អាជ្ញាធរខេត្តព្រះសីហនុ បានអះអាងថា សំណង់អគារ និងកំពង់ផែកប៉ាល់របស់ក្រុមហ៊ុន រ៉ូយ៉ាល់ គ្រុប (Royal Group) នៅលើកោះរ៉ុង គឺគ្មានច្បាប់អនុញ្ញាតពីអាជ្ញាធរមូលដ្ឋាននេះទេ និងកំពុងបំផ្លាញបរិស្ថានឆ្នេរខ្សាច់នៅលើកោះនេះធ្ងន់ធ្ងរ។ បញ្ហានេះ មន្ត្រីសង្គមស៊ីវិលឃ្លាំមើលការអភិវឌ្ឍសង្គម ទទូចដល់ថ្នាក់ដឹកនាំគណៈកម្មាធិការជាតិគ្រប់គ្រង និងអភិវឌ្ឍន៍ឆ្នេរសមុទ្រកម្ពុជា ពិសេសប្រមុខដឹកនាំរដ្ឋាភិបាល ជួយពិនិត្យសកម្មភាពរបស់ក្រុមហ៊ុន រ៉ូយ៉ាល់ គ្រុប ជាថ្មីឡើងវិញ ឬឈានដល់ដកសិទ្ធិវិនិយោគពីក្រុមហ៊ុននេះ។
ថ្នាក់ដឹកនាំនៅតាមស្ថាប័នពាក់ព័ន្ធខេត្តព្រះសីហនុ បានផ្តល់បទសម្ភាសន៍ថា សំណង់រឹងមាំសង់ពីថ្មនៅជុំវិញកោះរ៉ុង ពិសេសសំណង់អគារ និងកំពង់ផែកប៉ាល់ក្រុមហ៊ុន រ៉ូយ៉ាល់ គ្រុប របស់លោកឧកញ៉ា គិត ម៉េង ដែលសង់នៅលើកោះរ៉ុង គឺមិនទាន់មានច្បាប់អនុញ្ញាតនោះទេ។
អភិបាលក្រុងព្រះសីហនុ លោក អ៊ី សុខឡេង មានប្រសាសន៍ថា រូបលោកមិនទាន់ទទួលបានការស្នើសុំច្បាប់សាងសង់អគារផ្សេងៗ ពិសេសកំពង់ផែកប៉ាល់របស់ក្រុមហ៊ុន រ៉ូយ៉ាល់ គ្រុប មកកាន់ស្ថាប័នខ្លួនទេគិតមកដល់ខែមិថុនា នេះ។ លោកចាត់ទុកសកម្មភាពសាងសង់របស់ក្រុមហ៊ុននេះ ថាខុសច្បាប់ និងកំពុងបំផ្លាញឆ្នេរខ្សាច់នៅលើកោះរ៉ុង។ លោក អ៊ី សុខឡេង បញ្ជាក់ថា កន្លងមកនេះ ទាក់ទងឯកសារសាងសង់របស់ក្រុមហ៊ុន រ៉ូយ៉ាល់ គ្រុប នៅលើកោះរ៉ុង គឺក្រុមហ៊ុននេះមិនបានឆ្លងកាត់អាជ្ញាធរខេត្ត-ក្រុងព្រះសីហនុ ទេ ដោយសំអាងទទួលបានសិទ្ធិវិនិយោគពីរដ្ឋាភិបាល៖ « សំណង់អគាររឹងមាំផ្សេងៗ និងសំណង់កំពង់ផែរបស់ក្រុមហ៊ុន រ៉ូយ៉ាល់ គ្រុប សង់នៅលើកោះរ៉ុង មិនមានច្បាប់ទេ ព្រោះខាងខ្ញុំមិនទាន់ទទួលបានការស្នើសុំច្បាប់ពីក្រុមហ៊ុននេះនៅឡើយទេ។ រាល់ការងារផ្សេងៗរបស់ក្រុមហ៊ុននេះកន្លងមក គឺពួកគេមិនបានឆ្លងក្រុង និងខេត្តព្រះសីហនុ ទេ គឺគេធ្វើតាមអំពើចិត្តរបស់គេ ក្រោយទទួលបានសិទ្ធិវិនិយោគពីរដ្ឋាភិបាល »។
