គ្រួសារពលការិនីខ្មែរកំពុងធ្វើការនៅប្រទេសម៉ាឡេស៊ី នៅថ្ងៃពុធ ទី៣ ខែកក្កដា អំពាវនាវសុំឲ្យស្ថាប័នពាក់ព័ន្ធនៃប្រទេសកម្ពុជា សង្គ្រោះកូន និងក្មួយចំនួនបីនាក់ពីការរំលោភសិទ្ធិមនុស្ស និងកិច្ចសន្យាការងារពីសំណាក់ថៅកែ និងក្រុមហ៊ុននាំពលករទៅធ្វើការនៅប្រទេសម៉ាឡេស៊ី។
ពលការិនីខ្មែរទាំងបីនាក់ មានឈ្មោះ នួន សុខជា ជិន អាន់ និងឈ្មោះ សា មករា មានទីលំនៅនៅភូមិឆ្វាំង ឃុំសំអាង ស្រុកថាលាបរិវ៉ាត់ ខេត្តស្ទឹងត្រែង។
ស្ត្រីឈ្មោះ ម៉ាន អុន អាយុ ៥៤ឆ្នាំ ត្រូវជាម្តាយ និងជាមីងរបស់កម្មការិនីទាំងបីនាក់ មានប្រសាសន៍បញ្ជាក់ថា កូនស្រីគាត់បានទូរស័ព្ទប្រាប់ថា នាងត្រូវថៅកែវាយគំរាម ដោយសារតែនាងទាមទារវិលត្រឡប់មកលំនៅឋានវិញ។ អ្នកស្រីបន្តថា កូនរបស់គាត់បានចុះកិច្ចសន្យាជាមួយក្រុមហ៊ុននាំពលករឈ្មោះ អ៊ី.ឌី.ធី (EDT) រយៈពេល ២ឆ្នាំ ពីដើមឆ្នាំ២០១០ ទៅបម្រើការងារតាមផ្ទះ ប៉ុន្តែកិច្ចសន្យាការងារបានហួសកំណត់មួយឆ្នាំហើយ។ ចំណែកក្រុមហ៊ុននាំពលករបានបញ្ឈប់សកម្មភាព ហើយតំណាងក្រុមហ៊ុនគេចវេសមិនទទួលខុសត្រូវលើបញ្ហានេះឡើយ៖ «ចប់មួយអាណត្តិហើយ ពីរឆ្នាំហើយ នេះបីឆ្នាំហើយ មិនឃើញមកទៀត ព្រោះអ្វីក្រែងថៅកែគំរាមកំហែងកូនចៅយើងណា! កូនខ្ញុំវាពិតជាគេវាយហើយយប់មិញ វាទូរស័ព្ទមក ថៅកែវាយញាំងស្លឹកត្រចៀកចេញឈាម អ៊ីចឹងបានខ្ញុំព្រួយបារម្ភរឿងកូន»។
កាលពីថ្ងៃអង្គារ ស្ត្រីជាអាណាព្យាបាលពលការិនីទាំងបីនាក់ បានដាក់ពាក្យប្ដឹងមកការិយាល័យសមាគមការពារសិទ្ធិមនុស្សអាដហុក (Adhoc) ខេត្ត និងការិយាល័យប្រឆាំងការជួយដូរមនុស្សនៃស្នងការដ្ឋាននគរបាលខេត្ត សុំជួយអន្តរាគមន៍សង្គ្រោះកូន និងក្មួយរបស់គាត់ឲ្យមានសេរីភាពឡើងវិញ។
វិទ្យុអាស៊ីសេរី មិនអាចស្វែងរកអាសយដ្ឋានទាក់ទងរបស់ក្រុមហ៊ុន អ៊ី.ឌី.ធី សុំបំភ្លឺករណីនេះបានទេ នៅថ្ងៃពុធ ទី៣ ខែកក្កដា។
ទាក់ទិនករណីនេះ អនុប្រធានការិយាល័យប្រឆាំងការជួញដូរមនុស្សនៃស្នងការដ្ឋានប៉ូលិសខេត្តស្ទឹងត្រែង លោក ភៀន ភើយ មានប្រសាសន៍បញ្ជាក់ថា លោកបានទទួលពាក្យប្ដឹងពីករណីនេះហើយ។ លោកបន្តថា កំពុងធ្វើរបាយការណ៍ជូនថ្នាក់ជាតិ ដើម្បីចាត់វិធានការបន្តក្នុងរឿងនេះ៖ «ខ្ញុំកំពុងចំណាត់ការតាមភាគីហើយ។ កំពុងធ្វើការជូនទៅនាយកដ្ឋានហើយ»។
ចំណែកមន្ត្រីឃ្លាំមើលសិទ្ធិមនុស្សសមាគមអាដហុក ខេត្តស្ទឹងត្រែង លោក ហូ សំអុល មានប្រសាសន៍បញ្ជាក់ដែរថា លោកក៏បានទទួលពាក្យបណ្ដឹងពីគ្រួសារពលការិនីរួចហើយ។ ករណីនេះ លោកនឹងសុំកិច្ចអន្តរាគមន៍ពីមន្ត្រីស្នាក់ការកណ្ដាលសមាគមអាដហុក ដើម្បីជួយអន្តរាគមន៍ទៅស្ថាប័នពាក់ព័ន្ធថ្នាក់ជាតិជួយដោះស្រាយបញ្ហា៖ «នៅទៅរួមខេត្ត គឺយើងធ្វើជាមួយស្នងការ។ ពេលរឿងមកដល់ភ្នំពេញ ខាងភ្នំពេញ គេធ្វើជាមួយខាងនាយកដ្ឋានខាងជួញដូរជាមួយទូតហ្នឹង»។
ទោះជាយ៉ាងនេះក៏ដោយ ប្រធានកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ លោក មឿង តុលា បានកត់សម្គាល់ថា កន្លងទៅនេះបទពិសោធន៍ដែលអង្គការលោករកឃើញ គឺក្រសួងការបរទេស ក៏មានកំហុសមួយចំណែកទាក់ទិនការបន្តទិដ្ឋាការដល់ពលករនៅប្រទេសម៉ាឡេស៊ី ដែលអាចនាំឲ្យកើតមានអំពើពុករលួយក្នុងការលួចបន្តអាណត្តិការងាររបស់ពលរដ្ឋ ដោយពុំមានការឯកភាពពីពលករ និងក្រុមគ្រួសារ ទើបកើតមានរឿងបែបនេះ៖ «គាត់អាចដាក់ពាក្យមកមជ្ឈមណ្ឌលអប់រំច្បាប់សម្រាប់សហគមន៍មក ពួកខ្ញុំចាប់ផ្ដើមទំនាក់ទំនងគាត់សួរនាំអង្គហេតុអ៊ីចឹង បន្ទាប់មកយើងចាប់ផ្តើមធ្វើការ»។
របាយការណ៍ស្រាវជ្រាវរបស់មជ្ឈមណ្ឌលអប់រំច្បាប់សម្រាប់សហគមន៍ នារយៈពេល ៦ខែចុងក្រោយនេះ មានបញ្ហាពលករចំណាកស្រុកជាង ១ពាន់ករណី ត្រូវបានជួយសង្គ្រោះពីប្រទេសថៃ អាហ្វ្រិកខាងត្បូង ចិន និងប្រទេសម៉ាឡេស៊ី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។