ប្រជាពលរដ្ឋចំនួន ២៧គ្រួសារក្នុងចំណោម ៤៧គ្រួសារដែលមានទំនាស់ដីធ្លីនៅក្រុងប៉ោយប៉ែត ខេត្តបន្ទាយមានជ័យ ចោទប្រកាន់អាជ្ញាធរមូលដ្ឋានថា បានឃុបឃិតគ្នារំលោភយកដីរបស់ពួកគាត់ទៅលក់ធ្វើជាប្រយោជន៍ផ្ទាល់ខ្លួន។
អ្នកភូមិកំពុងព្រួយបារម្ភខ្លាចអាជ្ញាធរ យកគ្រឿងចក្រទៅឈូសរំលំផ្ទះសម្បែងគ្មានទីស្នាក់អាស្រ័យ បន្ទាប់ពីពួកគាត់មិនព្រមចាកចេញពីដី ហើយមិនទទួលយកតាមសំណើដោះស្រាយពីសំណាក់អាជ្ញាធរ។ ប៉ុន្តែមេភូមិចាន់គីរី បដិសេធចំពោះការចោទប្រកាន់នេះ។
អ្នកភូមិមានទំនាស់ដីធ្លីនៅក្រុងប៉ោយប៉ែត ភាគច្រើនមិនហ៊ានចេញទៅធ្វើការងារឆ្ងាយពីផ្ទះសម្បែងរបស់ខ្លួនឡើយ។ ពួកគាត់បញ្ជាក់ថា មូលហេតុដែលមិនហ៊ានទៅណាឆ្ងាយពីផ្ទះ ដោយសារខ្លាចអាជ្ញាធរយកគ្រឿងចក្រឈូសឆាយរំលោភយកដីរបស់ពួកគាត់ ពីព្រោះកន្លងមក អាជ្ញាធរឈូសរំលំផ្ទះរបស់ពួកគាត់អស់ ២ខ្នងម្ដងរួចមកហើយ។
ពលរដ្ឋម្នាក់រស់នៅភូមិចាន់គីរី សង្កាត់ប៉ោយប៉ែត ក្រុងប៉ោយប៉ែត លោកស្រី គង់ រី ប្រាប់វិទ្យុអាស៊ីសេរី នៅលើគ្រែសំយាបផ្ទះទាំងទឹកភ្នែកថា ពួកគាត់ចំនួន ២៧គ្រួសារបានតាំងទីលំនៅលើដីខ្លះទំហំទទឹង ១០ម៉ែត្រ និងដីខ្លះទៀតជាង ១០ម៉ែត្រ និងបណ្ដោយ ២០ម៉ែត្រ តាំងពីឆ្នាំ២០០៦។ ស្ត្រីវ័យ ៧១ឆ្នាំរូបនេះបន្ថែមថា កាលពីពួកគាត់រស់នៅតំបន់ដីនោះពីដំបូងជាទីកន្លែងស្ងាត់ ឆ្ងាយពីទីប្រជុំជន ហើយពុំមានផ្ទះ និងមនុស្សរស់នៅឡើយ។
បើទោះជាដីគ្មានតម្លៃយ៉ាងនេះក្ដី លោកស្រីអះអាងថា ដោយជីវភាពក្រីក្ររកព្រឹកខ្វះល្ងាច ពួកគាត់បានទិញដីនោះពីទាហានប្រចាំការនៅតំបន់នោះក្នុងមួយឡូត៍ទទឹង ១០ម៉ែត្រ និងបណ្ដោយ ២០ម៉ែត្រ តម្លៃជាង ១លានរៀល ហើយសង់ផ្ទះដំបូលប្រក់ស័ង្កសីស្នាក់នៅរហូតមក។ ប៉ុន្តែលោកស្រីបញ្ជាក់ថា ចាប់តាំងពីដើមខែមករា ឆ្នាំ២០១៦ មក អាជ្ញាធរមូលដ្ឋាន ជាពិសេសលោកមេភូមិចាន់គីរី តែម្ដង បានបង្ខំពួកគាត់ឲ្យរើផ្ទះចាកចេញពីដីពីទទឹង ១០ម៉ែត្រ និងបណ្ដោយ ២០ម៉ែត្រ មកនៅត្រឹមទទឹង ៥ម៉ែត្រ និងបណ្ដោយ ២០ម៉ែត្រវិញ ប៉ុន្តែអ្នកភូមិមិនព្រមទទួលយកតាមសំណើរបស់អាជ្ញាធរឡើយ៖ « កូនខ្ញុំខំទៅរកស៊ីស្រុកគេ ដើម្បីយកប្រាក់មកទិញដី ហើយចាក់ដីអស់ជាង ៣០ឡាន មិនគួរណាអាជ្ញាធរមករំលោភយកដីរបស់ខ្ញុំទាំងបង្ខំអ៊ីចឹងទេ »។