លោក អ៊ី សុខឡេង បានរំឭកដល់ក្រុមហ៊ុន រ៉ូយ៉ាល់ គ្រុប ត្រូវសុំច្បាប់អនុញ្ញាតពីអាជ្ញាធរឲ្យបានត្រឹមត្រូវ និងមិនត្រូវបំផ្លាញបរិស្ថានឆ្នេរខ្សាច់នោះទេ។
អភិបាលក្រុងព្រះសីហនុ ទទូចស្នើដូច្នេះកាលពីថ្ងៃទី៧ ខែមិថុនា នៅគ្រាមន្ត្រីជំនាញខេត្តនេះមានមន្ទីរបរិស្ថាន មន្ទីរទេសចរណ៍ និងអាជ្ញាធរខេត្ត-ក្រុងព្រះសីហនុ បានចុះផ្អាកជាបណ្ដោះអាសន្នទៅលើការសាងសង់កំពង់ផែរបស់ក្រុមហ៊ុន រ៉ូយ៉ាល់ គ្រុប ដែលសង់នៅលើឆ្នេរខ្សាច់សក្បុសស្ថិតនៅភូមិសុខសាន្ត សង្កាត់កោះរ៉ុង។
ប្រធានក្រុមចុះពិនិត្យការងារនៅលើកោះរ៉ុង និងជាអភិបាលរងខេត្តព្រះសីហនុ លោក ឈិន សេងងួន បានគេចមិនឆ្លើយបំភ្លឺទៅលើសំណង់រឹងមាំរបស់ក្រុមហ៊ុន រ៉ូយ៉ាល់ គ្រុប ដែលសង់គ្មានច្បាប់នេះទេ។
យ៉ាងនេះក្តី នាយកទីចាត់ការអន្តរវិស័យសាលាខេត្តព្រះសីហនុ លោក នួន ប៊ុនថុល ដែលមានភារកិច្ចចុះពិនិត្យការងារនៅលើកោះរ៉ុង ទទួលស្គាល់ថា សកម្មភាពសង់កំពង់ផែកប៉ាល់ និងសំណង់អគាររឹងមាំផ្សេងទៀតរបស់ក្រុមហ៊ុន រ៉ូយ៉ាល់ គ្រុប នៅលើកោះរ៉ុង គឺពិតជាមិនទាន់មានច្បាប់សាងសង់ពិតមែន។ ជាងនេះ រាល់ការសាងសង់សំណង់រឹងមាំទាំងនោះ បានប៉ះពាល់ដល់បរិស្ថានឆ្នេរដែលមានខ្សាច់សក្បុសធ្ងន់ធ្ងរថែមទៀត។
ករណីនេះ លោកថា កាលពីថ្ងៃទី៧ ខែមិថុនា អាជ្ញាធរស្ថាប័នជំនាញខេត្តព្រះសីហនុ បានចុះផ្អាកការសាងសង់ជាបណ្ដោះអាសន្ន ដោយរង់ចាំក្រុមហ៊ុននេះបង្ហាញឯកសារឲ្យស្របតាមច្បាប់ជាមុនសិន៖ « ឆ្នេរសមុទ្រកម្ពុជា ដែលជាប់ជាសមាជិកក្លឹបឆ្នេរស្រស់ស្អាតនៅលើពិភពលោក ប៉ុន្តែបើសិនជាមានការសាងសង់កំពង់ផែនៅលើឆ្នេរ នាំឲ្យប៉ះពាល់ដល់ឆ្នេរនេះធ្ងន់ធ្ងរ និងរួមតូច។ ការសាងសង់កំពង់ផែកប៉ាល់ គួរតែរកទីតាំងណាដែលមានថ្ម និងមិនប៉ះពាល់ដល់ឆ្នេរខ្សាច់សម្រាប់ភ្ញៀវទេសចរដើរកម្សាន្ត »។
