ប្រជាពលរដ្ឋប្រមាណ ១០០គ្រួសារ មកពីបណ្ដាខេត្តនានា នាំគ្នាមកបោះតង់ស្នាក់នៅចំណុចផ្លូវជាតិលេខ៧៨ ក្នុងតំបន់ដីសម្បទានសេដ្ឋកិច្ចក្រុមហ៊ុនប៉ាស៊ីហ្វិក ក្នុងស្រុកកោះញ៉ែក ខេត្តមណ្ឌលគិរី។ ប្រជាពលរដ្ឋទាំងនោះអះអាងថា ពួកគេជាប្រជាពលរដ្ឋចំណាកស្រុក នាំគ្នាមកប្រមូលផ្តុំទីនេះដើម្បីសុំឲ្យអាជ្ញាធរខេត្តផ្ដល់ដីសម្បទានសម្រាប់ពួកគាត់រស់នៅ។
ក្រុមសមត្ថកិច្ចចម្រុះនៃអាជ្ញាធរខេត្តមណ្ឌលគិរី ប្រមាណ ៥០នាក់ ប្រដាប់ដោយដំបងឆក់ អមដោយរថយន្តបាញ់ទឹកពីរគ្រឿង និងរថយន្តបំពាក់ឧបករណ៍ស៊ីរ៉ែន បណ្ដេញប្រជាពលរដ្ឋឲ្យរុះរើរោងស្នាក់នៅ ហើយចាកចេញ និងចាប់ខ្លួនតំណាងប្រជាពលរដ្ឋពីរនាក់ប្តីប្រពន្ធ ក៏ប៉ុន្តែមិនមានអំពើហិង្សាតបតការបង្ក្រាបនេះឡើយ។
ចាប់តាំងពីថ្ងៃសុក្រ ទី២៣ ខែឧសភា គេសង្កេតឃើញប្រជាពលរដ្ឋបានជិះរថយន្តជាក្រុមៗ ហើយចូលមកបោះតង់សំពត់កៅស៊ូ នៅចំណុចដីសម្បទានសេដ្ឋកិច្ចក្រុមហ៊ុនប៉ាស៊ីហ្វិក ក្នុងឃុំរយ៉ ស្រុកកោះញ៉ែក ចំណុចផ្លូវជាតិលេខ៧៨អា ជាប់ព្រំប្រទល់ខេត្តរតនគិរី។
អភិបាលស្រុកកោះញ៉ែក លោក មើល សឿន នៅថ្ងៃច័ន្ទ ទី២៦ ខែឧសភា មានប្រសាសន៍បញ្ជាក់ថា សមត្ថកិច្ចចាត់វិធានការអប់រំប្រជាពលរដ្ឋទាំងនោះឲ្យចាកចេញដោយសន្តិវិធី។ លោកបញ្ជាក់ថា ដីតំបន់នោះរដ្ឋបានផ្តល់សម្បទានសេដ្ឋកិច្ចទៅឲ្យក្រុមហ៊ុនអស់ហើយ ដូច្នេះប្រជាពលរដ្ឋមិនអាចទៅវាស់វែងដីចែកគ្នាអនាធិបតេយ្យបានទេ៖ «ប្រជាជនមកចូលកាន់កាប់គឺខុសច្បាប់ហើយ ពីព្រោះរឿងរ៉ាវហ្នឹងពីឆ្នាំទៅគឺក្រុមការងារបានដោះស្រាយចប់សព្វគ្រប់អស់ហើយ។ ក្រុមហ៊ុនគេដោះស្រាយគោលនយោបាយអស់ហើយ តើរឿងអ្វីចូលមករុករានកាន់កាប់ទៀត?»។
