អតីតកម្មាភិបាលខ្មែរក្រហមដែលជាប់ចោទពីបទឧក្រិដ្ឋកម្មប្រឆាំងនឹងមនុស្សជាតិ នៃសាលាក្តីខ្មែរក្រហម មិនព្រមចេញបង្ហាញខ្លួននៅតុលាការក្នុងនាមជាជនជាប់សង្ស័យនោះទេ។
អ្នកស្រី អ៊ឹម ចែម ដែលជាជនសង្ស័យក្នុងសំណុំរឿង០០៤ គឺជាអតីតមន្ត្រីខ្មែរក្រហមប្រចាំតំបន់៥ ខេត្តបាត់ដំបង ក្នុងរបបកម្ពុជាប្រជាធិបតេយ្យ ឬរបបខ្មែរក្រហម តែងបដិសេធចំពោះការចោទប្រកាន់នេះ។ ទោះជាយ៉ាងណា ក្រោយពីការស៊ើបអង្កេតអស់រយៈពេលជាច្រើនឆ្នាំមក ការិយាល័យសហចៅក្រមស៊ើបអង្កេតនៃសាលាក្តីខ្មែរក្រហម បានបញ្ចប់ការស៊ើបអង្កេតសំណុំរឿងនេះកាលពីចុងខែធ្នូ ឆ្នាំ២០១៥ ហើយរង់ចាំចេញដីកាដំណោះស្រាយ។
របាយការណ៍ឆ្នាំ២០១៥ របស់អង្គការសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ឲ្យដឹងថា នៅចុងឆ្នាំ១៩៧៨ និងដើមឆ្នាំ១៩៧៩ ខណៈការគ្រប់គ្រងរបស់ខ្មែរក្រហមមានការបែកបាក់ផ្ទៃក្នុង ស្របពេលដែលកងទ័ពវៀតណាម ជាង ១២ម៉ឺននាក់ កំពុងវាយទន្ទ្រានចូលពាសពេញផ្ទៃប្រទេសកម្ពុជា នោះ អ្នកស្រី អ៊ឹម ចែម ដែលពេលនោះជាលេខាស្រុកព្រះនេត្រព្រះ ខេត្តបាត់ដំបង កំពុងជាប់ដៃត្រួតត្រាលើយុទ្ធនាការសម្លាប់មនុស្សទាំងឡាយណា ដែលជាប់សង្ស័យថាជាអ្នកប្រឆាំងនឹងអង្គការបដិវត្តន៍ខ្មែរក្រហម។
ទោះជាយ៉ាងណា នៅក្នុងបទសម្ភាសន៍ជាមួយបណ្ដាញព័ត៌មាន ស្រ៊ីវើល មីតឌៀ (3 World Media) កាលពីដើមឆ្នាំ២០០៧ អ្នកស្រី អ៊ឹម ចែម បានច្រានចោលការចោទប្រកាន់ទាំងឡាយណាដែលភ្ជាប់អ្នកស្រីទៅនឹងការសម្លាប់មនុស្ស៖ «ខ្ញុំនៅក្នុងសង្គមហ្នឹងមែន តែបើថាខ្ញុំបញ្ជាឲ្យសម្លាប់ យកការពិតមក ហើយអ្នកឯងដឹងថា ខ្ញុំសម្លាប់ហ្នឹងនៅពេលណា? ហើយឈ្មោះអីដែលខ្ញុំបញ្ជាឲ្យសម្លាប់។ ធម្មតាបងប្អូនតែស្លាប់ហើយ ចេះតែចោទ។ បើថាខ្ញុំបញ្ជាឲ្យទៅសម្លាប់ឈ្មោះ ក ហ្នឹង រកការពិតមក។ បើអត់ពិត អ្នកឯងចេះតែចោទគេ។ ខ្ញុំរកការពិត»។
មធ្យោបាយមួយដើម្បីស្វែងរកការពិត ដូចការចង់បានរបស់ អ្នកស្រី អ៊ឹម ចែម គឺតាមរយៈតុលាការ។ ប៉ុន្តែចាប់តាំងពីមានការចោទប្រកាន់ជាផ្លូវការកាលពីថ្ងៃទី៣ ខែមីនា ឆ្នាំ២០១៥ និងមានដីកាកោះ និងដីកានាំខ្លួនជាបន្តបន្ទាប់ ដោយការិយាល័យសហចៅក្រមស៊ើបអង្កេតអន្តរជាតិ នៃសាលាក្តីខ្មែរក្រហម អ្នកស្រី អ៊ឹម ចែម មិនបានចេញបង្ហាញខ្លួនម្តងណាឡើយ។ ដោយគ្មានកិច្ចសហប្រតិបត្តិការពីរដ្ឋអំណាចកម្ពុជា ផងនោះ ជនសង្ស័យ អ៊ឹម ចែម កំពុងរស់នៅគេចមុខពីសាធារណៈ។