លោក នួន ប៊ុនថុល មិនធ្វើអត្ថាធិប្បាយច្រើនទេ ដោយទុកការងារនេះជូនថ្នាក់ដឹកនាំគណៈកម្មាធិការជាតិគ្រប់គ្រង និងអភិវឌ្ឍន៍ឆ្នេរសមុទ្រកម្ពុជា ពិសេសប្រមុខដឹកនាំរដ្ឋាភិបាល ជួយមានវិធានការបន្ត។
ប្រធានអង្គការស្រាវជ្រាវជាតិកម្ពុជា ឬហៅកាត់ថា ស៊ីអ៊ិនរ៉ូ (CNRO) សាខាខេត្តព្រះសីហនុ ដែលតាមដានសកម្មភាពរបស់ក្រុមហ៊ុន រ៉ូយ៉ាល់ គ្រុប សង្កេតឃើញថា សកម្មភាពរបស់ក្រុមហ៊ុន រ៉ូយ៉ាល់ គ្រុប បានពុះច្រៀកផ្ទាំងថ្មចូលសមុទ្រ ដើម្បីសង់កំពង់ផែកប៉ាល់ និងសង់អគាររឹងមាំប៉ះពាល់ដល់សោភណភាពឆ្នេរ ជាពិសេសប៉ះពាល់ដល់ផែនការអភិវឌ្ឍន៍ឆ្នេរសមុទ្ររបស់រដ្ឋាភិបាល។
បន្ថែមលើនេះ ប្រធានអង្គការ ស៊ីអ៊ិនរ៉ូ លោក សុខ សុខុម សំណូមពរដល់ប្រមុខដឹកនាំរដ្ឋាភិបាល ត្រូវពិនិត្យឡើងវិញចំពោះសកម្មភាពរបស់ក្រុមហ៊ុន រ៉ូយ៉ាល់ គ្រុប ដែលកំពុងធ្វើសកម្មភាពនាំឲ្យប៉ះពាល់ដល់បរិស្ថានឆ្នេរសមុទ្រ និងការរស់នៅរបស់ប្រជាពលរដ្ឋនៅលើកោះរ៉ុង៖ « បច្ចុប្បន្ន ក្រុមហ៊ុន រ៉ូយ៉ាល់ គ្រុប មិនត្រឹមបង្កបញ្ហាជាមួយប្រជាពលរដ្ឋទេ ក្រុមហ៊ុននេះថែមទាំងប្រើគ្រឿងចក្រឈូសឆាយថ្ម និងដីចាក់ចូលសមុទ្រ ដើម្បីស្ថាបនាកំពង់ផែ និងសង់ផ្ទះនៅលើឆ្នេរសមុទ្រ នាំឲ្យប៉ះពាល់ដល់បរិស្ថានឆ្នេរនៅលើកោះរ៉ុងធ្ងន់ធ្ងរ ជាពិសេសបានអនុវត្តផ្ទុយពីសារាចរណែនាំរបស់រដ្ឋាភិបាល អនុវត្តផ្ទុយពីច្បាប់ភូមិបាល និងផ្ទុយពីរដ្ឋធម្មនុញ្ញនៃព្រះរាជាណាចក្រកម្ពុជា ធ្ងន់ធ្ងរ។ សូមឲ្យមន្ត្រីជំនាញគ្រប់គ្រងឆ្នេរសមុទ្ររបស់រដ្ឋាភិបាល ចុះពិនិត្យសកម្មភាពរបស់ក្រុមហ៊ុន រ៉ូយ៉ាល់ គ្រុប ដែលកំពុងសង់កំពង់ផែនៅលើកោះរ៉ុង »។
