹង។ ខ្ញុំក៏ចូលទៅ គេប្ដឹងៗថាអ៊ីឯងវាយអញ ហើយទៅប្ដឹងទៀត។ ដល់អ៊ីចឹងទៅ ខ្ញុំក៏ចេញមក គេថាកុំទុកកាប់កាំបិតដាច់ក។ ខ្ញុំស្ទុះទៅរង។ ស្ទុះទៅ ហុង ម៉ាប់ ហ្នឹងបាននេះមកចាប់ខ្ញុំដាល់ ២ដៃឡើងវិលបងអើយ! ហ្នឹងអនុភូមិណាហ្នឹង ខ្ញុំថាអនុភូមិអីធ្វើអ៊ីចឹង ខ្ញុំថាអ៊ីចឹង»។
លោកថា ដើមឡើយ លោកមានទំនាស់ពាក្យសម្ដីគ្នាជាមួយគូភាគីឈ្មោះ លោក ផុន រុំ ដែលជាប្រជាពលរដ្ឋរស់នៅក្នុងភូមិជាមួយគ្នា។ លោកថា បុរសឈ្មោះ ផុន រុំ ត្រូវជាក្មួយបង្កើតរបស់លោកអនុប្រធានភូមិ។ លោកថា អាជ្ញាធរភូមិមិនត្រឹមតែវាយដំមកលើរូបរាងកាយរបស់លោកប៉ុណ្ណោះទេ ហើយលោកអនុប្រធានភូមិថែមទាំងបានប្ដឹងប៉ូលិសឲ្យចាប់រូបលោកទៀតផង។
ឆ្លើយតបទៅនឹងការចោទប្រកាន់នេះ អនុប្រធានភូមិព្រៃព្រហ្ម លោក ហុង ម៉ាប់ បញ្ជាក់ឲ្យដឹងថា លោកពុំបានវាយដំទៅលើរូបរាងកាយរបស់ប្រជាពលរដ្ឋដូចការលើកឡើងឡើយ៖ «ខ្ញុំការដែលវាយដែលដំហ្នឹង ខ្ញុំអត់បានដឹងដែរបង ព្រោះមនុស្សហ្នឹងស្រវឹងមិនដឹងមកពីណាអីពីណា ខ្ញុំបានដឹងទេបង។ ខ្ញុំគ្រាន់តែសុំផ្ដល់ព័ត៌មានបងឲ្យបានដឹងថា មនុស្សហ្នឹងចូលមកអុកឡុកផ្ទះខ្ញុំតែប៉ុណ្ណឹង។ គ្រាន់តែខ្ញុំបានចាប់ប្រតាយប្រតប់គ្នាចេញ ដើម្បីចៀសវាងកុំឲ្យមានរឿងកើតនៅក្នុងផ្ទះខ្ញុំតែប៉ុណ្ណឹងបង»។
លោកថា ជនបង្កបានចូលធ្វើការអុកឡុក និងបង្កភាពអានាធិបតេយ្យក្នុងផ្ទះរបស់លោក ហើយបញ្ហានេះ លោកថាបានធ្វើឲ្យប៉ះពាល់ដល់សិទ្ធិសេរីភាពក្នុងការរស់នៅរបស់គ្រួសារលោក។
មន្ត្រីសម្របសម្រួលអង្គការអាដហុក (ADHOC) ប្រចាំខេត្តព្រៃវែង អ្នកស្រី អៀង គិមលី មានប្រសាសន៍ថា អាជ្ញាធរមានតួនាទីក្នុងការដោះស្រាយទំនាស់ទាំងឡាយរបស់ប្រជាពលរដ្ឋ ដោយមិនប្រកាន់បក្ខពួក ឬជាសាច់ញាតិរបស់ខ្លួនឡើយ។ អ្នកស្រីបន្តថា អាជ្ញាធរក៏មិនត្រូវប្រើអំពើហិង្សាវាយដំលើរូបរាងកាយរបស់ប្រជាពលរដ្ឋដែរ៖ «ទោះបីជាមានបញ្ហាយ៉ាងម៉េចក៏ដោយ ព្រោះខ្លួនគាត់ក្នុងនាមជាអាជ្ញាធរ គាត់កំពុងបំពេញកាតព្វកិច្ចឲ្យគេ នៅពេលដែលគេទៅពឹងគាត់ឲ្យគាត់ជួយដោះស្រាយនៅលើករណីហ្នឹង ទោះបីយ៉ាងណា គាត់មិនត្រូវប្រើហិង្សាដែរ។ ពាក្យថាប្រើហិង្សា គឺខុសហើយ ព្រោះយើងត្រូវដោះស្រាយរឿងអ្វីក៏ដោយ ត្រូវដោះស្រាយដោយសន្តិវិធី»។
អ្នកស្រីថា អាជ្ញាធរប៉ូលិស គួរពិនិត្យតាមដានរកខុសត្រូវចំពោះបញ្ហានេះឲ្យបានច្បាស់ ដើម្បីចៀសវាងការចោទប្រកាន់មនុស្សច្រឡំ ដែលបណ្ដាលឲ្យមានការប៉ះពាល់ដល់កិត្តិយសរបស់ប្រជាពលរដ្ឋនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។