លោក ឱម យ៉ិនទៀង ថ្លែងថា របាយការណ៍ស្ដីពីស្ថានភាពសិទ្ធិមនុស្សនៅកម្ពុជា របស់លោក សុរិយា ស៊ូប៊ែឌី ជារបាយការណ៍ឯកតោភាគី និងមិនមានភាពច្បាស់លាស់។
ថ្លែងក្នុងសន្និសីទសារព័ត៌មាន នៅព្រឹកថ្ងៃពុធ ទី២៣ ខែឧសភា ឆ្នាំ២០១៣ លោក ឱម យ៉ិនទៀង មានប្រសាសន៍ថា ជំនួបរវាងលោក និងលោក សុរិយា ស៊ូប៊េឌី ជាជំនួបដែលប្រព្រឹត្តទៅដោយរីករាយ។ ក៏ប៉ុន្តែ ទោះជាដូច្នេះក្ដី លោកចាត់ទុកថា របាយការណ៍ស្ដីពីស្ថានភាពសិទ្ធិមនុស្សនៅកម្ពុជា របស់លោក សុរិយា ស៊ូប៊ែឌី គឺជាគ្រាប់ព្រួញសម្រាប់កម្ពុជា៖ «របាយការណ៍ហ្នឹងដូចព្រួញបាញ់មកតែម្ខាងអ៊ីចឹង។ ឱ្យហូរឈាមរឹមៗ»។
លោកបន្តថា នៅក្នុងជំនួបនេះ លោក សុរិយា ស៊ូប៊ែឌី មានគោលបំណងសុំស្ដាប់របាយការណ៍រីកចម្រើនរបស់រដ្ឋាភិបាលកម្ពុជា ក្នុងការអនុវត្តអនុសាសន៍ ៤ចំណុចរបស់លោក ដែលបានផ្ដល់ចំពោះរដ្ឋាភិបាលតាមរយៈរបាយការណ៍ស្ដីពីស្ថានភាពសិទ្ធិមនុស្ស បន្ទាប់ពីលោកបញ្ចប់ដំណើរទស្សនកិច្ចមកកម្ពុជា លើកទី៨ កាលពីខែធ្នូ ឆ្នាំ២០១២ កន្លងទៅ។ ក្នុងអនុសាសន៍ទាំងនោះ គឺពាក់ព័ន្ធនឹងសភា កំណែប្រព័ន្ធបោះឆ្នោត សម្បទានដីសេដ្ឋកិច្ច និងប្រព័ន្ធតុលាការ ដែលលោកបានធ្វើបន្ទាប់ពីបេសកកម្មមកកម្ពុជា កាលពីខែធ្នូ ឆ្នាំ២០១២។
លោកមានប្រសាសន៍ថា ចំណុចដែលលោក សុរិយា ស៊ូប៊ែឌី សុំស្ដាប់របាយការណ៍រីកចម្រើនរបស់រដ្ឋាភិបាលកម្ពុជា ក្នុងការអនុវត្តអនុសាសន៍ចំណុចទាំងនេះ ដូច្នេះ លោកចាត់ទុកថា លោក សុរិយា ស៊ូប៊ែឌី មិនបានពិនិត្យរបាយការណ៍របស់រដ្ឋាភិបាលដែលជូនលោកទេ។
លោក ឱម យ៉ិនទៀង៖ «យើងបានជូនទៅអង្គការសហប្រជាជាតិនៅភ្នំពេញ ឱ្យបកប្រែជាភាសាអង់គ្លេស ឱ្យយើងទៀត។ អ៊ីចឹង យើងបានបញ្ជូនទៅឱ្យគាត់។ ប៉ុន្តែផ្ទុយទៅវិញ សូមតែមួយបន្ទាត់ក៏គាត់អត់មើលដែរ។ គាត់អត់មើលតែម្ដង ព្រោះក្នុងអនុសាសន៍ ក្នុងចំណុចតាំងពីបញ្ហាដីបឹងកក់ រឿងបញ្ហាដីសម្បទាន រឿងបញ្ហាប្រព័ន្ធតុលាការ រឿងការបោះឆ្នោត ដែលគាត់លើកប៉ុន្មាន យើងបានធ្វើអត្ថាធិប្បាយទៅគាត់ ចំណុចណាយ៉ាងម៉េចៗលើបញ្ហានេះ។ ផ្ទុយទៅវិញ គាត់មកសួរដដែល បានន័យថា គាត់អត់បានអាន កុំថាមួយទំព័រ មួយបន្ទាត់ក៏អត់ដែរ»។