តំណាងក្រុមហ៊ុន រ៉ូយ៉ាល់ គ្រុប លោកឧកញ៉ា ឈុន ប៊ុនថា មានប្រសាសន៍ខ្លីថា សកម្មភាពរបស់ក្រុមហ៊ុន រ៉ូយ៉ាល់ គ្រុប គឺបានអនុវត្តត្រឹមត្រូវតាមច្បាប់ ហើយរាល់សកម្មភាពសាងសង់សំណង់ផ្សេងៗនៅលើកោះរ៉ុង មានកំពង់ផែកប៉ាល់ជាដើម គឺមានបច្ចេកទេស និងមានការអនុញ្ញាតពីក្រសួងស្ថាប័នពាក់ព័ន្ធថ្នាក់ជាតិ៖ « គេចេះតែចោទក្រុមហ៊ុន រ៉ូយ៉ាល់ គ្រុប ដោយមិនបានដឹងថា ការស្ថាបនាកំពង់ផែរបស់ក្រុមហ៊ុននេះ គឺបានអនុវត្តទៅតាមលក្ខណៈបច្ចេកទេសត្រឹមត្រូវ តាមក្រសួង និងប្លង់មេបានដាក់ចេញត្រឹមត្រូវ។ ចំពោះការសាងសង់កំពង់ផែនៅលើកោះរ៉ុងវិញ គឺរាល់ម្ចាស់សង់បឹងកាឡូដែលសង់ផែទាំងអស់នៅលើកោះរ៉ុង គឺមិនមានច្បាប់ទេ ហើយបានបំពុលបរិស្ថានធ្ងន់ធ្ងរ »។
ទាក់ទិនបញ្ហានេះ អភិបាលខេត្តព្រះសីហនុ លោក យន្ត មីន ថ្លែងស្វាគមន៍ចំពោះផែនការអភិវឌ្ឍន៍វិស័យទេសចរណ៍របស់ក្រុមហ៊ុន រ៉ូយ៉ាល់ គ្រុប ដែលទទួលបានសិទ្ធិវិនិយោគពីរដ្ឋាភិបាលនៅលើកោះរ៉ុង ប៉ុន្តែស្នើឲ្យក្រុមហ៊ុននេះ ត្រូវអនុវត្តសកម្មភាពការងារឲ្យស្របតាមច្បាប់រដ្ឋ និងមិនត្រូវធ្វើឲ្យប៉ះពាល់បរិស្ថានឆ្នេរសមុទ្រនោះទេ។ លោក យន្ត មីន ហាក់មានការរារែកក្នុងការឆ្លើយបំភ្លឺជាមួយអ្នកយកព័ត៌មានវិទ្យុ និងទូរទស្សន៍អាស៊ីសេរី ដែលសួរនាំចំពោះសកម្មភាពនៃការសាងសង់អគារថ្ម និងកំពង់ផែកប៉ាល់របស់ក្រុមហ៊ុន រ៉ូយ៉ាល់ គ្រុប នៅលើកោះរ៉ុង។
កាលពីថ្ងៃទី១២ ខែធ្នូ ឆ្នាំ២០១៥ ក្រុមហ៊ុន រ៉ូយ៉ាល់ គ្រុប របស់លោកឧកញ៉ា គិត ម៉េង បានបើកការសាងសង់សណ្ឋាគារលំដាប់ផ្កាយ៥ មានឈ្មោះថា រ៉ូយ៉ាល់ សេន កោះរ៉ុង (Royal Sands Koh Rong) ក្នុងទឹកប្រាក់វិនិយោគប្រមាណ ២០លានដុល្លារអាមេរិក។ ក្នុងអំឡុងពេលបើកការដ្ឋានសាងសង់នោះ លោកឧបនាយករដ្ឋមន្ត្រី ស ខេង និងជារដ្ឋមន្ត្រីក្រសួងមហាផ្ទៃ បានចូលរួមសម្ពោធ ដែលអំឡុងពេលនោះ សំណង់លំដាប់ផ្កាយនេះធ្វើពិធីសម្ពោធដោយមិនទាន់បានស្នើសុំច្បាប់សាងសង់ពីអាជ្ញាធរស្ថាប័នពាក់ព័ន្ធខេត្តព្រះសីហនុ នោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។