ក្រុមហ៊ុន​ហូលីវូដ​បញ្ចប់​ការ​ថត​ភាពយន្ត​ខ្នាត​ធំ​និយាយ​ពី​របប​ខ្មែរ​ក្រហម​នៅ​ខេត្ត​បាត់ដំបង

0:00 / 0:00

ការ​ថត​ភាពយន្ត​ខ្នាត​ធំ​ដំបូង​គេ​នៅ​កម្ពុជា គឺ​រឿង «មុន​ដំបូង​ខ្មែរ​ក្រហម​សម្លាប់​ប៉ា​ខ្ញុំ» ដែល​ដឹក​នាំ​ដោយ​តារា​ហូលីវូដ (Hollywood) របស់​សហរដ្ឋ​អាមេរិក ដែល​មាន​តារា​ល្បី​ដឹក​នាំ​ថត គឺ​អ្នកស្រី អែនជេលីណា ចូលី ភីត (Angelina Jolie-Pitt) ថត​ក្នុង​ទឹក​ដី​ខេត្ត​បាត់ដំបង រយៈពេល​ជាង​មួយ​សប្ដាហ៍​កន្លង​មក បាន​បញ្ចប់​ហើយ​កាល​ពី​រសៀល​ថ្ងៃ​ទី​១៣ ខែ​កុម្ភៈ ឆ្នាំ​២០១៦។ ការ​ថត​ភាពយន្ត​នេះ បាន​ប៉ះពាល់​ដល់​ការ​ធ្វើ​ដំណើរ និង​ការ​លក់​ដូរ​របស់​ប្រជាពលរដ្ឋ​មួយ​ចំនួន​ក្នុង​ក្រុង​បាត់ដំបង ដោយសារ​សមត្ថកិច្ច​បិទ​ផ្លូវ​នៅ​តំបន់​ថត​កុន​នោះ ធ្វើ​ឲ្យ​ពួក​គាត់​មិន​អាច​ប្រកប​របរ​រក​ស៊ី​បាន។

ការ​ថត​ភាពយន្ត​ខ្នាត​អន្តរជាតិ​នេះ សមត្ថកិច្ច​បាន​ដាក់​កម្លាំង​យាមកាម​យ៉ាង​តឹងតែង​បំផុត​នៅ​តាម​ដង​ផ្លូវ​មួយ​ចំនួន ក្នុង​សង្កាត់​ស្វាយប៉ោ ក្រុង​បាត់ដំបង ជាពិសេស​ផ្លូវ​កាត់​ទទឹង​ពី​ចំណុច​អតីត​ស្ពាន​ដែក​នៃ​ស្ទឹង​សង្កែ ឆ្ពោះ​ទៅ​សាលា​បឋម​សិក្សា ២ ធ្នូ ក្បែរ​វត្ត​ដំរីស ដែល​ជា​ទីតាំង​សំខាន់​ក្នុង​ការ​ថត​រឿង​នេះ។

ថ្ងៃ​ថត​ចុង​ក្រោយ សមត្ថកិច្ច​បាន​បិទ​ផ្លូវ​ស្ទើរ​ពាក់​កណ្ដាល​ក្រុង​បាត់ដំបង និង​ធ្វើ​ឲ្យ​ស្ទះ​ចរាចរណ៍​យ៉ាង​ខ្លាំង ទាំង​ត្រើយ​ខាង​លិច និង​ត្រើយ​ខាង​កើត គឺ​ចាប់​ពី​ស្ពាន​ថ្ម​ថ្មី រហូត​ទល់​ផ្សារ​លើ ពីព្រោះ​នៅ​ថ្ងៃ​ទី​១៣ កុម្ភៈ ជា​ថ្ងៃ​ចុង​បញ្ចប់​នៃ​ការ​ថត​សាច់​រឿង និង​មាន​ប្រជាពលរដ្ឋ​ចូលរួម​សម្ដែង​ច្រើន​ជាង​ថ្ងៃ​ធម្មតា។