ប្រជាពលរដ្ឋមកពីស្រុកកោះញ៉ែក លោក វណ្ណ សារួន បញ្ជាក់ថា ដីនៅតំបន់នោះពួកគេបានកាប់រានព្រៃសង់រោងស្នាក់នៅកាលពីឆ្នាំ២០១២ ដើម្បីធ្វើកសិកម្ម បន្ទាប់ពីបានធ្វើលិខិតស្នើសុំអាជ្ញាធរឃុំ ស្រុក ក៏ប៉ុន្តែក្រុមសមត្ថកិច្ចបានរុះរើ និងបណ្ដេញពួកគាត់ចេញពីទីនោះទាំងបង្ខំដើម្បីយកដីប្រគល់ឲ្យក្រុមហ៊ុនសម្បទាន។ លោកបន្តថា ប្រជាពលរដ្ឋប្រមាណ ៥០០គ្រួសារបានស្វែងរកកិច្ចអន្តរាគមន៍ពីលោកនាយករដ្ឋមន្ត្រី និងប្រធានរដ្ឋសភា ប៉ុន្តែមិនមានដំណោះស្រាយទើបសម្រេចចិត្តនាំគ្នាមកតាំងទីលំនៅជាថ្មីនៅតំបន់នេះ។
លោក វណ្ណ សារួន៖ «អាជ្ញាធរគេយកលក់ឲ្យក្រុមហ៊ុន យកក្រុមហ៊ុនមកដេញចាប់រុះរើ គឺក្រុមហ៊ុនជាអ្នករុះរើខ្ទម។ គេប្រើកម្លាំងមកគំរាមកំហែង គេមានទាំងពីឡានទឹក ដំបងឆក់ មានទាំងកាំភ្លើង មកច្រើនមែនទែន ហើយចាប់ចែអ្នកតំណាងប្រជាពលរដ្ឋ ចាប់ដោះខ្នោះយកទៅបាត់ហើយ»។
មន្ត្រីឃ្លាំមើលសិទ្ធិមនុស្សសមាគមអាដហុក ខេត្តស្ទឹងត្រែង លោក ហូ សំអុល កត់សម្គាល់ថា ប្រជាពលរដ្ឋមិនមានឯកសារសំអាងទាក់ទិនការអនុញ្ញាតមកតាំងទៅលំនៅថ្មីនេះទេ ក៏ប៉ុន្តែអ្នកភូមិទាំងនោះជាជនក្រីក្រពិតប្រាកដ ហេតុនេះអាជ្ញាធរពាក់ព័ន្ធគួរផ្ដល់ដីសម្បទានសង្គមកិច្ចសម្រាប់ប្រជាពលរដ្ឋទាំងនោះតាំងទីលំនៅស្របច្បាប់។ លោកបន្តថា អ្នកភូមិត្រូវបានបណ្ដេញខ្ចាត់ខ្ចាយចេញពីតំបន់នោះអស់ហើយ នៅថ្ងៃទី២៦ ខែឧសភា។
លោក ហូ សំអុល៖ «ពី២០១២ គេដេញមួយសាហើយ ប៉ុន្តែក្រោយពីគេដេញពួកគាត់បានទៅសុំសម្តេច ហេង សំរិន។ ក្នុងអំឡុងខែ ៤ហ្នឹង ឃើញខាងពញាចក្រីគាត់បានស៊ីញ៉េមកឲ្យខេត្តដោះស្រាយឲ្យ អ៊ីចឹងគាត់បានលិខិតហ្នឹង គាត់ដាក់ជូនដែនដី សាលាខេត្ត សាលាស្រុក មេឃុំហើយ គាត់ក៏បានមករស់នៅកន្លែងចាស់របស់គាត់»។
តំណាងប្រជាពលរដ្ឋដែលត្រូវសមត្ថកិច្ចចាប់ខ្លួន គឺអ្នកស្រី អ៊ិត ចាន់នី និងប្តីឈ្មោះ ធី។ មន្ត្រីប៉ូលិសស្រុកកោះញ៉ែក ឲ្យដឹងថា អ្នកទាំងពីរត្រូវបានតម្រូវឲ្យធ្វើកិច្ចសន្យា និងអប់រំហើយ អនុញ្ញាតឲ្យវិលទៅលំនៅឋានវិញហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។