ប្រជាពលរដ្ឋដែលមិនព្រមទទួលយកសំណើដោះស្រាយដីធ្លីពីសំណាក់អាជ្ញាធរមូលដ្ឋាន ពុំមែនមានតែម្នាក់ប៉ុណ្ណោះទេ គឺមានពលរដ្ឋជាច្រើនគ្រួសារទៀត ក៏ជួបការលំបាកអំពីបញ្ហានេះដូចគ្នា។
ជាក់ស្ដែង ពលរដ្ឋនៅភូមិចាន់គីរី ម្នាក់ទៀត គឺលោកស្រី ទឹម ហៀក ថ្លែងថា បើទោះជាអាជ្ញាធរគំរាមយកគ្រឿងចក្រឈូសកម្ទេចផ្ទះរបស់ពួកគាត់ក៏ដោយ គឺលោកស្រីមិនព្រមរើផ្ទះចុះចេញពីដីរស់នៅឡើយ។ ស្ត្រីវ័យ ៤៧ឆ្នាំរូបនេះអះអាងថា មូលហេតុដែលលោកស្រីមិនព្រមចាកចេញពីដី ដោយសារមានជីវភាពក្រីក្រ និងមានកូនច្រើន ហើយម្យ៉ាងទៀត លោកស្រីថាគ្មានប្រាក់សម្រាប់ទិញដីធ្វើផ្ទះស្នាក់នៅឡើយ៖ « កន្លងមកមានកូនចៅអភិបាលក្រុង ៣នាក់ និងលោកអភិបាលក្រុងប៉ោយប៉ែត ផង បានមករួមប្រជុំគ្នាលើកទីមួយកាលពីខែមករា។ ប្រជុំលើកទីពីរទៀត តែខ្ញុំមិនទៅចូលទេ ហើយគាត់ឲ្យពលរដ្ឋទៅប្រជុំបង្ខំផ្ដិតស្នាមមេដៃ ហើយបានគំរាមពួកគាត់ខ្ញុំថា បើសិនផ្ដិតមេដៃហើយហ៊ានតវ៉ា គឺអាជ្ញាធរនឹងចាប់ដាក់គុក »។
អ្នកភូមិភាគច្រើនលើកឡើងថា អាជ្ញាធរបណ្ដេញពួកគាត់ចេញពីដីដើម្បីរៀបចំធ្វើជាដីឡូត៍យកដីទៅលក់ឲ្យពលរដ្ឋផ្សេង ហើយយកប្រាក់ធ្វើជាប្រយោជន៍ផ្ទាល់ខ្លួន។
ឆ្លើយតបនឹងបញ្ហានេះ មេភូមិចាន់គីរី លោក សេង ចាន់ឌី មានប្រសាសន៍ថា អាជ្ញាធរពុំមានចេតនាបណ្ដេញពលរដ្ឋចេញពីដីឡើយ ប្រសិនបើពួកគាត់រស់នៅលើដីនោះដោយស្របច្បាប់ ប៉ុន្តែលោកអះអាងថា ប្រជាពលរដ្ឋជាង ៤០គ្រួសារនោះរស់នៅលើដីអតីតទាហានកងពលធំលេខ១២ ហើយអាជ្ញាធរបានរៀបចំសាងសង់ផ្លូវនៅតំបន់នោះ ដើម្បីសម្រួលដល់ការធ្វើដំណើររបស់ពលរដ្ឋ។ លោកបញ្ជាក់ថា អាជ្ញាធរនឹងយកដីនោះមួយចំនួនចែកជូនគ្រួសារមន្ត្រីទាហាន៖ « បាទ ! ការពិត គឺគ្មានទេ ធ្វើការងារ យើងគិតប្រជាពលរដ្ឋណាស់ ទោះបីលើកនៅក្នុងអង្គប្រជុំក៏ដោយ យើងមិនបានបង្ខិតបង្ខំប្រជាពលរដ្ឋឡើយ។ ប៉ុន្តែពួកគាត់បង្កការលំបាកដល់អាជ្ញាធរ ដោយម្ដងព្រមទទួលយក ម្ដងថាមិនព្រមទទួលយកដី »។
