អ្នកស្រី ទេព វន្នី អំពាវនាវ​ឲ្យ​លោក​នាយក​រដ្ឋមន្ត្រី​ជួយ​ផ្តល់​យុត្តិធម៌

សកម្មជន​ដីធ្លី​តំបន់​បឹងកក់ ដែល​កំពុង​ជាប់​ឃុំ អ្នកស្រី ទេព វន្នី នៅ​ព្រឹក​ថ្ងៃ​ទី​១៥ ខែ​កុម្ភៈ អំពាវនាវ​ដល់​លោក​នាយក​រដ្ឋមន្ត្រី ហ៊ុន សែន ឲ្យ​ជួយ​ផ្តល់​យុត្តិធម៌​ដល់​ពលរដ្ឋ​តំបន់​បឹងកក់ និង​ពលរដ្ឋ​ដែល​កំពុង​រងគ្រោះ​ដោយ​ការ​រំលោភ​បំពាន​ផ្សេងៗ។

ថ្លែង​បន្ទាប់​ពី​ចេញ​ពី​បន្ទប់​សវនាការ​នៅ​សាលា​ឧទ្ធរណ៍ អ្នកស្រី ទេព វន្នី សង្ឃឹម​ថា លោក​នាយក​រដ្ឋមន្ត្រី ហ៊ុន សែន នឹង​កែប្រែ​ផ្តល់​ក្តី​មេត្តា និង​ជួយ​ដោះស្រាយ​បញ្ហា​ជូន​ប្រជាពលរដ្ឋ៖ «សូម​សម្ដេច​នាយក​រដ្ឋមន្ត្រី ហ៊ុន សែន ជួយ​ប្រជាពលរដ្ឋ​ខ្មែរ​ច្រើន​ណាស់ មិន​មែន​តែ​អ្នក​បឹងកក់​ទេ​ដែល​រស់នៅ​ដោយ​ វេទនា និង​ទឹកភ្នែក គឺ​ឈឺ​ចាប់​ស្ទើរ​គ្រប់​ទីកន្លែង​ទាំងអស់។ នេះ​ហើយ​ជា​សម្រែក​ទាមទារ​យុត្តិធម៌​ពី​ប្រជាពលរដ្ឋ​ខ្មែរ សូម​សម្ដេច​នាយក​រដ្ឋមន្ត្រី ហ៊ុន សែន ផ្តល់​ភាព​មេត្តា​ដល់​ប្រជាពលរដ្ឋ​ខ្លួន​ឯង ដូចជា​គ្រួសារ​តែ​មួយ សាច់​ឈាម​តែ​មួយ ទើប​យើង​ដឹកនាំ​ប្រទេស​ដោយ​មាន​កិត្តិយស​លើ​ឆាក​អន្តរជាតិ»។

សវនាការ​សាលា​ឧទ្ធរណ៍​នៅ​ព្រឹក​ថ្ងៃ​ទី​១៥ ខែ​កុម្ភៈ ជំនុំ​ជម្រះ​ករណី​ចោទ​ប្រកាន់​មក​លើ​សកម្មជន​ដីធ្លី​តំបន់​បឹងកក់ អ្នកស្រី ទេព វន្នី និង​ស្ត្រី​បឹងកក់ ៣​នាក់​ផ្សេង​ទៀត​ពី​បទ​ប្រមាថ​អ្នក​រាជការ​សាធារណៈ និង​ប្រឆាំង​នឹង​អ្នក​រាជការ​សាធារណៈ​មាន​ស្ថាន​ទម្ងន់​ទោស។

ស្រប​គ្នា​នេះ ក្រុម​សកម្មជន​ដីធ្លី​ប្រមាណ ២០​នាក់ ក៏​បាន​ជួបជុំ​គ្នា​នៅ​មុខ​សាលា​ឧទ្ធរណ៍ និង​ស្រែក​អំពាវនាវ​ឲ្យ​មាន​ការ​ដោះលែង​អ្នកស្រី ទេព វន្នី ឲ្យ​មាន​សេរីភាព។ ក្រៅ​ពី​នេះ ក្រុម​ពលរដ្ឋ​ក៏​ស្រែក​ទាមទារ​សេរីភាព​ឲ្យ​ស្ថាប័ន​តុលាការ ដោយ​ក្រុម​ពលរដ្ឋ​ចាត់​ទុក​ថា តុលាការ​បច្ចុប្បន្ន​កំពុង​ស្ថិត​ក្រោម​ការ​បញ្ជា​ពី​អ្នក​មាន​អំណាច ពោល​គឺ​ជា​តុលាការ​គ្មាន​ភាព​ឯករាជ្យ។

សវនាការ​បាន​បញ្ចប់​នៅ​ម៉ោង​ប្រមាណ ១១​ព្រឹក​ថ្ងៃ​ទី​១៥ កុម្ភៈ ហើយ​ចៅក្រម​សម្រេច​ប្រកាស​នៅ​ថ្ងៃ​ទី​២៧ ខែ​កុម្ភៈ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។