ប្រជាពលរដ្ឋមួយរូបរស់នៅខេត្តមណ្ឌលគិរី ចោទសមត្ថកិច្ចប៉ូលិសមូលដ្ឋាន ថាបានផ្ទុះអាវុធបាញ់គំរាមក្នុងជម្លោះវាយតប់គ្នាកាលពីថ្ងៃចូលឆ្នាំខ្មែរកន្លងទៅ ធ្វើឲ្យរបួសយុវជនម្នាក់។ បន្ទាប់មក បានចាប់ជនរងរបួសដាក់ខ្នោះ និងវាយដោយដំបងបន្ថែមទៀត ទើបដោះលែងយុវជននោះឲ្យក្រុមគ្រួសារយកទៅព្យាបាលរបួស ប៉ុន្តែសមត្ថកិច្ចរូបនោះមិនទទួលខុសត្រូវលើទង្វើនេះឡើយ។
ប្រជាពលរដ្ឋមួយគ្រួសាររស់នៅភូមិ៤ ឃុំមេម៉ង់ ស្រុកកែវសីមា នៅថ្ងៃព្រហស្បតិ៍ ទី១៧ ខែមេសា បានស្វែងរកកិច្ចគាំពារពីអង្គការការពារសិទ្ធិមនុស្ស ដើម្បីជួយអន្តរាគមន៍ទៅស្ថាប័នពាក់ព័ន្ធ ស្វែងរកយុត្តិធម៌ក្នុងរឿងនេះ។
យុវជនដែលរងរបួសមានឈ្មោះ ភេន ចាន់ណន អាយុ ២៣ឆ្នាំ ត្រូវគ្រាប់កាំភ្លើងធ្លុះប្រអប់ជើងស្តាំ កាលពីថ្ងៃទី១៥ ខែមេសា ជាថ្ងៃបុណ្យចូលឆ្នាំ មានពិធីរាំលេងកម្សាន្តនៅវត្តមេម៉ង់។ ចំណែកអ្នកបង្ករបួស គឺនាយប៉ូលិសប៉ុស្តិ៍រដ្ឋបាលឃុំ លោក កប ធន់ បានបាញ់កាំភ្លើងពីរគ្រាប់ ក្នុងពេលដេញចាប់ក្រុមយុវជនដែលបង្កជម្លោះនោះ។
បងប្រុសយុវជនរងរបួស លោក ភេន ស៊ីណាត រៀបរាប់ថា មន្ត្រីប៉ូលិសមិនទទួលខុសត្រូវក្នុងបញ្ហានេះ ព្រមទាំងចាត់ទុកថា ប្អូនលោកមានរបួសដោយសារឈើបុកត្រូវ។ លោកចាត់ទុកថា នេះគឺជាទង្វើខ្វះការទទួលខុសត្រូវ រំលោភច្បាប់ និងរំលោភទៅលើសិទ្ធិប្រជាពលរដ្ឋដោយមន្ត្រីសមត្ថកិច្ចមូលដ្ឋាន៖ «បាញ់ត្រូវម៉ូតូមួយ ហើយបាញ់ត្រូវជើងប្អូនខ្ញុំហ្នឹង។ ថតទៅឃើញបែកឆ្អឹងមេជើងមួយ ហើយបែកលើស្មងជើង។ គាត់ក៏ដេញចាប់ប្អូនខ្ញុំហ្នឹង ប្អូនខ្ញុំក៏រត់ទៅក្រោយផ្ទះគេកាប់ជ្រូក ចាប់ហើយវាយពីរគល់ឃ្លៃទៀត ស្រាប់តែដាក់ខ្នោះ ដល់ពេលឃើញជើងប្អូនខ្ញុំត្រូវគ្រាប់អ៊ីចឹង ក៏ដោះខ្នោះចេញវិញទៅ»។
វិទ្យុអាស៊ីសេរី នៅថ្ងៃទី១៧ ខែមេសា មិនអាចសុំការបំភ្លឺពី លោក កប ធន់ ជុំវិញការចោទប្រកាន់នេះបានទេ ពីព្រោះលោកមិនទទួលទូរស័ព្ទហៅចូលជាច្រើនលើក។