សាលាក្តីខ្មែរក្រហម បានចោទប្រកាន់ អ្នកស្រី អ៊ឹម ចែម ពីឧក្រិដ្ឋកម្មប្រឆាំងនឹងមនុស្សជាតិ ដែលក្នុងនោះមានការធ្វើមនុស្សឃាត ការសម្លាប់រង្គាល ការធ្វើឲ្យទៅជាទាសករ ការដាក់ក្នុងមន្ទីរឃុំឃាំង ការធ្វើទុក្ខបុកម្នេញដោយមូលហេតុនយោបាយ និងអំពើអមនុស្សធម៌ផ្សេងទៀត នៅមន្ទីរសន្តិសុខភ្នំទ្រយោង និងនៅការដ្ឋានស្ពានស្រែង។
អ្នកស្រី អ៊ឹម ចែម ដែលមានទីលំនៅក្នុងស្រុកអន្លង់វែង ខេត្តឧត្តរមានជ័យ បញ្ជាក់ថា ប្រសិនបើអ្នកស្រីទៅបង្ហាញខ្លួននៅតុលាការ អ្នកស្រីនឹងមិនទៅក្នុងនាមជាជនសង្ស័យ ឬជាជនជាប់ចោទនោះឡើយ៖ «ខ្ញុំទៅឆ្លើយតាមការពិតរបស់ខ្ញុំ ដែលពេលកើតមក ប្រទេសជាតិមានសង្គ្រាម។ ហើយដែលមានតុលាការសម្រាប់កាត់ទោស អ៊ីចឹងអ្នកណាធ្វើខុសច្បាប់ឡើងតុលាការទៅ។ ឯខ្ញុំអត់ធ្វើខុស ហើយមកហៅខ្ញុំ ខ្ញុំទៅធ្វើអី? គ្រាន់តែបំភ្លឺតាមសាច់រឿងដែលខ្ញុំដឹង ខ្ញុំទៅបាន តែបើឲ្យខ្ញុំទៅឆ្លើយថាខ្ញុំមានទោស ខ្ញុំទទួលទោស អត់ទេ។ មិនបានធ្វើអីខុសចំពោះប្រជាជនទេ។ អ្នកណាខុស អ្នកហ្នឹងទទួល យើងអត់ខុស អត់ទៅទទួលទោសជំនួសគេទេ»។
អ្នកស្រី អ៊ឹម ចែម មានស្រុកកំណើតនៅស្រុកត្រាំកក់ ខេត្តតាកែវ។ គ្រួសាររបស់អ្នកស្រី បានចូលរួមតស៊ូប្រដាប់អាវុធជាមួយក្រុមឧទ្ទាមកុម្មុយនិស្តខ្មែរក្រហមតាំងពីទសវត្សឆ្នាំ១៩៦០។ នៅឆ្នាំ១៩៧៧ ក្រោមរបបកម្ពុជាប្រជាធិបតេយ្យ អ្នកស្រី អ៊ឹម ចែម ក្នុងនាមជាកម្មាភិបាលខ្មែរក្រហមដ៏ឆ្នើមមួយរូប ត្រូវបានអង្គការបដិវត្តន៍បញ្ជូនពីភូមិភាគនិរតី ទៅកាន់តួនាទីជាលេខាស្រុកព្រះនេត្រព្រះ តំបន់៥ នៃភូមិភាគពាយ័ព្យ ក្នុងគ្រាដែលយុទ្ធនាការបោសសម្អាតកម្មាភិបាលខ្មែរក្រហមនៅទីនោះកំពុងឡើងសន្ទុះខ្លាំង។
ការបោសសម្អាតខ្មាំងបដិវត្តន៍នៅទីនោះ ក៏នៅតែបន្តកើតមានក្រោយពេល អ្នកស្រី អ៊ឹម ចែម ផ្លាស់មកគ្រប់គ្រងស្រុកព្រះនេត្រព្រះ។ ជនរងគ្រោះមួយចំនួននៅមន្ទីរ ស-២១ ឬគុកទួលស្លែង ក៏ត្រូវគេជឿថា បានបញ្ជូនចេញពីស្រុកព្រះនេត្រព្រះ ផងដែរ។