ប្រជាពលរដ្ឋ​ដែល​ត្រូវ​ជ្រើសរើស​ឲ្យ​សម្ដែង​ជា​តារា​កិត្តិយស ភាគ​ច្រើន​ស្លៀកពាក់​ឯកសណ្ឋាន​ដូច​ការ​រស់នៅ​ក្នុង​របប​សម័យ​ខ្មែរ​ក្រហម មាន​ជាអាទិ៍ ពាក់​អាវ​ខ្មៅ ខោ​ខ្មៅ និង​មាន​បង់​ក​កន្សែង ជាដើម។ ពលរដ្ឋ​អ្នក​ចូលរួម​សម្ដែង​មួយ​ចំនួន ថ្លែង​នៅ​ពេល​ដែល​ធ្វើ​ដំណើរ​ទៅ​ថត​កុន​នៅ​មាត់​ស្ទឹង​សង្កែ ក្រុង​បាត់ដំបង ថា ពួក​គាត់​មាន​ក្ដី​រំភើប​ជា​ខ្លាំង​ដែល​បាន​ចូលរួម​សម្ដែង​ក្នុង​រឿង​ប្រវត្តិសាស្ត្រ​នេះ៖ « គេ​ឲ្យ​ពួក​ខ្ញុំ​មក​សម្ដែង​ធ្វើ​ជា​ប្រជាពលរដ្ឋ ជម្លៀស​ជា​ជន​ភៀស​ខ្លួន ដោយ​នាំ​គ្នា​រត់​ពី​កន្លែង​មួយ​ទៅ​កន្លែង​មួយ​ទៀត ប៉ុន្តែ​ពុំ​ដឹង​ថា គេ​ឲ្យ​រត់​ទៅ​ខាង​ណា​នៅ​ឡើយ​ទេ »

នៅ​ទីកន្លែង​ថត​កុន​នេះ មាន​រៀបចំ​ឆាក​ឈុត​សម្ដែង​ស្រដៀង​នឹង​សម័យ​ខ្មែរ​ក្រហម ទាំង​រថយន្ត និង​ការ​ស្លៀកពាក់​របស់​ទាហាន​ខ្មែរ​ក្រហម និង​ទាហាន​របស់​លោក​សេនា​ប្រមុខ លន់ នល់ ជាដើម។ ក្រៅ​ពី​នេះ ក៏​មាន​ទាហាន និង​តារា​ភាពយន្ត​ខ្មែរ ដូចជា លោក ទេព រិនដារ៉ូ លោក ជា សំណាង ព្រម​ទាំង​ប្រជាពលរដ្ឋ​មក​ពី​ក្រុង​បាត់ដំបង ចូលរួម​ជិត ៤​ពាន់​នាក់។

អភិបាល​ក្រុង​បាត់ដំបង លោក សៀង ឯមវូនហ្សី មាន​ប្រសាសន៍​ថា អ្នក​រួម​សម្ដែង​ក្នុង​ចំណោម ៤​ពាន់​នាក់​នោះ មាន​ប្រជាពលរដ្ឋ​ដែល​សម្ដែង​ចាប់​ពី​ម៉ោង ១២ ដល់​ម៉ោង ៥​រសៀល នៅ​ថ្ងៃ​ទី​១៣ កុម្ភៈ ចំនួន ២​ពាន់​នាក់ ទទួល​ប្រាក់​ឈ្នួល​ម្នាក់ ១០​ដុល្លារ​សហរដ្ឋ​អាមេរិក​ក្នុង​មួយ​ថ្ងៃ។ ក្រៅ​ពី​នោះ អ្នក​ដែល​បាន​ហ្វឹកហាត់​ខ្លះ​ប្រមាណ​ជាង ១​ពាន់​នាក់ ទទួល​បាន​ប្រាក់​ឈ្នួល ២៥​ដុល្លារ​ក្នុង​មួយ​ថ្ងៃ៖ « នៅ​ក្នុង​ទីក្រុង​បាត់ដំបង បាន​កំណត់​ទីតាំង​ចំណុច​ធំៗ។ ទី​១ នៅ​កែង​ផ្លូវ​លេខ​១២៣ និង​ផ្លូវ​លេខ​២ ក្រុង​បាត់ដំបង នៅ​កែង​បណ្ណាគារ​អាង​ឈួង និង​ចំណុច​ទី​២ នៅ​មុខ​ប្រៃសណីយ៍​ខេត្ត ទៅ​បញ្ចប់​នៅ​សួន​យុវ័ន »

