Opens in new windowអង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃព្រហស្បតិ៍ ទី១០ កញ្ញា បានបញ្ចប់ការស្ដាប់សក្ខីកម្មរបស់សាក្សីទី៣ ឈ្មោះ សេង ឃួយ ទាក់ទងនឹងការចាប់ជនជាតិចាម នៅក្នុងស្រុកកងមាស ខេត្តកំពង់ចាម។ សាក្សី សេង ឃួយ អតីតជាអ្នកដឹកជនជាតិចាម សម្លាប់មនុស្សនៅមន្ទីរសន្តិសុខវត្តអូរត្រកួន ក្នុងខេត្តកំពង់ចាម នោះ ថាពួកខ្មែរក្រហមចង់បំបាត់ជនជាតិភាគតិច។
មុននឹងបញ្ចប់ការផ្ដល់សក្ខីកម្មបន្តិច សាក្សី សេង ឃួយ បានឆ្លើយតបសំណួររបស់មេធាវីការពារក្ដីជនជាប់ចោទ ខៀវ សំផន ថា ពួកខ្មែរក្រហមក្នុងតំបន់របស់លោក មិនចង់ឲ្យមានជនជាតិភាគតិចចាម រស់នៅទេ។
សាក្សីថ្លែងបញ្ជាក់ថា ការហ៊ានអះអាងបែបនេះ គឺដោយសារតែលោកបានឮពីប្រធានសន្តិសុខខ្មែរក្រហមនិយាយដោយផ្ទាល់ ក្នុងពេលចាប់ជនជាតិចាម៖ «នៅពេលដែលឈ្មោះ រុន មេសន្តិសុខចាប់ហ្នឹង បានពោលពាក្យសម្ដីថា សម្លាប់ចោលឲ្យអស់ពូជអាកំពូជចាម កុំឲ្យសល់! អ៊ីចឹងបានជាខ្ញុំសន្និដ្ឋានថា ពួកខ្មែរក្រហមអត់ចង់ឲ្យមានជនជាតិភាគតិចអីរស់នៅទេ។ នេះជាពាក្យសម្ដីដែលខ្ញុំបានឮសន្តិសុខឈ្មោះ រុន ចាប់ចាម»។
បន្ថែមលើការអះអាងនេះ សាក្សី សេង ឃួយ មានប្រសាសន៍ថា ការពិនិត្យជាក់ស្ដែង ជនជាតិចាម នៅក្នុងឃុំអង្គរបាន របស់លោកចំនួនពីរភូមិ មិនឃើញមាននៅសល់ចាម ណាម្នាក់រស់នៅទេពេញមួយរបបកម្ពុជាប្រជាធិបតេយ្យ ចាប់ពីឆ្នាំ១៩៧៥ ដល់ឆ្នាំ១៩៧៩។ លោកសន្និដ្ឋានថា ការចាប់ចងជនជាតិចាម យកទៅបាត់រហូតនេះ គឺជាគោលការណ៍សម្លាប់បំបាត់ពូជសាសន៍ជនជាតិភាគតិចរបស់ពួកខ្មែរក្រហម។
ទាក់ទងនឹងការផ្ដល់សក្ខីកម្មអំពីការចាប់ជនជាតិចាម នៅស្រុកកងមាស ខេត្តកំពង់ចាម ខាងមេធាវីជនជាប់ចោទ នួន ជា មិនបានសួរដេញដោលសាក្សី សេង ឃួយ ទេ។
សវនាការនៅថ្ងៃទី១០ កញ្ញា ជនជាប់ចោទ នួន ជា នៅតែមិនអាចចូលរួមផ្ទាល់បានទេ។ ប្រធានអង្គជំនុំជម្រះសាលាដំបូង លោកចៅក្រម និល ណុន ប្រកាសថា ជនជាប់ចោទ នួន ជា មានបញ្ហាសុខភាពមិនអាចអង្គុយយូរបាន៖ «បានឃើញកំណត់ហេតុពិនិត្យសុខភាព នួន ជា ដែលធ្វើឡើងដោយគ្រូពេទ្យប្រចាំការ ពិនិត្យព្យាបាលថែទាំសុខភាពជនជាប់ចោទនៅ អ.វ.ត.ក ចុះថ្ងៃទី១០ ខែកញ្ញា ឆ្នាំ២០១៥ បានកត់សម្គាល់ថា ស្ថានភាពសុខភាពរបស់ជនជាប់ចោទ នួន ជា នៅថ្ងៃនេះមានអាការៈឈឺចង្កេះ និងវិលមុខនៅពេលអង្គុយ និងបានផ្ដល់អនុសាសន៍ថា សុំឲ្យអង្គជំនុំជម្រះអនុញ្ញាតឲ្យជនជាប់ចោទ នួន ជា ចូលរួមតាមដានកិច្ចដំណើរការសវនាការពីបន្ទប់ខាងក្រោមសាលសវនាការនេះ និងតាមបទបញ្ញត្តិនៃវិធាន ៨១ (៥) នៃវិធានផ្ទៃក្នុង អ.វ.ត.ក អង្គជម្រះអនុញ្ញាតឲ្យជនជាប់ចោទ នួន ជា ចូលរួមតាមដានសវនាការពីចម្ងាយពីបន្ទប់ឃុំខ្លួនមួយ នៅខាងក្រោមសាលសវនាការនេះ»។
លោកចៅក្រម និល ណុន ប្រកាសថា បន្ទាប់ពីការស្ដាប់សក្ខីកម្មរបស់សាក្សី សេង ឃួយ នៅថ្ងៃច័ន្ទ ទី១៤ កញ្ញា សប្ដាហ៍ក្រោយ អង្គជំនុំជម្រះគ្រោងស្ដាប់សាក្សីថ្មីពីររូបទៀត ទាក់ទងនឹងអង្គហេតុនៃការប្រព្រឹត្តចំពោះជនជាតិចាម។ សាក្សីឲ្យដឹងថា ជនជាតិចាម បីភូមិនៅស្រុកក្រូចឆ្មារ ខេត្តកំពង់ចាម បានងើបបះបោរប្រឆាំងអាជ្ញាធរខ្មែរក្រហម ព្រោះតែការគាបសង្កត់បំបិទសិទ្ធិសេរីភាពក្នុងការរស់នៅ និងការគោរពសាសនា។ ខ្មែរក្រហមក៏កាប់សម្លាប់ខ្លាំងនៅស្រុកនោះ។ អង្គជំនុំជម្រះសាលាដំបូង បានសម្រេចយកការប្រព្រឹត្តលើជនជាតិចាម នៅខេត្តកំពង់ចាម ធ្វើជាអង្គហេតុចោទប្រកាន់ជនជាប់ចោទ នួន ជា និង ខៀវ សំផន អំពីបទប្រល័យពូជសាសន៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។