កម្មកររងគ្រោះមានឈ្មោះ ង៉ែត សារ៉ន មកពីខេត្តតាកែវ ត្រូវបុរសជនជាតិចិន ជាមេជាងធ្វើប្រឡាយថ្ម នៃក្រុមហ៊ុនចិន វាយពីក្រោយខ្នងក្បែរចង្កេះ ត្រូវដេរមុខរបួស និងដៃម្ខាងត្រូវវាយហើមជាំកម្រើកមិនរួច។
អំពើហិង្សានេះកើតឡើងនៅការដ្ឋានធ្វើប្រឡាយនៅចំណុចមុខវត្តអូរចេង ឃុំប៉ាតាង ស្រុកកូនមុំ ខេត្តរតនគិរី កាលពីថ្ងៃសុក្រ កន្លងទៅនេះ ដោយសារតែកម្មករតវ៉ាមិនព្រមទៅវាយថ្មតាមបញ្ជារបស់មេជាង។
កម្មករខ្មែរនៅក្នុងហេតុការណ៍សុំមិនបញ្ចេញឈ្មោះឲ្យដឹងថា ក្រោយពេលមេជាងចិន វាយកម្មករខ្មែរឲ្យរបួសដួលសន្លប់ភ្លាមៗនោះ បុរសជនជាតិចិន ម្នាក់ទៀតដែលរួមការងារនៅទីនោះប៉ុនប៉ងយកដំបងវាយកម្មករខ្មែរនោះបន្ថែមទៀត ប៉ុន្តែត្រូវកម្មករខ្មែរនាំគ្នាស្រែកឃាត់ទើបបុរសជនជាតិចិន នោះឈប់។
មន្ត្រីផ្នែកអង្កេតសមាគមអាដហុក ខេត្តរតនគិរី លោក មាន ព្រហ្មមុនី ចាត់ទុកទង្វើនេះថា ជាអំពើហិង្សារំលោភច្បាប់ និងប្រមាថទៅលើសិទ្ធិពលរដ្ឋខ្មែរធ្ងន់ធ្ងរ។
លោកអំពាវនាវឲ្យតំណាងក្រុមហ៊ុន និងស្ថានទូតចិន ត្រួតពិនិត្យករណីនេះ៖ «នេះជាការរំលោភសិទ្ធិធ្ងន់ធ្ងរទៅលើកម្មករ ជនជាតិចិន ទោះជាមានការខុសឆ្គងអ្វីមិនត្រូវប្រើអំពើហិង្សាទៅលើកម្មករទេ។ យើងទទូចឲ្យក្រុមហ៊ុនចិនហ្នឹងគោរពសិទ្ធិពលរដ្ឋខ្មែរជាកម្មករ ត្រូវមានលក្ខខណ្ឌកិច្ចសន្យាខ្លីវែងឲ្យបានត្រឹមត្រូវ»។
នាយនគរបាលប៉ុស្តិ៍រដ្ឋបាលឃុំតាអង លោក សែ តេន មានប្រសាសន៍បញ្ជាក់ថា អ្នកទទួលខុសត្រូវក្រុមហ៊ុនចិន បានធានាខ្លួនបុរសជនជាតិចិន និងផ្ដល់សំណងព្យាបាល ព្រមទាំងសំណងជំងឺចិត្តជាប្រាក់ប្រមាណ ៥០០ដុល្លារទៅឲ្យជនរងគ្រោះ បន្ទាប់ពីជនរងគ្រោះស្នើសុំប្រាក់សំណងវិលទៅលំនៅឋានវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។