អ្នករាយការណ៍ពិសេសអង្គការសហប្រជាជាតិ ស្ដីពីសិទ្ធិមនុស្សនៅកម្ពុជា អ្នកស្រី រ៉ូណា ស្មីត (Rhona Smith) ជួបប្រធានគណៈកម្មាធិការសិទ្ធិមនុស្សកម្ពុជា នៅព្រឹកថ្ងៃទី៨ សីហា ដើម្បីចង់ដឹងអំពីការវិវឌ្ឍន៍នៃការគោរពសិទ្ធិមនុស្ស តាមអនុសាសន៍របស់ក្រុមប្រឹក្សាសិទ្ធិមនុស្សអង្គការសហប្រជាជាតិ។
ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី ទទួលស្គាល់ការបារម្ភអំពីសិទ្ធិមនុស្សរបស់អ្នកស្រី រ៉ូណា ស្មីត។
ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី មានប្រសាសន៍ថា លោកទទួលស្គាល់ការបារម្ភរបស់អ្នកស្រី រ៉ូណា ស្មីត អំពីពាក្យសម្ដីរបស់រដ្ឋមន្ត្រីក្រសួងសង្គមកិច្ច លោក វង សូត ដែលព្រមានវាយក្បាលអ្នកតវ៉ារឿងលទ្ធផលបោះឆ្នោតនៅពេលខាងមុខ។ លោកថា នេះជាការអប់រំច្បាប់៖ « ចំណុចដែលសំខាន់បំផុតមិនមែនជាការគំរាមកំហែងទេ គ្រាន់តែជាការអប់រំមួយតាមផ្លូវច្បាប់ ក៏ប៉ុន្តែគ្រាន់តែថា ពាក្យសម្ដីរបស់គាត់វាបង្ហាញនូវការប្រើហ្នឹងរូបភាពមួយធ្វើឲ្យមានការប្រតិកម្មក្នុងវិស័យសិទ្ធិមនុស្ស។ ក៏ប៉ុន្តែបុគ្គលិកលក្ខណៈរបស់បុគ្គលរដ្ឋមន្ត្រីដែលលើកឡើង គាត់ជាមនុស្សស្លូតបូត។ ប៉ុន្តែគាត់ ( រ៉ូណា ស្មីត ) ទទួលស្គាល់ថា ស្លូតបូតមែន ក៏ប៉ុន្តែការប្រើពាក្យសម្ដីមិនគួរឲ្យមានការព្រួយបារម្ភភ័យខ្លាចទេ » ។
លោកបញ្ជាក់ទៅអ្នកស្រី រ៉ូណា ស្មីត ថា នោះគ្រាន់តែជាការបង្ហាញក្ដីព្រួយបារម្ភរបស់ថ្នាក់ដឹកនាំរដ្ឋាភិបាល ព្រោះតែកន្លងទៅមានអ្នកមិនទទួលស្គាល់លទ្ធផលបោះឆ្នោត។
អ្នកស្រី រ៉ូណា ស្មីត ថ្លែងថា អ្នកស្រីបានលើកឡើងអំពីការព្រួយបារម្ភចំពោះបញ្ហាសិទ្ធិមនុស្ស ដែលទាក់ទងនឹងពាក្យសម្ដីរបស់រដ្ឋមន្ត្រីក្រសួងសង្គមកិច្ច លោក វង សូត ដែលព្រមានវាយក្បាលអ្នកតវ៉ានឹងគល់ឫស្សី ហើយលោក កែវ រ៉េមី យល់ស្របថានោះជាបញ្ហាដែលមិនជួយអីដល់ការបោះឆ្នោតដែរ។
រដ្ឋមន្ត្រីក្រសួងសង្គមកិច្ច លោក វង សូត កាលពីសប្ដាហ៍មុន ត្រូវបានគេរិះគន់ច្រើនពេលដែលលោកព្រមានវាយក្បាលអ្នកតវ៉ារឿងលទ្ធផលបោះឆ្នោតនៅពេលខាងមុខ នឹងគល់ឫស្សី៖ « បោះឆ្នោតលើកនេះ បើសិនជាមានការតវ៉ាទៀត ច្បាស់ត្រូវក្បាលនឹងគល់ឫស្សីហើយ ! ច្បាស់អ៊ីចឹងតែម្ដង។ អត់មានបើកសិទ្ធិឲ្យហ្អែងតវ៉ាអីទេ។ តវ៉ាតបាន តតាមផ្លូវច្បាប់ អត់បិទទេ។ ច្បាប់គេឲ្យតវ៉ាដាក់ពាក្យប្ដឹងអីយ៉ាងម៉េច បើហ្អែងថាហ្អេ ! ដាក់ប្ដឹងអីយ៉ាងម៉េច បើពួកហ្នឹងសុទ្ធតែគ្នាវា អើបើហ្អែងមិនប្ដឹងហីទៅ ហ្អែងធ្វើខុសច្បាប់ចាប់ដាក់គុក។ អាហ្នឹងយើងចង់និយាយថា យើងប្រើអំណាចស្របច្បាប់ហើយ ហើយបើថាច្បាប់ហ្នឹងចាប់វាមិនបាន ច្បាប់ហ្នឹងនៅចន្លោះប្រហោង នាំគ្នាធ្វើច្បាប់ទៀត។ អញឈ្នះហើយ អញចង់ធ្វើអីក៏បានដែរ » ។
