មន្ត្រីជាន់ខ្ពស់អង្គការសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) មករដ្ឋធានីវ៉ាស៊ីនតុន ជួបនឹងមន្ត្រីជាន់ខ្ពស់រដ្ឋាភិបាលអាមេរិក និងសមាជិកព្រឹទ្ធសភាដើម្បីជជែកពីបញ្ហាសិទ្ធិមនុស្សនៅកម្ពុជា។
ក្នុងជំនួបនោះមន្ត្រីរដ្ឋាភិបាលអាមេរិក ស្លុតចិត្តចំពោះរបាយការណ៍នានានៃការរំលោភសិទ្ធិមនុស្ស ការរៀបចំការបោះឆ្នោតដោយមិនសេរីនិងយុត្តិធម៌ និងការបន្តកាន់អំណាចក្នុងរយៈពេល ៣០ឆ្នាំរបស់លោក ហ៊ុន សែន ដោយការគ្រប់គ្រងលទ្ធផលបោះឆ្នោត។
នាយកប្រតិបត្តិទទួលបន្ទុកកិច្ចការតំបន់អាស៊ីរបស់អង្គការ យូមែន រ៉ៃត៍ វ៉ច្ឆ លោក ប្រ៊ែដ អាដាម (Brad Adams) បញ្ជាក់ក្នុងបទសម្ភាសន៍ជាមួយវិទ្យុអាស៊ីសេរី នៅរដ្ឋធានីវ៉ាស៊ីនតុន ថា ក្នុងដំណើររបស់លោកនេះ លោកបានជួបនឹងមន្ត្រីក្រុមប្រឹក្សាសន្តិសុខសេតវិមាន (White House) ក្រសួងការបរទេស ក្រសួងការពារជាតិ និងសមាជិកព្រឹទ្ធសភា។
លោក ប៊្រែដ អាដាម៖ «ខ្ញុំបានជជែកបញ្ហាសិទ្ធិមនុស្សក្នុងប្រទេសផ្សេងៗ ជាពិសេសបញ្ហាសិទ្ធិមនុស្សនៅកម្ពុជា។ មន្ត្រីទាំងនោះមានការងឿងឆ្ងល់ចំពោះប្រទេសកម្ពុជា បន្ទាប់ពីរយៈពេល ២០ឆ្នាំក្រោយការបោះឆ្នោតរៀបចំដោយអង្គការសហប្រជាជាតិ ដែលនៅបន្តជួបប្រទះបញ្ហាសិទ្ធិមនុស្សជាមូលដ្ឋាន គោលការណ៍លទ្ធិប្រជាធិបតេយ្យ និងតួនាទីរបស់កងកម្លាំងប្រដាប់អាវុធ។ បញ្ហាទាំងនេះ គួរបានដោះស្រាយជាច្រើនឆ្នាំមកហើយ ប៉ុន្តែបន្តសល់មកទល់ពេលបច្ចុប្បន្ននេះទៀត។ មន្ត្រីសហរដ្ឋអាមេរិកមានការទាស់ចិត្តជាខ្លាំងដែលលោកនាយករដ្ឋមន្ត្រី ហ៊ុន សែន បន្តកាន់តំណាងក្នុងរយៈពេល ៣០ឆ្នាំ»។
លោក ប្រ៊ែដ អាដាម បន្តថា មន្ត្រីជាច្រើនក្នុងរដ្ឋបាលរដ្ឋធានីវ៉ាស៊ីនតុន បានដេកលក់ មិនចាប់អារម្មណ៍នឹងបញ្ហារបស់ប្រទេសកម្ពុជា ប៉ុន្តែនៅពេលថ្មីៗនេះ មន្ត្រីទាំងនោះបានភ្ញាក់ឡើងវិញ ហើយដឹងថា ការដែលលោក ហ៊ុន សែន បានកាន់កាប់អំណាចជានាយករដ្ឋមន្ត្រីក្នុងរយៈពេល ៣០ឆ្នាំកន្លងមកនេះ មិនដែលមានការរៀបចំបោះឆ្នោតមានលក្ខណៈសេរីនិងយុត្តិធម៌ឡើយ។