លោក​បន្ថែម​ថា អ្នកស្រី អែនជេលីណា ចូលី ជា​អ្នក​ដឹក​នាំ​រឿង និង​នៅ​ប្រចាំ​ការ​ផ្ទាល់​ទីកន្លែង​ថត​ភាពយន្ត តែ​ពុំ​បាន​ចូលរួម​សម្ដែង​នោះ​ទេ។ លោក​បញ្ជាក់​ទៀត​ថា ការ​ថត​កុន​នេះ​ជា​មោទនភាព​មួយ​របស់​ខ្មែរ ដើម្បី​បង្ហាញ​បរទេស​ឲ្យ​បាន​ស្គាល់​កម្ពុជា កាន់​តែ​ច្រើន​ថែម​ទៀត៖ « អ្នកស្រី អែនជេលីណា ចូលី គាត់​ចង់​រំឭក​ឲ្យ​កូន​ខ្មែរ​បាន​ដឹង និង​ទុក​ជា​ឯកសារ​ដើម្បី​មើល​នៅ​ថ្ងៃ​ក្រោយ ដែល​បាន​ឆ្លង​កាត់​ការ​ឈឺ​ចាប់​ក្នុង​សម័យ​ខ្មែរ​ក្រហម »

ទន្ទឹម​គ្នា​នេះ សាលា​បឋម​សិក្សា ២ ធ្នូ ត្រូវ​បាន​បិទ​ទ្វារ​អស់​មួយ​សប្ដាហ៍ ដោយ​សិស្ស​មិន​បាន​រៀន​សូត្រ​នោះ​ទេ។ ចំណែក​ឯ​ពលរដ្ឋ​រស់​នៅ​សង្កាត់​ស្វាយប៉ោ មួយ​ចំនួន បាន​លើក​ឡើង​ថា ការ​ថត​ភាពយន្ត​នេះ ជា​មោទនភាព​របស់​ខេត្ត​បាត់ដំបង ក៏ដោយ ក៏ប៉ុន្តែ​បាន​ប៉ះពាល់​ដល់​របរ​រក​ស៊ី​របស់​ពួក​គាត់ ធ្វើ​ឲ្យ​មិន​អាច​លក់​ដូរ​រក​ប្រាក់​ចំណូល​ដោះស្រាយ​ជីវភាព​គ្រួសារ​បាន​នោះ​ឡើយ៖ « ខ្ញុំ​ចង់​ឲ្យ​អាជ្ញាធរ និង​ក្រុមហ៊ុន​ថត​កុន​ដោះស្រាយ​ផ្ដល់​សំណង​ដែល​ខាតបង់​មិន​បាន​រក​ស៊ី​ប្រចាំ​ថ្ងៃ បើ​មិន​បាន​ទាំងអស់ ក៏​បាន ៥០​ភាគរយ​ដែរ ព្រោះ​អី​ខ្ញុំ​រក​ស៊ី​មួយ​ថ្ងៃ​សម្រាប់​រស់​បាន​តែ​មួយ​ថ្ងៃ​ទេ »

ក្រៅ​អំពី​ថត​កុន​នៅ​ក្រុង​បាត់ដំបង ហើយ នៅ​អាង​កំពីងពួយ ក៏​ជា​ទីតាំង​មួយ​សំខាន់​ដែរ ដោយ​នៅ​ទីនោះ​បាន​ថត​រយៈពេល​មួយ​ថ្ងៃ ពាក់ព័ន្ធ​នឹង​ពេល​បំពេញ​ការងារ​របស់​ពលរដ្ឋ​ក្នុង​សម័យ​ខ្មែរ​ក្រហម។

