Opens in new windowអង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃពុធ ទី៩ កញ្ញា បានស្ដាប់សក្ខីកម្មរបស់សាក្សីទី៣ ទាក់ទងនឹងការប្រព្រឹត្តចំពោះជនជាតិចាម នៅក្នុងរបបកម្ពុជាប្រជាធិបតេយ្យ។ សាក្សីទី៣ ឈ្មោះ សេង ឃួយ អតីតជាអ្នកដឹកជនជាតិចាម ដែលគេចាប់យកទៅកន្លែងឃុំឃាំង និងសម្លាប់មនុស្សនៅមន្ទីរសន្តិសុខវត្តអូរត្រកួន ក្នុងខេត្តកំពង់ចាម។
លោក សេង ឃួយ មកពីឃុំអង្គរបាន ស្រុកកងមាស ខេត្តកំពង់ចាម ជម្រាបអង្គជំនុំជម្រះសាលាដំបូងថា ការដឹកជនជាតិចាម ដែលគេចាប់យកទៅមន្ទីរសន្តិសុខវត្តអូរត្រកួន នោះ គឺធ្វើឡើងតាមការបញ្ជារបស់កម្មាភិបាលខ្មែរក្រហម៖ «ពេលនោះ គឺអនុប្រធានភូមិអង្គរបាន ទី២ ហ្នឹង (ឈ្មោះ) ហ៊ុន ហ្នឹង បានបញ្ជាឲ្យប្រជាពលរដ្ឋហ្នឹង យករទេះគោដឹកបងប្អូនចាម ហ្នឹងទៅវត្តអូរត្រកួន នៅប្រហែលជាម៉ោង ៩យប់។ ចំនួនប្រហែលតាមមើលពី ៥ ទៅ ៦រទេះគោ។ ក្នុងហ្នឹង គឺខ្លួនខ្ញុំម្នាក់ក៏គេចាត់ឲ្យដឹកទៅដែរ»។
សាក្សី សេង ឃួយ ឆ្លើយថា នៅពេលនោះលោកមិនអាចប្រកែកតវ៉ានឹងបញ្ជានោះបានទេ ព្រោះខ្លាចគេយកទៅសម្លាប់ជាមួយជនជាតិចាម ទាំងនោះ។ លោកមិនដឹងពីមូលហេតុពិតប្រាកដ ដែលនាំឲ្យមានការចាប់ខ្លួនទេ គ្រាន់តែដឹងថា អ្នកទាំងនោះជាអ្នកខំធ្វើការងារ។ លោកអះអាងថា លោកបានឃើញផ្ទាល់ភ្នែកនៅក្នុងព្រឹត្តិការណ៍ចាប់ជនជាតិចាម ទាំងនោះ នៅឆ្នាំ១៩៧៧៖ «នៅយប់នោះ គឺមានសន្តិសុខគេមកចាប់ចាម ហ្នឹង។ ចាប់ហ្នឹងមិនមែនម្នាក់ទេ គឺចាប់ចាម ដែលរស់នៅភូមិទី២ ប៉ុន្មានហ្នឹងចាប់ទាំងអស់ ហើយចាប់ហ្នឹងនៅក្នុងរោងបាយ កំពុងតែហូបបាយជុំគ្នាជាមួយបងប្អូនខ្មែរនោះដែរ។ តាមខ្ញុំគិតមើល បងប្អូនចាម នោះមិនដឹងពីផែនការគេចាប់ខ្លួនទេ ស្រាប់តែអង្គុយៗហូបបាយហ្នឹង សន្តិសុខគេមកចាប់តែម្ដង មានទាំងស្ត្រីក្មេងប្រុសក្មេងស្រី»។
លោកបញ្ជាក់បន្ថែមជូនអង្គជំនុំជម្រះ ទៅលើសក្ខីកម្មរបស់សាក្សី និងដើមបណ្ដឹងរដ្ឋប្បវេណីជាជនជាតិចាម មុនៗដែរថា អាជ្ញាធរខ្មែរក្រហមបានបិទសិទ្ធិរបស់ជនជាតិចាម មិនឲ្យគោរពសាសនាទេ៖ «គឺគេចូលទៅគ្រប់គ្រងហើយ ចាម ហ្នឹងគេលែងឲ្យទៅជាជនជាតិចាម ទៀតហើយ គេឲ្យក្លាយទៅជាខ្មែរ ទាំងសម្លៀកបំពាក់ ទាំងការហូបចុក ឲ្យមកជាខ្មែរ លែងឲ្យកាន់សាសនាចាម ហើយតាមខ្ញុំដឹង ពេលមករស់នៅក្នុងភូមិខ្ញុំ គឺលែងហ៊ានស្លៀកពាក់ចាម ហើយ ស្លៀកពាក់សម្របខ្លួនទៅតាមខ្មែរទាំងអស់ ហើយការនិយាយស្ដីក៏លែងហ៊ាននិយាយអីចំហហើយ។ ដូច្នេះនិយាយជាខ្មែរទាំងអស់ »។
សាក្សី សេង ឃួយ ថ្លែងថា ជនជាតិចាម ដែលលោកទទួលបញ្ជាឲ្យដឹកទៅមន្ទីរសន្តិសុខវត្តអូរត្រកួន នោះ លោកមិនដែលឃើញពួកគេវិលត្រឡប់វិញទេ។ ក្រោយពេលរបបកម្ពុជាប្រជាធិបតេយ្យដួលរលំ មជ្ឈមណ្ឌលឯកសារកម្ពុជា ស្រាវជ្រាវរកឃើញថា វត្តអូរត្រកួន នៅក្នុងឃុំពាមជីកង ស្រុកកងមាស ខេត្តកំពង់ចាម គឺជាកន្លែងសម្លាប់មនុស្សដ៏ធំមួយ។ លោក សេង ឃួយ ប៉ាន់ស្មានថា មនុស្សដែលគេយកទៅសម្លាប់នៅទីនោះ មានចំនួនប្រហែល ៣ម៉ឺននាក់។ ក្នុងចំណោមនោះ ក៏មានជនជាតិចាម ជាច្រើននាក់ផង។
អង្គហេតុសម្លាប់ជនជាតិចាម ត្រូវបានសាលាដំបូងចាត់ចូលក្នុងបទប្រល័យពូជសាសន៍ ដែលកំពុងចោទប្រកាន់ចំពោះជនជាប់ចោទ នួន ជា និង ខៀវ សំផន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។