ប្រធានសហព័ន្ធសហជីពវិស័យទេសចរណ៍សេវាកម្ពុជា ហៅកាត់ជាភាសាអង់គ្លេសថា ស៊ី.ធី.អេស.ដាប់បែលយូ.អេស (C.T.S.W.S.) លោក សុខ ណារិទ្ធ មានប្រសាសន៍នៅថ្ងៃទី១៣ មិថុនា ថា បើសិនជាថៅកែកាស៊ីណូ ណាហ្គា វឺល មិនដោះស្រាយតាមការទាមទាររបស់កម្មករ បុគ្គលិក ទេ ពួកគេនឹងរៀបចំធ្វើបាតុកម្មឲ្យធំជាងមុនទៅទៀត ដោយមានមនុស្សចូលរួម ៤.០០០នាក់។
លោក សុខ ណារិទ្ធ ឲ្យដឹងទៀតថា បុគ្គលិកទាំងអស់បានប្ដេជ្ញាថា បើភាគីថៅកែ និងសហព័ន្ធសហជីពវិស័យទេសចរណ៍សេវាកម្ពុជា នៅថ្ងៃទី១៣ មិថុនា ឆ្នាំ២០១៣ ចរចាមិនចុះសម្រុងទេនោះ បុគ្គលិកនឹងបន្តធ្វើបាតុកម្មនេះ លុះត្រាតែថៅកែកាស៊ីណូ យល់ព្រមអនុវត្តតាមអ្វីដែលខ្លួនបានសន្យា។
លោក សុខ ណារិទ្ធ សង្កត់ធ្ងន់ថា ការគេចវេះនៃភាគីកាស៊ីណូ ក្នុងការអនុវត្តច្បាប់ការងារ ផ្ដល់ភាពងាយស្រួលដល់ថៅកែក្នុងការបណ្ដេញបុគ្គលិកចេញពីកាស៊ីណូ ដូច្នេះបុគ្គលិកទាំងអស់ហាក់ប្រឈមនឹងឱកាសបាត់បង់ការងារច្រើន។
អ្នកមើលការខុសត្រូវ ឬហៅថា ស៊ុបភើវ៉ាយស៊ឺ (Supervisor) លោក គង់ សារុន ដែលធ្វើការនៅកាស៊ីណូ នេះអស់រយៈពេល ១៧ឆ្នាំ មានប្រសាសន៍ថា រឿងរ៉ាវឈានដល់ដំណាក់កាលបុគ្គលិកនាំគ្នាធ្វើដូច្នេះ ផលវិបាកការងាររបស់បុគ្គលិកធ្លាក់ចូលក្នុងស្ថានភាពពិបាកថ្លែងហើយ។ លោកបញ្ជាក់បន្ថែមថា ថ្នាក់ដឹកនាំដែលមិនស្វែងយល់ពីវប្បធម៌នៃជាតិសាសន៍ដទៃ ហើយធ្វើអ្វីតាមអំពើចិត្តនោះ វាប៉ះពាល់ដល់បុគ្គលិកដែលស្ថិតនៅក្រោមបង្គាប់របស់ខ្លួន។
ទោះយ៉ាងណា លោក សុខ ណារិទ្ធ អះអាងថា ការជួបចរចាគ្នាមិនទទួលផ្លែផ្កាទេ នៅថ្ងៃ១៣ មិថុនា នេះ ដោយភាគីកាស៊ីណូ សុំឲ្យបុគ្គលិកផ្អាកការធ្វើបាតុកម្ម ប៉ុន្តែភាគីបុគ្គលិកមិនយល់ព្រម ព្រោះកន្លងមក ភាគីកាស៊ីណូ ធ្លាប់ក្បត់ការសន្យារបស់ខ្លួនម្ដងហើយជាមួយបុគ្គលិក ដូច្នេះលើកនេះ ពួកគាត់មិនយល់ព្រមធ្វើតាមនោះទេ។
ឆ្លើយតបនឹងបញ្ហានេះ មេធាវីការពារក្ដីជូនកាស៊ីណូ ណាហ្គា វឺល អ្នកស្រី ម៉ៅ វុទ្ធារី ឲ្យដឹងដោយសង្ខេបថា ភាគីកាស៊ីណូ យល់ព្រមតាមការទាមទាររបស់បុគ្គលិកគ្រប់ចំណុច ប៉ុន្តែភាគីបុគ្គលិកទៅវិញទេដែលមិនព្រមទទួល។
ភាគីបុគ្គលិក និងភាគីកាស៊ីណូ ធ្លាប់ជួបគ្នាចរចាម្ដង កាលពីថ្ងៃទី២៧ ខែកុម្ភៈ ឆ្នាំ២០១៣ នៅក្រសួងការងារ។ កាលនោះភាគីកាស៊ីណូ យល់ព្រមដំឡើងប្រាក់ឈ្នួលទាបបំផុត ១៥០ដុល្លារដល់បុគ្គលិកគ្រប់ផ្នែក។ រីឯបុគ្គលិកដែលទទួលបានប្រាក់ខែលើសពីនេះនឹងត្រូវថែម ២០ភាគរយទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។