មន្ត្រី​សម្រប​សម្រួល​នៃ​សមាគម​ការពារ​សិទ្ធិ​មនុស្ស​អាដហុក (ADHOC) ខេត្ត​បាត់ដំបង លោក យិន ម៉េងលី សាទរ​ចំពោះ​ការ​ថត​កុន​រឿង​ប្រវត្តិសាស្ត្រ​នេះ ប្រសិន​បើ​អាជ្ញាធរ និង​ក្រុមហ៊ុន​ថត​កុន​ដោះស្រាយ​ឲ្យ​មាន​ការ​ប៉ះពាល់​តិចតួច​បំផុត និង​ផ្ដល់​សំណង​សមរម្យ​ដល់​អ្នក​ដែល​ខាតបង់​អត្ថប្រយោជន៍ ដោយសារ​មិន​បាន​លក់​ដូរ​ប្រចាំ​ថ្ងៃ៖ « អ្នក​ដែល​ចូលរួម​ការ​ថត​ភាពយន្ត​នោះ បាន​ទទួល​ថវិកា​មែន ប៉ុន្តែ​ផ្ទះ​ពលរដ្ឋ​មួយ​ចំនួន​ក៏​បាន​បិទ​ទ្វារ ដោយសារ​តែ​ការ​ថត​នេះ​ដែរ ហើយ​ពួក​គាត់​ទាំង​នោះ អាជ្ញាធរ​មិន​បាន​ដោះស្រាយ​អី​ឲ្យ​នៅ​ឡើយ​ទេ »

ទាក់ទង​នឹង​បញ្ហា​នេះ លោក សៀង ឯមវូនហ្សី អះអាង​ថា ក្រុម​ការងារ​របស់​អ្នក​ថត​កុន នឹង​ចុះ​ស្រង់​ចំនួន​ផ្ទះ​របស់​ប្រជាពលរដ្ឋ​ដែល​រង​ផល​ប៉ះពាល់​ពី​ការ​ថត​ភាពយន្ត​នេះ នៅ​ថ្ងៃ​ទី​១៥ ខែ​កុម្ភៈ ឆ្នាំ​២០១៦។

ទោះ​បី​ជា​យ៉ាង​នេះ​ក្ដី លោក​ពុំ​បាន​បញ្ជាក់​អំពី​ការ​ផ្ដល់​សំណង​ប៉ះពាល់​មួយ​គ្រួសារ​ប៉ុន្មាន​នោះ​ទេ។

សាច់​រឿង​ដែល​ថត​នៅ​ក្នុង​ទឹក​ដី​ខេត្ត​បាត់ដំបង ភាគ​ច្រើន​ជា​ការ​សម្ដែង​សាច់​រឿង​បញ្ចប់​នៃ​រឿង «មុន​ដំបូង​ខ្មែរ​ក្រហម​សម្លាប់​ប៉ា​ខ្ញុំ» គឺ​ជា​ការ​ចងចាំ​របស់​កុមារ​កម្ពុជា ម្នាក់ កាល​ពី​សម័យ​ខ្មែរ​ក្រហម​ពី​ឆ្នាំ​១៩៧៥ ដល់​ឆ្នាំ​១៩៧៩។ រឿង​នេះ ត្រូវ​បាន អ្នកស្រី អែនជេលីណា ចូលី ជ្រើស​យក​ខេត្ត​សៀមរាប និង​ខេត្ត​បាត់ដំបង ធ្វើ​ជា​ទីតាំង​សំខាន់​សម្រាប់​ថត​រឿង។ ដោយ​ខេត្ត​បាត់ដំបង តំណាង​ឲ្យ​ទីក្រុង​ភ្នំពេញ​នៃ​សម័យ​នោះ និង​ខេត្ត​សៀមរាប ជា​ទី​កន្លែង​សម្ដែង​សាច់​រឿង និង​មាន​ឆាក​ប្រយុទ្ធ​សំខាន់ៗ​របស់​ទាហាន​ខ្មែរ​ក្រហម។ រឿង​នេះ ចំណាយ​រយៈពេល​ថត​ប្រមាណ ៣​ខែ ហើយ​បាន​បញ្ចប់​នៅ​ទីតាំង​ខេត្ត​បាត់ដំបង។ អ្នក​ចូលរួម​សម្ដែង​មួយ​ចំនួន​រំពឹង​ថា ភាពយន្ត​ខ្នាត​អន្តរជាតិ​មួយ​នេះ នឹង​ដាក់​បញ្ចាំង​ឲ្យ​ទស្សនា​ទូទាំង​ពិភពលោក​ប្រមាណ ២​ឆ្នាំ​ខាង​មុខ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។