តំណាងការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា ជំរុញឲ្យរដ្ឋាភិបាលកម្ពុជា អនុវត្តអនុសាសន៍ជាង ១៦០ ដែលរដ្ឋាភិបាលបានទទួលយកពីរដ្ឋជាសមាជិកនៃអង្គការសហប្រជាជាតិ ក្នុងអំឡុងពេលត្រួតពិនិត្យជាសាកលតាមពេលវេលាកំណត់ ហៅថា យូ.ភី.អ (UPR) លើកទី២ របស់កម្ពុជា។
ការជំរុញឲ្យរដ្ឋាភិបាលអនុវត្តអនុសាសន៍ទាំងនេះធ្វើឡើងនៅក្នុងកិច្ចពិគ្រោះយោបល់ថ្នាក់ជាតិ និងសិក្ខាសាលាតស៊ូមតិបន្ទាប់ពីការត្រួតពិនិត្យជាសាកលតាមពេលវេលាកំណត់របស់កម្ពុជា ដែលធ្វើឡើងរយៈពេលពីរថ្ងៃ គឺថ្ងៃទី១៧ និងថ្ងៃទី១៨ កក្កដា នៅរាជធានីភ្នំពេញ។
មន្ត្រីជាន់ខ្ពស់នៃការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សលើកឡើងថា រដ្ឋាភិបាលកម្ពុជា ត្រូវតែអនុវត្តនូវអនុសាសន៍ចំនួន ១៦៣ និងកត់សម្គាល់អនុសាសន៍ ៤២ នោះ ឲ្យមានប្រសិទ្ធភាព។
តំណាងការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា អ្នកស្រី វ៉ាន់ ហ៊ាលី (Wan Hea Lee) មានប្រសាសន៍ថា រដ្ឋាភិបាលបានទទួលយកអនុសាសន៍ទាំងនេះ ហើយវាជាកាតព្វកិច្ចរបស់រដ្ឋាភិបាលក្នុងការអនុវត្តអនុសាសន៍ទាំងនោះ។
អ្នកស្រីបញ្ជាក់ទៀតថា អង្គការសង្គមស៊ីវិល មានតួនាទីយ៉ាងសំខាន់ក្នុងការតាមដានរដ្ឋាភិបាល និងជំរុញឲ្យរដ្ឋាភិបាលអនុវត្តអនុសាសន៍ទាំងឡាយដែលខ្លួនបានទទួលយកហើយនោះ៖ «សំឡេង»។
អនុសាសន៍១៦៣ ក្នុងចំណោមអនុសាសន៍ជាង ២០០ ដែលរដ្ឋាភិបាលទទួលយកកាលពីខែមិថុនា ឆ្នាំ២០១៤ នោះ ដែលអនុសាសន៍ទាំងនោះគ្រប់ដណ្ដប់ទៅលើបញ្ហាមួយចំនួន រួមមានការបង្កើនកិច្ចសហប្រតិបត្តិការជាមួយការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្ស ការលុបបំបាត់ការរើសអើងដោយផ្អែកលើយេនឌ័រ ជាតិសាសន៍ សញ្ជាតិ និងការធ្វើឲ្យប្រសើរឡើងចំពោះលក្ខខណ្ឌនៃការឃុំខ្លួន ការលុបបំបាត់ពលកម្មកុមារ ពង្រឹងឯករាជ្យនៃប្រព័ន្ធតុលាការ និងប្រព័ន្ធផ្សព្វផ្សាយ ការប្រយុទ្ធប្រឆាំងនឹងការជួញដូរមនុស្ស និងការបង្កើតស្ថាប័នសិទ្ធិមនុស្សថ្នាក់ជាតិ ។ល។
ការត្រួតពិនិត្យជាសកលតាមពេលវេលាកំណត់ យូ.ភី.អ គឺជាដំណើរការដែលរដ្ឋជាសមាជិករបស់អង្គការសហប្រជាជាតិទាំងអស់ទទួលការពិនិត្យលើរបាយការណ៍សិទ្ធិមនុស្សរបស់ប្រទេសនីមួយៗ។ យូ.ភី.អ ធ្វើឡើងរៀងរាល់ ៤ឆ្នាំម្ដង ចំណែកកម្ពុជា ក៏បានបញ្ចប់ការត្រួតពិនិត្យលើកទី២ របស់ខ្លួនរួចហើយ កាលពីដើមឆ្នាំ២០១៤។
ប្រធានគណៈកម្មការសិទ្ធិមនុស្សកម្ពុជា លោក ម៉ក់ សម្បត្តិ មានប្រសាសន៍ថា គណៈកម្មការសិទ្ធិមនុស្សរបស់រដ្ឋាភិបាលរីករាយក្នុងការធ្វើការសហការជាមួយអង្គការសង្គមស៊ីវិល ដើម្បីអនុវត្តទៅលើអនុសាសន៍ទាំងនេះ។ លោកបញ្ជាក់ថា គណៈកម្មការសិទ្ធិមនុស្សកម្ពុជា នឹងរៀបចំប្រជុំនៅខែសីហា និងអញ្ជើញតំណាងអង្គការសង្គមស៊ីវិលចូលរួមជាមួយគ្នា ដើម្បីរិះរកនីតិវិធីអនុវត្តទៅលើអនុសាសន៍ទាំងនេះ៖ «សំឡេង»។
តំណាងមជ្ឈមណ្ឌលសិទ្ធិមនុស្សកម្ពុជា (CCHR) អ្នកស្រី ជ័រ ច័ន្ទធីតា មានប្រសាសន៍ថា ទោះបីជារដ្ឋនីមួយៗមិនជាប់កាតព្វកិច្ចក្នុងការអនុវត្តអនុសាសន៍ដែលខ្លួនទទួលយកនោះហើយក្ដី ក៏ប៉ុន្តែរដ្ឋនីមួយៗត្រូវមានការទទួលខុសត្រូវខ្ពស់ចំពោះសហគមន៍អន្តរជាតិ ហើយក៏ត្រូវចាប់បង្ខំរដ្ឋាភិបាលក្នុងការអនុវត្តអនុសាសន៍ទាំងនោះឲ្យមានប្រសិទ្ធភាព៖ «សំឡេង»។
មជ្ឈមណ្ឌលសិទ្ធិមនុស្សកម្ពុជា និងការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សរៀបចំកិច្ចពិគ្រោះថ្នាក់ជាតិ និងសិក្ខាសាលាតស៊ូមតិបន្ទាប់ពីការត្រួតពិនិត្យជាសាកលតាមពេលវេលាកំណត់របស់កម្ពុជា រយៈពេលពីរថ្ងៃ គឺថ្ងៃទី១៧ និងថ្ងៃទី១៨ កក្កដា នេះ ក្នុងគោលបំណងលើកកម្ពស់ការយល់ដឹងអំពីដំណើរការក្នុងចំណោមអង្គការសង្គមស៊ីវិល និងដៃគូពាក់ព័ន្ធ ដើម្បីធានាឲ្យមានការតស៊ូមតិជាប្រព័ន្ធក្នុងការតាមដានទៅលើការអនុវត្តអនុសាសន៍ក្នុងពេលបន្ទាប់ៗទៀត និងពិភាក្សារកមធ្យោបាយក្នុងការតាមដានទៅលើការអនុវត្តអនុសាសន៍ យូ.ភី.អ របស់រដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។