Opens in new windowអង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃព្រហស្បតិ៍ ទី៣ កញ្ញា បានធ្វើសវនាការស្ដាប់ភាគីដើមចោទនៅក្នុងសំណុំរឿង០០២ វគ្គ២ ដែលដាក់ឯកសារគន្លឹះទាក់ទងនឹងការធ្វើការដោយបង្ខំនៅការដ្ឋានការងារចំនួន៣។
សវនាការនៅថ្ងៃទី៣ កញ្ញា គឺជាសវនាការដែលអង្គជំនុំជម្រះសាលាដំបូង ផ្ដល់ឱកាសឲ្យភាគីសហព្រះរាជអាជ្ញា និងសហមេធាវីនាំមុខដើមបណ្ដឹងរដ្ឋប្បវេណី លើកយកឯកសារមកជម្រាបជូនអង្គជំនុំជម្រះសម្រាប់ពិចារណា។
ឯកសារគន្លឹះដែលភាគីសហព្រះរាជអាជ្ញា និងសហមេធាវីនាំមុខដើមបណ្ដឹងរដ្ឋប្បវេណី ដាក់ជូនអង្គជំនុំជម្រះ គឺជាការស្រង់យកខ្លឹមសារ ដែលភាគីខ្លួនគិតថាសំខាន់ យកមកអានជូនអង្គជំនុំជម្រះ។ ឯកសារទាំងនេះ គឺបានមកពីដើមបណ្ដឹងរដ្ឋប្បវេណី ឬសាក្សីដែលចៅក្រមស៊ើបអង្កេតបានស្ដាប់ចម្លើយ។
ក្នុងចំណោមនោះ សហមេធាវីនាំមុខដើមបណ្ដឹងរដ្ឋប្បវេណី លោក ពេជ អង្គ លើកយកចម្លើយដើមបណ្ដឹងរដ្ឋប្បវេណីមួយរូបឈ្មោះ លៀម ពេញ ដែលអះអាងអំពីការសម្លាប់មនុស្សនៅអាងត្រពាំងថ្ម៖ «ខ្ញុំចាំថា ថ្ងៃមួយមិត្តរួមការងារម្នាក់ (មិនចាំឈ្មោះ) ជីករណ្ដៅប្រឡាយមិនបានសម្រេច ក៏ត្រូវយោធាខ្មែរក្រហម (មិនចាំឈ្មោះ) ចាប់នឹងស្លាបសេក រួចវាយនឹងត្បូងចបសម្លាប់ចោលតែម្ដង ធ្វើឲ្យខ្ញុំភ័យខ្លាចជាខ្លាំង។ ដូច្នេះ រាល់ថ្ងៃខ្ញុំបានប្រឹងប្រែងធ្វើការណាស់ ព្រោះបើមិនបានគ្រប់តាមផែនការកំណត់ទេនោះ ខ្ញុំនឹងអាចពួកវាយកទៅសម្លាប់ដែរ»។
សវនាការរបស់អង្គជំនុំជម្រះ ដែលស្ដាប់ការដាក់ឯកសារគន្លឹះនេះ ធ្វើឡើងបន្ទាប់ពីអង្គជំនុំជម្រះបានដោះស្រាយទៅលើភាពចម្រូងចម្រាសរវាងភាគីចុងចោទ និងដើមចោទ។ ភាពចម្រូងចម្រាសគ្នារឿងដាក់ឯកសារគន្លឹះនេះ បានធ្វើឲ្យក្រុមមេធាវីការពារក្ដីជនជាប់ចោទ នួន ជា និង ខៀវ សំផន ដើរចេញពីសវនាការកាលពីថ្ងៃទី២៦ សីហា។ មេធាវីការពារក្ដីជនជាប់ចោទ មិនពេញចិត្តនឹងការដាក់ឯកសារ ដោយស្រង់យកខ្លឹមសារស្ដាប់សាក្សីដែលស្លាប់ហើយ និងពីសំណុំរឿង០០៣ និង ០០៤ ទេ។ ដោយសារការមិនពេញចិត្តនឹងនីតិវិធីនេះ មេធាវីការពារក្ដីជនជាប់ចោទ នួន ជា នៅតែរក្សាជំហរថា ខ្លួននឹងមិនបង្ហាញឯកសារគន្លឹះរបស់ខ្លួនទេ។
ប្រធានអង្គជំនុំជម្រះសាលាដំបូង លោកចៅក្រម និល ណុន ប្រកាសថា បន្ទាប់ពីបានស្ដាប់ភាគីសហព្រះរាជអាជ្ញា និងសហមេធាវីនាំមុខដើមបណ្ដឹងរដ្ឋប្បវេណី សវនាការបន្តនៅថ្ងៃទី៧ កញ្ញា អង្គជំនុំជម្រះនឹងស្ដាប់ពីភាគីជនជាប់ចោទវិញម្ដង៖ «ជំនុំជម្រះ នឹងបន្តធ្វើសវនាការបង្ហាញឯកសារគន្លឹះ ដោយស្ដាប់សហមេធាវីការពារក្ដីជនជាប់ចោទ ខៀវ សំផន ការឆ្លើយតបរបស់ភាគី ធ្វើអត្ថាធិប្បាយកត់សម្គាល់តបទៅនឹងបណ្ដាឯកសារគន្លឹះ ដែលបានដាក់បង្ហាញដោយតំណាងសហព្រះរាជអាជ្ញា និងសហមេធាវីនាំមុខដើមបណ្ដឹងរដ្ឋប្បវេណី ពាក់ព័ន្ធនឹងអង្គហេតុការដ្ឋានការងារចំនួន៣ ការដ្ឋានទំនប់ ១មករា ការដ្ឋានការងារព្រលានយន្តហោះកំពង់ឆ្នាំង ការដ្ឋានការងារទំនប់ត្រពាំងថ្ម»។
សវនាការបន្តនៅសប្ដាហ៍ក្រោយនោះ អង្គជំនុំជម្រះ ក៏នឹងចាប់ផ្ដើមស្ដាប់សាក្សីមួយរូប មានរហស្សនាមថា 2TCW 813 ដែលពាក់ព័ន្ធនឹងអង្គហេតុថ្មី គឺការចោទប្រកាន់អំពីការប្រព្រឹត្តលើមនុស្សជាក់លាក់ចំពោះជនជាតិចាម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។