អ្នកស្រី អ៊ឹម ចែម បន្តថា ពេលទៅដល់ដំបូង មេស្រុកព្រះនេត្រព្រះ ចាស់ បានផ្ទេរតំណែង និងប្រគល់ស្ថិតិប្រជាជនដែលមានក្នុងបញ្ជីចំនួន ១០ម៉ឺននាក់ដល់អ្នកស្រី ប៉ុន្តែបន្តិចក្រោយមក ចំនួនជាក់ស្តែងត្រឹម ៩ម៉ឺននាក់ប៉ុណ្ណោះ៖ «ខ្ញុំទៅនៅស្រុកព្រះនេត្រព្រះ ចុងក្រោយយកគេបង្អស់។ ចៅហ្វាយស្រុកចាស់ហ្នឹងគេហៅយកទៅបាត់ហើយ គាត់បានប្រជុំខ្ញុំម្តងផ្ទេរបញ្ជីឲ្យខ្ញុំ។ ទទួលពីគេមកខែប្រាំបី (៨) ១៩៧៨ ខ្ញុំទៅដល់ ដល់ខ្ញុំទទួលបញ្ជីគេ ១សែននាក់ហ្នឹងហើយ ខ្ញុំនៅបានប្រហែលជា ៣ខែ ខ្ញុំចាប់ផ្តើមស្រង់បញ្ជីថ្មី ហើយជាក់ស្តែងវាបាត់ ១ម៉ឺន នៅសល់តែ ៩ម៉ឺនទេ។ មិនមែនស្លាប់ហ្នឹងដោយសារតែគេសម្លាប់ទេ។ ស្លាប់ដោយអត់បាយ ជំងឺ អ៊ីចឹងការស្លាប់នេះមិនមែនស្លាប់ដោយសារគេសម្លាប់ទាំងអស់ទេ»។
អ្នកស្រី អ៊ឹម ចែម ទទួលស្គាល់ថា មានបញ្ហាជាច្រើនកើតមាននៅក្នុងស្រុកព្រះនេត្រព្រះ ក្រោមការគ្រប់គ្រងរបស់អ្នកស្រី ប៉ុន្តែអ្នកស្រីបដិសេធថា អ្នកស្រីមិនដែលបានសម្លាប់ ឬបញ្ជាឲ្យសម្លាប់មនុស្សសោះឡើយ៖ «អត់ទេ។ ខ្ញុំក្តាប់ប្រជាជនរហូត អត់បញ្ជាឲ្យទៅសម្លាប់អ្នកនេះអ្នកនោះទេ ព្រោះយើងនៅជាប់ប្រជាជនរហូត មិនអាចធ្វើអ៊ីចឹងបានទេ បើយោធាផែនការគេយោធាតែម្តង អាហ្នឹងគេសម្លាប់គេអី។ បើយើងនៅជាមួយប្រជាជន ទៅវាយគេស្រស់ៗដៃទទេហ្នឹង គេវាយងាប់វិញហើយ។ ប៉ុន្តែរឿងដោះស្រាយ ស្លាប់ដោយជំងឺ ដោយអត់បាយ អត់ទឹកដូចសព្វថ្ងៃអ៊ីចឹងមាន តែថាឲ្យទៅសម្លាប់គេ បញ្ជាឲ្យសម្លាប់អ្នកនេះអ្នកនោះ អត់មានទេ បើយោធាមាន»។
មិនដឹងថានេះជាពាក្យពិតចេញពីបេះដូង ឬយ៉ាងណានោះទេ ប៉ុន្តែក្រោយពេលបម្រើយ៉ាងស្មោះស្ម័គ្រចលនាកុម្មុយនិស្តខ្មែរក្រហមប្រមាណ បី (៣) ទសវត្សមក អ្នកស្រី អ៊ឹម ចែម បានសម្ដែងការសោកស្ដាយចំពោះរបៀបរបបខ្លះៗនៃការគ្រប់គ្រងប្រទេសរបស់ខ្មែរក្រហម។ អតីតជនបដិវត្តន៍ខ្មែរក្រហមចាស់វស្សារូបនេះ ចង់ឃើញខ្មែរក្រហមនៅពេលកាន់អំណាច ផ្តល់សិទ្ធិសេរីភាពដល់ពលរដ្ឋឲ្យបានច្រើន៖ «ហើយរៀបចំឯកជន ការរស់នៅមានសិទ្ធិរកស៊ីដើរហើរដោះស្រាយក្នុងជីវភាពគ្រួសារគ្រប់គ្រាន់ ត្រង់នេះដែលខ្ញុំពេញចិត្ត។ ពីមុនដែលធ្វើខុស ខ្ញុំសោកស្ដាយ។ ឯប្រឹងប្រែងតទៅទៀតនេះ ក៏លើកអង្កាល់ណោះមកឲ្យបង្ហាញឲ្យប្រជាជនដឹងដែរ កុំធ្វើអ៊ីចឹងទៀត។ ឯទី២ ធំ កាលណោះគេហៅថា ម៉ឺងម៉ាត់នោះ ផែនការច្រើនតែផ្ដាច់ការ ហើយច្បាប់ច្រើនតែអត្តនោម័តិលើបុគ្គល ហ្នឹងមាន ២ចំណុចដែលធំ កាលធ្វើខ្មែរក្រហមមានតែពីរហ្នឹង ក្រៅពីនោះអត់អីទេ ត្រឹមត្រូវព្រោះសង្គមយើងអត់មានស្រីពេស្យាអាវ៉ាសែ ប្រុសសំផឹងអីអត់មានទេ ស្អាតស្អំតែម្តង ប្រពន្ធមួយ គឺមួយហើយ។ ខ្ញុំឃើញដែលស្ដាយក្រោយមាន ២ហ្នឹងដែលធំ។ ក្រៅពីនោះ គ្មានអីខុសជាងហ្នឹងនេះទៀត អត់មានទេ។ នោះខ្ញុំស្ដាយក្រោយពេលខ្ញុំដឹកនាំនៅពេលនោះ ហើយផ្ទាល់ខ្លួនខ្ញុំ ពិតមែនខ្ញុំមិនចេះចោទប្រកាន់គេ ខ្ញុំចេះពិចារណាមែន ប៉ុន្តែនៅក្នុងសង្គមនោះ វាចូលក្នុងទូកតែមួយ។ អ្នកជិះទូក ម៉ាទូក បើអ្នកដឹកនាំចែវវាលិចទឹកវាលិចហើយ»។
បន្ទាប់ពីការស៊ើបអង្កេតអស់រយៈពេលជាង ៦ឆ្នាំមក សំណុំរឿង០០៤ របស់ អ្នកស្រី អ៊ឹម ចែម ត្រូវបានសាលាក្តីខ្មែរក្រហម បិទបញ្ចប់ការស៊ើបអង្កេតហើយកាលពីថ្ងៃទី១៨ ខែធ្នូ ឆ្នាំ២០១៥។
បច្ចុប្បន្ន ការិយាល័យសហចៅក្រមស៊ើបអង្កេត កំពុងវាយតម្លៃ និងវិភាគទៅលើភស្តុតាង និងឯកសារនានា ដើម្បីឈានទៅដំណាក់កាលចុងក្រោយ គឺការកំណត់ថា តើជនសង្ស័យ អ៊ឹម ចែម ពិតជាស្ថិតនៅក្នុងដែនកំណត់យុត្តាធិការដែលត្រូវចោទប្រកាន់ និងបញ្ជូនទៅជំនុំជម្រះក្ដី ឬត្រូវទម្លាក់ចោលការចោទប្រកាន់ ហើយការសម្រេចចុងក្រោយណាមួយនេះ នឹងចេញជាដីកាដំណោះស្រាយ ដែលគេរំពឹងថា អាចនឹងធ្វើឡើងនៅក្នុងខែមីនា ឆ្នាំ២០១៦។
អ្នកស្រី អ៊ឹម ចែម ជាប់ចោទពាក់ព័ន្ធនឹងឧក្រិដ្ឋកម្មដែលកើតឡើងក្នុងរបបកម្ពុជាប្រជាធិបតេយ្យ ឬរបបខ្មែរក្រហម ប្រព្រឹត្តឡើងរវាងថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី៦ ខែមករា ឆ្នាំ១៩៧៩ ដែលមានមនុស្សជិត ២លាននាក់បានស្លាប់ដោយសារការសម្លាប់ ការអត់អាហារ ការបង្ខំឲ្យធ្វើការងារបាក់កម្លាំង និងជំងឺតម្កាត់ដែលគ្មានថ្នាំព្យាបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។