ប្រធានក្រុមអ្នកច្បាប់ការពារសិទ្ធិកម្ពុជា លោក ហុង គឹមសួន មានប្រសាសន៍ថា សម្ដីរបស់លោក វង សូត គឺខុសច្បាប់៖ « ការប្រមាថក្បាលគេនឹងគល់ឫស្សីហ្នឹង អាហ្នឹងគឺជាការប្រមាថកាតទានហើយ។ វាចូលក្នុងច្បាប់ ស្មើនឹងបទល្មើសជេរប្រមាថទៅទៀត។ ដល់អ្នកនាំពាក្យហ្នឹងទៀត បើដឹងថាអ្នកហ្នឹងប្រមាថកាតទានហើយ គេអប់រំផ្លូវច្បាប់ គេដែលអប់រំច្បាប់ឲ្យវាយក្បាលគេនឹងគល់ឫស្សីអ៊ីចឹងដែរ ? ក្រមព្រហ្មទណ្ឌចំតែម្ដង ការប្រមាថវាយក្បាលគេនឹងគល់ឫស្សី » ។
អ្នកស្រី រ៉ូណា ស្មីត ថ្លែងថា អ្នកស្រីបានលើកឡើងអំពីការព្រួយបារម្ភចំពោះបញ្ហាសិទ្ធិមនុស្ស ដែលទាក់ទងនឹងពាក្យសម្ដីរបស់រដ្ឋមន្ត្រីក្រសួងសង្គមកិច្ច លោក វង សូត ដែលព្រមានវាយក្បាលអ្នកតវ៉ានឹងគល់ឫស្សី ហើយលោក កែវ រ៉េមី យល់ស្របថា នោះជាបញ្ហាដែលមិនជួយអីដល់ការបោះឆ្នោតដែរ។
ដោយឡែកអ្នកស្រី រ៉ូណា ស្មីត ថ្លែងបើកកិច្ចប្រជុំនោះថា ការជួបជាមួយប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី នៅព្រឹកថ្ងៃទី៨ សីហា គឺដើម្បីចង់ដឹងអំពីការវិវឌ្ឍន៍នៃការគោរពសិទ្ធិមនុស្សថ្មីបន្ថែមទៀត តាមអ្វីដែលបានពិភាក្សាកាលពីឆ្នាំមុន ជាពិសេសគឺការចងក្រងរបាយការណ៍សិទ្ធិមនុស្ស ដែលរដ្ឋាភិបាលត្រូវដាក់ជូនក្រុមប្រឹក្សាសិទ្ធិមនុស្សអង្គការសហប្រជាជាតិតាមកាលកំណត់។
ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី ថ្លែងបន្ថែមថា អ្នកស្រី រ៉ូណា ស្មីត បានលើកពីការបារម្ភអំពីសិទ្ធិមនុស្សជាទូទៅ សិទ្ធិកុមារ និងជនជាតិដើមភាគតិច ដែលប៉ះពាល់ដោយការសាងសង់ទំនប់វារីអគ្គិសនីសេសានក្រោមពីរនៅខេត្តស្ទឹងត្រែង។ លោកថា រដ្ឋាភិបាលនឹងរៀបចំការឆ្លើយតបអំពីការព្រួយបារម្ភរបស់អ្នកស្រី រ៉ូណា ស្មីត ជាលាយលក្ខណ៍អក្សរ។
ទោះជាយ៉ាងណាក្ដី អ្នកស្រី រ៉ូណា ស្មីត មិនអាចបញ្ជាក់ពិស្ដារអំពីខ្លឹមសារនៃកិច្ចប្រជុំនេះទេ ដោយថ្លែងខ្លីថា អ្នកស្រីនឹងត្រូវជួបអ្នកពាក់ព័ន្ធជាច្រើនទៀតក្នុងទស្សនកិច្ចរបស់អ្នកស្រីជាលើកទីបួននេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។