លោកថា អង្គការ យូមែន រ៉ៃត៍ វ៉ច្ឆ ព្រួយបារម្ភពីស្ថានភាពនៅកម្ពុជា ដោយសារលោក ហ៊ុន សែន បន្តកាត់តំណែងដោយការបោះឆ្នោតមិនសេរីនិងយុត្តិធម៌។ លោកបន្តថា ស្ថានភាពនៃការបោះឆ្នោតឆ្នាំ២០១៨ នឹងប្រែប្រួល ប្រសិនបើយុវជនបន្តចូលរួមក្នុងសកម្មភាពនយោបាយ។
លោក ប្រ៊ែដ អាដាម បន្តថា លោកបានជជែកនឹងមន្ត្រីអាមេរិក អំពីអនាគតកម្ពុជា៖ «យើងបានជជែកជាច្រើនចំណុចពីអនាគតរបស់ប្រទេសកម្ពុជា។ មានការចាប់អារម្មណ៍ថា យុវជននឹងងើបឡើងជាថ្មីម្តងទៀតក្នុងការបោះឆ្នោតលើកក្រោយ។ តើអាចមានការផ្លាស់ប្ដូរនៅកម្ពុជាទេ? ពួកគេជឿជាក់ថា ប្រសិនបើមានក្រុមយុវជនងើបឡើងដូចកាលបោះឆ្នោតឆ្នាំ២០១៣នោះ គណបក្សប្រឆាំងនឹងអាចឈ្នះឆ្នោត។ យើងបានជជែកអំពីការរំលោភបំពានរបស់មន្ត្រីសន្តិសុខរបស់កម្ពុជា។ មានការព្រួយបារម្ភជាច្រើនកើតឡើងពីបញ្ហាការអនុវត្តតួនាទីរបស់កងរាជអាវុធហត្ថ ប៉ូលិស និងយោធា ដោយសារតែមន្ត្រីទាំងនោះជាប់ពាក់ព័ន្ធនឹងបញ្ហានយោបាយ»។
លោកបន្តថា កាលពីសប្ដាហ៍មុនមន្ត្រីកងប្រដាប់អាវុធចំនួនជាង ៨០នាក់ ត្រូវបានដាក់បញ្ចូលក្នុងសមាជិកគណៈកម្មាធិការកណ្ដាលបក្សប្រជាជនកម្ពុជា។ នេះជាការលាយឡំគ្នារវាងរដ្ឋហើយនិងបក្សដូចកាលពីទសវត្សរ៍ ឆ្នាំ៨០ និង៩០ ប៉ុន្តែត្រូវបានផ្លាស់ប្ដូរដោយអ៊ុនតាក់ ដែលបានរៀបចំឲ្យរចនាសម្ព័ន្ធរដ្ឋាភិបាល និងបក្សអោយដាច់ដោយឡែកពីគ្នា។ ប៉ុន្តែឥឡូវនេះបែរជាបក្សប្រជាជនកម្ពុជា កំពុងដាក់បញ្ចូលអោយបក្ស និងរដ្ឋនៅក្នុងកញ្ចប់តែមួយ ដែលទង្វើនេះជាការផ្ទុយពីគោលការណ៍ប្រជាធិបតេយ្យ និងនីតិរដ្ឋដែលធានាដោយរដ្ឋធម្មនុញ្ញកម្ពុជា ខ្លួនឯង។ លោក ប្រ៊ែដ អាដាម បញ្ជាក់ថា កងកម្លាំងប្រដាប់អាវុធធ្វើការងារបម្រើពលរដ្ឋ។ ពួកគេមិនត្រូវអនុវត្តឲ្យក្លាយជាមន្ត្រីគណបក្សឡើយ ប្រសិនបើមិនដូច្នោះទេ ពួកគេនឹងមាននិន្នាការលំអៀងទៅរកគណបក្សនយោបាយនៅពេលបំពេញតួនាទីរបស់រដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។