អ្នកស្រី រ៉ូណា ស្មីត ថា​កម្ពុជា​ហាក់​កំពុង​ខិត​ទៅ​ជិត​ស្ថានភាព​គ្រោះថ្នាក់

0:00 / 0:00

អ្នក​រាយការណ៍​ពិសេស​​របស់​អង្គការ​សហប្រជាជាតិ​ទទួល​បន្ទុក​សិទ្ធិមនុស្ស​ប្រចាំ​កម្ពុជា អ្នកស្រី រ៉ូណា ស្មីត (Rhona Smith) ថ្លែង​ថា ប្រទេស​កម្ពុជា ហាក់​កំពុង​ខិត​ទៅ​ជិត​ស្ថានភាព​គ្រោះថ្នាក់។ ការ​ថ្លែង​នេះ ធ្វើ​ឡើង​ក្នុង​ពេល​អ្នកស្រី​ធ្វើ​សន្និសីទ​សារព័ត៌មាន​បូក​សរុប​លទ្ធផល​ការងារ​នៃ​ដំណើរ​ទស្សនកិច្ច​លើក​ទី​៤ របស់​អ្នកស្រី​នៅ​កម្ពុជា។

ចំណាត់​ការ​ផ្លូវ​ច្បាប់​ជា​ច្រើន​ប្រឆាំង​អ្នក​នយោបាយ ការ​ចោទ​ប្រកាន់​ពី​ការ​រំលោភ​លើ​អព្យាក្រឹត្យ​ខាង​នយោបាយ​របស់​អង្គការ​ក្រៅ​រដ្ឋាភិបាល សវនាការ​សម្រេច​ពន្យារ​ពេល​ការ​ឃុំ​ខ្លួន​បណ្ដោះអាសន្ន ការ​បំភិតបំភ័យ និង​ការ​ភ័យ​ខ្លាច​ទាំង​អស់​នេះ គឺ​ជា​កត្តា​សំខាន់ៗ​មួយ​ចំនួន​ដែល​ធ្វើ​ឲ្យ​អ្នកស្រី រ៉ូណា ស្មីត យល់​ថា ប្រទេស​កម្ពុជា ហាក់​កំពុង​ខិត​ទៅ​ជិត​ស្ថានភាព​គ្រោះថ្នាក់​នោះ។

អ្នកស្រី​សង្កត់​ធ្ងន់​ថា កត្តា​ទាំង​អស់​នេះ​ហើយ​ដែល​ធ្វើ​ឲ្យ​ស្ថានភាព​ទូទៅ​នៅ​ប្រទេស​កម្ពុជា នៅ​មាន​ភាព​តានតឹង ហើយ​ដែល​អ្នកស្រី​យល់​ឃើញ​ថា វា​នឹង​មិន​ធ្វើ​ឲ្យ​បរិយាកាស​ការ​បោះឆ្នោត​នៅ​ពេល​ខាង​មុខ​មាន​ភាព​សេរី​នោះ​ទេ។ អ្នកស្រី​ជំរុញ​ឲ្យ​រដ្ឋាភិបាល​ធានា​ថា គ្រប់​ភាគី​ទាំង​អស់​មាន​លទ្ធភាព​ក្នុង​ការ​សួរ​ដេញ​ដោល​គ្នា និង​ពិភាក្សា​គ្នា​ដោយ​ចំហ​លើ​បញ្ហា​ដែល​ជា​កង្វល់​របស់​ពលរដ្ឋ​ខ្មែរ​ទាំង​មូល។នៅ​ក្នុង​ដំណើរ​ទស្សនកិច្ច​របស់​អ្នកស្រី​លើក​ទី​៤ នៅ​កម្ពុជា ដែល​បិទ​បញ្ចប់​នៅ​ថ្ងៃ​ទី​១៨ ខែ​សីហា អ្នកស្រី រ៉ូណា ស្មីត បាន​ជួប​ពិភាក្សា​ជាមួយ​ភាគី​ពាក់ព័ន្ធ​ជាច្រើន រួម​មាន​មន្ត្រី​រដ្ឋាភិបាល មន្ត្រី​បក្ស​ប្រឆាំង សង្គម​ស៊ីវិល និង​ទៅ​មើល​អ្នក​ជាប់​ឃុំ​ក្នុង​ពន្ធនាការ និង​មណ្ឌល​កែប្រែ​ជាដើម។

