អាជ្ញាធរខេត្តឧត្តរមានជ័យ បានរាយបណ្ដាក់កម្លាំងសមត្ថកិច្ចចម្រុះ មានប៉ូលិស និងប៉េអឹម នៅតាមកំណាត់ផ្លូវសំខាន់ៗដែលបែកចេញពីទីក្រុងសំរោង ឆ្ពោះទៅកាន់បណ្ដាខេត្តផ្សេងៗទៀតជាច្រើនថ្ងៃមកនេះ។
ការរាយបណ្ដាក់ប៉ូលិសនិងប៉េអឹមនោះ ត្រូវបានគេដឹងថា ដើម្បីត្រួតពិនិត្យនិងរឹតបន្តឹងទៅលើអ្នកដំណើរតាមរថយន្តឈ្នួលចេញពីខេត្តឧត្តរមានជ័យ ឆ្ពោះទៅកាន់ខេត្តផ្សេងទៀត ដូចជាទៅខេត្តសៀមរាប និងខេត្តបន្ទាយមានជ័យ ជាដើម។
បុរសម្នាក់ជាអ្នកបើករថយន្តឈ្នួលពីខេត្តឧត្តរមានជ័យ ទៅខេត្តបន្ទាយមានជ័យ ដែលសុំមិនបញ្ចេញឈ្មោះ បានមានប្រសាសន៍កាលពីរសៀលថ្ងៃអាទិត្យ ទី១៥ ខែធ្នូ ថា ក្នុងរយៈពេលជាង ១សប្ដាហ៍មកហើយ គាត់តែងឃើញកម្លាំងប៉ូលិស និងប៉េអឹម រាយបណ្ដាក់នៅលើដងផ្លូវដើម្បីកាក់រថយន្តឈ្នួលត្រួតពិនិត្យ និងកត់ចំនួនអ្នកដំណើរ។ គាត់មានការងឿងឆ្ងល់ចំពោះសកម្មភាពនោះ ក៏ប៉ុន្តែគាត់មិនហ៊ានសាកសួរទៅសមត្ថកិច្ចថាតើកត់ចំនួនអ្នកដំណើរដើម្បីយកទៅធ្វើអ្វីឡើយ។
ពលរដ្ឋសុំមិនបញ្ចេញឈ្មោះ៖ «កម្លាំងប៉ូលិស ៣-៤នាក់ ប៉េអឹម ២-៣នាក់ គេកាក់សួរចំនួនមនុស្សប៉ុន្មាននាក់ ស្រីប៉ុន្មាន ប្រុសប៉ុន្មានក្នុងឡាន ហើយគេកត់ចំនួនមនុស្ស ក៏កត់ស្លាកលេខឡានខ្ញុំ។ គេសួរខ្ញុំថា ឡានទៅខាងណា? ប៉ុន្តែយើងមិនដឹងថា គេកាក់ហ្នឹង គេចង់បំណងស្អី គេមិនដឹងទេ។ ពីកន្លងមកមុនបោះឆ្នោតមកអត់ដែលមានទេ ទើបតែមានប្រហែលជា ១អាទិត្យជាងហើយ»។
ទោះយ៉ាងណា វិទ្យុអាស៊ីសេរី មិនអាចទាក់ទងអភិបាលខេត្ត អភិបាលក្រុងសំរោង និងស្នងការនគរបាលខេត្តឧត្តរមានជ័យ ដើម្បីសុំការពន្យល់អំពីបញ្ហានោះបានថាយ៉ាងណានៅឡើយទេ ដោយសារតែទូរស័ព្ទទាំងអស់បានបិទ។
សកម្មជនការពារសិទ្ធិមនុស្សប្រចាំតំបន់ក៏បានសំដែងការងឿងឆ្ងល់ចំពោះកម្លាំងសមត្ថកិច្ចចម្រុះ ដែលរាយបណ្ដាក់លើកំណាត់ផ្លូវ ដើម្បីត្រួតពិនិត្យអ្នកដំណើរនោះដែរ។
អ្នកសម្របសម្រួលរបស់សមាគមការពារសិទ្ធិមនុស្សអាដហុក (ADHOC) ខេត្តឧត្តរមានជ័យ លោក ស្រី ណារ៉េន បានមានប្រសាសន៍ថា លោកក៏បានឃើញកម្លាំងប៉ូលិសនិងប៉េអឹម ឈរនៅលើកំណាត់ផ្លូវចេញពីក្រុងសំរោង ដើម្បីកាក់ឡានត្រួតពិនិត្យដែរ នៅពេលដែលលោកធ្វើដំណើរតាមរថយន្តឈ្នួលឆ្ពោះទៅទីក្រុងភ្នំពេញ កាលពីថ្ងៃទី១០ ធ្នូ។
លោក ស្រី ណារ៉េន យល់ថា ប្រសិនបើសមត្ថកិច្ចទាំងនោះ កាក់ត្រួតពិនិត្យ និងរឹតបន្តឹងការដើរហើររបស់ប្រជាពលរដ្ឋ គឺជាការរំលោភទៅលើសិទ្ធិមនុស្សដែលខុសពីច្បាប់របស់ប្រទេសកម្ពុជា៖ «មិនដឹងថា គេធ្វើហ្នឹង ដើម្បីអ្វី ក៏យើងមិនដឹងដែរ ប៉ុន្តែគ្រាន់ថា វាចម្លែក កន្លងមកវាមិនដែលមានអ៊ីចឹង ហើយបើសិនជាការរឹតត្បិតសួរនាំអីទៅណាមកណាទៀត អាហ្នឹងជាការបិទសេរីភាព បិទសិទ្ធិក្នុងការដើររបស់ប្រជាពលរដ្ឋហើយ»។
អង្គការសិទ្ធិមនុស្សប្រចាំខេត្តឧត្តរមានជ័យ បានកត់សម្គាល់ឃើញថា សកម្មភាពរបស់ប៉ូលិស និងប៉េអឹមឈរលើដងផ្លូវដើម្បីកាក់រថយន្តត្រួតពិនិត្យ និងកត់ចំនួនអ្នកដំណើរនោះ បានកើតមានតាំងតែពីមុនថ្ងៃ ១០ ធ្នូ ជាថ្ងៃដែលគណបក្សសង្គ្រោះជាតិ ធ្វើបាតុកម្មអហិង្សានៅខេត្តសៀមរាប ហើយសមត្ថកិច្ចទាំងនោះនៅតែបន្តដាក់ត្រួតពិនិត្យអ្នកដំណើរនៅឡើយ នៅស្របពេលដែលគណបក្សសង្គ្រោះជាតិ គ្រោងនឹងធ្វើបាតុកម្មឯទីក្រុងភ្នំពេញ។
ប្រភពពីប្រជាពលរដ្ឋឱ្យដឹងថា សកម្មភាពប៉ូលិសនិងបេអឹមឈរតាមដងផ្លូវដើម្បីកាក់រថយន្តឈ្នួលត្រួតពិនិត្យ និងកត់ចំនួនអ្នកដំណើរចេញពីខេត្តឧត្តរមានជ័យនេះ ក៏មាននៅតាមបណ្ដាស្រុកខ្លះទៀត ដូចជានៅអូរស្មាច់ នៃក្រុងសំរោង និងស្រុកអន្លង់វែង លើដងផ្លូវឆ្ពោះទៅកាន់ខេត្តសៀមរាប ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។