ទាក់ទងនឹងបញ្ហានេះដែរ ចៅសង្កាត់រងទី២ នៃសង្កាត់ប៉ោយប៉ែត មកពីគណបក្ស សម រង្ស៊ី លោក ចៅ វាសនា អះអាងថា ដីមួយចំនួននៅភូមិចាន់គីរី នោះ មន្ត្រីទាហានបានលក់ឲ្យទៅពលរដ្ឋ និងមួយចំនួនទៀត គ្រួសារទាហានសង់ផ្ទះរស់នៅដោយខ្លួនឯង។ លោកអះអាងថា អាជ្ញាធរភូមិ និងអាជ្ញាធរសង្កាត់ប៉ោយប៉ែត បែងចែកដីទំនាស់ជាមួយពលរដ្ឋដោយមិនបានជូនដំណឹងឲ្យលោកដឹងនោះទេ៖ « បើអាជ្ញាធរយកដីនោះទៅចែកឲ្យពលរដ្ឋថ្មីទៀត ខ្ញុំមិនថាទេ តែនេះអាជ្ញាធរមានចេតនាយកដីពីប្រជាពលរដ្ឋ »។
មន្ត្រីសម្របសម្រួលអង្គការលីកាដូ (LICADHO) ខេត្តបន្ទាយមានជ័យ លោក ភួន ឈិន ដែលបានតាមដានរឿងទំនាស់ដីធ្លីនេះ មានប្រសាសន៍ថា ប្រជាពលរដ្ឋប្រមាណ ២០គ្រួសារដែលព្រមទទួលយកតាមសំណើបែងចែកដីពីសំណាក់អាជ្ញាធរមូលដ្ឋាន ដោយសារពួកគាត់គ្មានជម្រើស បន្ទាប់ពីអាជ្ញាធរបានគំរាមពួកគាត់ថា នឹងដកហូតដីទាំងអស់ទុកជាសម្បត្តិរដ្ឋ៖ « ខ្ញុំកំពុងចុះស្រាវជ្រាវបន្តទៀត ពីព្រោះយើងស្រាវជ្រាវកន្លងមក មិនបានពេញលេញនៅឡើយ។ ប៉ុន្តែអំឡុងពេលដែលបានស្រាវជ្រាវ យើងរកឃើញថា ប្រជាពលរដ្ឋភ័យខ្លាច ដោយសារអាជ្ញាធរគំរាមយកដីពួកគាត់ »។
បញ្ហាទំនាស់ដីធ្លីនៅភូមិចាន់គីរី កន្លងមក ប្រជាពលរដ្ឋបានតវ៉ាជាមួយនឹងអាជ្ញាធររហូតកើតមានអំពើហិង្សារវាងពលរដ្ឋ និងប្រជាការពារភូមិ។ អ្នកភូមិអះអាងថា គ្រានោះពលរដ្ឋម្នាក់ឈ្មោះ ស៊ូ ផល្លី អាយុ ៤៣ឆ្នាំ បានយកឈើឫស្សីទៅវាយលោក ជិន គិមសាន ប្រជាការពារភូមិចាន់គីរី បណ្ដាលឲ្យរងរបួសស្រាល។ ក្រោយមកនៅថ្ងៃទី១២ ខែឧសភា ឆ្នាំ២០១៦ សាលាដំបូងខេត្តបន្ទាយមានជ័យ បានចាប់លោក ស៊ូ ផល្លី ដាក់ពន្ធនាគារ ក្រោមបទចោទបង្ករបួសស្នាម។ រហូតមកទល់ពេលនេះ តុលាការមិនទាន់ដោះលែងនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។