​ក្នុង​កិច្ច​ពិភាក្សា​ជាមួយ​ភាគី​ពាក់ព័ន្ធ​ទាំង​អស់​នេះ អ្នកស្រី​បាន​លើក​ឡើង​ពី​បញ្ហា​ប្រឈម​របស់​កុមារ ស្ថានភាព​ជនជាតិ​ដើម​ភាគ​តិច ជន​ដែល​រស់​នៅ​តាម​ចិញ្ចើម​ផ្លូវ អ្នក​ញៀន​គ្រឿង​ញៀន និង​ការ​បង្ក្រាប​គ្រឿងញៀន បញ្ហា​របស់​ជនជាតិ​ដើម​ភាគតិច​ម៉ុងតាញ៉ា​វៀតណាម ដែល​កំពុង​ស្វែង​រក​សិទ្ធិ​ជ្រកកោន​នៅ​កម្ពុជា ពី​នីតិរដ្ឋ និង​ការ​គ្រប់គ្រង​វិស័យ​យុត្តិធម៌ និង​លំហ​ប្រជាធិបតេយ្យ​នៅ​កម្ពុជា ជាដើម។

​ទាក់ទង​លំហ​ប្រជាធិបតេយ្យ អ្នកស្រី រ៉ូណា ស្មីត លើក​ឡើង​ថា បើ​ទោះ​ជា​អ្នកស្រី​ស្វាគមន៍​ចំពោះ​ការ​ដោះលែង​មន្ត្រី​ការពារ​សិទ្ធិមនុស្ស​សមាគម​អាដហុក (ADHOC) ៤​រូប និង​មន្ត្រី គ.ជ.ប ១​រូប កាល​ពី​ពេល​កន្លង​ទៅ​ក្តី ប៉ុន្តែ​អ្នកស្រី​យល់​ថា អ្នក​ការពារ​សិទ្ធិមនុស្ស​នៅ​តែ​ត្រូវ​បាន​គេ​ដៅ​ជា​មុខសញ្ញា​កាន់​តែ​ច្រើន​ឡើង។ ច្បាប់​ជា​ច្រើន​ប្រភេទ​ត្រូវ​បាន​យក​មក​ប្រើ​ប្រាស់​ដើម្បី​រឹតត្បិត​អ្នក​រិះគន់​រដ្ឋាភិបាល ហើយ​ការ​បង្អាក់​ការ​ពិភាក្សា​ដេញដោល​ផ្នែក​នយោបាយ​នៅតែ​បន្ត​កើត​មាន​ឡើង​ជា​ច្រើន។