យ៉ាងនេះក្តី ស្នងការប៉ូលិសខេត្តមណ្ឌលគិរី លោក ញ៉ែម វ៉ាន្នី ទទួលស្គាល់ថា ជាកំហុសអចេតនារបស់សមត្ថកិច្ចប៉ូលិសក្នុងការបំពេញតួនាទីការពារសុវត្ថិភាពជូនប្រជាពលរដ្ឋ។ លោកបញ្ជាក់ថា សមត្ថកិច្ចប៉ូលិសទទួលខុសត្រូវក្នុងបញ្ហានេះជាមួយគ្រួសារជនរងគ្រោះ។ ហេតុនេះ ក្រោយបុណ្យចូលឆ្នាំ ក្រុមគ្រួសារជនរងគ្រោះអាចធ្វើការទំនាក់ទំនងមកមន្ត្រីស្នងការដ្ឋានប៉ូលិស ដើម្បីដោះស្រាយបញ្ហា៖ «បាញ់ផ្ចុចគំរាមទេណា! មិនមែនបាញ់តម្រង់មនុស្សទេ ប៉ុន្តែចៃដន្យវាខ្ទាតត្រូវប្រអប់ជើងអ៊ីចឹងទៅ ហើយប៉ូលិសយើងក៏ចូលរួមទទួលខុសត្រូវការងារហ្នឹងដែរ។ គម្រោងយើងមិនមែនបាញ់អំពើហិង្សា ឬធ្វើអ្វីទេ ដោយសារឃាត់វាមិនឈ្នះប៉ូលិសហ្នឹងវាតិច ហើយក្មេងហ្នឹងវាច្រើន»។
ទាក់ទិនករណីនេះដែរ មន្ត្រីឃ្លាំមើលសិទ្ធិមនុស្សសមាគមអាដហុក (Adhoc) ខេត្តមណ្ឌលគិរី លោក សុក រដ្ឋា បញ្ជាក់ថា មន្ត្រីប៉ូលិសបានប្រើប្រាស់អាវុធបាញ់ក្នុងជម្លោះប្រជាពលរដ្ឋរាំលេង គឺជាប្រការខុសទៅនឹងវិន័យកងនគរបាល និងបានប្រើដំបងវាយទៅលើយុវជនកំពុងមានរបួសបន្ថែមទៀតនេះ គឺជាទង្វើរំលោភសិទ្ធិមនុស្ស។លោកបន្តថា នៅដើមសប្ដាហ៍ក្រោយ សមាគមអាដហុកនឹងជួយអន្តរាគមន៍ពាក្យប្ដឹងរបស់គ្រួសារជនរងគ្រោះទៅស្នងការប៉ូលិស ជួយដោះស្រាយបញ្ហាជូនជនរងគ្រោះ៖ «ទោះបីគាត់កត់សម្គាល់ថា បុគ្គលហ្នឹងជាជនសង្ស័យ ឬក៏បុគ្គលហ្នឹងជាក្មេងទំនើងក៏ដោយ ក៏គាត់មិនគួរយកអាវុធទៅប្រើប្រាស់លើពួកគាត់ដែរ គឺខាងជនរងគ្រោះគាត់មកដាក់ពាក្យប្ដឹងនៅកន្លែងខ្ញុំ អ៊ីចឹងគាត់ថាគាត់បានទៅប្ដឹងដល់ប៉ុស្តិ៍ហ្នឹងហើយ ប៉ុន្តែប្ដឹងយ៉ាងម៉េចមេប៉ុស្តិ៍ជាអ្នកបាញ់ ប្ដឹងយ៉ាងម៉េចក៏គេមិនចាត់ការ»។
ទោះយ៉ាងនេះក៏ដោយ បងប្រុសជនរងគ្រោះសំណូមពរឲ្យសមត្ថកិច្ចប៉ូលិសទទួលខុសត្រូវលើសំណងព្យាបាលរបួសរហូតជាសះស្បើយ និងទទួលខុសត្រូវ ប្រសិនជនរងគ្រោះពិការជើងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។