លោកថ្លែងថា លោក សុរិយា ស៊ូប៊ែឌី ទទួលស្គាល់ថា រដ្ឋាភិបាលកម្ពុជា មានមាគ៌ា និងយុត្តិសាស្ត្រល្អ ហើយលោកគាំទ្រថា ការអភិវឌ្ឍសេដ្ឋកិច្ចកម្ពុជា បានផ្ដល់ផលដល់ប្រជាជនម្នាក់ៗដែរ។
ទាក់ទងនឹងការបោះឆ្នោតដែលមានអត្រាអ្នកបោះឆ្នោតថយចុះពីរភាគរយ គឺពី ៦៧% មក ៦៥% ត្រូវបានលោក ឱម យ៉ិនទៀង ពន្យល់ថា បណ្ដាលមកពីកត្តា ២សំខាន់ គឺទី១ មកពីបញ្ជីឈ្មោះប៉ោង ដែលលុបមិនបានអស់ ដូចជាអ្នកស្លាប់ និងអ្នកផ្លាស់ប្ដូរទីកន្លែង។ ទី២ គឺច្បាប់បោះឆ្នោតកម្ពុជា មិនបានបង្គាប់ឱ្យចាប់បង្ខំពលរដ្ឋឱ្យទៅបោះឆ្នោតទេ។
លោកបន្ថែមថា របាយការណ៍របស់លោក សុរិយា ស៊ូប៊ែឌី គឺជារបាយការណ៍ដែលធ្វើឡើងក្នុងលក្ខណៈតែម្ខាង ហើយត្រូវបានគណបក្សប្រឆាំងយកទៅប្រើដើម្បីចំណេញនយោបាយ។
ក្រោយជំនួបនៅថ្ងៃទី២២ ឧសភា នេះ លោក សុរិយា ស៊ូប៊ែឌី មិនបានធ្វើអត្ថាធិប្បាយអ្វីក្បោះក្បាយទេ អំពីខ្លឹមសារនៃកិច្ចប្រជុំនោះ៖ «ខ្ញុំនឹងចែករំលែកទស្សនៈរបស់ខ្ញុំដល់លោកអ្នក នៅថ្ងៃសៅរ៍។ ខ្ញុំមានកិច្ចប្រជុំប្រកបដោយភាពស្ថាបនាល្អជាមួយលោក ឱម យ៉ិនទៀង។ ខ្ញុំបានទទួលព័ត៌មានជាច្រើន ហើយខ្ញុំនឹងចាត់ការដាក់បញ្ចូលក្នុងរបាយការណ៍របស់ខ្ញុំ ហើយនឹងដាក់ជូនក្រុមប្រឹក្សាសិទ្ធិមនុស្សអង្គការសហប្រជាជាតិ។ ប៉ុន្តែអ្វីដែលខ្ញុំរកឃើញ ខ្ញុំនឹងចែករំលែកនៅថ្ងៃសៅរ៍»។
ដំណើរទស្សនកិច្ចលើកទី៩ រយៈពេលមួយសប្ដាហ៍របស់លោក សុរិយា ស៊ូប៊ែឌី នឹងត្រូវបញ្ចប់នៅថ្ងៃសៅរ៍ ទី២៥ ឧសភា សប្ដាហ៍នេះ ហើយលោកនឹងធ្វើសន្និសីទសារព័ត៌មានរួមមួយ ជុំវិញដំណើរទស្សនកិច្ចរបស់លោកនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។