អ្នកស្រី​បារម្ភ​ពី​ការ​អនុវត្ត​ច្បាប់​បាតុកម្ម​ដោយ​សន្តិវិធី ដែល​អ្នកស្រី​ថា មិន​ទាន់​ត្រូវ​បាន​អាជ្ញាធរ​អនុវត្ត​ពេញលេញ​នៅ​ឡើយ​នៅ​ថ្នាក់​មូលដ្ឋាន ហើយ​ក្រសួង​មហាផ្ទៃ ថែម​ទាំង​បាន​តម្រូវ​ឲ្យ​សង្គម​ស៊ីវិល​រាយការណ៍​សកម្មភាព​ទាំង​អស់​របស់​ពួកគេ​ទៅ​ឲ្យ​អាជ្ញាធរ​ឃុំ និង​ស្រុក​ទៀត។ ​អ្នកស្រី រ៉ូណា ស្មីត កត់សម្គាល់​ដែរ​ថា បើ​ទោះ​ជា​កម្ពុជា មាន​ភាព​ជោគជ័យ​ក្នុង​ការ​រៀបចំ​ការ​បោះ​ឆ្នោត​ឃុំ-​សង្កាត់ កាល​ពី​ខែ​មិថុនា ក្តី អ្នកស្រី​នៅ​តែ​មាន​កង្វល់​ពី​ការ​ប្រើប្រាស់​ពាក្យ​សម្ដី​ហិង្សា​ថ្លែង​ដោយ​មន្ត្រី​រដ្ឋាភិបាល និង​មន្ត្រី​យោធា​ដែល​គាំទ្រ​បក្ស​កាន់​អំណាច។ អ្នកស្រី​ថា មតិ​យោបល់​បែប​នេះ​មិន​គួរ​ត្រូវ​បាន​ធ្វើ​ឡើង​ដោយ​មន្ត្រី​រដ្ឋាភិបាល​ឡើយ សូម្បី​តែ​ក្នុង​ភាព​ឯកជន​ក៏ដោយ ជាពិសេស​នោះ​មិន​ត្រូវ​ឲ្យ​មាន​នៅ​ក្នុង​សង្គម​មួយ​ដែល​កំពុង​មាន​សន្តិភាព​ដូច​កម្ពុជា នោះ​ទេ។

អ្នកស្រី​សង្កត់​ធ្ងន់​ថា មន្ត្រី​រាជការ កម្លាំង​កម្លាំង​នគរបាល និង​យោធា ត្រូវ​ប្រកាន់​ជំហរ​អព្យាក្រឹត​ចំពោះ​រឿង​នយោបាយ។ ​អ្នកស្រី​ក៏​បារម្ភ​ពី​ការ​ធ្វើ​វិសោធនកម្ម​ច្បាប់​ស្តីពី​គណបក្ស​នយោបាយ​ដោយ​តំណាងរាស្ត្រ​បក្ស​កាន់​អំណាច ដែល​ហាមឃាត់​គណបក្ស​មិន​ឲ្យ​ប្រើ​រូបភាព សំឡេង ឬ​ឯកសារ​ជា​លាយលក្ខណ៍អក្សរ និង​សកម្មភាព​នានា​របស់​ទណ្ឌិត។ ការ​បារម្ភ​នេះ ដោយសារ​អ្នកស្រី​មើល​ឃើញ​ថា អ្នកដឹកនាំ​ល្បីៗ​លើ​ពិភពលោក​ជា​ច្រើន ត្រូវ​បាន​គេ​ផ្ដន្ទាទោស​នៅ​ពេល​ណា​មួយ​ក៏​បាន។

​ទាក់ទង​នឹង​ការ​បោះឆ្នោត​វិញ អ្នកស្រី​ស្វាគមន៍​ការ​ចូលរួម​របស់​បន្ទប់​ស្ថានការណ៍​សម្រាប់​ការ​បោះឆ្នោត​ដែល​បង្កើត​ឡើង​ដោយ​បណ្ដុំ​សង្គម​ស៊ីវិល​ដើម្បី​ឃ្លាំមើល​ការ​បោះឆ្នោត​ក្នុង​ពេល​កន្លង​ទៅ។ អ្នកស្រី​ថា បន្ទប់​ស្ថានការណ៍​មិន​មែន​ជា​អង្គការ​ក្រៅ​រដ្ឋាភិបាល​មួយ​នោះ​ទេ ដូច្នេះ​អ្នកស្រី​ថា បន្ទប់​ស្ថានការណ៍​មិន​មាន​កាតព្វកិច្ច​ទៅ​តាម​ច្បាប់​ស្ដីពី​សមាគម និង​អង្គការ​ក្រៅ​រដ្ឋាភិបាល​ឡើយ​ដែល​នេះ​ប្រហែល​ជា​អ្នកស្រី​សំដៅ​លើ​ចំណាត់​ការ​របស់​ក្រសួង​មហាផ្ទៃ ដែល​ថា បន្ទប់​ស្ថានការណ៍​មិន​បាន​ចុះ​បញ្ជី​នៅ​ក្រសួង​មហាផ្ទៃ ទើប​ត្រូវ​បាន​រដ្ឋាភិបាល​បិទ​មិន​អោយ​បន្ត​ការងារ​របស់​ខ្លួន​ទៀត។​

ដោយ​ឡែក​សម្រាប់​វិស័យ​នីតិរដ្ឋ និង​យុត្តិធម៌ អ្នកស្រី​យល់​ថា ច្បាប់​គ្រឹះ​ទាំង ៣ គឺ​ច្បាប់​ស្ដីពី​ការ​រៀបចំ​អង្គការ​តុលាការ ច្បាប់​ស្ដីពី​លក្ខន្តិកៈ​ចៅក្រម និង​ព្រះរាជអាជ្ញា និង​ច្បាប់​ស្ដីពី​ការ​រៀបចំ និង​ការ​ប្រព្រឹត្ត​ទៅ​នៃ​ឧត្ដមក្រុមប្រឹក្សា​នៃ​អង្គ​ចៅក្រម អាច​នឹង​ត្រូវ​ធ្វើ​វិសោធនកម្ម។ ទោះជាយ៉ាងណា អ្នកស្រី​លើក​ទឹក​ចិត្ត​ក្រសួង​យុត្តិធម៌ ធ្វើ​យ៉ាង​ណា ការ​ធ្វើ​វិសោធនកម្ម​ច្បាប់​ណា​មួយ គឺ​ត្រូវ​ឆ្លុះ​បញ្ចាំង​នូវ​កង្វល់​ទាំង​ឡាយ​ដែល​អ្នក​ពាក់ព័ន្ធ​លើក​ឡើង ហើយ​ត្រូវ​ឲ្យ​ស្រប​តាម​បទដ្ឋាន​សិទ្ធិ​មនុស្ស​នានា ដើម្បី​ពង្រឹង និង​មិន​ធ្វើ​ឲ្យ​អោយ​ចុះ​ខ្សោយ​ដល់​ឯករាជភាព​នៃ​ស្ថាប័ន​តុលាការ។

អ្នកស្រី​ក៏​បារម្ភ​ពី​ការ​អនុវត្ត​ការ​ឃុំ​ខ្លួន​បណ្តោះអាសន្ន រង់ចាំ​ការ​កាត់ទោស​ដែល​អ្នកស្រី​ថា នៅ​មិន​ទាន់​មាន​ភាព​ត្រឹមត្រូវ​នៅ​ឡើយ។ លើស​ពី​នេះ ភាព​ចង្អៀត​ណែនណាន់តាន់តាប់​ក្នុង​ពន្ធនាគារ ការ​ខ្វះ​ទំនុក​ចិត្ត​របស់​ពលរដ្ឋ​លើ​ប្រព័ន្ធ​តុលាការ និង​ការ​ខ្វះខាត​មេធាវី​ការពារ​ក្ដី​ឲ្យ​បុគ្គល​ងាយ​រងគ្រោះ​បំផុត ក៏​នៅ​តែ​ជា​កង្វល់​របស់​អ្នក​រាយការណ៍​ផ្នែក​សិទ្ធិ​មនុស្ស​រូប​នេះ។

ប្រតិកម្ម​ទៅ​នឹង​បញ្ហា​នេះ មន្ត្រី​រដ្ឋាភិបាល និង​ជា​អ្នកនាំពាក្យ​ទីស្ដីការ​គណៈរដ្ឋមន្ត្រី លោក ផៃ ស៊ីផាន សម្ដែង​ការ​សោកស្ដាយ​ចំពោះ​ការ​វាយ​តម្លៃ​របស់​អ្នកស្រី រ៉ូណា ស្មីត ហើយ​ថា រដ្ឋាភិបាល​មិន​អាច​ទទួល​យក​បាន​នោះ​ឡើយ។ លោក​ថា អ្នកស្រី រ៉ូណា ស្មីត មិន​ទាន់​ស្គាល់​ប្រទេស​កម្ពុជា ច្បាស់​នោះ​ទេ។ លោក​បន្ថែម​ថា រដ្ឋាភិបាល​អនុវត្ត​ច្បាប់​ដើម្បី​រក្សា​សណ្ដាប់ធ្នាប់ ហើយ​ការ​ប្រើ​ពាក្យពេចន៍​របស់​មន្ត្រី​រដ្ឋាភិបាល និង​យោធា​កន្លង​ទៅ មិន​មែន​ជា​ការ​បំភិតបំភ័យ​អ្នក​ប្រឆាំង​នោះ​ទេ។

លោក ផៃ ស៊ីផាន៖ «មិន​គួរ​ណា​មក​ជាន់​ស្រុក​ខ្មែរ ហើយ​ប្រើ​ពាក្យ​ហ្នឹង​ទេ។ ថ្មីៗ​នេះ​មាន​អង្គការ​ជា​ច្រើន​ថា ស្រុក​ខ្មែរ​កំពុង​ដំណើរ​ការ​ល្អ ហើយ​ចំណែក​ការ​លើក​ឡើង​នូវ​ភាសា​ដែល​ឥស្សរជន​លើក​ឡើង​ជា​ពាក្យ​ហិង្សា​នោះ ដោយសារ​គាត់​អត់​ស្គាល់​វប្បធម៌​ខ្មែរ​ច្បាស់ ទី​២ បំពាន​ទៅ​លើ​អត្ថន័យ​នៃ​ការ​លើក​ឡើង ដូចជា​ខ្មែរ​ថា ដំបង​ឥឡូវ បាក់​ធ្មេញ​ឥឡូវ មួយ​ព្រនង់​ឥឡូវ វា​គ្រាន់​តែ​ជា​ភាសា​ព្រមាន មិន​មែន​ភាសា​បំភិតបំភ័យ​ទេ»

ទោះជាយ៉ាងណា អ្នកស្រី រ៉ូណា ស្មីត សង្ឃឹម​ថា ដើម្បី​ធ្វើ​ដំណើរ​ឆ្ពោះ​ទៅ​មុខ និង​ដើម្បី​ឲ្យ​ប្រទេស​កម្ពុជា នឹង​ខិត​ចាក​ចេញ​ពី​ស្ថានភាព​គ្រោះថ្នាក់​ទាំង​អស់​នេះ គឺ​ត្រូវ​បញ្ចៀស​មិន​ឲ្យ​មាន​ទៀត​នូវ​ការ​គំរាមកំហែង អំពើ​ហិង្សា ការ​បង្ក្រាប​ដោយ​ការ​ប្រើ​កម្លាំង ឬ​សង្គ្រាម ឬ​បង្កើត​ឲ្យ​មាន​សេចក្ដី​ថ្លែង​ទាំង​ឡាយ​ណា​មាន​លក្ខណៈ​អុចអាល​ពូជ​សាសន៍។

នៅ​ចុង​ខែ​កញ្ញា ខាង​មុខ អ្នកស្រី រ៉ូណា ស្មីត នឹង​ចូល​រួម​ជាមួយ​ក្រុមប្រឹក្សា​សិទ្ធិមនុស្ស​អង្គការ​សហប្រជាជាតិ នៅ​ទីក្រុង​ហ្សឺណែវ (Geneva) ប្រទេស​ស្វីស (Switzerland)។ នៅ​ពេល​នោះ អ្នកស្រី​នឹង​បង្ហាញ​របាយការណ៍ និង​ធ្វើ​បច្ចុប្បន្នភាព​អំពី​ស្ថានភាព​សិទ្ធិ​នៅ​កម្ពុជា ចាប់​តាំង​ពី​ខែ​មិថុនា មក និង​រាយការណ៍​ផ្ទាល់​មាត់​អំពី​បេសកកម្ម​ពេល​នេះ​របស់​អ្នកស្រី​ទៅ​កាន់​ប្រឹក្សា​សិទ្ធិមនុស្ស​នៃ​អង្គការ​សហប្រជាជាតិ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។